Paghulagway ni Moises nga nag-orden ni Josue, ni Darrell Thomas

Mayo 23–29

Josue 1–8; 23–24

“Magmakusganon Ka ug Magmaisug”

Samtang magtuon ka sa basahon ni Josue, ikonsiderar kon sa unsang paagi ang mga butang nga imong nakat-onan mahitungod sa mga Israelihanon makapadako sa imong pagtuo diha ni Jesukristo.

Irekord ang Imong mga Impresyon

Miabot og pipila ka henerasyon, apan ang saad sa Ginoo hapit na matuman: ang mga anak sa Israel hapit na makapanunod sa gisaad nga yuta. Apan nagbabag sa ilang agianan ang Suba sa Jordan, ang mga paril sa Jerico, ug usa ka daotan apan gamhanan nga katawhan kinsa misalikway sa Ginoo (tan-awa sa 1 Nephi 17:35). Dugang pa niana, ang ilang minahal nga pangulong si Moises wala na. Ang sitwasyon tingali nakapaluya ug nakapahadlok sa pipila ka Israelihanon apan ang Ginoo miingon, “Magmakusganon ka ug magmaisug.” Nganong kinahanglan man nga ingon niini ang ilang bation? Dili tungod sa ilang kaugalingong kusog—o bisan kang Moises o Josue—apan tungod kay “ang Ginoo nga imong Dios magauban kanimo bisan asa ikaw paingon” (Josue 1:9). Kon aduna kitay atong kaugalingong mga suba nga labangon ug mga paril nga tumpagon, ang talagsaong mga butang mahimong mahitabo sa atong kinabuhi, tungod kay “ang Ginoo [ang] magbuhat og mga katingalahan sa [atong] taliwala” (Josue 3:5).

Alang sa kinatibuk-ang pagpasabot sa basahon sa Josue, tan-awa sa “Josue diha sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Josue 1:1–9

Ang Dios magauban kanako kon ako magmatinud-anon Kaniya.

Hunahunaa kon sama sa unsa kaha alang kang Josue nga tawagon sa pagpuli kang Moises. Timan-i kon unsa ang gisulti sa Ginoo diha sa Josue 1:1–9 aron sa pag-awhag kaniya. Hunahunaa ang lisod nga mga hagit nga imong giatubang; unsa ang anaa niini nga mga bersikulo ang makahatag kanimo og kaisog?

Makapaikag nga hunahunaon nga ang ngalan nga Josue (Yehoshua o Yeshua sa Hebreohanon) nagpasabot nga “si Jehova moluwas.” Ug ang ngalan nga Jesus nagagikan sa Yeshua. Busa samtang magbasa ka mahitungod ni Josue, ikonsiderar kon sa unsang paagi ang iyang misyon sa pagpangulo sa mga anak sa Israel padulong sa gisaad nga yuta nagpahinumdom kanimo sa misyon sa Manluluwas.

Tan-awa usab sa Ann M. Dibb, “Magmaisog,” Liahona, Mayo 2010, 114–16.

Josue 2

Ang pagtuo ug binuhatan gikinahanglan alang sa kaluwasan.

Ang nag-una nga mga Kristiyano mitan-aw kang Rahab isip usa ka ehemplo sa gahom sa pagtuo ug binuhatan (tan-awa sa Mga Hebreohanon 11:31; Santiago 2:25). Samtang magbasa ka sa Josue 2, ikonsiderar ang tahas sa pagtuo ug binuhatan ni Rahab sa pagluwas sa iyang kaugalingon, sa iyang pamilya, ug sa mga Israelihanon nga mga maniniid. Unsa ang gitudlo niini kanimo kon sa unsang paagi ang imong pagtuo kang Kristo ug ang imong binuhatan makaimpluwensya sa imong kaugalingon ug sa uban?

Tingali interesado ka nga mahibalo nga si Rahab maoy parehong kagikan ni Hari David ug Jesukristo (tan-awa sa Mateo 1:5). Unsay posible nga mga leksyon ang atong makat-onan gikan niini?

Si Rahab diha sa iyang bintana. Waiting for the Promise [Naghulat sa Saad], ni Elspeth Young.

Josue 3–4

Akong masinati ang “mga katingalahan” sa Dios kon aduna akoy pagtuo kang Jesukristo.

Ang Ginoo nagtinguha nga “ang tanang katawhan sa kalibutan makaila sa kamot sa Ginoo, nga kana makagagahom” (Josue 4:24). Samtang magbasa ka sa Josue 3–4, pamalandongi kon giunsa nimo pagkasayod nga makagagahom ang kamot sa Ginoo. Sa unsang paagi ang Ginoo mihimo og “mga katingalahan” diha sa imong kinabuhi? (Josue 3:5). Sa unsang paagi nimo masinati—o maila—kadto nga mga katingalahan nga mas kanunay? (sama pananglit, tan-awa sa Josue 3:17).

Ngano kaha nga ang mga Israelihanon kinahanglang magputli sa ilang mga kaugalingon sa dili pa sila motabok sa Suba sa Jordan? Unsay importansya nga imong makita sa panghitabo nga ang suba natunga lamang human “ang mga tiil sa mga sacerdote nanghituslob na didto sa daplin sa suba”? (Josue 3:13, 15).

Alang sa ubang importante nga mga panghitabo nga nahitabo sa Suba sa Jordan, tan-awa sa 2 Mga Hari 2:6–15; 5:1–14; ug Marcos 1:9–11. Samtang mamalandong ka niini nga mga kasulatan, unsa nga mga koneksyon ang imong makita tali niini nga mga panghitabo?

Tan-awa usab sa Gérald Caussé, “Katingalahan Pa Ba Gihapon Kini Alang Kaninyo?” Liahona, Mayo 2015, 98–100.

Josue 6–8

Ang pagkamasulundon magdala sa gahom sa Dios nganhi sa akong kinabuhi.

Kini nga mga kapitulo naghisgot sa mga pakig-away sa pagkontrolar sa kayutaan sa Jerico ug Ai. Samtang magbasa ka niini, ikonsidera kon giunsa nimo sa pagkigbatok sa tintasyon diha sa imong kaugalingong kinabuhi (sama pananglit, tan-awa sa Josue 7:10–13). Unsa ang imong nakat-onan kon sa unsang paagi ang Dios makatabang kanimo ug unsa ang kinahanglan nimong buhaton aron makapahimulos sa Iyang gahom? Sama pananglit, unsay nagustohan nimo mahitungod sa mga instruksyon sa Ginoo alang sa pagkuha sa Jerico? (tan-awa sa Josue 6:1–5). Tingali ang istorya diha sa Josue 7 makadasig kanimo sa pagtino kon “anaay butang nga linaglag” sa imong kinabuhi nga kinahanglan nimong tangtangon (Josue 7:13).

Josue 23–24

“Pakigtipon kamo sa Ginoo nga inyong Dios.”

Human mabahin ang gisaad nga yuta tali sa napulog duha ka tribo sa Israel (tan-awa sa Josue 13–21), si Josue mihatag kanila sa iyang kataposang mga pagtulun-an. Samtang magbasa ka niini nga mga pagtulun-an diha sa Josue 23–24, pwede ka nga maghimo og lista sa mga pasidaan, tambag, ug gisaad nga mga panalangin nga imong makit-an. Maghunahuna sa tanan nga nasinati sa mga Israelihanon, ngano kaha nga si Josue mipili sa pagsulti kanila niini nga mga butang sa kataposan sa iyang kinabuhi? Unsay imong nakita nga makapadasig nimo sa “pakigtipon sa Ginoo”? (Josue 23:8).

Mga Ideya alang sa Pamilya nga Pagtuon sa Kasulatan ug Family Home Evening

Josue 1:8.Unsa ang gisugyot niini nga bersikulo kon unsaon nato sa paghimo ang atong pagtuon sa kasulatan, sa tinagsa ug isip usa ka pamilya? Sa unsang paagi ang mga kasulatan nakahimo sa atong “[paagi nga] magmauswagon” ug mihatag kanato og “kauswagan”?

Josue 4:3, 6–9.Human mabasa ang unsay gusto sa Ginoo nga buhaton sa mga Israelihanon sa mga bato gikan sa Suba sa Jordan, ang inyong pamilya mahimong maghisgot sa pipila sa talagsaong mga butang nga nahimo sa Ginoo alang kaninyo. Dayon mahimo nimong hatagan ang matag sakop sa pamilya og usa ka bato ug dapiton sila sa pagsulat o pagdrowing diha niini og butang nga nabuhat sa Ginoo alang kanila.

Josue 6:2–5.Ang inyong pamilya tingali malingaw sa pag-aksyon sa mga instruksyon nga gihatag sa Ginoo ngadto sa mga Israelihanon aron sa pagbuntog sa Jerico. Unsa kaha ang gusto sa Ginoo nga atong makat-onan gikan niini nga istorya?

Josue 24:15.Human mobasa niini nga bersikulo, ang mga sakop sa pamilya mahimong mopaambit og mga kasinatian diin mipili sila sa pagserbisyo sa Ginoo bisan kon kini lisod. Nganong importante man nga mopili sa pagserbisyo Kaniya “niining adlawa” imbis nga mohulat sa pagdesisyon hangtod nga motumaw ang usa ka sitwasyon? Sa unsang paagi kita makasuporta sa mga sakop sa atong “balay” samtang maningkamot kita nga “magaalagad sa Ginoo”?

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Pilia ang Matarung,” Mga Himno, nu. 146.

Pagpalambo sa Atong Pagtudlo

Ihatag ang imong pagpamatuod kanunay. Ang imong kinasingkasing nga saksi sa kamatuoran kusganong makaimpluwensya sa imong pamilya. Dili kinahanglan nga maayo kini nga pagkasulti o taas. Ang usa ka pagpamatuod labing gamhanan kon kini direkta ug kinasingkasing. (Tan-awa sa Pagtudlo sumala sa Pamaagi sa Manluluwas, 10–11.)

Ang Ginoo mihimo sa mga paril sa Jerico nga matumpag. © Providence Collection/gilisensyahan gikan sa goodsalt.com