The Flight of the Prisoners [Ang Biyahe sa mga Binilanggo], ni James Tissot ug uban pa

Hulyo 11–17

2 Mga Hari 17–25

“Siya Misalig sa Ginoong Dios sa Israel”

Samtang ikaw nagplano sa mga kalihokan sa pagtuon alang sa mga kabataan, hinumdumi nga ang mga kalihokan alang sa mas gagmay nga mga bata dinhi niini nga outline mahimo nga mapahiangay alang sa mas dagko nga mga bata ug magbinayloay.

I-rekord ang Imong mga Panghunahuna

Dapita ang Pagpaambit

Isulat ang ngalan sa matag bata diha sa usa ka piraso nga papel, ug ibutang ang mga papel sa usa ka sudlanan. Sa sinugdanan sa klase, papuli-puliha ang mga kabataan sa pagpili og usa ka ngalan. Kon ang ngalan sa usa ka bata mahulbotan, dapita kana nga bata sa pagpakigbahin og usa ka butang nga bag-o niyang nakat-unan mahitungod sa ebanghelyo o mahitungod ni Jesukristo. Ipadayon hangtud nga ang matag bata adunay oportunidad sa pagpakigbahin.

Itudlo ang Doktrina: Mas Gagmay nga mga Bata

2 Mga Hari 18:3, 5

Ako makasalig sa Langitnong Amahan ug ni Jesukristo.

Ang ehemplo ni Ezechias diha sa 2 Mga Hari 18:3, 5 makatabang sa mga kabataan nga imong gitudloan sa pagbutang sa ilang pagsalig diha sa Dios.

Posible nga mga Kalihokan

• Paghingalan og pipila ka mga butang nga tingali buhaton sa usa ka maayong hari ug pipila ka mga butang nga tingali buhaton sa usa ka dili maayo nga hari. Hangyoa ang mga kabataan sa pagtindog ug sa pag-abiba alang sa maayong mga butang ug sa paglingkod alang sa dili maayo nga mga butang. Ipasabut ngadto sa mga kabataan nga ang Israel dihay daghang mga hari, ang pipila matarung ug ang pipila dili. Dapita ang mga kabataan sa pagpaminaw alang sa unsay mihimo ni Ezechias nga usa ka maayong hari samtang imong basahon ang 2 Mga Hari 18:3, 5. Tabangi sila sa paghunahuna og mga paagi nga kita makapakita nga mosalig kita sa Ginoo sama sa gibuhat ni Ezechias.

• Tabangi ang mga kabataan sa pagsabut unsay kahulugan sa mosalig og usa ka tawo. Pagsulti mahitungod og mga tawo nga ikaw mosalig, ug pasultiha usab ang mga kabataan. Pagpakita og hulagway ni Jesukristo. Nganong kita makasalig ni Jesukristo? Ipahayag ang imong pagsalig nga si Jesukristo nahigugma kanato ug motabang kanato sa pagbalik og puyo sa hangtud uban sa Langitnong Amahan.

2 Mga Hari 22:8–11; 23:2

Ang mga kasulatan usa ka panalangin.

Bisan tuod ang mas gagmay nga mga kabataan dili makabasa o makasabut sa tanan diha sa mga kasulatan, sila mapanalanginan pinaagi sa gahum sa mga kasulatan. Unsay imong mabuhat sa pagtabang kanila sa pagbaton og tinguha nga mapanalanginan pinaagi sa pulong sa Dios?

Posible nga mga Kalihokan

• Pagtago og usa ka kopya sa mga kasulatan bisan asa diha sa kwarto, ug dapita ang mga kabataan sa pagpangita niini. Ipasabut nga sa mga panahon ni Hari Josias, kadaghanan sa mga katawhan wala magkat-on gikan sa mga kasulatan hangtud usa ka pari nakakaplag niini diha sa templo (tan-awa sa 2 Mga Hari 22:8–11). Unsa ang mga kasulatan? Nganong kita nagkinahanglan sa mga kasulatan? Sultihi ang mga kabataan nganong ikaw malipayon nga kita adunay mga kasulatan karon, ug himoa nga sila mopakigbahin sa ilang mga pagbati mahitungod sa mga kasulatan.

• Basaha ang 2 Mga Hari 23:2 ngadto sa mga kabataan, ug hangyoa sila sa pagpaminaw alang sa unsay gibuhat sa hari sa mga kasulatan. Nganong importante kini alang sa tanan sa pagpaminaw unsay nahisulat diha sa mga kasulatan? Pagkanta og usa ka awit mahitungod sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66), ug hangyoa ang mga kabataan sa pagsulti mahitungod sa unsay ilang gibati kon sila makadungog og mga pagtulun-an ug mga istorya gikan sa mga kasulatan.

  

  Ang mga kasulatan makatabang sa pagpadangop sa atong mga kasingkasing ngadto sa Ginoo.

Itudlo ang Doktrina: Mas Dagko nga mga Bata

2 Mga Hari 18:3–6; 19:14–19

Ako makasalig sa Langitnong Amahan ug ni Jesukristo.

Sa dihang ang mga Asirianhon mihulga sa Jerusalem, ang matarung nga Hari Ezechias midangop ngadto sa Ginoo diha sa hugot nga pagtuo. Ang ehemplo ni Ezechias makatabang kanimo ug sa mga kabataan sa pagsulti mahitungod kon unsaon nga kita makapakita sa atong hugot nga pagtuo diha sa Ginoo, bisan og kana nga hugot nga pagtuo gihagit.

Posible nga mga Kalihokan

• Gamit ang mapa 3 sa Biblia, “Ang Pagkabahin sa 12 ka Mga Tribo,” ipasabut sa lakbit ngadto sa mga kabataan nga ang Amihanang gingharian sa Israel nabuntog sa mga katawhan nga gitawag og mga Asirianhon. Ipasabut nga ang mga Asirianhon sa kadugayan misulay sa pagbuntog sa Habagatang gingharian sa Juda. Dapita ang mga kabataan sa paghunahuna kon unsa ang ilang bation kon sila nanimuyo sa Juda ug nahibalo nga ang mga Asirianhon moabut aron sa paglumpag sa siyudad. Hangyoa ang mga kabataan sa pagbasa sa 2 Mga Hari 18:3, 5–6 aron mahibaloan ngano si Hari Ezechias, ang hari sa Juda, nahimong maisug sa dihang miabut ang mga Asirianhon.

• Dapita ang mga kabataan sa pagbasa sa 2 Mga Hari 19:14–19, mangita sa unsay gibuhat ni Ezechias sa dihang ang mga Asirianhon mihulga sa iyang gingharian. Sa unsa nga paagi nga ang pagbuhat niining mga butanga nagpakita nga siya misalig diha sa Ginoo? Unsa ang atong mabuhat sa pagpakita sa atong pagsalig diha sa Ginoo kon kita nagkinahanglan og tabang?

2 Mga Hari 22:8–13; 23:2–3

Ang mga kasulatan nagtudlo kanako kon unsaon sa pagsunod ni Jesukristo.

Human sa mga katuigan sa espirituhanong kangitngit, ang mga Judeo mibag-o sa ilang pasalig ngadto sa Ginoo. Kini nahitabo tungod kay gibalik og hinumdom ni Hari Josias ang basahon sa kasugoan ug gibasa ngadto sa mga katawhan. Kini nga asoy makatabang sa mga kabataan sa pagsabut ngano ang mga kasulatan bililhon kaayo.

Posible nga mga Kalihokan

• Sultihi ang mga kabataan nga si Hari Josias misugo sa iyang mga katawhan sa pag-ayo sa templo, ug samtang ilang gibuhat, sila nakakaplag og usa ka butang nga hilabihan ka bililhon. Dapita ang mga kabataan sa pagbasa sa 2 Mga Hari 22:8–11 aron mahibaloan kon unsa kadto. Ipasabut nga ang basahon nga ilang nakit-an naglangkub og mga pakigsaad ug mga sugo nga ang mga anak sa Israel wala mahibalo. Unsa kaha ang mahitabo kanato kon kita walay mga kasulatan? Pangutan-a ang mga kabataan nganong sila mapasalamaton sa pagbaton sa mga kasulatan. Nganong mas maglisud sa pagsunod sa Manluluwas kon kita wala magbaton sa mga kasulatan?

• Hatagi ang matag bata og usa ka pirasong papel, ug hangyoa sila sa paggisi niini. Ipasabut nga sa panahon ni Hari Josias, ang mga tawo usahay mogisi, o “gigisi” ang ilang mga saput kon sila nasamok. Hangyoa ang mga kabataan sa pagpangita sa pulong “gigisi” diha sa 2 Mga Hari 22:11. Ngano kaha nga si Josias nasamok? Tabangi ang mga kabataan sa pagpangita og tubag diha sa bersikulo 13. Nganong importante alang kanato ang pagbasa kanunay sa mga kasulatan?

• Pagdungan og basa sa 2 Mga Hari 23: 2–3, ug hangyoa ang mga kabataan sa pagpangita kon sa unsa nga paagi nga ang mga kasulatan nagtabang kang Josias ug sa iyang mga katawhan. Pakigbahin uban sa mga kabataan og usa ka kasulatan nga nakapadasig kanimo sa “pagsunod sa Ginoo” (bersikulo 3), ug dapita ang mga kabataan sa pagpakigbahin og mga kasulatan nga nakatabang kanila. Panganta og dungan sa “Tudloi Ko Paglakaw sa Kahayag” (Songbook sa mga Bata).

2 Mga Hari 23:3

Ako mohupot sa akong mga pakigsaad sa Dios.

Sa dihang si Josias ug ang iyang mga katawhan nakakat-on sa mga sugo sa Dios, mihimo sila og usa ka pakigsaad sa pagpuyo niini. Ikaw makatabang sa mga kabataan nga imong gitudloan sa pagtinguha nga magpabiling matinud-anon ngadto sa mga pakigsaad nga ilang gihimo diha sa bunyag.

Posible nga mga Kalihokan

• Dapita ang mga kabataan sa pagbasa sa 2 Mga Hari 23:3 ug sa pagpangita og mga pulong o mga hugpong sa mga pulong nga nagpakita kon unsa ang gibati sa mga katawhan mahitungod sa mga sugo sa Ginoo. Dapita sila sa pagtindog ug pagsulti mahitungod sa unsa kaha ang kahulugan sa “[pagtindog] sa pakigsaad.” Dapita sila sa paglakaw diha sa gibarugan ug sa pagsulti mahitungod sa unsa kahay gipasabut sa “pagsunod sa Ginoo.” Dapita sila sa pagbutang sa ilang mga kamot diha sa ilang mga kasingkasing ug sa pagsugyot og mga paagi nga kita makasunod sa mga sugo “sa bug-os [natong] kasingkasing.”

• Tabangi ang mga kabataan sa paghimo og usa ka lista sa mga saad nga ilang gihimo diha sa bunyag (tan-awa sa Mosiah 18:10; Doktrina ug mga Pakigsaad 20:37, 77, 79). Unsa ang gisaad sa Dios kanato kon atong tumanon ang atong mga pakigsaad? Unsa ang atong nakat-unan gikan sa 2 Mga Hari 23:3 mahitungod kon unsaon nato pagtuman ang atong mga pakigsaad?

Awhaga ang Pagkat-on diha sa Panimalay

Dapita ang mga kabataan sa pagpakigbahin ngadto sa usa ka sakop sa pamilya og usa ka bersikulo sa kasulatan o usa ka istorya gikan sa mga kasulatan nga nagpanalangin kanila.

Pagpalambo sa Atong Pagtudlo

Lig-una ang pagsalig sa mga kabataan. Usa ka paagi sa pagtabang sa mga kabataan pag-angkon og pagsalig mao ang pagdayeg kanila kon sila moapil sa klase. Saari ang mga kabataan nga ang Espiritu Santo motabang kanila samtang sila nagkat-on.