King David Enthroned [Si Hari David Gipalingkod sa Trono], ni Jerry Miles Harston

Hunyo 20–26

2 Samuel 5–7; 11–12; 1 Mga Hari 3; 8; 11

“Ang Imong Gingharian Pagahimoong Malig-on sa Walay Katapusan”

“Ang tibuok nga kasulatan gituga sa Dios, ug may kapuslanan alang sa pagpanudlo, alang sa pagpamadlong, alang sa pagpanul-id, alang sa pagmatoto sa pagkamatarung” (2 Timoteo 3:16).

Irekord ang Imong mga Impresyon

Ang pagmando ni Hari David misugod nga puno sa paglaom. Ang iyang dili matarog nga pagtuo sa pagbuntog kang Goliath nabantog pag-ayo. Isip hari, gihimo niya ang Jerusalem isip iyang kaulohan [capital] ug mihiusa sa Israel (tan-awa sa 2 Samuel 5). Ang gingharian wala pa gayod mahisama niini kalig-on. Apan si David nagpadala sa tintasyon ug nawad-an sa iyang espirituhanong gahum.

Ang pagmando usab sa anak ni David nga si Salomon misugod nga puno sa paglaom. Ang iyang balaanong nadawat nga kaalam ug pag-ila nabantog pag-ayo. Isip hari, napadak-an niya ang mga utlanan sa Israel ug mitukod og halangdong templo alang sa Ginoo. Ang gingharian wala pa gayod mahisama niini kalig-on. Apan si Salomon binuang nga mitugot sa iyang kasingkasing nga madala ngadto sa laing mga dios.

Unsa ang atong makat-unan gikan niining subo nga mga istorya? Tingali ang usa ka leksyon mao nga bisan unsa pa ang atong nangagi nga mga kasinatian, ang atong espirituhanong kalig-on mag-agad sa mga pagpili nga atong himoon karon. Masabtan usab nato dinhi niini nga mga istorya nga dili ang atong kaugalingong kalig-on o kaisog o kaalam ang makaluwas kanato—ang sa Ginoo ang makaluwas. Kini nga mga istorya nagpakita kanato nga ang tinuod nga paglaom sa Israel—ug nato—wala diha kang David, Salomon, o ni bisan kinsang mortal nga hari, apan diha sa laing “anak ni David”: si Jesukristo (Mateo 1:1), ang Mahangturong Hari kinsa “magpasaylo sa sala sa [Iyang] katawhan” kon kita “mobalik pag-usab [Kaniya]” (1 Mga Hari 8:33–34).

Alang sa kinatibuk-ang pagpasabot sa mga basahon sa 2 Samuel ug 1 Mga Hari, tan-awa sa “Samuel, ang Propeta sa Daang Tugon” ug “Hari, Mga” sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

2 Samuel 5:17–25

Ang Ginoo makahatag kanako og direksyon.

Sa dihang nahiusa ni David ang Israel (tan-awa sa 2 Samuel 5:1–5), kinahanglang panalipdan niya ang iyang katawhan gikan sa mga Filistehanon. Samtang magbasa ka sa 2 Samuel 5:17–25, ikonsiderar kon sa unsang paagi ang ehemplo ni David makatabang kanimo sa mga hagit nga imong giatubang (tan-awa usab sa 1 Samuel 23:2, 10–11; 30:8; 2 Samuel 2:1). Giunsa nimo pagtinguha sa direksyon sa Ginoo diha sa imong kinabuhi? Sa unsang paagi ka napanalanginan pinaagi sa pagsunod sa pagpadayag nga imong nadawat?

Tan-awa usab sa 1 Cronicas 12; Richard G. Scott, Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 45–47.

2 Samuel 7

Unsa man ang “balay” nga gisaad sa Ginoo kang David?

Sa dihang si David mitanyag sa pagtukod og balay, nga nagpasabot sa usa ka templo, alang sa Ginoo (tan-awa sa 2 Samuel 7:1–3), ang Ginoo mitubag nga sa pagkatinuod ang anak ni David ang motukod niini (tan-awa sa mga bersikulo 12–15; tan-awa usab sa 1 Cronicas 17:1–15). Ang Ginoo miingon usab nga agig balos Siya motukod kang David og “balay,” nga nagpasabot og kaliwatan, ug nga ang iyang trono molungtad sa kahangtoran (tan-awa sa 2 Samuel 7:11, 16, 25–29; Salmo 89:3–4, 35–37). Kini nga saad natuman diha ni Jesukristo, ang atong Mahangturong Hari, kinsa usa ka kaliwat ni David (tan-awa sa Mateo 1:1; Lucas 1:32–33; Juan 18:33–37).

2 Samuel 11; 12:1–14

Kinahanglang magbantay ako kanunay batok sa sala.

Ang pagkamatinud-anon ni David ngadto sa Ginoo sa nangaging panahon wala makahimo niya nga dili matintal sa dihang siya “milakaw sa ibabaw sa atop sa balay sa hari” ug “nakita niya ang usa ka babaye nga naligo” (2 Samuel 11:2). Ikonsiderar kon unsa nga mga leksyon ang imong makat-onan gikan sa iyang mga kasinatian. Ang mga pangutana nga sama niini tingali makatabang kanimo sa pagtuon niini nga istorya:

• Unsa nga mga pagpili ang gihimo ni David nga midala kaniya ngadto sa nagkagrabe nga dalan sa pagpakasala? Unsa nga matarong nga mga pagpili ang pwede unta niyang mahimo?

• Sa unsang paagi kaha ang kaaway naningkamot sa pagdala kanimo sa mga dalan sa pagpakasala diha sa imong kaugalingong kinabuhi? Unsa nga mga pagpili ang imong mahimo karon aron luwas nga makabalik?

Tan-awa usab sa 2 Nephi 28:20–24.

1 Mga Hari 3:1–15

Ang gasa sa pag-ila motabang kanako sa pag-ila tali sa sakto ug sayop.

Kon ang Ginoo moingon kanimo, “Pangayo kon unsay akong ihatag kanimo” (1 Mga Hari 3:5), unsa ang imong pangayoon? Unsay dalaygon alang nimo mahitungod sa hangyo ni Salomon? Pamalandongi nganong ang “usa ka masinabtanong kasingkasing” aron “maila … ang kalainan tali sa maayo og daotan” (bersikulo 9) usa ka bililhon nga gasa. Unsa ang imong mabuhat sa pagtinguha niini nga gasa?

Tan-awa usab sa 2 Cronicas 1; Moroni 7:12–19; David A. Bednar, “Dali nga Makaobserbar,” Liahona, Dis. 2006, 15–20.

1 Mga Hari 8:12–61

Ang templo mao ang balay sa Ginoo.

Sulod sa gatosan ka mga tuig, ang presensya sa Dios girepresentar sa madala-dala nga tabernakulo nga gitukod ni Moises. Bisan kon gusto ni David nga tukoran ang Dios og mas permanente nga puloy-anan, ang Dios mipili hinoon sa anak ni David nga si Salomon nga motukod sa templo sa Ginoo. Samtang magbasa ka sa pag-ampo ni Salomon ug sa mga pulong nga iyang gisulti ngadto sa iyang katawhan pagkahuman sa templo, timan-i kon unsa ang iyang gibati mahitungod sa Ginoo ug sa Iyang balay. Pwede usab nga maghimo ka og lista sa mga panalangin nga gipangayo ni Salomon diha sa iyang pag-ampo. Unsa ang imong nabantayan mahitungod niini nga mga panalangin? Sa unsang paagi nga napanalanginan ka sa balay sa Ginoo sa atong panahon?

Tan-awa usab sa 2 Cronicas 6.

Barranquilla Colombia Temple

Mga Ideya alang sa Pamilya nga Pagtuon sa Kasulatan ug Family Home Evening

2 Samuel 5:19, 23.Kanus-a kita “nangutana sa Ginoo” alang sa giya ug direksyon? Giunsa Niya kita pagtubag?

2 Samuel 7:16.Sa dihang ang Ginoo miingon kang David, “Ang imong trono pagapalig-onon sa walay katapusan,” nagpasabot Siya sa usa ka umaabot nga hari sa linya sa pamilya ni David kinsa maghari sa kahangtoran: si Jesukristo. Tingali ang inyong pamilya malingaw sa pagbuhat og hinimo sa balay nga mga korona samtang maghisgot nganong mapasalamaton kamo nga si Jesukristo mao ang inyong Mahangturong Hari.

2 Samuel 11.Ang pagbasa mahitungod sa grabe nga mga sala ni David tingali maayo nga oportunidad sa paghisgot sa mga peligro sa pornograpiya, law-ay nga mga hunahuna, ug imoralidad. Ang mosunod nga mga kapanguhaan mahimong mapuslanon sa inyong diskusyon: ang Oktubre 2019 nga isyu sa Liahona, ug ang mga kapanguhaan sa Simbahan sa Pagsulbad sa Pornograpiya (ChurchofJesusChrist.org/addressing-pornography). Ang mga sakop sa pamilya pwedeng maghimo og plano kon unsa ang ilang buhaton kon makasugat og pornograpiya.

1 Mga Hari 11:9–11.Unsa ang pipila sa “laing mga dios” (bersikulo 10) nga makapalayo sa atong mga kasingkasing sa Ginoo? Unsaon nato nga mapabiling nakasentro ang atong mga kasingkasing diha sa Langitnong Amahan ug ni Jesukristo?

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Dugang Kabalaan Hatagi Ako,” Mga Himno, nu. 77.

Pagpalambo sa Atong Pagtudlo

Tutuki ang mga baruganan nga mopanalangin sa imong pamilya. Samtang mainampoon ka nga magtuon sa pulong sa Dios, pangutan-a ang imong kaugalingon, “Unsay akong nakita dinhi nga mahimong makahuluganon kaayo ngadto sa akong pamilya?” (tan-awa sa Pagtudlo sumala sa Pamaagi sa Manluluwas, 17).

Paghulagway sa templo ni Salomon, pinaagi ni Sam Lawlor