Paghulagway ni Eliseo nagpakita sa iyang sulugoon sa mga karro sa kalayo, © Ribyu & Herald Publishing/pagtugot gikan sa goodsalt.com

Hulyo 4–10

2 Mga Hari 2–7

“Adunay Usa ka Propeta sa Israel”

Ang mga kalihokan dinhi niini nga outline gituyo aron sa pagpakidlap sa imong kaugalingong mamugnaon nga mga ideya. Pinaagi sa mainampoong pagtuon, ikaw makadawat og inspirasyon sa pagtubag sa mga panginahanglan sa mga kabataan nga imong gitudloan.

I-rekord ang Imong mga Panghunahuna

Dapita ang Pagpaambit

Aron sa pag-awhag sa mga kabataan sa pagpakigbahin unsay ilang nahibaloan mahitungod ni propeta Eliseo, dapita sila sa pagdrowing og hulagway sa usa ka butang nga iyang gihimo.

Itudlo ang Doktrina: Mas Gagmay nga mga Bata

2 Mga Hari 4–5

Ang Dios makahimo og mga milagro sa akong kinabuhi.

Pinaagi ni propeta Eliseo, gipanalanginan sa Ginoo ang daghang mga tawo sa milagrosong mga paagi. Tabangi ang mga kabataan sa pag-ila sa mga milagro sa Ginoo diha sa ilang mga kinabuhi.

Posible nga mga Kalihokan

• Pakigbahin og usa o daghan pa sa mga milagro nga gi-rekord diha sa 2 Mga Hari 4–5 (tan-awa sa “Ang Propeta Eliseo:Tulo ka mga Milagro” diha sa Mga Istorya sa Daang Tugon). Dapita ang mga bata sa pagpakigbahin unsay ilang nagustohan mahitungod niini nga mga istorya. Dapita sila sa pagpaistorya og balik ngadto sa usag usa.

• Ipamatuod nga ang Ginoo makagamit sa Iyang gahum sa pagbuhat og mahinungdanong mga butang aron sa pagtabang kanato. Gitawag nato kining mga butanga og mga milagro. Ipakigbahin kon giunsa sa Ginoo pagpakita sa Iyang gugma alang kanimo sa mga paagi nga dagko o gagmay. Panganta og dungan sa usa ka awit mahitungod sa gugma sa Dios, sama sa “Gihigugma Ako sa Langitnong Amahan” (Songbook sa mga Bata, 16–17). Hangyoa ang mga bata sa pagpakigbahin giunsa nila sa pagkahibalo nga ang Langitnong Amahan nahigugma kanila.

2 Mga Hari 5:1–15

Ako makapili sa pagbuhat unsay mga sugo sa Dios pinaagi sa Iyang propeta.

Si Naaman naglisud sa pagsunod sa dihang si propeta Eliseo misulti kaniya kon sa unsa nga paagi mamaayo sa sanla. Pamalandonga kon unsaon nimo sa pagtabang ang mga kabataan sa pagsabut sa mga panalangin nga moabut tungod sa pagkamasulundon.

Posible nga mga Kalihokan

• I-asoy ang istorya ni Naaman (tan-awa diha sa 2 Mga Hari 5:9–14; “Ang Propeta Eliseo: Tulo ka mga Milagro” diha sa Mga Istorya sa Daang Tugon; tan-awa usab ang hulagway ni Naaman diha sa outline niini nga semana sa Dali, Sunod Kanako—Alang sa mga Indibidwal ug mga Pamilya). Hatagi og gibug-aton nga sa una si Naaman dili buot nga maligo sa Suba sa Jordan, bisan tuod og gisultihan siya ni Eliseo nga kini moayo sa iyang sakit. Sulti mahitungod sa usa ka panahon nga ikaw dili sigurado nga imong buhaton ang matarung nga butang, ug tabangi ang mga kabataan sa paghunahuna og kaugalingon nilang mga ehemplo. Dayon ipakigbahin kon sa unsa nga paagi si Naaman napanalanginan sa dihang gibuhat niya ang matarung nga pagpili.

• Basaha ang 2 Mga Hari 5:13 ngadto sa mga kabataan, ug ipasabut nga ang mga sulugoon ni Naaman mitabang kaniya sa paghukom sa pagsunod ni propeta Eliseo. Tabangi ang mga kabataan sa paghunahuna og mga paagi nga sila makatabang sa ilang mga higala o mga sakop sa pamilya sa pagpaminaw ug sa pagsunod sa propeta.

2 Mga Hari 6:8–17

Ang Ginoo nagbantay kanako.

Sa dihang ang sulugoon ni Eliseo nakakita sa kasundalohan sa Siria nga naglibut kanila, nahadlok kaayo siya. Apan, misulti si Eliseo kaniya nga “ayaw kahadlok” tungod kay ang Ginoo nag-uban kanato (2 Mga Hari 6:16).

Posible nga mga Kalihokan

• Basaha ang 2 Mga Hari 6:15 ngadto sa mga kabataan, o hubara kini aron sila makasabut. Dapita ang mga kabataan sa paghanduraw nga sila gilibutan og dako kaayong kasundalohan nga may nga kabayo ug mga karro sama sa sulugoon ni Eliseo. Unsay ilang bation? Unsay ilang buhaton? Hangyoa sila sa pagpiyong sa ilang mga mata samtang imong basahon ang 2 Mga Hari 6:16–17 ngadto kanila. Kon ikaw moabut na sa mga pulong “bukha ang iyang mga mata,” hangyoa ang mga kabataan sa pagbuka sa ilang mga mata. Ihulagway ngadto kanila unsa ang nakita sa sulugoon nga nagpanalipod kaniya ug ni Eliseo. Ipakigbahin kon giunsa nimo sa pagkahibalo nga ang Ginoo nagbantay kanato.

• Panganta og dungan sa usa ka awit mahitungod sa pag-amuma sa Dios alang kanato, sama sa unang bersikulo sa “Pinalangga nga mga Anak, Ang Dios Duol Kaninyo” (Mga Himno, nu. 50). Ilisi ang mga pulong sa awit og mga ngalan sa mga kabataan aron sa paghatag og gibug-aton nga ang Dios nagbantay kanila.

Itudlo ang Doktrina: Mas Dagko nga mga Bata

2 Mga Hari 4–5

Ang Dios makahimo og mga milagro sa akong kinabuhi.

Sa panahon sa iyang pangalagad, giayo ug gipanalanginan ni Eliseo ang daghang mga tawo. Sa unsa nga paagi nga ang mga milagro diha sa 2 Mga Hari 4–5 nagtabang sa mga kabataan nga makaila sa Langitnong Amahan diha sa ilang mga kinabuhi?

Posible nga mga Kalihokan

• Dapita ang mga kabataan sa pagsulat diha sa pisara og daghang mga milagro kutob sa ilang mahinumduman gikan sa mga kasulatan. Dayon hatagi sila og panahon sa pagribyu sa 2 Mga Hari 4–5 ug idugang ngadto sa ilang lista (tan-awa sa 2 Mga Hari 4:1–7, 14–17, 32–35, 38–41, 42–44; 5:10–14). Unsa ang gitudlo niini nga mga milagro mahitungod sa paagi nga ang Langitnong Amahan mibati mahitungod kanato?

• Hangyoa ang mga kabataan sa pagsulti mahitungod sa unsa ang milagro. Kon gikinahanglan nila ang tabang, mahimo silang makaribyu sa “Milagro” diha sa Ang Giya ngadto sa mga Kasulatan (scriptures.ChurchofJesusChrist.org). Dapita sila sa pagpakigbahin og pipila ka mga milagro nga gihimo ni Jesus. Pagsulti mahitungod sa giunsa nimo pagkakita sa gahum sa Dios diha sa imong kinabuhi. Mahimo tingali nimong i-apil ang inadlaw nga mga milagro sama sa mga pagbati sa kalinaw, sa gasa sa matag adlaw nga kinabuhi o sa tabang sa inadlaw nga mga buhat. Dapita ang mga kabataan sa pagsulti mahitungod sa mga milagro sa ilang mga kinabuhi, dagko ug gagmay.

2 Mga Hari 5:1–15

Ako makapili nga magmatinud-anon, magmapainubsanon, ug magmasulundon.

Gusto ni Naaman nga mamaayo sa sanla, apan wala siya magpaabut sa yano nga panudlo nga gihatag ni Eliseo kaniya:“Lakaw og maghugas ka didto sa Jordan sa makapito” (2 Mga Hari 5:10). Hunahunaa unsaon nimo sa paggamit kini nga istorya sa pagtudlo sa mga kabataan mahitungod sa hugot nga pagtuo diha ni Jesukristo, pagkamapainubsanon, ug pagkamasulundon.

Posible nga mga Kalihokan

• Isulat ang hugot nga pagtuo, pagkamapainubsanon, ug pagkamasulundon diha sa pisara, ug pangutan-a ang mga kabataan unsay kahulugan niini nga mga pulong (tan-awa diha sa Matinud-anon sa Tinuohan, 49–51, 142–143, 143). Dapita ang mga bata sa pagbasa sa 2 Mga Hari 5:9–14. Giunsa ni Naaman sa pagpakita og hugot nga pagtuo diha sa Ginoo, pagkamapainubsanon, ug pagkamasulundon? Nganong importante kini alang kanato nga magbaton niini nga mga kalidad?

• Hangyoa ang mga kabataan sa pagsulti mahitungod sa usa ka panahon sa dihang usa ka higala mitabang kanila sa pagpili sa matarung. Usab pakigbahin og kaugalingon nimong kasinatian. Pagbasa og dungan sa 2 Mga Hari 5:10–13 aron mahibalo giunsa sa sulugoon ni Naaman pagtabang kaniya sa pagpili nga sundon ang propeta. Unsa ang atong mabuhat sa pagtabang sa usag usa sa pagsunod sa atong propeta karon?

• Dapita ang mga kabataan sa pagkompleto sa pahina sa kalihokan ug sa pagpakigbahin ngadto sa sakop sa pamilya o higala og usa ka butang nga ilang nakat-unan gikan sa istorya ni Naaman diha sa 2 Mga Hari 5:1–15.

2 Mga Hari 6:8–17

Wala ako mag-inusara.

Ang mga kabataan nga imong gitudloan usahay mahimong mobati sama sa sulugoon ni Eliseo––nagduha-duha kon unsaon sa pagsagubang sa mga hagit nga ilang giatubang. Makagamit ka sa asoy diha sa 2 Mga Hari 6:8–17 sa pagtudlo kanila sa “ayaw kahadlok” tungod kay ang Ginoo wala magbiya kanila nga nag-inusara.

Posible nga mga Kalihokan

• Pagbasa og dungan sa 2 Mga Hari 6:15–17. Dapita ang usa sa mga kabataan sa pagpakaaron-ingnon nga sulugoon ni Eliseo samtang ang uban nga mga kabataan mangutana mahitungod sa iyang kasinatian sama sa unsa ang iyang gibati sa dihang ang mga kasundalohan sa Siria mipalibut sa siyudad o sama sa unsa kini nga makakita sa kasundalohan sa Dios. Pakigsulti sa mga kabataan mahitungod sa mga panahon sa dihang gibati nila ang pag-inusara sa pagpaninguha sa pagpuyo sa ebanghelyo. Sa unsa nga paagi ang Ginoo nagtabang kanato nga mahibalo nga kita wala mag-inusara?

• Kanta og usa ka awit mahitungod sa pagsalig diha sa Ginoo, sama sa “Kon Molahutay ang Pagtuo” (Mga Himno, nu. 74). Unsa ang gitudlo niini nga awit kanato mahitungod sa pagsalig diha sa Ginoo?

Awhaga ang Pagkat-on diha sa Panimalay

Dapita ang mga kabataan sa pagpakigbahin og mga kasinatian uban sa ilang mga pamilya sa dihang naila nila ang gahum sa Dios diha sa ilang mga kinabuhi. Awhaga sila sa paghangyo sa mga sakop sa ilang pamilya sa pagpakigbahin og susama nga mga kasinatian.

Pagpalambo sa Atong Pagtudlo

Ang mga kabataan makakat-on sa daghang mga paagi. “Ang imong mga paninguha sa pagtudlo sa mga kabataan mahimong labing epektibo samtang ikaw maggamit og nagkalainlaing mga pamaagi sa pagtudlo,” lakip ang mga istorya, mga tabang sa pagtan-aw, [visual aids] ug musika (Pagtudlo sumala sa Pamaagi sa Manluluwas, 25).