David and Goliath [David ug Goliat], ni Steve Nethercott

Hunyo 13–19

1 Samuel 8–10; 13; 15–18

“Ang Gubat Iya sa Ginoo”

Bisan og ang mga kalihokan sa ubos gidesinyo alang sa bisan hain sa mas gagmay o sa mas dagko nga mga kabataan, mahimo nimong ipahiangay ang bisan hain niini aron sa pagtubag sa mga panginahanglan niadtong imong gitudloan.

I-rekord ang Imong mga Panghunahuna

Dapita ang Pagpaambit

Ipakita ang hulagway ni David ug Goliath gikan diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Dapita ang mga kabataan sa pagpakigbahin unsay ilang nahibaloan mahitungod sa istorya, ug pangutana aron sa pagtabang kanila sa paghinumdom og mga bahin sa istorya nga ilang nalaktawan.

Itudlo ang Doktrina: Mas Gagmay nga mga Bata

1 Samuel 16:1–13

Ang Ginoo nasayud kon unsa ang sulod sa akong kasingkasing.

Ang pakigbahin sa istorya kalabut kon giunsa sa Ginoo pagsulti si Samuel sa pagpili ni David isip hari makatabang sa mga kabataan nga makahibalo nga ang Ginoo nakaila kanato sa tinagsa.

Posible nga mga Kalihokan

• Pakigbahin kon giunsa sa Ginoo pagsulti si Samuel nga si David mao ang mahimong hari sa Israel (tan-awa sa 1 Samuel 16:1–13). Samtang imong giasoy ang istorya, mahimo nimong himoon ang usa ka bata sa pagrepresentar ni Samuel. Mahimo siyang mohatag og korona nga papel ngadto sa lain nga bata, kinsa nagrepresentar ni David. Pakigbahin sa imong pagpamatuod nga ang Ginoo nasayud sa kasingkasing ni David ug nga Siya nakaila sa matag usa kanato.

• Pakigbahin og kasinatian diin imong gibati nga ang Ginoo nagpakabana kanimo. Kantaha ang usa ka awit nga nagtudlo nga ang Manluluwas nakaila ug nahigugma kanato, sama sa “Si Jesus Ang Atong Mahigugmaong Higala” (Songbook sa mga Bata, 37).

1 Samuel 17:10–54

Ang hugot nga pagtuo diha ni Jesukristo makatabang kanako nga magbaton og kaisug.

Ang mga kabataan dali nga makapakigsama ngadto sa batan-ong David tungod kay bisan tuod si David gamay, gibuntog niya ang dakong hagit. Tabangi sila sa pag-ila nga ang tinubdan sa iyang kaisug ug kalig-on mao ang iyang hugot nga pagtuo diha ni Jesukristo.

Posible nga mga Kalihokan

• Ribyuha ang istorya ni David ug Goliath uban sa mga kabataan (tan-awa sa Mga Istorya sa Daang Tugon), ug papuli-puliha sila sa pag-aksyon sa istorya. Aghata ang bata nga nagpakaaron-ingnon nga si Goliath sa pagsulti, “Hatagi ako og usa ka tawo, aron kami magakaaway” (1 Samuel 17:10). Aghata ang bata nga nagpakaaron-ingnon nga si David sa pagsulti, “Ako mianhi kanimo sa ngalan sa Ginoo” (1 Samuel 17:45). Ipamatuod nga kon kita adunay hugot nga pagtuo diha sa Ginoo, Siya motabang kanato nga makabaton og kaisug sama nga si David aduna.

• Gamita ang pahina sa kalihokan niini nga semana sa pagpakita kon unsa ka taas si Goliath itandi ngadto sa usa ka gamay nga batang lalaki nga si David. Ipasabut nga ang kasundalohan sa Israel nahadlok ni Goliath. Hangyoa ang mga kabataan sa pagpakaaron-ingnon nga nahadlok. Dayon pagpakita og hulagway ni Jesukristo, ug sultihi ang mga kabataan nga tungod kay si David adunay hugot nga pagtuo diha sa Ginoo, siya mahimong maisug. Hangyoa sila sa pagbarug nga maisugon, sama nga sila maisug.

• Dapita ang mga kabataan sa pagmartsa ingon og sila sama ni David nga padulong sa pakig-away ni Goliath samtang nagkanta og usa ka awit mahitungod sa pagkaisug, sama sa “Magmaisugon Ko” (Songbook sa mga Bata, 85).

1 Samuel 18:1–4

Ang maayo nga mga higala mahimo nga usa ka panalangin ngari kanako.

Ang panaghigalaay ni Jonathan ug David usa ka importanting ehemplo sa mga panalangin nga mahimong moabut gikan sa maayong mga higala.

Posible nga mga Kalihokan

• Pagdrowing og duha ka tawo diha sa pisara, ang usa nagrepresentar ni David ug ang lain nagrepresentar ni Jonathan. Basaha ngadto sa mga kabataan ang pipila ka mga hugpong sa mga pulong gikan sa 1 Samuel 18:1–4 nga naghatag og gibug-aton sa gugma nga gibati niining duha ka mga higala alang sa usag usa. Hatagi ang matag bata og usa ka pirasong papel nga kasingkasing, ug pangutan-a sila kon unsaon nila sa pagpakita og gugma ngadto sa usa ka higala. Human ang matag bata makigbahin og ideya, dapita ang bata sa pagpapilit sa papel nga kasingkasing ngadto sa pisara.

• Sultihi ang mga kabataan mahitungod sa usa ka maayong higala kinsa nagtabang kanimo sa pagpuyo sa ebanghelyo o paglig-on sa imong hugot nga pagtuo diha ni Jesukristo, ug dapita ang mga kabataan sa pagpakigbahin kon kinsa ang nagtabang kanila. Dapita ang mga kabataan sa pagpakita og aksyon nga nagbuhat og usa ka butang nga maayo alang sa usa ka higala.

Itudlo ang Doktrina: Mas Dagko nga mga Bata

1 Samuel 8:6; 9:15–17; 10:1–24; 16:1–13

Kadtong kinsa nagserbisyo diha sa Simbahan gitawag sa Dios.

Ang mga asoy sa Dios nga nagpili ni Saul ug David nga mahimong mga hari makatabang sa imong klase sa pagsabut kon giunsa pagtawag ang mga tawo sa pagserbisyo diha sa Simbahan karon. Kini nga mga asoy makalig-on sa hugot nga pagtuo nga ang mga calling nagagikan sa Dios pinaagi sa Iyang gihatagan og awtoridad nga mga sulugoon.

Paghulagway ni Samuel nga nagdihog ni Saul, © Lifeway Collection/pagtugot gikan sa goodsalt.com

Posible nga mga Kalihokan

• Sa lahi nga mga gilis sa papel, isulat ang mosunod nga mga pahayag ug mga kasulatan: ang mga katawhan gusto og usa ka hari (1 Samuel 8:6); ang Ginoo misulti ni Samuel nga si Saul mahimong hari (1 Samuel 9:15–17); gidihugan ni Samuel si Saul (1 Samuel 10:1); gipaila ni Samuel si Saul ngadto sa mga katawhan (1 Samuel 10:24). Hangyoa ang mga kabataan sa pagbasa sa mga tudling sa kasulatan ug sa paghan-ay niini sa hustong pagkasunod-sunod.

• Pagkat-on og dungan sa ikalimang artikulo sa hugot nga pagtuo. Sa daklit sultihi ang mga kabataan kon giunsa nimo pagdawat ang imong calling nga magtudlo sa Primary. Giunsa nimo sa pagkahibalo nga ikaw gitawag sa Dios? Ipamatuod nga ang Dios nagdasig sa mga lider sa pagtawag og mga tawo sa pagserbisyo.

1 Samuel 16:1–13

“Ang Ginoo nagatan-aw sa kasingkasing”

Kini sagad nga hukman ang uban pinasikad sa unsay atong makita, apan kabahin sa mahimong mas mahisama ni Jesus mao ang pagkat-on kon unsaon ang pagtan-aw sama sa iyang gibuhat––pinaagi sa pagtan-aw “sa kasingkasing” (1 Samuel 16:7).

Posible nga mga Kalihokan

• Dapita ang mga kabataan sa paghanduraw nga sila gihangyo sa pagpili og usa ka tawo nga mahimong usa ka hari. Unsa nga mga kalidad ang ilang pangitaon? Pagbasa og dungan sa 1 Samuel 16:6–7 aron mahibaloan kon unsay gisulti sa Ginoo ngadto ni Samuel samtang siya nangita og bag-ong hari alang sa Israel. Unsa ang atong makat-unan gikan sa mga panudlo sa Ginoo?

• Paghatag og leksyon nga maggamit og butang aron sa paghulagway ngadto sa mga kabataan nga ang mga paghukom nga atong gihimo pinasikad diha “sa panagway sa gawas” (bersikulo 7) tingali dili husto. Sama pananglit, makapakita ka kanila og pipila ka mga pagkaon o usa ka basahon nga adunay putos o hapin nga wala motukma sa tinuod nga sulod niini. Unsa ang gisugyot sa 1 Samuel 16:7 ug niining leksyon nga maggamit og butang mahitungod kon unsaon nato pagtan-aw ang atong mga kaugalingon ug ang ubang mga tawo?

• Pakigbahin og kasinatian diin ikaw nakakat-on kon nganong ikaw kinahanglan nga “nagatan-aw sa kasingkasing,” dili lamang “sa panagway sa gawas” (bersikulo 7). Himoa nga ang mga bata makigbahin og bisan unsang susamang mga kasinatian nga sila aduna. Pagkanta og usa ka awit nga naghatag og gibug-aton niini nga baruganan sama sa “Mouban Ko Nimo” o “Buhata Gayud ang Matarung” (Songbook sa mga Bata, 78–79, 80).

1 Samuel 17:20–54

Si Jesukristo makatabang kanako sa pagbuntog sa bisan unsa nga hagit.

Ang mga kabataan mahimong nag-atubang og mga hagit nga ingon kalisud sa pagbuntog og usa ka higante sama ni Goliath. Ang ehemplo ni David makahatag kanila og paglaum nga ang Ginoo motabang sa pagpakig-away sa atong mga gubat.

Posible nga mga Kalihokan

• I-assign sa mga kabataan ang pagdrowing og mga hulagway sa lain-laing mga bahin sa istorya sa 1 Samuel 17:20–54. Ipakita ang mga hulagway nga nagsunod-sunod diha sa pisara, ug dapita ang mga kabataan sa pagpakigbahin sa istorya pinaagi sa pagsulti mahitungod sa matag mga hulagway nga ilang gidrowing. Unsay gusto sa Ginoo nga atong makat-unan gikan niini nga istorya?

• Tabangi ang mga kabataan sa paghimo og lista diha sa pisara sa pipila ka malisud nga mga hagit nga tingali gisinati sa usa ka tawo. Dapita sila sa pagpangita og mga butang nga gisulti ni David nga makaawhag sa usa ka tawo kinsa nagsinati og mga hagit sama niini (tan-awa sa 1 Samuel 17:26, 32, 34–37, 45–47). Sultihi ang mga kabataan kon giunsa ni Jesus pagtabang kanimo panahon sa mga hagit.

Awhaga ang Pagkat-on diha sa Panimalay

Pangutan-a ang mga kabataan mahitungod sa usa ka butang nga ilang nakat-unan karong adlawa. Isulat ang mga pangutana, ug hatagi og kopya ang matag bata nga dad-on sa panimalay ug maghisgot uban sa iyang pamilya.

Pagpalambo sa Atong Pagtudlo

Tabangi ang mga bata sa paghanduraw sa mga kasulatan. Ang mga kabataan kasagaran naghatag og mas dako nga atensyon ngadto sa usa ka leksyon kon sila makatan-aw og mga larawan nga kalabut ngadto sa mga istorya o mga pagtulun-an sa kasulatan. Hunahunaa ang paggamit og mga larawan diha sa Libro sa mga Hulagway sa Ebanghelyo o diha sa ChurchofJesusChrist.org.