“Mayo 30–Hunyo 5. Mga Maghuhukom 2–4; 6–8; 13–16: ‘Ang Ginoo Nagpatindog og Usa ka Manluluwas,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Mayo 30–Hunyo 5. Mga Maghuhukom 2–4; 6–8; 13–16,” Dali, Sunod Kanako—Alang sa mga Individual ug mga Pamilya: 2022
Paghulagway kang Debora nga nangulo sa mga kasundalohan sa Israel, © Lifeway Collection/gilisensyahan gikan sa goodsalt.com
Mayo 30–Hunyo 5
Mga Maghuhukom 2–4; 6–8; 13–16
“Ang Ginoo Nagpatindog og Usa ka Manluluwas”
Ang mga kasulatan nagpamatuod mahitungod ni Jesukristo. Pamalandongi kon sa unsang paagi ang mga istorya nga imong mabasa diha sa Mga Maghuhukom makatabang kanimo nga mas mapaduol Kaniya.
Irekord ang Imong mga Impresyon
Nasayod kitang tanan kon sama sa unsa ang makahimo og sayop, mobati og dili maayo niini, ug dayon maghinulsol ug modesisyon nga mag-usab sa atong mga paagi. Apan sa pipila ka sitwasyon atong malimtan ang atong nag-unang desisyon, ug, kon mag-atubang kita og tintasyon, tingali atong makaplagan ang atong kaugalingon nga mihimo na usab sa maong sayop. Kining makaguol nga pabalik-balik nga han-ay maoy kasagaran nga mga kasinatian sa mga Israelihanon nga gihulagway diha sa basahon sa Mga Maghuhukom. Naimpluwensyahan sa mga tinuohan ug binuhatan sa pagsimba sa mga Canaanhon—kinsa angay unta nilang papahawaon sa yuta—ang mga Israelihanon misupak sa ilang mga pakigsaad ngadto sa Ginoo ug mihunong sa pagsimba Kaniya. Isip resulta, nawad-an sila sa Iyang proteksyon ug nahulog ngadto sa pagkabihag. Apan sa matag higayon nga mahitabo kini, ang Ginoo mihatag kanila og kahigayonan sa paghinulsol ug mipadala og tigluwas, usa ka lider sa militar nga gitawag og “maghuhukom.” Dili tanang maghuhukom diha sa basahon sa Mga Maghuhukom mga matarong, apan ang pipila kanila mipakita og dakong pagtuo sa pagluwas sa mga anak sa Israel ug sa pagpahiuli kanila ngadto sa ilang relasyon sa pakigsaad sa Ginoo. Kini nga mga istorya nagpahinumdom kanato nga bisan unsa pa ang nakapahilayo kanato kang Jesukristo, Siya ang Manunubos sa Israel ug kanunay nga andam sa pagluwas kanato ug pagdawat kanato balik Kaniya.
Alang sa kinatibuk-ang pagpasabot sa basahon sa Mga Maghuhukom, tan-awa sa “Maghuhukom, Basahon sa mga sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Ang Ginoo mitanyag og kaluwasan kon mahisalaag ko.
Ang basahon sa Mga Maghuhukom pwedeng mahimong usa ka pasidaan kanato: bisan nga human nato masinati ang gahom sa Ginoo sa atong mga kinabuhi, posible kanunay nga mapahilayo. Ang basahon makahatag usab og pagdasig ngadto niadtong nagpahilayo, tungod kay ang Ginoo mitanyag og paagi nga makabalik. Sama pananglit, samtang magbasa ka sa Mga Maghuhukom 2:1–19, pangita og mga binuhatan nga nakapalayo sa mga Israelihanon gikan sa Ginoo ug giunsa sa Ginoo pagluwas kanila. Unsa ang gitudlo kanimo niini nga mga bersikulo mahitungod sa Ginoo? Unsay imong mabuhat aron magpabilin nga mas makanunayon sa pagkamatinud-anon ngadto Kaniya?
Imong makita ang han-ay sa pagkamasupilon, kaguol, ug kaluwasan nga nagbalik-balik sa tibuok Mga Maghuhukom (tan-awa ilabi na sa mga kapitulo 3, 4, 6, ug 13). Samtang magbasa ka sa basahon sa Mga Maghuhukom, pamalandongi unsa ang gihimo sa mga maghuhukom aron sa pagluwas sa Israel ug sa unsang paagi ang Manluluwas motabang kanimo kon nagkinahanglan ka og kaluwasan.
Usa ka importanting ehemplo sa usa ka tawo nga mitabang sa pagluwas sa Israel mao si Debora. Pagbasa mahitungod kaniya diha sa Mga Maghuhukom 4:1–16, ug timan-i ang iyang impluwensya sa mga tawo sa iyang palibot. Unsa nga mga pulong o binuhatan ni Debora nga nagpakita kanimo nga aduna siyay pagtuo sa Ginoo? Unsay imong gibati nga maoy gipasabot ni Debora sa iyang pangutana diha sa bersikulo 14: “Wala ba ang Ginoo mag-una kanimo?”
Tan-awa usab sa Alma 7:13; Doktrina ug mga Pakigsaad 84:87–88.
Kinsa si Baal ug Astaroth?
Si Baal mao ang Canaanhon nga dios-dios sa bagyo, ug si Astaroth mao ang Canaanhon nga dios-dios sa pagkamabungahon [fertility]. Ang pagsimba niining duha ka dios-dios nagpakita kon unsa ka importante ang pagkamabungahon sa yuta ug sa mga tawo ngadto sa mga Canaanhon. Ang mga paagi sa pagsimba sa mga tawo niini ug sa ubang mini nga mga dios-dios—lakip, usahay, sa sekswal nga imoralidad ug ang pagsakripisyo og mga bata—hilabihan ka makapasilo sa Ginoo.
Ang Ginoo makahimo og mga milagro kon mosalig ako sa Iyang mga paagi.
Aron madawat ang mga milagro sa Ginoo sa atong mga kinabuhi, kinahanglan gayod kitang mosalig sa Iyang mga paagi, bisan kon ang Iyang mga paagi daw dili kasagaran. Ang istorya ni Gedeon, nga makita diha sa Mga Maghuhukom 6–8, usa ka maayong ehemplo niini. Sa unsang paagi ang Ginoo mihimo og talagsaon nga milagro sa dihang ang kasundalohan ni Gedeon mibuntog sa mga Madianhon? Unsay imong gibati nga gustong itudlo sa Ginoo kanimo? Sa unsang paagi nimo nakita ang Ginoo nga mibuhat sa Iyang buhat sa mga paagi nga daw talagsaon?
Ang kalig-on moabot gikan sa pagkamatinud-anon sa akong mga pakigsaad sa Dios.
Si Samson nawad-an sa iyang pisikal nga kusog ug espirituhanong kalig-on tungod kay gisupak niya ang iyang mga pakigsaad sa Dios, lakip niadtong alang lamang sa mga Nazareo (alang sa impormasyon mahitungod sa mga Nazareo, tan-awa sa Numeros 6:1–6; Mga Maghuhukom 13:7). Samtang magbasa ka sa istorya ni Samson diha sa Mga Maghuhukom 13–16, pamalandongi ang matag pakigsaad nga imong nahimo. Sa unsang paagi ka napanalanginan og kalig-on tungod kay gituman nimo kadto nga mga pakigsaad? Unsa ang imong nakat-onan gikan sa istorya ni Samson nga nagdasig kanimo nga magpabiling matinuoron sa imong mga pakigsaad sa Dios?
Samson Puts Down the Pillars [Si Samson Mitumba sa mga Haligi], ni James Tissot ug uban pa
Mga Ideya alang sa Pamilya nga Pagtuon sa Kasulatan ug Family Home Evening
-
Mga Maghuhukom 2:10.Human mamatay si Josue, ang misunod nga henerasyon sa mga Israelihanon “wala managpakaila sa Ginoo.” Pakigsulti sa imong pamilya kon giunsa nila sa pagkaila sa Ginoo ug “sa iyang buhat nga iyang gihimo” alang kanila. Unsaon ninyo sa pagsiguro nga kini nga kahibalo mapreserbar alang sa umaabot nga mga henerasyon?
-
Mga Maghuhukom 3:7–10.Kini nga mga bersikulo nag-summarize sa han-ay sa panghitabo nga kanunay nga nahitabo sa tibuok basahon sa Mga Maghuhukom. Samtang ang mga sakop sa inyong pamilya mobasa niini nga mga bersikulo, mahimo silang motino unsa ang gibuhat sa Israel aron mapahilayo gikan sa Ginoo ug unsa ang gibuhat sa Ginoo aron sa pagluwas kanila. Unsa ang makahimo kanato sa paghikalimot sa Ginoo? Unsaon Niya sa pagluwas kanato? Unsaon nato nga mahimong mas makanunayon sa pagkamatinud-anon ngadto Kaniya?
-
Mga Maghuhukom 6:13–16, 25–30.Si Gedeon mipakita og dakong kaisog sa pagsunod sa Ginoo, bisan kon ang iyang mga binuhatan wala mauyoni. Unsa ang gipabuhat kanato sa Ginoo nga ang uban tingali dili mouyon? Sa unsang paagi ang mga pulong sa Ginoo kang Gedeon diha sa mga bersikulo 13–16 nagdasig kanato sa pagbuhat sa matarong nga butang?
-
Mga Maghuhukom 7.Makadrama-drama ba mo o uban pang mamugnaong kalihokan aron sa pagtabang sa inyong pamilya nga makakat-on gikan sa kasinatian sa kasundalohan ni Gedeon nga gihulagway niini nga kapitulo? Sa unsang paagi ang mga pulong sa Ginoo niini nga kapitulo (tan-awa, sama pananglit, sa mga bersikulo 2 ug 15) magamit sa atong kinabuhi?
-
Mga Maghuhukom 13:5.Ang mga pakigsaad ni Samson sa Ginoo mihatag kaniya og kalig-on, sama nga ang atong mga pakigsaad maghatag kanato og kalig-on. Ang inyong pamilya tingali malingaw sa pagbuhat og pisikal nga mga ehersisyo ug sa paghisgot kon sa unsang paagi kadto nga mga ehersisyo makatabang sa paghimo kanatong lig-on. Unsa ang atong mahimo aron makatabang nga mahimo kitang mas lig-on sa espirituhanong paagi? Alang sa pipila ka ideya, ang mga sakop sa pamilya mahimong mobasa sa Mosiah 18:8–10; Doktrina ug mga Pakigsaad 20:77, 79. Sa unsang paagi ang pagtuman sa atong mga pakigsaad makahatag kanato og espirituhanong kalig-on?
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Manunubos sa Israel,” Mga Himno, nu. 6.
Pagpalambo sa Personal nga Pagtuon
Buhata unsay imong nakat-unan. Samtang magtuon ka, pangutan-a ang imong kaugalingon kon unsaon nimo sa paggamit ang imong nakat-onan, ug dayon pasalig sa pagbuhat niini. Tuguti nga mogiya kanimo ang Espiritu. (Tan-awa sa Pagtudlo sumala sa Pamaagi sa Manluluwas, 35.)
Gideon’s Army [Kasundalohan ni Gedeon], ni Daniel A. Lewis