Ruth ug Noemi

Bisan Asa Ikaw Moadto, ni Sandy Freckleton Gagon

Hunyo 6–12

Ruth; 1 Samuel 1–3

“Ang Akong Kasingkasing Naghimaya sa Ginoo”

Samtang magtuon ka sa mga kinabuhi ni Ruth, Noemi, Ana, ug sa uban pa niining semanaha, paminaw og maayo sa Espiritu ug irekord ang bisan unsang mga impresyon nga imong madawat. Unsa ang nadasig ka sa pagbuhat?

Irekord ang Imong mga Impresyon

Usahay maghunahuna kita nga ang atong kinabuhi kinahanglang mosubay og klaro nga dalan gikan sa sinugdanan hangtod sa kataposan. Tutal, ang kinamub-an nga distansya tali sa duha ka punto mao ang tul-id nga dalan. Apan ang kinabuhi kanunay nga puno sa mga paglangay ug mga pagtipas nga modala kanato sa wala damha nga mga direksyon. Atong makita tingali nga ang atong kinabuhi medyo lahi ra kay sa atong gihunahuna nga mamahimo kini.

Si Ruth ug Ana siguradong nakasabot niini. Si Ruth dili usa ka Israelihanon, apan naminyo siya og Israelihanon, ug sa dihang namatay ang iyang bana, aduna siyay usa ka desisyon nga kinahanglang himoon. Mobalik ba siya ngadto sa iyang pamilya ug sa iyang karaan, naandan nga kinabuhi, o hangupon ba niya ang Israelihanon nga tinuohan ug bag-ong panimalay uban sa iyang ugangan nga babaye? (tan-awa sa Ruth 1:4–18). Ang plano ni Ana alang sa iyang kinabuhi mao ang pagbaton og mga anak, ug ang iyang pagkadili makahimo sa ingon mibutang kaniya “diha sa kapaitan sa iyang kalag” (tan-awa sa 1 Samuel 1:1–10). Samtang magbasa ka mahitungod kang Ruth ug Ana, ikonsiderar ang pagtuo nga siguradong anaa kanila aron mobutang sa ilang kinabuhi sa mga kamot sa Ginoo ug mopanaw sa ilang wala damha nga mga dalan. Dayon mahimo nimong hunahunaon ang imong kaugalingong panaw. Lahi kini tan-awon kay sa mga dalan ni Ruth ug Ana—ug ni bisan kinsa pa. Apan tadlas sa tanang mga pagsulay ug mga surprisa tali dinhi ug sa imong mahangturong destinasyon, makakat-on ka sa pagsulti uban ni Ana, “Ang akong kasingkasing naghimaya sa Ginoo” (1 Samuel 2:1).

Alang sa kinatibuk-ang pagpasabot sa mga basahon sa Ruth ug 1 Samuel, tan-awa sa “Ruth” ug “Samuel, ang Propeta sa Daang Tugon” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

Ruth

Si Kristo makausab sa trahedya aron mahimo kining kalampusan.

Sa dihang namatay ang bana ni Ruth, ang trahedya adunay mga sangputanan alang kaniya nga mas grabe pa kay sa atubangon sa usa ka biyuda karong panahona. Sa Israelihanon nga kultura niadtong panahona, ang usa ka babaye nga walay bana o mga anak nga lalaki walay katungod sa kabtangan ug wala gayoy paagi nga makapanginabuhi. Samtang magbasa ka sa istorya ni Ruth, timan-i kon sa unsang paagi ang Ginoo mihimo sa trahedya ngadto sa dagkong mga panalangin. Unsa ang imong nabantayan mahitungod ni Ruth nga tingali nakatabang kaniya? Unsa ang tahas ni Booz sa pagtubos ni Ruth gikan sa iyang desperadong sitwasyon? (tan-awa sa Ruth 4:4–7). Unsang Kristohanon nga mga hiyas ang imong nakita diha ni Ruth ug Booz?

Ruth; 1 Samuel 1

Makasalig ako nga ang Dios mogiya ug motabang kanako bisan unsa pa ang akong sitwasyon.

Makita ba nimo ang imong kaugalingon diha sa mga istorya ni Ruth, Noemi, ug Ana? Tingali nag-antos ka og grabeng pagkawala, sama kang Ruth ug Noemi (tan-awa sa Ruth 1:1–5). O tingali, sama kang Ana, nangandoy ka og mga panalangin nga wala pa nimo madawat (tan-awa sa 1 Samuel 1:1–10). Pamalandongi unsa nga mga mensahe ang imong makat-onan gikan sa mga ehemplo niining matinud-anon nga mga babaye. Giunsa ni Ruth ug Ana sa pagpakita og pagtuo sa Dios? Unsa nga mga panalangin ang ilang nadawat? Unsaon nimo pagsunod ang ilang mga ehemplo? Hunahunaa kon sa unsang paagi ka “mianhi aron sa pagpasilong” sa Ginoo (Ruth 2:12) bisan kon ang kinabuhi mabati nga lisod.

Tan-awa usab sa Reyna I. Aburto, “Sa Dag-um ug Kahayag, Ginoo, Ubani Ako!” Liahona, Nob. 2019, 57–60.

Ana ug Samuel

For This Child I Prayed [Alang Niining Bata Ako Nag-ampo], ni Elspeth Young

1 Samuel 2:1–10

Ang akong kasingkasing mahimong magmaya diha sa Ginoo.

Human gidala ni Ana ang batan-ong si Samuel ngadto sa templo, namulong siya og matahom nga mga pulong sa pagdayeg ngadto sa Ginoo, nga narekord diha sa 1 Samuel 2:1–10. Kini nga mga pulong mas labing makatandog kon imong hunahunaon nga sa sayo pa niini, “si Ana diha sa kapaitan gayod sa iyang kalag, … ug naghilak sa dakong kasakit” (1 Samuel 1:10). Samtang magtuon ka niini nga mga bersikulo, unsa nga mga mensahe ang imong nakita nga makapadugang sa imong mga pagbati sa pagdayeg ug pagpasalamat sa Ginoo? Tingali ang awit ni Ana makadasig kanimo sa pagpangita og mamugnaong paagi sa pagpahayag sa imong kamapasalamaton sa Ginoo—usa ka awit, usa ka pinintal, usa ka buhat sa pagserbisyo, o bisan unsa nga makapadayag sa imong mga pagbati ngadto Kaniya.

Siyempre, dili tanang mainiton nga mga pag-ampo tubagon sa samang paagi sa kang Ana. Unsa ang imong nakita diha sa mensahe ni Presidente Dieter F. Uchtdorf “Mapasalamaton sa Bisan Unsang Kahimtang” nga makatabang nimo kon ang imong mga pag-ampo wala tubaga sa paagi nga imong gilaoman? (Liahona, Mayo 2014, 70–77).

1 Samuel 3

Akong madungog ug masunod ang tingog sa Ginoo.

Sama kanatong tanan, si Samuel kinahanglang makat-on unsaon sa pag-ila sa tingog sa Ginoo. Samtang nagtuon ka sa 1 Samuel 3, unsa ang imong nakat-onan gikan niining batang lalaki mahitungod sa pagpaminaw ug pagsunod sa tingog sa Ginoo? Unsa nga mga kasinatian ang imong naangkon kalabot sa pagpaminaw sa Iyang tingog? Unsa nga mga oportunidad nga aduna ka, sama kang Eli, sa pagtabang sa uban nga makaila kon ang Ginoo namulong kanila? (tan-awa sa 1 Samuel 3:7).

Tan-awa usab sa Juan 14:14–21; David P. Homer, “Ang Pagpaminaw sa Iyang Tingog,” Liahona, Mayo 2019, 41–43.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Ruth 1:16–18; 2:5–8, 11–12.Ang imong pamilya mahimong mangita og mga ehemplo sa kamabination ug kamaunungon dinhi niini nga mga bersikulo. Unsaon nato sa pagpakita og kamabination sa atong pamilya ug sa uban ug kamaunungon ngadto ni Jesukristo? Ang kapitulo nga “Ruth ug Naomi” (sa Mga Istorya sa Daang Tugon) makatabang sa imong pamilya nga makakat-on gikan sa ehemplo ni Ruth.

1 Samuel 1:15.Tingali mahimo ka nga mobubu og bisan unsa gikan sa usa ka sudlanan aron sa pagtabang sa mga sakop sa pamilya sa paghanduraw kon unsa ang gipasabot ni Ana sa dihang miingon siya, “Akong gibubo ang akong kalag sa atubangan sa Ginoo.” Nganong maayo man kini nga paagi sa paghulagway kon unsa ang angay nga matang sa atong mga pag-ampo? Unsaon nato sa pagpalambo sa atong mga pag-ampo sa personal ug sa tibuok pamilya?

1 Samuel 2:1–10.Ang balak ni Ana sa pagdayeg sa Ginoo posibleng makapahimo ninyo sa paghunahuna og mga awit nga inyong magamit sa pagdayeg sa Ginoo. Mahimo kamong dungan nga manganta sa pipila. Ang mga sakop sa inyong pamilya mahimo usab nga maghunahuna og ubang mga paagi sa pagpahayag sa ilang mga pagbati alang ni Jesukristo. Pananglitan, mahimo silang modrowing og mga hulagway nga nagpakita nganong gimahal nila ang Manluluwas.

1 Samuel 3:1–11.Tingali makalingaw ang pagdrama-drama sa istorya sa Ginoo nga nanawag kang Samuel. Ang mga sakop sa pamilya mahimong maghisgot sa mga panahon nga gibati nila nga ang Ginoo namulong kanila ug giunsa nila pagsunod ang Iyang mga pulong.

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Kalag Ko May Kasanag Karon,” Mga Himno, nu. 139.

Pagpalambo sa Personal nga Pagtuon

Tuguti ang Espiritu nga mogiya sa imong pagtuon. Pag-ampo nga ang Espiritu Santo mogiya kanimo ngadto sa mga butang nga kinahanglan nimong makat-onan. Kinahanglang sensitibo ka sa Iyang mga paghunghong, bisan kon mogiya kini kanimo sa pagbasa sa usa ka hilisgutan nga wala nimo gidahom o sa pagtuon sa lahi nga paagi.

batang si Samuel sulod sa tolda

Paghulagway kang Samuel nga nakadungog sa Ginoo, ni Sam Lawlor