“Hulyo 25–31. Ester: ‘Ikaw [Nahiabot] … sa Maingon Niini nga Panahona,’” Dali, Sunod Kanako––Alang sa mga Indibidwal ug mga Pamilya: Daang Tugon 2022 (2021)
“Hulyo 25–31. Ester,” Dali, Sunod Kanako—Alang sa mga Indibidwal ug mga Pamilya: 2022
Esther [Ester], ni James Johnson
Hulyo 25–31
Ester
“Ikaw [Nahiabot] … sa Maingon Niini nga Panahona”
Samtang magbasa ka sa Ester, pagtinguha og inspirasyon gikan sa Espiritu nga gipahaom kanimo, ug irekord ang mga impresyon nga imong nadawat.
Irekord ang Imong mga Impresyon
Daghang panghitabo diha sa basahon ni Ester makita nga daw swerte o sulagma. Unsaon pa man nimo sa pagpasabot kon sa unsang paagi ang usa ka ilo nga babayeng Judeo nahimong rayna sa Persia sa tukma gayod nga panahon aron maluwas ang iyang katawhan gikan sa pagkapatay? Unsa ang kahigayonan nga ang ig-agaw ni Ester nga si Mardocheo sulagma nga nakadungog sa usa ka plano sa pagpatay sa hari? Kini ba mga sulagma, o parte kini sa usa ka balaanon nga plano? Si Elder Ronald A. Rasband misulti: “ Ang unsay morag sulagma lang, sa pagkatinuod, gidumala sa usa ka mahigugmaong Amahan sa Langit. … Ang impluwensya sa Ginoo makita sa ginagmayng mga detalye sa atong kinabuhi” (“Pinaagi sa Balaan nga Plano,” Liahona, Nob. 2017, 56). Dili nato kanunay mailhan ang impluwensya sa Ginoo niining “ginagmayng mga detalye.” Apan atong nakat-onan gikan sa kasinatian ni Ester nga makagiya Siya sa atong dalan ug makaandam kanato “sa maingon niini nga panahona” (Ester 4:14) sa diha nga mamahimo kitang mga instrumento sa Iyang mga kamot sa pagtuman sa Iyang mga katuyoan.
Alang sa kinatibuk-ang pagpasabut sa basahon sa Ester, tan-awa ang “Ester” sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Ang Ginoo makahimo kanako nga instrumento sa pagpanalangin sa uban.
Si Sister Anne C. Pingree mitudlo: “Ang pagkahimo nga instrumento sa mga kamot sa Dios maoy usa ka dakong pribilehiyo ug sagrado nga responsibilidad. Bisag asa kita magpuyo, bisag unsa ang atong mga kahimtang, bisag unsay atong marital status o edad, ang Ginoo nagkinahanglan sa kada usa kanato para motuman sa [atong] talagsaong bahin sa pagtukod sa Iyang gingharian niining kataposang dispensasyon” (“Pagkasayod sa Kabubut-on sa Ginoo alang Kaninyo,” Liahona, Nob. 2005, 112).
Samtang magbasa ka sa istorya ni Ester, pamalandongi kon sa unsang paagi kini na pamahayag magamit ngadto kaniya. Pangita og mga paagi nga ang Ginoo mihimong posible kaniya sa pagluwas sa mga Judeo (tan-awa, sama pananglit, sa Ester 2:21–23; 3:10–14; 4:14–16). Dayon pamalandongi kon sa unsang paagi nga migiya Siya sa imong kinabuhi sa mga paagi nga nagtugot kanimo sa pagpanalangin sa uban. Unsa ang pipila ka mga sirkumstansya o mga relasyon nga gibati nimo nga Siya migiya kanimo “sa maingon niini nga panahona”? (Ester 4:14). Kon ikaw adunay patriyarkal nga panalangin, ikonsiderar ang pagbasa niini aron makakat-on pa mahitungod sa buhat nga ipabuhat sa Ginoo kanimo.
Ang garbo ug kasuko mahimong mosangpot sa pagkapukan.
Sa basahon ni Ester, nakakat-on kita gikan sa pagkamatinud-anon ni Ester ug Mardocheo ingon man gikan sa garbo ug kasuko ni Aman. Samtang magbasa ka sa Ester 3; 5:9–14, ikonsiderar ang pagtimaan sa mga pagbati, mga pulong, ug mga binuhatan ni Aman. Unsa ang gibutyag niini mahitungod kaniya ug sa iyang mga tinguha? Unsa nga mga sangpotanan ang iyang giatubang? (tan-awa sa Ester 7). Ang pagbasa mahitungod ni Aman mahimong moaghat kanimo sa pagtimbang-timbang kon unsa ang nagdasig sa imong mga pagbati ug mga buhat. Gidasig ka ba sa paghimo og bisan unsa nga mga kausaban? Unsaon nimo sa pagdangop sa Langitnong Amahan alang sa tabang?
Tan-awa usab sa Proverbios 16:32; Alma 5:28.
Ang pagpuasa nagpakita sa akong pag-agad sa Ginoo.
Timan-i ang mga kahimtang nga nakapahimo ni Ester ug sa tanang mga Judeo sa pagpuasa (tan-awa sa Ester 3:13; 4:1–3, 10–17). Sa unsang paagi nga ang pagpuasa usa ka panalangin ngadto kanila? (tan-awa sa Ester 5:2–3; 8:11–12). Nganong mihangyo man ang Ginoo kanato nga magpuasa? Hunahunaa kon unsay imong mabuhat aron sa paghimo sa puasa nga mas dako nga panalangin sa imong kinabuhi.
Tan-awa usab sa Isaias 58:6–12; Mateo 4:1–4; 17:14–21.
Ang pagbuhat sa matarong kasagaran nagkinahanglan og dakong kaisog.
Sa dihang gipanalipdan ni Mardocheo ug Ester ang ilang mga tinuohan, gibutang nila ang ilang kinabuhi sa peligro. Ang atong mga pagpili adunay mga sangpotanan nga tingali dili ingon ka grabe, apan ang pagbuhat sa matarong magkinahanglan gihapon og kaisog. Unsa ang imong nakat-onan gikan sa Ester 3:1–4; 4:10–17 mahitungod sa pagbaton og kaisog sa pagbuhat sa matarong? Timan-i ang managlahi nga mga sangpotanan nga nasinati ni Mardocheo ug Ester human mopakita og kaisog (tan-awa sa Ester 3:5–11; 5:1–4). Unsa ang kinahanglang mahibaloan sa usa ka tawo mahitungod sa Dios aron makahimo sa mga pagpili nga gihimo ni Ester ug Mardocheo—sa pagbuhat sa matarong bisan unsa pa ang mga sangpotanan?
Sa sunod higayon nga imong hunahunaon ang mga sangpotanan sa pagbuhat sa matarong, mahimo nimong gamiton ang maisugon nga mga pulong ni Ester diha sa Ester 4:16 sa imong kaugalingong sitwasyon. Sama pananglit, mahimo ka nga mosulti sa imong kaugalingon, “Kon mopili ko sa matarong, kon ako [mawad-an og mga higala], ako [mawad-an og mga higala].”
Tan-awa usab sa Thomas S. Monson, “Unta Kamo Adunay Kaisug,” Liahona, Mayo 2009, 123–27.
Esther before the King [Si Ester sa atubangan sa Hari], ni Minerva K. Teichert
Mga Ideya alang sa Pamilya nga Pagtuon sa Kasulatan ug Family Home Evening
-
Ester 1–10.Human maribyu ang istorya ni Ester (tan-awa sa “Ester” sa Mga Istorya sa Daang Tugon), ang imong pamilya tingali malingaw sa paghimo og yano nga mga tawo-tawo [puppet] sa pipila sa mga tawo diha sa istorya (tan-awa sa pahina sa kalihokan niining semanaha diha sa Dali, Sunod Kanako—Alang sa Primary). Mahimo dayon nila kining gamiton sa pagsaysay og usab sa istorya. Mahimo usab kamong manganta ug usa ka awit mahitungod sa pagkahimong maisog ug matinuoron, sama sa “Buhata Gayud ang Matarung” (Songbook sa mga Bata, 80) o “Buhata Unsa ang Matarung” (Mga Himno, nu. 145). Unsa nga mga pulong diha sa awit ang nagpahinumdom kanato kang Ester?
-
Ester 2:5–7.Unsa ang atong makat-unan gikan sa ehemplo ni Mardocheo mahitungod sa pagtabang sa mga sakop sa pamilya sa mga panahon sa pagsulay? Kinsa sa atong pamilya ang nagkinahanglan sa atong suporta? Paghimo og plano sa pagtabang kanila.
-
Ester 4:15–17.Ang kaisog ni Ester mahimong makadasig sa inyong pamilya sa paghisgot kon unsaon sa pagpalambo og kaisog nga manalipod sa kamatuoran sa mga sitwasyon nga ilang giatubang. Unsa ang gipasabot ni Ester sa “Kon ako mamatay, mamatay ako”? Sa unsang paagi nga ang iyang mga pulong magamit kanato kon kinahanglan kita nga magmaisugon?
-
Ester 9:26–32.Ang fiesta sa Judeo nga Purim gi-establisar aron sa paghinumdom sa istorya ni Ester. Sa oras tingkaon niining semanaha, ikonsiderar ang pagpaambit of mga istorya sa dihang ang mga sakop sa inyong pamilya, lakip sa katigulangan, mipanalangin sa uban pinaagi sa pagpanalipod sa matarong sama sa gibuhat ni Ester.
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Buhata Gyud ang Matarung,” Songbook sa mga Bata, 80.
Pagpalambo sa Atong Pagtudlo
Sunda ang kinabuhi sa Manluluwas. “Apan ang gahum sa Manluluwas sa pagtudlo ug pagbayaw sa uban naggikan sa paagi sa Iyang pagpakabuhi ug unsa Siya nga matang sa tawo. Kon mas makugihon ka nga naningkamot nga magpakabuhi sama ni Jesukristo, mas makahimo ka sa pagtudlo sama Kaniya” (Pagtudlo sumala sa Pamaagi sa Manluluwas, 13).
Queen Esther [Rayna Ester], ni Minerva K. Teichert, © William ug Betty Stokes