Paghulagway ni Moises diha sa Bukid sa Nebo, © Providence Collection/pagtugot gikan sa goodsalt.com

Mayo 16–22

Deuteronomio 6–8; 15; 18; 29–30; 34

“Magbantay Ka aron Dili Ka Mahikalimot sa Ginoo”

Pamalandonga kon unsaon nimo sa pagpahiangay ang mga kalihokan niini nga outline ngadto sa mga panginahanglan sa mga kabataan nga imong gitudloan. Sama pananglit, kon ikaw nagtudlo og gagmay nga mga kabataan, makatabang ka kanila sa pag-andam alang sa bunyag pinaagi sa pagpahiangay sa mga kalihokan ubos sa “Paghupot sa akong mga pakigsaad nagdala og importanting mga panalangin” diha sa seksyon alang sa mas dagko nga mga kabataan.

I-rekord ang Imong mga Panghunahuna

Dapita ang Pagpaambit

Dapita ang mga kabataan sa pagpakigbahin og mga butang nga ilang nakat-unan mahitungod ni Moises sa Primary o sa panimalay human sa milabay nga pipila ka mga semana. Kon gikinahanglan, pagpakita og mga hulagway sa mga hitabo gikan sa kinabuhi ni Moises aron sa pagtabang kanila nga makahinumdom. Sultihi sila nga karon ikaw magsulti mahitungod sa mga butang nga gitudlo ni Moises sa katapusan sa iyang kinabuhi sa yuta.

Itudlo ang Doktrina: Mas Gagmay nga mga Bata

Deuteronomio 6:5

Ako makahigugma sa Ginoo sa tibuok kong kasingkasing.

Gitudlo ni Moises sa mga anak sa Israel nga kinahanglan ilang higugmaon ang Ginoo sa tibuok nilang kasingkasing, kalag, ug gahum. Paghunahuna og mga paagi nga ikaw makatabang sa mga kabataan nga imong gitudloan, sa pagpadugang sa ilang gugma alang sa Langitnong Amahan ug sa Manluluwas.

Posible nga mga Kalihokan

• Pagdrowing diha sa pisara og usa ka kasingkasing, hugis sa usa ka lawas, ug usa ka maskulado nga bukton. Basaha ang Deuteronomio 6:5, ug itudlo ang mga hulagway samtang imong basahon ang “kasingkasing,” “kalag,” ug “gahum.” Dapita ang mga bata sa pagpapuli-puli og tudlo ngadto sa mga hulagway samtang nagsulti og usab ang klase sa tudling sa kasulatan uban kanimo.

• Kantaha ang usa ka awit nga nagtudlo mahitungod sa gugma sa Dios, sama sa “Gihigugma Ako sa Langitnong Amahan” (Songbook sa mga Bata, 16–17). Tabangi ang mga kabataan sa pagpangita og mga pulong diha sa kanta nga nagpakita nga ang Langitnong Amahan nahigugma kanato. Tabangi sila sa paghunahuna og mga paagi nga kita makapakita Kaniya nga kita nahigugma usab Kaniya.

Deuteronomio 6:6–9

Ang mga kasulatan mga pulong sa Dios.

Ang tambag diha sa Deuteronomio 6:6–9 gituyo aron sa pagtabang sa mga Israelite nga “magabantay nga aron dili [sila] mahikalimot sa Ginoo” ug sa Iyang pulong (bersikulo 12). Sa unsa nga paagi ikaw makatabang sa mga bata sa paghimo sa mga kasulatan nga kanunay nga kabahin sa ilang mga kinabuhi?

Posible nga mga Kalihokan

• Dapita ang usa ka bata sa pagtago og usa ka kopya sa mga kasulatan diha sa lawak samtang ang nahibilin sa mga kabataan nagpiyong sa ilang mga mata. Dayon dapita ang mga kabataan sa pag-abli sa ilang mga mata ug sa pagsulay sa pagpangita sa mga kasulatan. Gamit sa importanting mga hugpong sa mga pulong gikan sa Deuteronomio 6:6–9, pakigbahin ngadto sa mga kabataan nga gisultihan ni Moises ang mga Israelite sa pagbutang og mga tudling sa kasulatan sa dapit diin sila makakita niini ug makakat-on gikan niini kada adlaw. Tabangi ang mga kabataan sa paghunahuna og mga dapit diha sa ilang mga panimalay diin ilang mabutang ang mga kasulatan aron makita kini kada adlaw.

• Pagkanta og usa ka awit mahitungod sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66). Pakigbahin sa imong pagpamatuod nga ang mga kasulatan mao ang mga pulong sa Dios, ug sultihi ang mga kabataan kon giunsa niini pagpanalangin ang imong kinabuhi.

Si Jesus mao ang propeta sama ngadto ni Moises.

Deuteronomio 18:15–18

Ang mga propeta nagtudlo kanato mahitungod ni Jesukristo.

Gipanagna ni Moises nga si Jesukristo moanhi ug nga kita kinahanglan nga maminaw ngadto sa mga pulong nga itudlo ni Jesus.

Posible nga mga Kalihokan

• Tabangi ang usa sa mga kabataan sa pagbasa sa Deuteronomio 18:18, ug sultihi ang mga kabataan nga ang Propeta nga ipatindog sa Dios nga sama ni Moises mao si Jesukristo. Aron sa pagtabang sa mga kabataan nga makakita og mga kinaiya nga si Moises ug si Jesus susama, pagdala og mga hulagway sa mga butang nga gibuhat ni Moises ug mga butang nga gibuhat ni Jesukristo, ug ipapares kini sa mga bata. Sama pananglit, makadala ka og mga hulagway ni Moises ug ni Jesus nga nag-orden ug nagtudlo sa uban (tan-awa sa Libro sa mga Hulagway sa Ebanghelyo, nus. 15, 16, 38, 39).

• Pagpakita sa mga kabataan og usa ka hulagway sa atong propeta karon, ug pakigbahin og usa ka butang nga iyang natudlo mahitungod sa Manluluwas. Dapita ang mga kabataan sa pagdrowing og hulagway sa propeta nga ipakigbahin sa ilang mga pamilya.

Itudlo ang Doktrina: Mas Dagko nga mga Bata

Deuteronomio 6:6–9

Ako makahupot sa pulong sa Dios sulod sa akong kasingkasing.

Gitudlo ni Moises nga kita kinahanglan nga maghupot sa pulong sa Dios sulod sa atong mga kasingkasing, ug gihatagan niya ang mga Israelite og tambag mahitungod kon unsaon sa paghupot kanunay sa pulong sa Dios sa ilang atubangan. Unsaon nimo pagdasig ang mga kabataan sa pagkat-on gikan sa pulong sa Dios matag adlaw?

Posible nga mga Kalihokan

• Diha sa pisara, isulat ang mga pulong ug mga hugpong sa mga pulong gikan sa Deuteronomio 6:6–9 nga nagpakita kanus-a ug giunsa sa mga Israelite sa paghinumdom sa pulong sa Dios (sama sa magalingkod, magalakaw, paghigda, kamot, ug balay). Dapita ang mga kabataan sa pagpangita niini nga mga pulong diha sa mga bersikulo. Unsa ang gitudlo niini nga mga pulong mahitungod kon unsaon paghimo sa mga kasulatan nga kabahin sa atong mga kinabuhi sa matag adlaw? Pangutan-a ang mga kabataan kon unsa ang ilang mabuhat aron sa paghinumdom sa pulong sa Dios diha sa ilang kinabuhi sa matag adlaw.

• Hatagi ang matag bata og usa ka pirasong papel, ug dapita sila sa pagsulat og hugpong sa mga pulong gikan sa Deuteronomio 6 nga makahuluganon ngadto kanila. Hangyoa sila sa pagpakigbahin kon nganong gipili nila ang ilang hugpong sa pulong. Isugyot nga adornohan nila ang ilang papel ug ipakita kini sa ilang panimalay aron sa paghinumdom niini. Awhaga ang mga kabataan sa pagsulat ug sa pagpakita og ubang mga hugpong sa mga pulong nga ilang makit-an diha sa mga kasulatan.

Deuteronomio 15:7–11

Ako malipayon nga makaserbisyo niadtong kinsa nanginahanglan.

Ang mga pagtulun-an sa Deuteronomio 15:7–11 makatabang sa mga kabataan nga imong gitudloan sa pagsabut nga ang pagtabang sa uban naglakip og labaw pa kay sa lihok lamang. Kini kinahanglan nga buhaton uban sa andam nga kasingkasing.

Posible nga mga Kalihokan

• Isulat ang kinsa, ngano, ug unsaon diha sa pisara. Dapita ang mga kabataan sa pagbasa sa Deuteronomio 15:7–11 aron sa pagsuta kon kinsa ang kinahanglan natong tabangan, nganong kinahanglan nato silang tabangan, ug unsaon sa atong mga kasingkasing nga kinahanglang mobati mahitungod sa pagtabang. Pasulata sila diha sa pisara kon unsay ilang nakaplagan. Kanta og usa ka awit nga nagpalig-on sa mensahe niini nga mga bersikulo, sama sa “Nakabuhat Ba Ako og Maayo Karon?” (Mga Himno, nu. 135).

• Hangyoa ang mga kabataan sa paghunahuna og usa ka tawo nga ilang matabangan––ilabi na sa ilang kaugalingon nga pamilya. Hatagi sila og panahon sa pagsulat kon unsa ang ilang pagabuhaton niini nga semana sa pagtabang niana nga tawo. Kon mahimo, paghimo og mga plano sa pagtabang isip usa ka klase ngadto sa usa ka tawo nga nanginahanglan.

Deuteronomio 30:8–10

Ang paghupot sa akong mga pakigsaad nagdala og importanting mga panalangin.

Sama sa mga anak sa Israel, nagkinahanglan kita og kanunay nga mga pahinumdom sa pagpuyo sa atong mga pakigsaad. Ang pagbasa sa Deuteronomio 30:8–10 makatabang sa mga kabataan nga mas makasabut og maayo kon unsa ang pakigsaad ug pagdasig kanila sa paghupot sa ilang mga pakigsaad.

Posible nga mga Kalihokan

• Pangutan-a ang mga kabataan kon unsa ang pakigsaad (kon sila nagkinahanglan og tabang, isugyot nga makit-an nila ang katin-awan sa “Pakigsaad” diha sa Ang Giya ngadto sa mga Kasulatan [scriptures.ChurchofJesusChrist.org]). Pagdrowing og duha ka kolum nga tsart nga aduna niini nga mga ulohan: mga saad sa mga Israelite ug mga saad sa Dios. Dapita ang mga bata sa pagsiksik sa Deuteronomio 30:8-10 ug isulat sa tsart. (Kon kinahanglan, tabangi ang mga kabataan sa pagsabut sa mga kahulugan sa mga hugpong sa mga pulong diha sa bersikulo 9.) Ipamatuod ang mga panalangin nga miabut nganha kanimo tungod sa paghupot sa imong mga pakigsaad.

• Dapita ang mga kabataan sa paglista diha sa pisara sa mga saad nga atong gihimo sa bunyag ug ang mga saad nga gihimo sa Langitnong Amahan ngari kanato (tan-awa sa Doktrina ug mga Pakigsaad 20:37, 77). Unsa ang atong mabuhat sa paghinumdom kanunay sa Manluluwas ug sa paghupot sa atong mga pakigsaad?

Awhaga ang Pagkat-on diha sa Panimalay

Dapita ang mga kabataan sa pagpakaaron-ingnon nga ikaw sakop sa ilang pamilya, ug hangyoa sila sa pagsulti kanimo og usa ka butang nga ilang nakat-unan sa klase karon. Awhaga sila sa pagpakigbahin sa unsay ilang gisulti kanimo ngadto sa usa sa ilang mga sakop sa pamilya kon sila moabut sa panimalay.

Pagpalambo sa Atong Pagtudlo

Pangutana og dinasig nga mga pangutana. Pangutana og makadapit sa mga kabataan dili lamang sa pag-report og mga kamatuoran apan sa pagpakigbahin sa ilang mga pagpamatuod sa mga kamatuoran sa ebanghelyo. Sama pananglit, kon kamo naghisgot sa mga sugo, mahimo nimong hangyoon ang mga kabataan sa pagpakigbahin kon sa unsang paagi ang pagsunod sa mga sugo nagpanalangin kanila.