Whither Thou Goest [Bisan Asa Ikaw Moadto], ni Sandy Freckleton Gagon

Hunyo 6–12

Ruth; 1 Samuel 1–3

“Ang Akong Kasingkasing Nagmaya diha sa Ginoo”

Samtang ikaw nagbasa sa Ruth ug sa 1 Samuel 1–3, pangutan-a ang Langitnong Amahan sa unsang paagi ikaw mahimong makatabang sa mga kabataan sa pagkat-on gikan sa mga kamatuoran niini nga mga kapitulo. I-rekord ang mga panghunahuna nga imong madawat.

I-rekord ang Imong mga Panghunahuna

Dapita ang Pagpaambit

Hangyoa ang mga kabataan sa pagpaambit sa unsay ilang nahibaloan mahitungod ni Ruth, Noemi, Ana, o Samuel. Kini mahimo usab nga makatabang ang pagpakita kanila sa mga hulagway sama niadtong anaa sa outline niini nga semana sa Dali, Sunod Kanako—Alang sa mga Indibidwal ug mga Pamilya.

Itudlo ang Doktrina: Mas Gagmay nga mga Bata

Ruth

Ako makapakita og gugma ug pagkamabination ngadto niadtong naglibut kanako.

Sa dihang namatay ang bana ni Ruth, makapabilin unta siya sa iyang nasud nga natawhan, apan mipili siya sa pagkuyog sa iyang nabiyuda nga ugangang babaye, si Noemi, ug sa pag-amuma kaniya. Hunahunaa sa unsa nga paagi nga ang Kristohanong ehemplo ni Ruth nakapadasig sa mga kabataan nga imong gitudloan sa pagmabination ngadto niadtong naglibut kanila.

Posible nga mga Kalihokan

• Dapita ang mga kabataan sa pagrepresentar ni Noemi, Ruth, Booz, o ubang mga magdudula samtang ikaw nag-asoy sa ilang istorya gikan sa basahon ni Ruth (tan-awa usab sa “Ruth ug Naomi” diha sa Mga Istorya sa Daang Tugon). Dapita ang mga kabataan sa pagpataas sa ilang mga kamot sa matag higayon nga makadungog sila og usa ka buhat sa pagkamabination diha sa istorya. Unsay atong bation kon ang mga tawo mabination kanato? Unsay atong bation kon kita mabination ngadto sa uban?

• Panganta og dungan sa usa ka awit mahitungod sa pagkamabination, sama sa “Pagkamabination Magagikan Kanako” (Songbook sa mga Bata, 83). Tabangi ang mga bata sa paghunahuna og mga paagi nga sila magmabination ngadto sa ilang pamilya ug mga higala. Kon sila nagkinahanglan og tabang, pakit-a sila og mga hulagway sa mga tawo nga nagpakita og pagkamabination. Alang sa matag ideya nga gihisgutan, padrowinga ang mga kabataan og kasingkasing diha sa pisara.

1 Samuel 1:1–18

Ang Langitnong Amahan maminaw ug motubag sa akong mga pag-ampo.

Sa dihang si Ana nagsubo tungod kay siya dili makabaton og mga anak, miduol siya sa Ginoo sa hugot nga pagtuo ug gitubag Siya sa iyang pag-ampo. Tabangi ang mga kabataan nga makakita nga sila sa kanunay makaampo ngadto sa Langitnong Amahan, ilabi na kon sila masulub-on.

Posible nga mga Kalihokan

• Sa imong kaugalingong mga pulong, sultihi ang mga kabataan nganong si Ana nagmasulub-on (tan-awa sa 1 Samuel 1:2–8; tan-awa usab sa “Hannah” diha sa Old Testament Stories). Unsay atong mabuhat kon kita nagmasulub-on? Basaha ngadto sa mga kabataan ang 1 Samuel 1:10, ug dapita ang mga kabataan sa pagpaminaw alang sa unsay gibuhat ni Ana. Pangutan-a ang mga kabataan kon unsay ilang gibati kon sila mag-ampo. Basaha gikan sa bersikulo 18 aron sa pagpasabut nga human sa iyang pag-ampo, si Ana “wala na magmasulub-on.”

  

  For This Child I Prayed [Alang Niining Bata Ako Nag-ampo], ni Elspeth Young

• Gamita ang pahina sa kalihokan niini nga semana sa pagtudlo sa mga kabataan nga sila makaampo ngadto sa Langitnong Amahan ug Siya motabang kanila. Samtang ang mga kabataan nagkolor kantaha o tugtoga ang usa ka rekording sa usa ka awit nga nagtudlo mahitungod sa pag-ampo, sama sa “Ampo sa Usa ka Bata”(Songbook sa mga Bata, 6–7).

1 Samuel 2:1–10

Ang Ginoo nakabuhat og daghang kahibulongang mga butang alang kanako.

Gipakita ni Ana ang iyang pasalamat ngadto sa Ginoo pinaagi sa usa ka matahum nga balak sa pagdayeg. Ang iyang ehemplo makatabang sa mga kabataan sa paghunahuna mahitungod sa daghang mga butang nga sila makapasalamat sa Langitnong Amahan.

Posible nga mga Kalihokan

• Basaha ngadto sa mga kabataan ang pipila sa unsay gisulti ni Ana human ang Ginoo mipanalangin kaniya og anak nga lalaki (tan-awa sa 1 Samuel 2:1-2). Pakigbahin uban sa mga kabataan og panalangin nga imong nadawat gikan sa Ginoo ug unsay imong gibati. Dayon dapita ang mga kabataan sa pagsulti mahitungod sa mga panalangin nga gihatag sa Ginoo kanila. Unsaon nato sa pagpakita sa atong pasalamat ngadto Kaniya?

• Panganta og dungan sa usa ka awit nga naghulagway og pipila sa mga panalangin nga gihatag sa Ginoo kanato, sama sa “Gihigugma Ako sa Langitnong Amahan” (Songbook sa mga Bata, 16–17). Dapita ang mga kabataan sa pagdrowing og mga hulagway sa mga panalangin nga ilang nadawat gikan sa Ginoo.

Itudlo ang Doktrina: Mas Dagko nga mga Bata

Ruth

Makabaton ako og hugot nga pagtuo diha sa Ginoo.

Mihimo og mga sakripisyo si Ruth aron mahimong matinud-anon ngadto sa Ginoo ug nagpabiling maunungon ngadto ni Noemi. Unsaon nimo pagtabang ang mga kabataan nga makakat-on sa mga buhat sa hugot nga pagtuo gikan ni Ruth?

Posible nga mga Kalihokan

• Pagpakita og hulagway ni Ruth ug Noemi (tan-awa sa outline niini nga semana diha sa Dali, Sunod Kanako—Alang sa mga Indibidwal ug mga Pamilya). Dayon pagsulat og tulo ka mga ulohan diha sa pisara: Mga Pagsulay, Mga Lihok, Mga Panalangin. Dapita ang mga kabataan sa pagbasa diha sa Ruth 1:3–5, 8, 16; 2:1–3, 8–12; 4:13–17, ug sa pagsulat ubos sa mga ulohan unsa ang ilang nakaplagan dinhi niini nga mga bersikulo. Sa unsa nga paagi gipakita ni Ruth ang iyang hugot nga pagtuo diha sa Ginoo? Pakigbahin og ehemplo kon giunsa ka sa pagpanalangin tungod kay ikaw adunay hugot nga pagtuo diha ni Jesukristo, ug pasultiha ang mga kabataan sa ilang kaugalingon nga mga kasinatian.

• Panganta og dungan sa usa ka awit mahitungod sa hugot nga pagtuo sama sa “Ang Dios Kahayag Ko” (Mga Himno, nu. 46) o “Hugot nga Pagtuo” (Songbook sa mga Bata 50). Unsa ang gitudlo kanato sa awit mahitungod sa pagsalig diha sa Ginoo? Unsaon nato pagbaton og hugot nga pagtuo diha ni Jesukristo bisan atol sa malisud nga mga panahon?

1 Samuel 1

Ang Langitnong Amahan maminaw ug motubag sa akong mga pag-ampo.

Sa dihang si Ana “diha sa kapaitan sa kalag,”midangop siya ngadto sa Langitnong Amahan sa pag-ampo (1 Samuel 1:10). Unsaon nimo pag-awhag ang mga kabataan nga imong gitudloan sa pagbuhat sa ingon?

Posible nga mga Kalihokan

• Aron sa pagtabang sa mga kabataan nga makakat-on mahitungod ni Ana gikan sa 1 Samuel 1, hatagi ang matag bata og pipila ka mga bersikulo nga basahon gikan sa kapitulo. Human niana, pag-itsa og bola o gamay nga butang ngadto sa usa ka gamay nga bata ug dapita siya sa pagsulti og bahin sa istorya sa dili pa ipasa ang bola ngadto sa sunod nga bata sa pagsulti og laing bahin sa istorya. Kon ang istorya mahuman, hangyoa ang mga kabataan sa pagpakigbahin og usa ka butang nga ilang nakat-unan gikan sa ehemplo ni Ana.

• Pagbasa og dungan sa 1 Samuel 1:15, ug paghisgot kon unsa ang kahulugan sa ibu-bu ang atong mga kalag sa atubangan sa Ginoo. Uban sa mga kabataan, paghimo og lista sa mga butang nga kita makahimo sa pagsulti ngadto sa Dios kon kita mag-ampo. Panganta og dungan sa usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7). Ipamatuod ang gugma sa Dios alang sa Iyang mga anak ug sa Iyang tinguha sa pagpaminaw ug pagtubag sa ilang mga pag-ampo.

• Hangyoa ang mga kabataan sa paglista (sa tinagsa o sa mga grupo) og mga ehemplo sa mga tawo diha sa mga kasulatan kinsa nag-ampo ngadto sa Langitnong Amahan. (Kon sila nagkinahanglan og tabang, makatudlo ka kanila ngadto sa Lucas 22:41–43; Enos 1:2–6; Joseph Smith—Kasaysayan 1:14–17.) Dapita sila sa pagpakigbahin unsay ilang nakat-unan gikan niini nga mga istorya.

1 Samuel 3:1–10

Ako makadungog ug makasunod sa tingog sa Ginoo.

Sa dihang si Samuel usa ka batan-ong lalaki, nadungog niya ang tingog sa Ginoo apan wala makaila niini sa una. Unsaon nimo pagtabang ang mga kabataan nga imong gitudloan sa pagpaminaw ug sa paglihok sa mga pag-aghat nga ilang madawat?

Posible nga mga Kalihokan

• Dapita ang usa ka bata sa pagpakaaron-ingnon nga si Samuel ug lain sa pagpakaaron-ingnon nga si Eli samtang imong basahon ang 1 Samuel 3:1–10. Unsa ang atong makat-unan gikan ni Samuel mahitungod kon unsaon sa pagpaminaw sa tingog sa Ginoo? Unsaon nato sa pagpakita nga kita andam sa pagpaminaw kon ang Ginoo makigsulti kanato?

• Dapita ang mga kabataan sa paghunahuna mahitungod kon unsaon nila sa pagpasabut ngadto sa usa ka tawo kon sa unsa nga paagi ang Ginoo makigsulti kanila. Dapita sila sa pagpangita alang sa mga tubag diha sa usa o labaw pa sa mosunod nga mga kasulatan: Doktrina ug mga Pakigsaad 6:22–23; 8:2–3; 9:7–9.

Awhaga ang Pagkat-on diha sa Panimalay

Awhaga ang mga kabataan sa paghunahuna og usa ka tawo o usa ka butang nga ilang i-ampo niini nga semana. Hatagi sila og oportunidad sa umaabut sa pagpakigbahin kon giunsa sa Langitnong Amahan pagtubag ang ilang mga pag-ampo.

Pagpalambo sa Atong Pagtudlo

Mga Bata nga may mga kakulangan sa panglawas. Palihug bisitaha ang disability.ChurchofJesusChrist.org sa pagsusi kon sa unsa nga paagi mas maayo nimong matubag ang mga panginahanglan sa mga bata nga may kakulangan sa panglawas.