Esther [Ester], ni James Johnson

Hulyo 25–31

Ester

“Ikaw Mahiabut … sa Maingon niini nga Panahona”

Ang tanang mga kasulatan nagpamatuod ni Jesukristo. Pamalandonga kon unsaon nimo sa pagtabang ang mga kabataan sa pagkakita sa impluwensya sa Manluluwas diha sa istorya ni Ester.

I-rekord ang Imong mga Panghunahuna

Dapita ang Pagpaambit

Ipalibut ang usa ka hulagway ni Ester (tan-awa diha sa outline niini nga semana sa Dali, Sunod Kanako—Alang sa mga Indibidwal ug mga Pamilya). Samtang ang mga kabataan naggunit sa hulagway dapita sila sa pagpakigbahin og usa ka butang nga ilang nahibaloan mahitungod sa istorya ni Ester.

Itudlo ang Doktrina: Mas Gagmay nga mga Bata

Ester 2:5–7

Makaserbisyo ako sa akong pamilya.

Sa dihang namatay ang mga ginikanan ni Ester, ang iyang ig-agaw nga si Mardocheo miamuma kaniya. Ikaw makagamit sa ilang mga kasinatian isip usa ka oportunidad sa pag-istorya mahitungod sa pagserbisyo og mga sakop sa atong mga pamilya.

Posible nga mga Kalihokan

• Diha sa pisara, pagdrowing og mga tawo nga magrepresentar ni Ester, ug sa iyang ig-agaw nga si Mardocheo. Ipasabut nga ang mga ginikanan ni Ester namatay, busa si Ester nanginahanglan og usa ka tawo sa pag-amuma kaniya. Basaha ang Ester 2:7 ngadto sa mga kabataan, ug hangyoa ang mga kabataan sa pagpaminaw alang sa unsay gibuhat ni Mardocheo. Tabangi ang mga kabataan sa paghunahuna sa mga panginahanglan nga tingali aduna ang mga sakop sa ilang mga pamilya nga ang mga kabataan makatabang.

• Dapita ang pipila ka mga kabataan sa pag-aksyon og usa ka butang nga mabination nga ilang mabuhat sa pagserbisyo og usa ka tawo sa ilang mga pamilya, ug sa paghangyo sa ubang mga kabataan sa pagtagna kon unsa ang ilang gibuhat. Dapita sila sa pagsulti mahitungod sa mga butang nga ilang gibuhat sa pagpanalangin sa ilang mga pamilya, ug sa pagsulti mahitungod sa pipila ka mga butang nga imong gibuhat.

• Pagkanta og awit mahitungod sa pagtabang sa atong mga pamilya, sama sa “Kon Kita Motabang” (Songbook sa mga Bata, 108). Pakigbahin sa imong pagpamatuod nga ang pagtabang sa atong mga pamilya naghimo kanatong malipayon.

Ester 4:15–16

Ako makahimo nga maisug.

Ang mga kabataan nga imong gitudloan moatubang og mga sitwasyon sa panahon nga sila nagkinahanglan sa panabang sa Ginoo nga maisug. Unsaon nimo sila pagtabang nga makakat-on gikan sa ehemplo ni Ester sa pagkaisug?

Posible nga mga Kalihokan

• Nahibalo ba ang mga kabataan nga imong gitudloan unsa ang kahulugan sa kaisug? Pakigbahin og yano nga katin-awan, sama sa “Ang pagkaisug nagpasabut sa pagbuhat unsay matarung bisan kon ikaw nahadlok.” Ipakigbahin ang istorya ni “Ester” (tan-awa sa “Ester” diha sa Mga Istorya sa Daang Tugon), ug tabangi ang mga kabataan sa pagkakita kon sa unsa nga paagi si Ester maisug. Pagamita ang mga kabataan sa mga tawo-tawo diha sa pahina sa kalihokan niini nga semana sa pag-asoy og balik sa istorya.

• Pagpakita og hulagway ni Ester (tan-awa kini diha sa outline sa semana sa Dali, Sunod Kanako—Alang sa mga Indibidwal ug mga Pamilya). Kantaha uban sa mga kabataan ang usa ka awit mahitungod sa kaisug, sama sa “Magmaisugon Ko” (Songbook sa mga Bata, 85). Itudlo ang mga pulong ug mga hugpong sa mga pulong diha sa awit nga naghulagway ni Ester, ug ipamatuod nga ang Manluluwas makatabang sa mga bata nga maisug.

• Sultihi ang mga kabataan mahitungod sa mga panahaon sa dihang si Jesukristo maisug; sama pananglit, sa dihang Siya nag-antus sa atong mga sala, didto sa Getsemani ug didto sa krus (tan-awa sa Mateo 26:36–39; 27:33–35). Hangyoa ang mga kabataan sa pagsulti mahitungod sa usa ka panahon sa dihang sila maisug (hunahunaa ang pagkontak og una sa ilang mga pamilya aron sa paghangyo kanila alang sa pipila ka mga ehemplo). Unsa ang mitabang kanila nga maisug? Sultihi ang mga kabataan kon giunsa sa Ginoo pagtabang kanimo nga maisug sa dihang ikaw nahadlok.

  

  Esther before the King [Ester sa atubangan sa Hari], ni Minerva K. Teichert

Itudlo ang Doktrina: Mas Dagko nga mga Bata

Ester 4:14

Ako mahimong usa ka instrumento diha sa mga kamot sa Dios.

Sa dihang si Ester nahadlok, si Mardocheo miawhag kaniya pinaagi sa pagtudlo kaniya nga tingali ang Ginoo mihimo kaniya nga reyna “sa maingon niini nga panahona” (Ester 4:14). Pamalandonga kon giunsa sa Ginoo pag-andam ang mga kabataan nga imong gitudloan alang sa ilang mga oportunidad sa pagpanalangin sa uban.

Posible nga mga Kalihokan

• Dapita ang usa ka tawo sa pagtugtog og usa ka awit alang sa mga kabataan diha sa usa ka instrumento sa musika, o sa pagpakita og usa ka tawo nga nagtugtog og usa ka instrumento. Pag-istorya mahitungod sa unsay ipasabut niini nga mahimong instrumento diha sa mga kamot sa Dios. Ribyuha ang istorya ni Ester uban sa mga kabataan (tan-awa ang “Reyna Ester” diha sa Mga Istorya sa Daang Tugon), ug dapita sila sa pagsulti mahitungod kon sa unsa nga paagi si Ester nahimo nga instrumento alang sa Ginoo sa pagtuman sa Iyang mga katuyoan. Sa unsa nga paagi kita mahimong mga instrumento alang sa Ginoo?

• Human maribyu ang istorya ni Ester, pagpataput og kard nga may ngalan sa usa sa mga magdudula gikan sa istorya diha sa buko-buko sa matag bata. Dapita ang mga kabataan sa pagsulay sa pagsusi kinsang ngalan ang anaa sa ilang mga buko-buko pinaagi sa pagpangutana sa ubang mga kabataan sama sa “Kini nga tawo matarung ba?” o “kini nga tawo babaye ba?” Dayon paghisgot sa unsa nga paagi si Mardocheo ug Ester mga instrumento alang sa Ginoo sa pagluwas sa mga Judeo.

Ester 3:1–11; 4:10–17

Ang Langitnong Amahan nagtabang kanako sa pagbaton og kaisug kon ako mahadlok.

Kanus-a nimo nakita ang mga kabataan nga imong gitudloan maisugon? Unsa nga mga kasinatian ang imong mapakigbahin sa panahon nga ikaw nagkinahanglan sa tabang sa Ginoo nga magmaisugon?

Posible nga mga Kalihokan

• Isulat diha sa pisara Mardocheo mipakita og kaisug pinaagi sa … ug Ester mipakita og kaisug pinaagi sa … Dapita ang pipila ka mga kabataan sa pagbasa diha sa Ester 3:1–11 ug ang uban sa pagbasa diha sa Ester 4:10–17. Hangyoa sila sa paggamit sa unsay ilang nabasa sa pagkompleto sa mga kapahayag diha sa pisara. Dayon isulat ang Ako magpakita og kaisug pinaagi sa … ug dapita ang mga kabataan sa paglista sa mga butang nga ang Langitnong Amahan gusto nga ilang buhaton nga nagkinahanglan og kaisug. Sa unsang paagi kita mahimong sama ni Mardocheo ug ni Ester?

• Dapita ang mga kabataan sa paghunahuna og mga sitwasyon nga ilang giatubang diin kini mahimong malisud ang pagbuhat sa matarung nga butang. Isulat diha sa pisara ang maisugong mga pulong ni Ester “Busa ako moadto sa hari, … ug kon ako mamatay, mamatay ako.” (Ester 4:16). Tabangi ang mga kabataan sa paggamit sa mga pulong ni Ester diha sa ilang mga kaugalingon pinaagi sa pag-ilis “moadto sa hari” og usa ka matarung apan malisud nga pagpili nga sila kinahanglan nga mohimo. Dayon dapita sila sa pag-ilis sa “mamatay” ngadto sa usa ka dili maayo nga butang nga mahimong moabut pinaagi sa pagbuhat og unsay matarung. Nganong mas maayo ang pagbuhat og matarung nga butang, bisan og adunay mga malisud nga mga sangputanan?

• Hisguti kon sa unsang paagi si Jesukristo usa ka ehemplo niini nga baruganan.

Ester 4:1–3, 10–17

Ang pagpuasa makatabang kanako ug makapanalangin sa uban.

Atol sa panahon sa panginahanglan, si Ester ug ang mga Judeo nagpuasa. Unsaon nimo sa pagtabang ang mga kabataan nga imong gitudloan nga makasabut sa espirtwal nga mga panalangin sa pagpuasa?

Posible nga mga Kalihokan

• Dapita ang mga kabataan sa paghimo og lista sa mga butang nga sila makahimo sa pagpuasa (kon gikinahanglan, sila makatan-aw sa “Puasa ug mga Halad sa Puasa” diha sa Matinud-anon sa Tinuohan, 208–211). Dayon hangyoa sila sa pagbasa diha sa Ester 4:1–3, 10–17 sa pagsusi kon ngano nga ang mga Judeo ug si Ester nagpuasa. Awhaga ang mga kabataan sa paghunahuna og katarungan nga sila nagkinahanglan og espesyal nga tabang gikan sa Ginoo, ug isugyot nga ila kanang himoon nga rason nga kabahin sa ilang pagpuasa atol sa sunod nga Dominggo sa puasa.

• Dapita ang mga kabataan sa pagpakaaron-ingnon nga sila nagpasabut ngadto sa usa ka higala kon ngano nga sila nagpuasa. Unsa ang ilang isulti? Itudlo sila ngadto sa Ang Giya ngadto sa mga Kasulatan, “Puasa, Pagpuasa” (scriptures.ChurchofJesusChrist.org) kon sila nagkinahanglan og tabang. Pakigbahin og kasinatian sa dihang ikaw nagpuasa aron sa pagdawat sa tabang sa Ginoo. Dapita ang mga kabataan sa pagpakigbahin og kasinatian nga sila aduna sa pagpuasa.

Awhaga ang Pagkat-on diha sa Panimalay

Panganta og dungan sa usa ka awit mahitungod sa usa ka baruganan nga imong nakat-unan sa klase karon (tan-awa sa mga hilisgutan diha sa Songbook sa mga Bata alang sa mga ideya). Dapita ang mga bata sa pagkanta sa awit uban sa ilang mga pamilya.

Pagpalambo sa Atong Pagtudlo

Ipakita sa imong pagpuyo ang unsay imong gitudlo. Ang imong pagtudlo mahimong mas gamhanan kon ikaw makapamatuod gikan sa personal nga kasinatian mahitungod sa mga panalangin sa pagpuyo sa ebanghelyo. Samtang ikaw magpili og mga baruganan nga itudlo sa mga kabataan, palandunga unsaon nimo nga masunod sa mas hingpit nga paagi kadto nga mga baruganan. (Tan-awa sa Pagtudlo sumala sa Pamaagi sa Manluluwas, 13–14.)