Paghulagway ni Jehova nga nagpakita ngadto ni Moises ug sa 70 ka mga anciano sa Israel, ni Jerry Harston

Abril 25–Mayo 1

Exodo 24; 31–34

“Ang Akong Presensya Mouban Kanimo”

Samtang si Moises nangandam sa pagpangulo sa mga anak sa Israel ngadto sa gisaad nga yuta, ang Ginoo miingon, “Ang akong presensya mouban kanimo” (Exodo 33:14). Samtang ikaw mangandam sa pagtudlo sa mga kabataan sa imong klase, hunahunaa kon unsaon nimo sa pagdapit ang presensya sa Ginoo sa “pag-uban [kanimo].”

I-rekord ang Imong mga Panghunahuna

Dapita ang Pagpaambit

Hangyoa ang matag bata sa pagpili og bisan hain sa ginumerohan nga pirasong papel. Gamita kini nga mga numero sa pagpiho sa pagkasunod-sunod sa mga kabataan sa pagpakigbahin og usa ka butang nga ilang gikat-unan gikan sa mga kasulatan, sa panimalay ba o sa Primary.

Itudlo ang Doktrina: Mas Gagmay nga mga Bata

Exodo 31:13, 17

Pagbalaan sa Igpapahulay maoy usa ka timaan sa akong gugma alang sa Ginoo.

Gisultihan sa Ginoo si Moises nga kon ang mga anak sa Israel magbalaan sa adlaw nga Igpapahulay, sila nagpakita Kaniya nga sila gusto nga mahimong Iyang mga katawhan.

Posible nga mga Kalihokan

• Pagdrowing og usa ka kasingkasing diha sa pisara, ug pangutan-a ang mga kabataan unsa ang kahulugan niini nga simbolo. Tabangi sila sa paghunahuna og ubang mga butang nga mahimong usa ka timaan alang sa gugma, sama sa usa ka paggakos o usa ka buhat sa serbisyo. Basaha ngadto kanila ang Exodo 31:13. Tabangi sila sa pagsabut nga kon kita magbalaan sa adlaw nga Igpapahulay, kini usa ka timaan ngadto sa Ginoo nga kita nahigugma Kaniya.

• Sutihi ang mga kabataan mahitungod sa pipila ka mga paagi nga ikaw naninguha sa pagpakita sa imong gugma alang sa Ginoo diha sa Igpapahulay. Himoa nga sila mopakigbahin kon giunsa nila ug sa ilang mga pamilya sa pagbuhat niini. Dapita sila sa paggamit sa pahina sa kalihokan niini nga semana aron makigbahin og mas daghan pang mga ideya.

  

  Pinaagi sa pagtahud sa Igpapahulay, kita nagpakita sa atong gugma alang sa Ginoo.

Exodo 32:1–8, 19–24

Makabutang ako og una sa Ginoo dinhi sa akong kinabuhi.

Samtang si Moises didto sa Bukid sa Sinai nakigsulti sa Ginoo, ang mga anak sa Israel mipili sa pagsimba og usa ka bulawanong dios-dios kay Kaniya. Kini nga istorya makapahinumdom sa mga kabataan nga imong gitudloan nga kita kinahanglan dili motugot sa ubang mga butang nga mahimong mas importante ngari kanato kay sa Ginoo.

Posible nga mga Kalihokan

• Sa daklit ribyuha ang Napulo ka mga Sugo uban sa mga kabataan, maghatag og gibug-aton sa unang duha (tan-awa sa Exodo 20:3–6). Gamita ang “Ang Napulo ka mga Sugo” (sa Mga Istorya sa Daang Tugon) aron ipakigbahin kanila ang istorya gikan sa Exodo 32:1–8, 19–24. Kon mahimo, patabanga ang mga kabataan kanimo sa pag-asoy sa istorya. Tabangi ang mga kabataan nga makaila kon unsay gibuhat nga sayop sa mga Israelite dinhi niini nga istorya (mahimo nimong pahinumduman ang mga kabataan sa unang duha sa Napulo ka mga Sugo). Unsa unta ang kinahanglang buhaton sa mga Israelite?

• Pagpakita og hulagway ni Jesukristo kauban sa mga hulagway sa ubang mga butang nga ang mga kabataan mahimong mogahin og panahon, sama sa mga dulaan, mga kalingawan, ug uban pa. Hangyoa ang mga kabataan sa pagpangita sa hulagway nga nagpakita kon unsa ang kinahanglan nga labing importante ngari kanato. Pakigbahin uban sa mga kabataan kon giunsa ka sa pagpanalangin sa pagbutang sa Ginoo og una diha sa imong kinabuhi––gani una sa ubang mga butang nga maayo.

Exodo 33:11

Misulti ang Ginoo ngadto ni Moises sa nawong ug nawong.

Human giguba ni Moises ang bulawanong nati nga baka, “ang Ginoo misulti kang Moises sa nawong ug nawong, ingon sa usa ka tawo nga nakigsulti sa iyang higala.” Ang pagkahibalo niini makalig-on sa pagtuo sa mga kabataan nga ang Ginoo usa ka tinuod nga tawo kinsa nahigugma kanila.

Posible nga mga Kalihokan

• Sultihi ang mga kabataan kon unsay imong bation kon ikaw makigsulti ngadto sa usa ka maayong higala ug pangutana kanila kon unsa ang ilang bation. Basaha ngadto kanila ang unang kapahayag sa Exodo 33:11. Pangutan-a ang mga kabataan unsa sa ilang hunahuna ang gibati kaha ni propeta Moises. Sultihi ang mga kabataan sa mga panahon sa diha nga imong gibati ang kaduol ngadto sa Ginoo, bisan og ikaw wala makakita Kaniya sa imong mga mata.

• Panganta og dungan sa usa ka awit nga nagpahayag kon sa unsa nga paagi ang Langitnong Amahan o si Jesus mibati kanato, sama sa “Si Jesus Ang Atong Mahigugmaong Higala” (Songbook sa mga Bata, 37). Pagpakita og mga hulagway sa Manluluwas nga nagpakita og paghigugma ngadto sa uban (tan-awa sa Libro sa Hulagway sa Ebanghelyo, mga nu. 36, 41–43, 46–47). Dapita ang mga kabataan sa pagpakigbahin kon unsa ang ilang gibati mahitungod sa Langitnong Amahan ug ni Jesus.

Itudlo ang Doktrina: Mas Dagko nga mga Bata

Exodo 31:12–17

Pagbalaan sa Igpapahulay maoy usa ka timaan sa akong gugma alang sa Ginoo.

Ang pagbalaan sa adlaw nga Igpapahulay mahimong mas sayon––ug mas malipayon––alang sa mga kabataan kon sila makaila nga kini usa ka timaan sa ilang pasalig ngadto sa Ginoo.

Posible nga mga Kalihokan

• Pangutan-a ang mga kabataan og pipila ka mga pangutana sa pagtabang kanila nga makasabut kon unsa ang timaan––sama pananglit, “Unsa ang mga timaan nga magpahibalo kaninyo nga ang tingpamulak umaabut o nga ikaw padulong nga sip-unon?” Dapita sila sa pagbasa sa Exodo 31:13, 16–17 ug sa pagpangita sa pulong nga “timaan.” Unsa ang gisulti sa Ginoo nga usa ka timaan tali kanato ug Kaniya? Nganong kini nga timaan importante kaayo?

• Dapita ang mga kabataan sa pagpuli-puli sa pagpasabut kon nganong pilion nila ang pagtahud sa Igpapahulay.

• Dapita ang mga kabataan sa pagsulat sa tanang mga butang nga ilang mahunahuna nga ilang mabuhat sa Dominggo sa pagpakita sa Ginoo nga sila nahigugma Kaniya. Awhaga sila sa pagpakigbahin og pipila ka mga butang gikan sa ilang mga lista. Dapita sila sa pagdala sa ilang mga lista ngadto sa panimalay, sa pagpakigbahin niini ngadto sa ilang mga pamilya, ug sa pagtan-aw niini bisan kanus-a sila nanginahanglan og mga ideya mahitungod sa unsay buhaton sa adlaw nga Igpapahulay.

Exodo 32:1–8, 19–24

Makabutang ako og una sa Ginoo dinhi sa akong kinabuhi.

Usa ka mensahe gikan sa asoy diha sa Exodo 32 mao ang importansya sa pagsunod sa unang duha sa Napulo ka mga Sugo––ayaw pagsimba ni bisan kinsa o sa bisan unsa gawas sa Ginoo.

Posible nga mga Kalihokan

• Hangyoa ang mga kabataan sa pagpakigbahin og bisan unsa nga ilang nahibaloan mahitungod sa istorya ni Aaron nga naghimo og bulawanong nati nga baka alang sa pagsimba sa mga Israelite. Kon sila nagkinahanglan og tabang, ipatan-aw kanila ang Exodo 32: 1–8, 19–24, o ipakigbahin kanila “Ang Napulo ka mga Sugo” (sa Mga Istorya sa Daang Tugon). Nganong kini sayop alang sa mga Israelite ang pagsimba og dios-dios? (Mahimo nimong itudlo ang mga kabataan ngadto sa unang duha sa Napulo ka mga Sugo diha sa Exodo 20:3–6.)

• Tabangi ang mga kabataan sa paghunahuna og mga ehemplo sa mga butang nga ang mga tawo mahimong matintal sa pagsimba kay sa Ginoo––mga butang nga nagdani sa atong atensyon palayo gikan Kaniya. Dayon hangyoa sila sa pagpakigbahin og mga ehemplo sa mga butang nga nagtabang kanila sa pagpunting diha sa Manluluwas ug sa pagsimba Kaniya.

Exodo 32:1–5, 21–24

Makabarug ako alang sa pagkamatarung.

Sa dihang ang mga Israelite misulti ni Aaron sa paghimo og usa ka bulawanong dios-dios, miuyon siya sa paghimo niini, bisan kini sayop (tan-awa sa Deuteronomio 9:20). Hunahunaa kon sa unsang paagi ikaw makaawhag sa mga kabataan sa pagbarug alang sa pagkamatarung, bisan kon ang uban namugos kanila sa dili pagbarug.

Posible nga mga Kalihokan

• Dapita ang mga kabataan sa pagbasa sa Exodo 32:1–5, 21–24, sa tinagsa o magpares, ug sa pagpakigbahin kon unsa ang ilang hunahuna nga kinahanglan untang buhaton ni Aaron sa dihang ang mga Israelite mihangyo kaniya sa paghimo og usa ka bulawanong nati nga baka. Unsaon kaha unta pagtabang ni Aaron ang mga katawhan?

• Tabangi ang mga kabataan sa paghunahuna og mga sitwasyon nga mahimo nilang atubangon kon ang ubang mga tawo mohangyo kanila sa pagbuhat og usa ka butang nga sila nahibalo nga sayop. Hangyoa ang mga kabataan sa pagpakigbahin og mga ideya ngadto sa usag usa mahitungod sa unsay buhaton diha niadto nga mga sitwasyon.

Awhaga ang Pagkat-on diha sa Panimalay

Dapita ang mga kabataan sa pagpakigbahin ngadto sa ilang mga pamilya og bisan unsa nga mga ideya nga ilang nadunggan karon mahitungod kon unsaon pagbalaan sa adlaw nga Igpapahulay.

Pagpalambo sa Atong Pagtudlo

Dapita ang mga kabataan sa pagpamatuod. Ang imong mga gipangutana makaawhag sa mga kabataan sa pagpakigbahin kon unsa ang ilang gibati mahitungod sa Manluluwas ug sa unsa nga paagi ang pagpuyo sa ebanghelyo nagpanalangin kanila. Kon sila nagbuhat niini, sila nagpamatuod. (Tan-awa sa Pagtudlo sa Pamaagi sa Manluluwas, 11, 32.)