Elijah Contends against the Priests of Baal [Elias Nakigbisog Batok sa mga Pari ni Baal], ni Jerry Harston

Hunyo 27–Hulyo 3

1 Mga Hari 17–19

“Kon ang Ginoo Dios Man, Sumunod Kamo Kaniya”

Kadaghanan sa mga kabataan gusto og mga istorya. Tabangi ang mga kabataan sa pag-ila og mga kamatuoran diha sa istorya nga makaplagan sa 1 Mga Hari 17–19 nga molig-on sa ilang hugot nga pagtuo diha ni Jesukristo.

I-rekord ang Imong mga Panghunahuna

Dapita ang Pagpaambit

Ipakita sa mga kabataan ang mga hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Hangyoa ang mga bata sa pagpakigbahin sa unsay ilang nahibaloan mahitungod sa mga istorya nga gipakita diha sa mga hulagway. Unsa ang atong makat-unan gikan niini nga mga istorya?

Itudlo ang Doktrina: Mas Gagmay nga mga Bata

1 Mga Hari 17

Ang Ginoo nagpanalangin niadtong kinsa nagbaton og hugot nga pagtuo.

Ang 1 Mga Hari 17 nagrekord og daghang mga ehemplo sa lawom nga hugot nga pagtuo. Isip resulta sa pagbaton og lawom nga hugot nga pagtuo, si Elias gipakaon sa mga uwak sa panahon sa kagutom, usa ka balo nga babaye ug ang iyang anak nga lalaki midaghan ang mga pagkaon, ug gibuhi ni Elias ang anak nga lalaki sa balo nga babaye gikan sa patay.

Posible nga mga Kalihokan

• Pagpakita og mga hulagway o mga butang nga mobagay sa mga istorya sa 1 Mga Hari 17, sama sa mga langgam, pan, o usa ka batang lalaki. I-asoy kini nga istorya ngadto sa mga kabataan (“Ang Propeta Elias” sa Mga Istorya sa Daang Tugon makatabang), ug dapita sila sa pagpangita sa hulagway o butang nga mobagay sa matag istorya. Hatagi og gibug-aton nga si Elias ug ang balo nga babaye nagbaton og hugot nga pagtuo ni Jesukristo ug nakadawat og importanting mga panalangin.

• Tabangi ang mga kabataan sa paghunahuna og mga paagi nga sila makapakita nga sila nagbaton og hugot nga pagtuo sa Langitnong Amahan ug ni Jesukristo, nga nagpasabut nga sila nagtuo diha Kanila ug nagsalig Kanila. Kanta uban kanila og usa ka awit mahitungod sa hugot nga pagtuo, sama sa “Ako Nasayud Akong Amahan Buhi” (Songbook sa mga Bata, 8).

1 Mga Hari 18:17–39

Makapili ako sa pagsunod ni Jesukristo.

Giaghat ni Elias ang mga katawhan sa Israel sa paghimo og desisyon sa pagsunod ni Jesukristo. Tabangi ang mga kabataan sa pagtan-aw nga sila makahimo niining sama nga pagpili.

Posible nga mga Kalihokan

• Ipasabut ngadto sa mga kabataan nga ang mga tawo sa panahon ni Elias wala makasiguro kon sila gusto bang mosunod sa Ginoo. Ipakigbahin ang istorya kon giunsa ni Elias sa pagdapit kanila sa pagpili sa pagsunod sa Ginoo, makaplagan diha sa 1 Mga Hari 18:17–39 (tan-awa usab ang “Elias ug ang mga Pari sa Baal” diha sa Mga Istorya sa Daang Tugon). Sultihi ang mga kabataan kon nganong ikaw nagpili sa pagsunod ni Jesukristo, ug pangutan-a sila kon nganong sila nagpili sa pagsunod Kaniya.

• Basaha ngadto sa mga kabataan unsay gisulti ni Elias ngadto sa mga katawhan: “Kon ang Ginoo Dios man, sumunod kamo kaniya” (1 Mga Hari 18:21). Unsa ang buot ipasabut sa pagsunod ni Jesukristo? Tabangi ang mga kabataan sa paghunahuna og piho nga mga butang nga ilang buhaton sa pagsunod ni Jesukristo, ug dapita sila sa pagdrowing og mga hulagway sa ilang mga kaugalingon nga nagbuhat niadtong mga butanga.

  

  Makapili kita sa pagsunod ni Jesukristo.

1 Mga Hari 19:9–12

Ang Espiritu Santo namulong ngari kanako sa usa ka hinay, hinagawhaw nga tingog.

Uban sa pipila ka paggiya, ang gagmay nga mga kabataan makaila sa impluwensya sa Espiritu Santo diha sa ilang mga kinabuhi. Pamalandonga kon sa unsa nga paagi ikaw makatabang kanila.

Posible nga mga Kalihokan

• I-summarize alang sa mga kabataan ang istorya nga makaplagan diha sa 1 Mga Hari 19:9–12, ug basaha ang mga bersikulo 11–12. Dapita sila sa paghimo og mga aksyon sa pagrepresentar sa kusog nga hangin, sa linog, ug sa kalayo. Dayon dapita sila sa paglingkod nga hilum kaayo samtang imong basahon ang katapusan sa bersikulo 12 sa usa ka hinay nga tingog: “tapus sa kalayo ang usa ka malinawon nga diyutayng tingog.” Hangyoa sila sa pagsulay og sulti sa ligdong, hinagawhaw nga tingog. Sultihi sila mahitungod sa mga panahon nga ikaw nakasinati og pag-aghat gikan sa Espiritu Santo.

• Tabangi ang mga kabataan sa pag-ila kanus-a mahimong bation nila ang impluwensya sa Espiritu Santo. Sama pananglit, pagtugtog o pagkanta og usa ka ligdong nga pagtahud nga awit mahitungod ni Jesus, ug pangutan-a sila kon unsa ang ilang bation kon sila maghunahuna mahitungod Kaniya. Pangutan-a sila kon unsa ang ilang gibati sa panahon sa ubang ligdong nga pagtahud nga mga kalihokan, sama sa pag-ampo uban sa ilang mga pamilya o pag-ambit sa sakramento. Ipasabut nga kini nga mga pagbati miabut gikan sa Espiritu Santo. Sultihi ang mga kabataan kon giunsa sa gahum sa Espiritu Santo pagpanalangin sa imong kinabuhi.

Itudlo ang Doktrina: Mas Dagko nga mga Bata

1 Mga Hari 17:8–16

Kon ang Ginoo maghangyo kanako sa pagsakripisyo, ako makasunod diha sa hugot nga pagtuo.

Ang balo nga babaye sa Sarepta misalig sa Ginoo ug sa Iyang propeta, bisan tuod siya gihangyo sa paghimo og dako nga sakripisyo. Kini nga istorya makatabang sa mga kabataan sa panahon nga ang Ginoo maghangyo kanila sa paghimo og mga sakripisyo.

Posible nga mga Kalihokan

• Basaha ngadto sa mga kabataan ang 1 Mga Hari 17:8–16. Dapita sila sa pag-aksyon sa istorya samtang imong basahon kini sa ikaduhang higayon. Hunong og kadiyot sa lain-laing gagmay nga mga bahin ug pangutana kon unsa ang ilang bation kon sila pa si Elias o ang balo nga babaye. Dapita sila sa pagpakigbahin kon unsay ilang nakat-unan gikan niini nga istorya.

• Dapita ang usa ka bata sa pagdrowing diha sa pisara og usa ka hulagway sa unsay gisugo sa Ginoo sa balo nga babaye nga ihatag ngadto ni Elias (tan-awa sa 1 Mga Hari 17:12–13). Dapita ang laing bata sa pagdrowing unsay nadawat sa balo nga babaye agi og balos (tan-awa sa 1 Mga Hari 17:15–16). Unsa ang pipila ka mga butang nga ang Ginoo naghangyo kanato sa pagsakripisyo? Dapita ang mga bata sa pagpakigbahin kon sa unsang paagi sila napanalanginan tungod sa paghimo og mga sakripisyo.

1 Mga Hari 18:17–39

Makapili ako sa pagsunod ni Jesukristo.

Ang mga Israelite nagduha-duha mahitungod sa pagsunod sa Ginoo. Pamalandunga kon unsaon nimo pagdasig ang mga kabataan nga mahimong mapasaligon sa ilang pagkadisipulo.

Posible nga mga Kalihokan

• I-assign sa matag bata ang pagbasa og daghang mga bersikulo gikan sa 1 Mga Hari 18:17–39 ug sa pagdrowing og hulagway sa unsay gihulagway sa iyang bersikulo. Tabangi ang mga kabataan sa pagsabut sa mga bersikulo kon gikinahanglan. Dayon ipagamit kanila ang ilang mga hulagway sa pag-asoy og istorya. Unsa ang gitudlo niining istorya kanato mahitungod sa Ginoo?

• Hangyoa ang mga kabataan sa pagsulti mahitungod sa mga panahon sa dihang sila kinahanglang mohukom tali sa duha ka magkalahi nga mga butang. Unsa ang mitabang kanila sa paghukom? Tabangi sila sa paghunahuna og mga sitwasyon nga sila mahimong manginahanglan sa paghukom kon mosunod ba o dili ni Jesukristo. Unsa nga mga kamatuoran gikan sa istorya sa 1 Mga Hari 18:17–39 ang makatabang kanila sa paghukom?

1 Mga Hari 19:9–12

Ang Espiritu Santo namulong ngari kanako sa usa ka hinay, hinagawhaw nga tingog.

Ang kalibutan puno sa makapalinga nga mga kalangas nga naghimo niini nga malisud sa pagdungog sa hinay, hinagawhaw nga tingod sa Espiritu. Unsaon nimo pagtabang ang mga kabataan sa pagdungog niini?

Posible nga mga Kalihokan

• Hangyoa ang mga kabataan sa pagpaminaw og maayo samtang imong basahon ang 1 Mga Hari 19:11–12 ngadto kanila sa hinay kaayo. Dapita sila sa pagsiksik sa 1 Mga Hari 19 aron sa pagpangita sa mga bersikulo nga imong gibasa ug mahibaloan unsay gibuhat ni Elias. Pagsulti mahitungod sa unsay ilang kinahanglang buhaton aron madungog unsay imong gisulti, ug tabangi sila sa pagtandi niini ngadto sa unsay kinahanglan natong buhaton aron madungog ang “hinay hinagawhaw nga tingog” sa Espiritu. Papuli-puliha ang mga kabataan sa pagbasa og hinay sa ubang mga bersikulo gikan sa 1 Mga Hari 19 samtang ang ubang mga kabataan mangita niadtong mga bersikulo diha sa mga kasulatan.

• Pakigbahin uban sa mga kabataan og pipila ka dugang nga mga kasulatan nga naghulagway kon sa unsang paagi ang Espiritu makigsulti kanato (tan-awa sa Ang Giya ngadto sa mga Kasulatan, “Dasig, Pagdasig,” scriptures.ChurchofJesusChrist.org). Hangyoa ang mga kabataan sa pagsulti mahitungod sa mga panahon sa dihang sila mibati sa Espiritu Santo nga naggiya kanila o nagpamatuod nganha kanila. Unsa ang ilang gibuhat? Unsa ang makapalinga kanato gikan sa pag-ila sa Espiritu? Pagbasa og dungan sa Moroni 4:3, ug awhaga ang mga kabataan sa pagpili og usa ka butang nga ilang buhaton aron sila sa “kanunay makabaton sa iyang Espiritu uban kanila.”

Awhaga ang Pagkat-on diha sa Panimalay

Dapita ang mga kabataan sa paghunahuna og usa ka butang nga gusto nilang buhaton tungod sa unsay ilang nakat-unan karon. Sama pananglit, sila makahimo og espiritwal, intelektwal, pisikal, o sosyal nga tumong nga mahimong mas mahisama ni Jesukristo.

Pagpalambo sa Atong Pagtudlo

Tabangi ang mga kabataan sa pag-ila sa Espiritu. “Usa sa labing importante nga mga butang nga imong mabuhat isip usa ka magtutudlo mao ang pagtabang niadtong imong mga gitudloan sa pag-ila sa impluwensya sa Espiritu Santo. … Tabangi [ang mga kabataan] nga makonektar sa ilang espirituhanong mga pagbati ngadto sa impluwensya sa Espiritu Santo.” (Pagtudlo sumala sa Pamaagi sa Manluluwas, 11.)