Mayo 9–15

Numeros 11–14; 20–24

“Dili Lamang Unta Kamo Magmalalison batok sa Ginoo, Ni Mahadlok”

Kini nga outline dili tuyo nga himoong usa ka basahon. Hinoon, gamita kini sa pagkuha og mga ideya ug inspirasyon alang sa pagkat-on og mga kalihokan nga mopanalangin sa mga kabataan sa imong klase.

I-rekord ang Imong mga Panghunahuna

Dapita ang Pagpaambit

Ipakita sa mga kabataan ang usa sa mga hulagway dinhi niini nga outline o sa outline niini nga semana diha sa Dali, Sunod Kanako—Alang sa mga Indibidwal ug mga Pamilya. Himoa nga sila makigbahin kanimo bisan unsay ilang nahibaloan mahitungod sa unsay nahitabo diha sa hulagway.

Itudlo ang Doktrina: Mas Gagmay nga mga Bata

Numeros 11:4–10

Ako mahimong mapasalamaton alang sa unsay gihatag sa Dios kanako.

Bisan tuod ang Ginoo naghimo og talagsaong mga butang alang sa mga anak sa Israel, sila sa kanunay nagpunting hinoon diha sa unsay wala kanila. Tabangi ang mga kabataan nga mahimong mapasalamaton alang sa unsay nahatag sa Dios kanila.

Posible nga mga Kalihokan

• Pangutan-a ang mga kabataan kon sila makahinumdom ba og pipila ka mga milagro nga gihimo sa Ginoo sa pagpanalangin sa mga Israelite didto sa kamingawan. (Kon ang mga kabataan nagkinahanglan og tabang, pakit-a sila og mga hulagway gikan sa Abril 4–10 nga outline diha sa Dali, Sunod Kanako––Alang sa mga Indibidwal ug mga Pamilya; tan-awa usab sa Exodo 14:21–22; 15:23–25; 16:4.) Dayon i-summarize alang kanila ang Numeros 11:4–10, naghatag og gibug-aton nga ang Ginoo wala malipay tungod sa mga pagbagulbol sa mga Israelite. Tabangi ang mga kabataan sa paghunahuna og mga paagi nga sila makapakita og pasalamat ngadto sa Ginoo.

• Panganta og dungan sa usa ka awit mahitungod sa pasalamat, sama sa “Ipha ang Inyong Panalangin” (Mga Himno, nu. 148). Dapita ang matag bata sa pagdrowing og mga hulagway sa mga panalanagin nga nahatag sa Ginoo kanila o sa ilang mga pamilya. Awhaga sila sa paghunahuna o sa pagtan-aw sa ilang mga hulagway sa panahon nga sila gitintal sa pagbagulbol mahitungod sa usa ka butang nga sila wala.

Numeros 13:17–33; 14:6–9

Ang hugot nga pagtuo makatabang kanako nga dili mahadlok.

Sa dihang si Moises mipadala og 12 ka mga lalaki sa pagkuha og impormasyon mahitungod sa gisaad nga yuta, 10 kanila mibalik nga nahadlok tungod sa kusgan nga mga tawo nga namuyo didto. Duha kanila, si Caleb ug Josue, wala mangahadlok, tungod kay sila adunay hugot nga pagtuo diha sa Ginoo.

Posible nga mga Kalihokan

• Gamit og mga hulagway o mga drowing sa mga ubas, dugos, mga higante, ug mga apan-apan aron sa laktud maistoryahan ang mga kabataan mahitungod sa 12 ka mga lalaki nga gisugo ni Moises sa pagpaniid sa gisaad nga yuta (tan-awa sa Numeros 13:17–33; tan-awa usab “Kwarenta Ka Tuig Sa Kamingawan” diha sa Mga Istorya sa Daang Tugon). Ipasabut nga sila nakakaplag og daghang prutas ug ubang mga pagkaon (dapita ang mga kabataan sa pagpakaaron-ingnon nga nagkaon sa pagkaon), apan sila usab nahadlok tungod kay ang mga tawo didto mga dagko ug kusgan (dapita ang mga bata sa pagpakaaron-ingnon nga nahadlok). Pagpakita og hulagway ni Jesus, ug ipasabut nga duha ka mga Israelite, si Caleb ug Josue, wala mangahadlok tungod kay sila adunay hugot nga pagtuo diha ni Jesukristo.

• Basaha ang Numeros 14:9 ngadto sa mga kabataan, ug sultihi mahitungod sa usa ka panahon sa dihang ikaw nahadlok apan ang imong hugot nga pagtuo diha ni Jesukristo mitabang kanimo sa pagbaton og kaisug. Tabangi ang mga kabataan sa pagpaambit sa bisan unsang susama nila nga mga kasinatian.

  

  Napulo sa mga espiya nga Israelite nangahadlok; si Josue ug Caleb adunay hugot nga pagtuo. © Lifeway Collection/pagtugot gikan sa goodsalt.com

Numeros 21:6–9

Makahimo ako sa pagtan-aw ngadto ni Jesukristo.

Sama lamang nga ang mga anak sa Israel nangaayo pinaagi sa pagtan-aw sa bitin nga tumbaga, ang mga kabataan sa imong klase makadawat og kaluwasan pinaagi sa pagtan-aw ngadto sa Manluluwas.

Posible nga mga Kalihokan

• Naggamit sa pahina sa kalihokan niini nga semana o sa hulagway diha sa outline niini nga semana sa Dali, Sunod Kanako––Alang sa mga Indibidwal ug sa mga Pamilya, istoryahi ang mga kabataan kon unsa ang nahitabo sa dihang ang “bitin nga mapintas” miabut ngadto sa kampo sa mga Israelite (tan-awa sa Numeros 21:6–9). Tabangi sila sa pagsabut kon sa unsa nga paagi ang bitin nga tumbaga sama ni Jesukristo (tan-awa sa Juan 3:14–15). Dayon papuli-puliha ang mga kabataan sa paggamit sa hulagway aron sa pag-asoy sa istorya ngadto sa usag usa.

• Hangyoa ang mga kabataan sa pagpiyong sa ilang mga mata samtang ikaw magpahimutang og usa ka hulagway sa Manluluwas sa usa ka dapit diha sa lawak. Dayon dapita ang mga kabataan sa pagpabuka sa ilang mga mata, pagpangita sa hulagway, ug pagtan-aw niini. Papuli-puliha sila nga maoy mopahimutang sa hulagway. Sa matag higayon nga makaplagan sa mga kabataan ang hulagway, tabangi sila sa paghunahuna og usa ka butang nga ilang mabuhat sa paghangad ngadto sa Manluluwas.

Itudlo ang Doktrina: Mas Dagko nga mga Bata

Numeros 12

Ang Ginoo gusto kanako nga mosunod sa Iyang propeta.

Ang Numeros 12 naglangkob og pipila ka bililhon nga mga leksyon nga makatabang sa mga kabataan kon makadungog og mga tawo nga magsulti og ngil-ad nga mga pulong mahitungod sa propeta sa Ginoo o sa ubang mga lider sa Simbahan.

Posible nga mga Kalihokan

• Sultihi ang mga kabataan nga sa usa ka higayon, ang Ginoo wala malipay ni Aaron ug Miriam, igsoong lalaki ug igsoong babaye ni Moises. Dapita sila sa pagbasa sa Numeros 12:1–2 aron mahibaloan kon ngano. Sumala sa mga bersikulo 5–8, unsay gibati sa Ginoo mahitungod ni Aaron ug Miriam nga nagsulti batok sa Iyang propeta?

• Tabangi ang mga kabataan sa paghunahuna og mga ehemplo sa mga tawo diha sa mga kasulatan kinsa misunod sa propeta ug napanalanginan (sama pananglit, tan-awa sa Genesis 7:7; 1 Nephi 3:7). Unsa ang pipila ka mga butang nga gitudlo sa atong buhi nga propeta kanato? Sa unsa nga paagi kita mapanalanginan kon kita mosunod sa iyang mga pagtulun-an?

Numeros 21:4–9

Si Jesukristo adunay gahum sa pag-ayo kanako sa espiritwal nga paagi.

Daghang mga Israelite ang namatay tungod kay sila walay hugot nga pagtuo nga ang Ginoo moayo kanila kon sila motan-aw sa bitin nga tumbaga (tan-awa sa Alma 33:18–20). Unsaon nimo pagtabang ang mga kabataan nga imong gitudloan sa pagbaton og hugot nga pagtuo diha sa makaluwas nga gahum ni Jesukristo?

Posible nga mga Kalihokan

• Dapita ang mga kabataan sa pagdrowing og mga hulagway sa unsay ilang nabasa sa Numeros 21:4–9. Ipagamit kanila ang ilang mga hulagway sa pag-asoy og istorya. Hangyoa ang matag bata sa pagpili og usa sa mosunod nga mga kasulatan ug sa pagpakigbahin kon unsay gidugang niini sa atong pagsabut sa istorya: Juan 3:14–15; 1 Nephi 17:41; Alma 33:18–20; Helaman 8:13–15; Doktrina ug mga Pakigsaad 6:36.

• Pagsulat diha sa pisara og usa ka pangutana sama sa Unsa ang atong mabuhat sa “paghangad ngadto sa Anak sa Dios uban sa hugot nga pagtuo”? (Helaman 8:15). Hatagi ang matag kabataan og usa ka piraso nga papel, ug dapita sila sa pagsulat og daghang tubag sa pangutana kutob sa ilang mahunahunaan. Kolektaha ang mga papel, basaha og kusog ang pipila ka mga tubag, ug dapita ang mga kabataan sa pagsulti mahitungod sa unsa nga paagi ang pagbuhat niini nga mga butang makatabang kanato kon kita nanginahanglan sa makaayo nga gahum sa Manluluwas.

Numeros 22–24

Makasunod ako sa kabubut-on sa Dios, bisan kon ang uban naninguha sa pagdani kanako sa dili pagsunod.

Si Balak naninguha sa pagdani ni Balaam sa pagtunglo sa mga Israelite, apan nahibalo si Balaam nga kini supak sa kabubut-on sa Dios. Ang ehemplo ni Balaam makatabang sa mga kabataan kon sila mag-atubang og pamugos sa dili pagsunod sa Dios.

Posible nga mga Kalihokan

• I-summarize ang Numeros 22:1–18 alang sa mga kabataan maghatag og gibug-aton kon sa unsang paagi si Balaam midumili sa pagtunglo sa mga katawhan sa Dios, bisan tuod og si Balak, ang hari sa Moab, mitanyag kaniya og kadungganan ug katigayunan. Hangyoa ang mga kabataan sa pagsiksik sa mosunod nga mga bersikulo alang sa mga hugpong sa mga pulong nga ilang gihunahuna nga nagpakita sa hugot nga tinguha ni Balaam sa pagsunod sa Dios: Numeros 22:18; 23:26; 24:13. Dapita ang mga kabataan sa pagpili og usa ka hugpong sa mga pulong nga ilang nagustohan ug sa pagsulat niini diha sa usa ka kard aron motabang kanila sa paghinumdom sa pagsunod sa Ginoo.

• Pakigsulti sa mga kabataan mahitungod sa mga sitwasyon diin ang mga higala o ang uban tingali maninguha sa pagdani kanila sa pagbuhat og usa ka butang nga sayop, sama sa gibuhat ni Balak ngadto ni Balaam. Sa unsa nga paagi ang pasalig ni Balaam ngadto sa Ginoo nagtabang kaniya sa pagsagubang sa pamugos gikan ni Balak? Dapita ang mga kabataan sa pagbansay og tubag niini nga mga sitwasyon gamit ang mga pulong sama sa kang Balaam.

Awhaga ang Pagkat-on diha sa Panimalay

Dapita ang mga kabataan sa pagpakigbahin og usa ka butang ngadto sa ilang mga pamilya, sama sa usa ka hulagway, usa ka kasulatan, o usa ka awit, nga nagpakita kon unsay ilang nakat-unan sa Primary.

Pagpalambo sa Atong Pagtudlo

Pagmatugtanon ngadto sa mga pag-aghat gikan sa Espiritu. “Kasagaran ang labing nindot nga mga higayon sa pagtudlo wala damha—sama pananglit, kon adunay mopakigbahin og kasinatian o adunay mangutana nga moresulta sa makahuluganon nga panaghisgot. … Pagmahimong andam nga mousab sa imong mga plano kon gikinahanglan aron sa pagsunod sa mga pag-aghat nga imong nadawat” (Pagtudlo sumala sa Pamaagi sa Manluluwas, 10).