King David Enthroned [Si Hari David Gipalingkod sa Trono], ni Jerry Miles Harston

Hunyo 20–26

2 Samuel 5–7; 11–12; 1 Mga Hari 3; 8; 11

“Ang Imong Gingharian Pagahimoong Malig-on sa Walay Katapusan”

Samtang imong basahon ang mga kasulatan, ang Espiritu Santo makahatag kanimo og mga panghunahuna ug makadasig kanimo nga mahibalo unsay labing makahuluganon ngadto sa mga kabataan nga imong gitudloan.

I-rekord ang Imong mga Panghunahuna

Dapita ang Pagpaambit

Hangyoa ang pipila ka mga kabataan sa pagsulti mahitungod sa ilang mga kasinatian sa pagbasa sa mga kasulatan (sa tinagsa, uban sa ilang mga pamilya, o diha sa simbahan). Kanus-a ug diin sila nagbasa sa mga kasulatan? Unsa ang ilang gibati sa dihang sila nagbasa sa mga kasulatan? Unsa nga mga panalangin ang ilang gidawat tungod sa pagsunod sa sugo?

Itudlo ang Doktrina: Mas Gagmay nga mga Bata

2 Samuel 5:19, 23

Kon ako nagkinahanglan og paggiya, makapangayo ako sa Langitnong Amahan.

Kini nga mga bersikulo naghulagway kon giunsa pag-ampo ni David ang paggiya ug direksyon isip ang hari sa Israel. Sa unsang paagi ikaw makadasig sa mga kabataan nga moduol ngadto sa Dios sa pag-ampo kon sila anaa sa panginahanglan?

Posible nga mga Kalihokan

• Ipasabut ngadto sa mga kabataan nga sa dihang si David nagkinahanglan og tabang, siya “nangutana,” o nag-ampo, alang sa mga tubag. Samtang imong basahon ang 2 Samuel 5:19, 23, dapita ang mga kabataan sa pagpaminaw alang sa pulong nga “nangutana” ug sa pagkyugpos sa ilang mga bukton kon sila makadungog niini. Ipamatuod nga kita makaampo kanunay ngadto sa Langitnong Amahan kon kita nanginahanglan og tabang.

• Aron sa pagtabang sa mga kabataan sa paghunahuna kon unsa kaha ang ilang isulti kon sila mag-ampo, ikaw makapangutana kanila kon unsaon nila pagtapos ang mga kapahayag sama niini: “Kami nagpasalamat Kanimo alang sa …” ug ”Kami nangayo Kanimo alang sa …” Padrowinga ang mga kabataan og mga hulagway sa mga butang nga mahimo nilang pasalamatan o pangayoon diha sa pag-ampo.

  

  Mahimo kitang mag-ampo ngadto sa Langitnong Amahan alang sa panabang ug paggiya.

• Sultihi ang mga kabataan mahitungod sa usa ka panahon sa dihang ikaw nag-ampo alang sa tabang sa Langitnong Amahan. Giunsa Niya sa pagtubag ang imong pag-ampo? Unsay nahimong kalainan nga anaa siya sa pagtabang kanimo? Dapita ang mga kabataan sa pagpakigbahin sa ilang mga kasinatian.

2 Samuel 7:16

Si Jesukristo mao ang atong Hari.

Sa dihang si David mao ang hari sa Israel, ang Ginoo misulti kaniya nga ang iyang “gingharian pagahimoong malig-on sa walay katapusan” (2 Samuel 7:16). Kini nga saad nagpasabut ngadto ni Jesukristo, atong Mahangturong Hari, kinsa natawo pinaagi sa kaliwatan ni David.

Posible nga mga Kalihokan

• Dapita ang usa sa mga kabataan sa pagpakaaron-ingnon nga hari o reyna. Kon mahimo, hatagi ang bata og yano nga mga prop nga gunitan. Unsa ang usa ka hari o reyna? Unsa ang ilang buhaton? Sultihi ang mga kabataan nga si David usa ka hari, ug siya kagikanan ni Jesukristo, kinsa atong gitawag og ang “Hari sa kaharian” (Pinadayag 19:16). Tabangi ang mga kabataan sa paghunahuna og mga paagi nga kita makapakita nga nagtuo kita nga si Jesukristo mao ang atong Mahangturong Hari.

• Samtang ang mga kabataan nagkompleto sa pahina sa kalihokan niini nga semana, kantaha o ipatugtog ang mga rekording sa mga awit nga nagpasabut ngadto ni Kristo isip atong Hari, sama sa “Nabuhi ba Gayud Pag-usab si Jesus,” “Gitawag sa Pagserbisyo,” “Paglipay, ang Ginoo Hari!” o “Nagtuo Ako ni Kristo” (Songbook sa mga Bata, 45, 94; Mga Himno, nus. 33, 78). Hangyoa ang mga kabataan sa pagpaminaw sa pulong nga “Hari” ug sa pagpataas og hulagway ni Jesus kon madunggan nila kini. Unsay atong bation kon manganta kita mahitungod ni Jesus?

1 Mga Hari 8:57–58

Ako makalakaw sa tanan sa mga dalan sa Dios.

Alang sa mga Israelite, ang pagtukod ug pagpahinungod sa templo usa ka oportunidad sa pagpaduol sa ilang mga kasingkasing ngadto sa Ginoo ug sa pagpasalig pag-usab sa “paglakaw sa tanan sa iyang mga dalan” (1 Mga Hari 8:58). Unsaon nimo sa pagtabang ang mga kabataan nga imong gitudloan sa “paglakaw sa tanan sa iyang mga dalan”?

Posible nga mga Kalihokan

• Ipakita sa mga kabataan ang hulagway sa usa ka templo karon ug sa templo nga gitukod ni Salomon (tan-awa sa outline niini nga semana diha sa Dali, Sunod Kanako—Alang sa mga Indibidwal ug mga Pamilya). Ipasabut nga sa dihang gitukod ni Salomon ang usa ka templo alang sa mga Israelite, miawhag siya kanila sa “paglakaw sa tanan [sa Ginoo] nga mga dalan” (1 Mga Hari 8:58). Sultihi ang mga kabataan kon sa unsa nga paagi ang templo nagtabang kanimo sa paglakaw diha sa mga dalan sa Ginoo. Dapita ang mga bata sa pagpakigbahin unsa ang ilang gibati mahitungod sa templo. Kantaha uban sa mga bata ang usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99).

• Hatagi ang pipila sa mga kabataan og papel nga mga kasingkasing ug ang ubang mga kabataan papel sa mga marka sa tunob sa tiil. Basaha ang 1 Mga Hari 8:58, ug hangyoa ang mga kabataan sa pagpataas sa mga kasingkasing kon imong isulti ang pulong “mga kasingkasing” ug ang mga marka sa tunod sa tiil kon imong isulti ang hugpong sa mga pulong “paglakaw sa tanan sa iyang mga dalan.” Tabangi ang mga kabataan sa pagsabut nga kita naglakaw diha sa mga dalan sa Ginoo kon kita nagsunod ni Jesus ug naninguha nga mahimong sama Kaniya. Pangutan-a ang mga kabataan unsay ilang buhaton sa paglakaw sa mga dalan sa Manluluwas. Mahimo kamong manganta og usa ka awit mahitungod sa pagsunod ni Jesus, sama sa “Maninguha Kong Mahimong Mahisama Kang Jesus” (Songbook sa mga Bata, 40–41).

Itudlo ang Doktrina: Mas Dagko nga mga Bata

2 Samuel 7:16–17

Si Jesukristo mao ang atong Hari.

Ang mga hari nga atong gibasa diha sa Daang Tugon tanan adunay mga kasaypanan ug mihimo og mga sayop––bisan ang maayong mga hari. Apan ang Hari nga gipanagna nga moabut gikan sa linya ni David, si Jesukristo, perpekto ug maghari sa kahangturan.

Posible nga mga Kalihokan

• Dapita ang mga kabataan sa pagbasa kon unsay gisulti ni Nathan kang Hari David diha sa 2 Samuel 7:16–17, ug pangutan-a sila unsay ilang hunahuna sa kahulugan kaha niini nga panagna. Sa unsa nga paagi nga ang gingharian ni David walay katapusan? Tabangi ang mga kabataan sa pagpangita ug pagbasa sa mga tudling sa kasulatan nga nagtudlo nga si Jesukristo, usa ka kaliwat ni David, usa ka Hari, sama sa Lucas 1:32–33; Juan 18:33–37; ug Pinadayag 19:16. Sa unsang paagi si Jesukristo sama sa usa ka hari? Unsa ang pipila ka mga paagi nga kita makapakita nga si Jesukristo mao ang atong Mahangturong Hari?

• Kanta uban sa mga kabataan og pipila ka mga himno nga nagpasabut ngadto ni Kristo isip atong Hari, sama sa “Dali, O Hari sa mga Hari,” “Paglipay, ang Ginoo Hari!” o “Jesus, Kanhi Kabus” (Mga Himno, nus. 30, 33, 117). Unsa ang gitudlo niini nga mga himno kanato mahitungod sa unsay kahulugan sa pagbaton ni Jesukristo isip atong Hari?

2 Samuel 11

Ako makabuntog sa tintasyon.

Ang mga kabataan nga imong gitudloan naghimo og gagmay apan importanting mga desisyon matag adlaw. Unsaon nimo sa pagtabang kanila nga masabtan ang importansya sa pagpili unsay matarung bisan kon kini malisud?

Posible nga mga Kalihokan

• Ribyuha ang 2 Samuel 11 uban sa mga kabataan, nagtudlo ngadto sa mga pagpili nga gihimo ni David. Pangutan-a ang mga kabataan unsang maayo nga mga pagpili nga kinahanglang himoon unta ni David. Unsa ang pipila ka mga butang nga atong mabuhat kon kita pagatintalon nga makatabang kanato sa pagpili sa matarung?

• Ang pagpakigbahin og ehemplo sa usa ka tawo kinsa, dili sama ni David, misalikway sa tintasyon, pangutan-a ang mga kabataan kon sila nakahinumdom ba sa istorya ni Jose ug sa asawa ni Potiphar (tan-awa sa Genesis 39:7–12). Mahimo nimo nga ribyuhon kini nga istorya uban sa mga kabataan ug tabangi sila sa pagtandi niini ngadto sa istorya ni David. Unsa ang atong makat-unan gikan sa mga istorya ni David ug ni Jose mahitungod sa unsaon sa pagsalikway og tintasyon?

Awhaga ang Pagkat-on diha sa Panimalay

Tabangi ang mga bata sa paghunahuna og usa ka butang nga ilang mahimo aron sa paggamit sa unsay ilang nakat-unan karon. Dayon awhaga sila sa paglihok sa ilang mga plano.

Pagpalambo sa Atong Pagtudlo

I-follow up ang mga pagdapit sa paglihok. Kon imong dapiton ang mga kabataan sa paglihok sa unsay ilang nakat-unan, i-follow up ang imong pagdapit atol sa sunod nga klase. Nagpakita kini sa mga kabataan nga ikaw nagpakabana mahitungod sa unsang paagi ang ebanghelyo nagpanalangin sa ilang mga kinabuhi. Samtang nagpakigbahin sila sa ilang mga kasinatian, malig-on sila ug motabang sa usag usa sa pagpuyo sa ebanghelyo.