Paghulagway sa templo ni Zorobabel, ni Sam Lawlor

Hulyo 18–24

Esdras 1; 3–7; Nehemias 2; 4–6; 8

“Ako Nagabuhat og Usa ka Dakong Buhat”

Si Presidente Ezra Taft Benson mitudlo, “Ang pulong sa Dios … adunay gahum sa pagpalig-on sa mga Santos ug pagsangkap kanila sa Espiritu aron sila makasagubang sa dautan, makagunit og hugot ngadto sa maayo, ug makakaplag og kalipay dinhi niini nga kinabuhi” (Mga Pagtulun-an sa mga Presidente sa Simbahan: Ezra Taft Benson [2014], 141).

Irekord ang Imong mga Impresyon

Ang katawhang Judeo nahimong bihag sa Babilonia sulod sa mga 70 ka tuig. Nawala kanila ang Jerusalem ug ang templo, ug daghan ang nakalimot sa ilang pasalig ngadto sa balaod sa Dios. Apan ang Dios wala makalimot kanila. Gani, mideklarar Siya pinaagi sa Iyang propeta, “Duawon ko kamo, ug tumanon ko ang akong maayong pulong nganha kaninyo, sa pagpabalik kaninyo” (Jeremias 29:10). Nagtuman niini nga panagna, ang Ginoo mihimo og paagi aron makabalik ang mga Judeo, ug mipatungha siya og mga sulugoon kinsa nakahimo og “usa ka dakong buhat” alang sa Iyang katawhan (Nehemias 6:3). Kini nga mga sulugoon naglakip og usa ka gobernador nga ginganlan og Zorobabel, kinsa midumala sa pagtukod og usab sa balay sa Ginoo; si Esdras, usa ka pari ug tigsulat kinsa mipabalik sa mga kasingkasing sa katawhan ngadto sa balaod sa Ginoo; ug si Nehemias, usa ka gobernador sa ulahing bahin sa Juda kinsa nangulo sa pagtukod og usab sa mga paril nga nagpanalipod libot sa Jerusalem. Siyempre, nakasugat sila og oposisyon apan nakadawat usab sila og tabang gikan sa wala damha nga mga tinubdan. Ang ilang mga kasinatian makatudlo ug makadasig kanato, tungod kay kita usab naghimo og dakong buhat. Ug sama sa ilaha, ang atong buhat dako kaayo og kalabutan sa balay sa Ginoo, sa balaod sa Ginoo, ug sa espirituhanong panalipod nga atong makita diha Kaniya.

Alang sa kinatibuk-ang pagpasabot sa mga basahon sa Esdras ug Nehemias, tan-awa sa “Esdras” ug “Nehemias” sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Esdras 1

Ang Ginoo modasig sa mga tawo aron mapahinabo ang Iyang mga katuyoan.

Human mabuntog sa Persia ang Babilonia, ang hari sa Persia, si Ciro, gidasig sa Ginoo sa pagpadala og usa ka grupo sa mga Judeo ngadto sa Jerusalem aron sa pagtukod og usab sa templo. Samtang magbasa ka sa Esdras 1, timan-i kon unsa ang andam nga buhaton ni Ciro aron sa pagsuporta sa mga Judeo niining importante nga buhat. Sa unsang paagi nimo nakita ang Ginoo nga milihok pinaagi sa mga lalaki ug mga babaye sa imong palibot, lakip niadtong dili mga miyembro sa Iyang Simbahan? Unsa ang gisugyot niini kanimo mahitungod sa Ginoo ug sa Iyang buhat?

Tan-awa usab sa Isaias 44:24–28.

Esdras 3:8–13; 6:16–22

Ang mga templo makahatag kanato og kalipay.

Sa dihang ang mga taga-Babilonia misulong sa Jerusalem, gilungkab nila ang templo ug gisunog kini hangtod naugdaw (tan-awa sa 2 Mga Hari 25:1–10; 2 Cronicas 36:17–19). Unsa kaha ang imong bation kon kauban ka sa mga Judeo nga nakasaksi niini? (tan-awa sa Salmo 137). Timan-i kon unsa ang gibati sa mga Judeo, paglabay sa mga dekada, sa dihang gitugotan sila nga mobalik ug motukod og usab sa templo (tan-awa sa Esdras 3:8–13; 6:16–22). Pamalandongi ang imong kaugalingon nga mga pagbati mahitungod sa templo. Nganong ang mga templo usa man ka tinubdan sa kalipay? Unsaon nimo sa pagpakita sa imong pagpasalamat sa Ginoo alang sa mga templo?

Ang templo mahimong usa ka tinubdan sa kalipay sa atong kinabuhi.

Esdras 4–6; Nehemias 2; 4; 6

Makatabang ako sa pagpauswag sa buhat sa Dios bisan pa sa oposisyon.

Ang buhat sa Ginoo panagsa ra nga walay mosupak, ug tinuod gayod kini sa mga paningkamot nga gipangulohan ni Zorobabel ug Nehemias. Sa duha ka sitwasyon, ang “mga kabatok sa Juda” (Esdras 4:1) mga Samarianhon—mga kaliwat sa mga Israelihanon kinsa nakigsagol sa mga Hentil. Ang pagbasa mahitungod sa ilang oposisyon sa pagtukod sa templo (tan-awa sa Esdras 4–6) makapahimo tingali kanimo sa pagpamalandong sa oposisyon nga giatubang sa buhat sa Dios karon ug unsaon nimo sa pagtubag kon moabot ang oposisyon.

Sa samang paagi, ang pagbasa mahitungod sa buhat ni Nehemias sa pag-ayo sa mga paril sa Jerusalem (tan-awa sa Nehemias 2; 4; 6) tingali makapahimo kanimo sa pagpamalandong sa buhat nga gusto sa Dios nga imong buhaton. Unsa ang imong nakat-unan gikan sa ehemplo ni Nehemias?

Tan-awa usab sa Dieter F. Uchtdorf, “Kita Nagbuhat og Dako nga Buhat ug Dili Makaanha,” Liahona, Mayo 2009, 59–62.

Esdras 7; Nehemias 8

Mapanalanginan ko kon magtuon ko sa mga kasulatan.

Bisan nga nahuman na ang pagtukod og usab sa templo, ang mga tawo sa Jerusalem nanlimbasog sa espirituhanong paagi, sa usa ka bahin tungod kay, sulod sa mga henerasyon, limitado ang ilang kahigayonan sa paggamit “sa basahon sa kasugoan ni Moises” (Nehemias 8:1). Si Esdras nga tigsulat nakadawat og pagtugot gikan sa hari sa Persia sa pag-adto sa Jerusalem, diin iyang “gidala … ang kasugoan sa atubangan sa katilingban” (Nehemias 8:2). Sa unsang paagi nimo masunod ang ehemplo ni Esdras sumala sa gihulagway diha sa Esdras 7:10? Samtang magbasa ka sa Nehemias 8, nga naghatag sa istorya ni Esdras nga mibasa sa balaod ngadto sa katawhan, unsa ang imong mga hunahuna mahitungod sa gahom sa pulong sa Dios diha sa imong kinabuhi?

Tan-awa usab sa Mga Pagtulun-an: Ezra Taft Benson, 137–49.

Mga Ideya alang sa Pamilya nga Pagtuon sa Kasulatan ug Family Home Evening

Esdras 3:8–13; 6:16–22.Giunsa sa mga Judeo sa pagpakita sa ilang kalipay alang sa templo samtang gitukod kini og balik ug dayon samtang gipahinungod kini? Unsa ang atong gibuhat aron mapakita ang atong kalipay alang sa templo? Tingali ang inyong pamilya mahimong motan-aw sa mga litrato sa mga templo ug maghisgot kon sa unsang paagi ang mga templo makahatag kaninyo og kalipay.(tan-awa sa temples.ChurchofJesusChrist.org).

Esdras 7:6, 9–10, 27–28.Sa pipila ka higayon dinhi niini nga mga bersikulo, si Esdras misulat nga ang kamot sa Ginoo anaa kaniya samtang mibiyahe siya ngadto sa Jerusalem. Unsa kaha ang gipasabut niini nga hugpong sa mga pulong? Sa unsang paagi nato nabati ang kamot sa Ginoo diha kanato? Tingali ang mga sakop sa pamilya mahimong mopaambit og mga ehemplo gikan sa ilang kinabuhi.

Nehemias 2; 4; 6.Ang istorya ni Nehemias makadasig sa mga sakop sa pamilya kon mag-atubang sila og oposisyon samtang mobuhat sila og “usa ka dakong buhat” (Nehemias 6:3). Ang mga sakop sa pamilya mahimong magtukod og paril gikan sa mga butang nga anaa sa palibot sa inyong panimalay samtang dungan kamo nga magbasa sa importanting mga tudling (sama sa Nehemias 2:17–20; 4:13–18; 6:1–3). Unsa ang atong nakat-unan gikan ni Nehemias mahitungod sa pag-atubang og oposisyon? Unsa nga dakong buhat ang gusto sa Ginoo nga atong buhaton? Sa unsang paagi ang Ginoo milig-on kanato sa pagbuntog sa oposisyon niini nga buhat?

Nehemias 8:1–12.Sa Nehemias 8, gibasa ni Esdras ang balaod ni Moises ngadto sa usa ka katawhan kinsa mahinamon nga naminaw sa pulong sa Dios. Ang pagbasa sa mga bersikulo 1–12 makatabang sa pagpalawom sa pagtamod sa inyong pamilya alang sa pulong sa Dios. Unsa ang gibati sa mga tawo mahitungod sa balaod sa Dios? Unsaon nato sa pagtabang ang usag usa nga “[ma]kasabot sa gibasa”? (bersikulo 8).

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Gusto ko nga Makita ang Templo,” Songbook sa mga Bata, 99.

Pagpalambo sa Atong Pagtudlo

Pagpaambit og mga kasulatan isip pamilya. Panahon sa pagtuon sa kasulatan sa inyong pamilya, tugoti ang mga sakop sa pamilya sa pagpaambit og mga tudling gikan sa ilang personal nga pagtuon nga labing makahuluganon kanila.

Paghulagway ni Esdras nga nagbasa sa mga kasulatan ngadto sa katawhan sa Jerusalem, ni H. Willard Ortlip, © Providence Collection/gilisensyahan gikan sa goodsalt.com