Paghulagway sa templo ni Zorobabel, ni Sam Lawlor

Hulyo 18–24

Esdras 1; 3–7; Nehemias 2; 4–6; 8

“Ako Nagabuhat og Usa ka Dakong Buhat”

Samtang ikaw nagtuon, hunahunaa hain sa mga mensahe ni Esdras ug Nehemias ang labing gikinahanglan sa mga kabataan nga imong gitudloan. Paghimo og usa ka plano sa pagtudlo nga naglakip og mga panghunahuna nga imong nadawat gikan sa Espiritu Santo.

I-rekord ang Imong mga Panghunahuna

Dapita ang Pagpaambit

Isulat diha sa pisara Zorobabel, Esdras, ug Nehemias. Pagdrowing o pagpakita og pipila ka mga hulagway nga kalabut ngadto niini nga mga tawo, sama sa templo, ug sa mga paril sa Jerusalem. Tabangi ang mga kabataan sa pagpares sa mga ngalan ngdto sa mga hulagway, ug himoa nga mopakigbahin sila sa unsay ilang nahibaloan mahitungod sa unsay gihimo niini nga mga tawo.

Itudlo ang Doktrina: Mas Gagmay nga mga Bata

Esdras 3:8–13

Ang templo makahatag kanako og kalipay.

Ang asoy ni Zorobabel ug sa mga Judeo nga nagtukod og balik sa templo makatabang sa mga bata nga imong gitudloan sa pagmaya diha sa mga panalangin nga moabut tungod sa balay sa Ginoo.

Posible nga mga Kalihokan

• Dapita ang mga kabataan sa paghisgut mahitungod sa usa ka butang nga makalipay kanila. Pagpakita og usa ka hulagway sa usa ka tawo nga nagpahiyom atubangan sa templo (sama sa hulagway dinhi niini nga outline), ug pangutan-a ang mga kabataan ngano kaha nga ang tawo malipayon kaayo. Ipamatuod nga ang templo mao ang balay sa Ginoo, ug sultihi mahitungod sa usa ka panahon sa dihang ikaw mibati og kalipay tungod sa templo.

• Basaha ngadto sa mga kabataan ang katapusang bahin sa Esdras 3:12, nagpasabut nga sa dihang ang mga Judeo mipahimutang sa pundasyon sa templo,“daghan nga naninggit sa makusog tungod sa kalipay.” Dapita ang mga kabataan sa pagsinggit tungod sa kalipay. Tabangi sila sa paghunahuna og mga rason nga kita mahimong malipayon mahitungod sa templo. Sama pananglit, didto sa templo kita naghimo og mga saad uban sa Dios nga nagtugot sa atong mga pamilya nga mag-uban sa kahangturan.

• Kantaha uban sa mga bata ang usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Human sa matag linya, hunong og kadiyut aron sa paghangyo sa usa ka bata sa pagpakigbahin og usa ka butang nga iyang nagustuhan mahitungod sa templo.

  

  Ang templo mahimong tinubdan sa kalipay sa atong mga kinabuhi.

Nehemias 2:17–20; 6:1–9

Ang Ginoo motabang kanako sa paghimo sa Iyang buhat.

Sa dihang si Nehemias nag-ayo sa mga paril nga naglibut sa Jerusalem, ang iyang mga kaaway misulay sa pagpahunong kaniya, apan mipabilin siya nga matinud-anon sa iyang buluhaton. Unsa ang pipila ka importanting mga butang nga gusto sa Ginoo nga buhaton sa mga kabataan, ug unsaon nimo pagdasig kanila nga magmatinud-anon ngadto niana nga buhat?

Posible nga mga Kalihokan

• Pakigbahin sa mga kabataan sa istorya ni Nehemias (tan-awa sa Nehemias 2:17–20; 6:1–9; Dieter F. Uchtdorf, “Kita Nagbuhat og Dako nga Buhat ug Dili Makaanha,” Liahona, Mayo 2009, 59–62). Sultihi ang mga kabataan sa unsay gisulti ni Nehemias sa dihang gibugal-bugalan siya sa mga tawo tungod kay gustong ayuhon ang mga paril sa Jerusalem: “Ang Dios sa langit, siya ang magapauswag kanamo, busa kami nga iyang mga alagad motindog ug magatukod” (Nehemias 2:20). Dapita ang mga kabataan sa pagbarug ug magpakaaron-ingnon nga motabang sa pag-ayo sa mga paril sa Jerusalem.

• Pagdala og mga block sa klase, ug ipagamit sa mga kabataan sa pagtabang kanimo og tukod sa paril (o pagdrowing og paril diha sa pisara). Tabangi ang mga kabataan sa paghunahuna og pipila ka importanting mga butang nga tingali mohangyo ang Langitnong Amahan kanila sa pagbuhat, sama sa pagkat-on kon unsaon pagbasa ang mga kasulatan. Sa matag ideya nga ilang ipakigbahin, dapita sila sa pagdugang og block ngadto sa paril. Ipasabut nga sa dihang si Nehemias naghimo sa iyang importanting buhat sa pag-ayo sa mga paril sa Jerusalem, ang mga tawo misulay sa pagpahunong kaniya. Basaha ang Nehemias 6:9, ug dapita ang mga kabataan sa pagpataas sa ilang mga kamot kon imong basahon ang “lig-unon mo ang akong mga kamot.” Sultihi ang mga kabataan mahitungod sa usa ka panahon nga imong gibati ang paglig-on sa Dios sa imong mga kamot sa paghimo sa Iyang buhat.

Nehemias 8:1–12

Ang mga kasulatan usa ka panalangin.

Mahimo nimong gamiton ang istorya ni Esdras nga nagbasa sa balaod aron sa pagtabang sa mga kabataan sa paghunahuna mahitungod sa unsa kita ka bulahan nga nakabaton sa mga kasulatan.

Posible nga mga Kalihokan

• Sultihi ang mga kabataan nga si Esdras mibasa sa mga kasulatan ngadto sa mga katawhan. Kusga pagbasa ang pipila sa mga hugpong sa mga pulong gikan sa Nehemias 8:2–3, 5–6, 8–9, 12 nga naghulagway kon unsay gihimo sa mga tawo sa dihang nadungog nila ang mga kasulatan, ug dapita ang mga kabataan sa pag-aksyon niini nga mga hugpong sa mga pulong. Nganong mapasalamaton kita nga nakabaton niini nga mga kasulatan?

• Dapita ang mga kabataan sa pagkolor sa pahina sa kalihokan niini nga semana. Samtang sila naghimo, pakigbahin sa mga kabataan kon sa unsang paagi ang pagbasa sa mga kasulatan nagdala kanimo nga mas maduol ngadto sa Manluluwas.

Itudlo ang Doktrina: Mas Dagko nga mga Bata

Esdras 3:8–13; 6:16–22

Ang templo naghatag kanako og rason sa pagmaya.

Samtang ikaw nagribyu uban sa mga kabataan sa asoy ni Zorobabel ug sa mga Judeo nga nagtukod og balik sa templo, pangita og mga paagi sa pagpamatuod sa kalipay nga moabut kanato tungod kay kita adunay mga templo karon.

Posible nga mga Kalihokan

• Dapita ang mga kabataan sa pagdungan og pangita sa mga hugpong sa mga pulong diha sa Esdras 3:10–13 nga nagpakita kon unsa ang gibati sa mga Judeo sa dihang ang templo sa Jerusalem gibalik og tukod. Unsaon nato sa pagpakita sa atong kalipay nga adunay mga templo sa yuta karon? Tabangi ang mga bata sa paghunahuna og mga paagi nga sila makapangandam sa pag-adto sa templo.

• Ipakigbahin sa mga kabataan ang imong mga pagbati mahitungod sa templo. Sa unsa nga paagi nga ang templo nagtabang kanimo nga mobati og mas duol ngadto sa Langitnong Amahan ug sa Manluluwas? Nganong magsaulog kita kon usa ka templo ipahinungod? Hatagi ang mga kabataan og panahon sa pagsulat kon unsay ilang gibati mahitungod sa templo, ug awhaga sila sa pagpakigbahin unsay ilang gisulat ngadto sa ilang mga pamilya.

Nehemias 2; 4; 6

Ang Ginoo molig-on kanako sa pagbuhat og usa ka “dakong buhat.”

Ang Ginoo adunay importante nga buhat alang sa mga kabataan nga imong gitudloan. Unsay ilang nakat-unan gikan ni Nehemias mahitungod sa paglahutay diha niana nga buhat bisan og sila nagsinati og pagbatok?

Posible nga mga Kalihokan

• Ribyuha uban sa mga kabataan ang istorya mahitungod ni Nehemias nga nag-ayo sa mga paril nga naglibut sa Jerusalem, lakip ang pagbatok nga iyang giatubang. Pagbasa og dungan sa Nehemias 2:19, ug hangyoa ang mga kabataan sa pagpakigbahin og mga sitwasyon diin ang usa ka tawo mahimong mokatawa kanato tungod sa pagbuhat sa matarung nga butang. Sumala sa Nehemias 2:20, sa unsa nga paagi mitubag si Nehemias? Unsaon nato sa pagtubag kon ang mga tawo mobugal-bugal kanato o mosaway kanato tungod sa pagbuhat sa matarung nga butang?

• Pagbasa og dungan sa Nehemias 6:1–9. Giunsa sa mga kaaway ni Nehemias pagbalik-balik og paningkamot sa pagpahunong kaniya sa pagtrabaho diha sa paril, ug giunsa niya pagtubag? Unsa nga buhat ang gusto sa Dios nga atong buhaton? (tan-awa, sama pananglit, sa Mosiah 18:8–10). Unsaon nato pagsunod ang ehemplo ni Nehemias diha sa bersikulo 9 kon kini malisud sa pagbuhat unsay gisugo sa Dios nga atong buhaton?

Nehemias 8:1–12

Ako mapanalanginan kon ako magtuon sa mga kasulatan.

Ang mga katawhan sa Jerusalem wala makadungog sa mga pulong sa Dios sulod sa dugay nang panahon sa wala pa mobasa si Esdras niini ngadto sa mga katawhan. Ang istorya ni Esdras nagpahinumdom kanato kon unsa ka importante ang mga kasulatan ngari kanato.

Posible nga mga Kalihokan

• Dapita ang mga kabataan sa pagsiksik sa Nehemias 8:1–12 alang sa mga pulong o mga hugpong sa mga pulong nga nagpakita kon unsa ang gibati sa mga tawo mahitungod sa pagkadungog sa pulong sa Dios. Hangyoa ang mga kabataan sa pagpakigbahin kon unsa ang ilang gibati sa dihang mibasa sila sa mga kasulatan, ug pakigbahin usab sa imong mga pagbati.

• Dapita ang usa ka bata sa pagbasa sa Nehemias 8:8, ug pangutan-a ang mga kabataan unsay nagtabang kanila sa pagsabut sa mga kasulatan. Pakit-a sila unsaon paggamit sa mga tabang sa pagtuon sama sa Ang Giya ngadto sa mga Kasulatan. Dapita ang mga kabataan sa pagpakigbahin og usa ka butang nga ilang nakat-unan mahitungod sa Manluluwas gikan sa mga kasulatan.

Awhaga ang Pagkat-on diha sa Panimalay

Dapita ang mga kabataan sa pagpili og usa ka butang nga ilang nakat-unan karon nga ilang gusto nga ipakigbahin ngadto sa ilang pamilya.

Pagpalambo sa Atong Pagtudlo

Mangandam sa espirituhanong paagi. “Ang gamhanan nga pagtudlo sa ebanghelyo nagpasabut nga dili lamang ang mag-andam og usa ka leksyon apan mag-andam sa atong kaugalingon. … Ang epektibong mga magtutudlo sa ebanghelyo—sa dili pa sila maghunahuna sa pagpuno sa oras sa klase—motutok sa pagpuno sa ilang mga kasingkasing sa Espiritu Santo” (Pagtudlo sumala sa Pamaagi sa Manluluwas, 12).