Mayo 2–8

Exodo 35–40; Levitico 1; 16; 19

“Balaan ngadto sa Ginoo”

Samtang ikaw mainampoon nga nagtuon sa mga kasulatan niini nga semana, paghunahuna mahitungod sa mga bata nga imong gitudloan. Ang Espiritu Santo makatabang kanimo nga mahibalo kon unsa nga mga kamatuoran ang gikinahanglan nilang makat-unan ug unsaon nimo sa pagtudlo niadto nga mga kamatuoran ngadto kanila.

I-rekord ang Imong mga Panghunahuna

Dapita ang Pagpaambit

Ibutang ang ngalan sa matag bata sa usa ka sudlanan. Hangyoa ang usa ka bata sa pagkuha og usa sa mga ngalan, ug dapita ang bata kansang ngalan nakuha sa pagpakigbahin og usa ka butang nga bag-ohay niyang nakat-unan gikan sa Daang Tugon. Pakigsulti sa mga kabataan mahitungod kon giunsa sa mga butang nga ilang gikat-unan pagtabang kanila nga mas maduol ngadto ni Jesukristo. Padayon hangtud ang tanan adunay oportunidad sa pagpakigbahin.

Itudlo ang Doktrina: Mas Gagmay nga mga Bata

Exodo 36:1

Makatabang ako sa buluhaton sa Ginoo.

Ang gagmay nga mga kabataan adunay mga gasa nga ilang magamit sa pagtabang ngadto sa buluhaton sa Ginoo dinhi sa yuta. Unsaon nimo pagtabang ang mga kabataan sa pagbati og usa ka tinguha sa pagpakigbahin kon unsay gihatag sa Ginoo nganha kanila?

Posible nga mga Kalihokan

• Basaha ang Exodo 36:1 ngadto sa mga kabataan, ug hangyoa sila sa pagpaminaw alang sa unsay gihatag sa Ginoo ngadto ni Bezaleel ug Aholiab aron sa pagtabang kanila og tukod sa “santuwaryo” (tabernakulo). Sultihi ang matag bata mahitungod sa usa ka gasa nga siya aduna (mahimong makatabang ang pagpangutana sa ilang mga ginikanan). Ipamatuod nga ang Dios “naghatag” og mga gasa ngadto sa matag usa sa Iyang mga anak.

• Sultihi ang mga kabataan nganong ikaw gusto nga motabang sa buluhaton sa Ginoo. Tabangi sila sa paghunahuna og mga paagi nga sila makaapil usab (sama sa pagkat-on mahitungod sa usa ka katigulangan, pag-istorya sa usa ka tawo mahitungod ni Jesus, o sa pagserbisyo og usa ka sakop sa pamilya). Isulat ang ilang mga ideya diha sa mga gagmay nga piraso sa papel, isulod kini sa usa ka sudlanan, ug dapita ang matag bata sa pagpili og usa ug lihokon ang aksyon nga anaa sa gamay nga piraso sa papel.

Exodo 40:17–34

Akong bation ang presensya sa Dios diha sa balaang mga dapit.

Ang Ginoo misugo sa mga anak sa Israel sa pagbuhat sa tabernakulo aron Siya “magapuyo taliwala kanila” (Exodo 25:8). Makatabang ka sa mga kabataan sa pagkat-on mahitungod sa balaang mga dapit nga gihatag sa Dios kanato karon aron sa pagtabang kanatong mobati sa Iyang presensya.

Posible nga mga Kalihokan

• Pagpakita og hulagway sa karaang tabernakulo (tan-awa ang outline niini nga semana diha sa Dali, Sunod Kanako—Alang sa mga Indibidwal ug mga Pamilya). Hangyoa ang mga kabataan sa pagpangita sa lain-laing mga dapit sa tabernakulo diha sa hulagway, sama sa tangkawan [candlestick] o sa mga altar, ug ipasabut nga kining mga butanga gituyo aron sa pagtabang sa mga Israelite sa paghunahuna mahitungod sa Ginoo (alang sa dugang nga impormasyon mahitungod sa tabernakulo, tan-awa sa Exodo 40: 17–34). Unsang balaan nga mga dapit kita aduna karon nga nagtabang kanato sa paghunahuna mahitungod sa Ginoo?

• Pagpakita og usa ka hulagway sa templo, ug basaha ang Exodo 25:8 ngadto sa mga kabataan. Ipasabut nga sa atong panahon, ang Dios naghatag kanato og balaang mga dapit diin kita makapaduol ngadto Kaniya. Tabangi ang mga kabataan sa paglista og pipila niini nga mga dapit. Pangutan-a ang mga kabataan kon unsa ang ilang gibati sa dihang sila naghunahuna niining balaang mga dapit. Pakigbahin kanila nga kita mobati usab og kaduol ngadto sa Dios kon kita mag-ampo, bisan asa man kita.

• Kompletoha ang pahina sa kalihokan uban sa mga bata. Samtang kamo nagbuhat, kanta og usa ka awit uban kanila mahitungod sa templo, sama sa “Gusto Ko nga Makita ang Templo” (Songbook sa mga Bata, 99).

  

  Sama sa karaang tabernakulo, ang templo nagtumong kanato ngadto sa Manluluwas.

Itudlo ang Doktrina: Mas Dagko nga mga Bata

Exodo 35:20–29; 36:1

Ang Dios naghatag kanako og mga gasa aron sa pagtabang sa Iyang buluhaton.

Ang tanang mga anak sa Langitnong Amahan adunay usa ka butang nga ikatabang ngadto sa Iyang buluhaton. Ang mga kabataan nga imong gitudloan mahimong nanginahanglan sa imong tabang sa pag-ila kon unsaon nga sila makagamit sa ilang mga gasa aron sa pagtabang sa buluhaton sa Dios.

Posible nga mga Kalihokan

• Pagpakita og usa ka hulagway sa tabernakulo (tan-awa ang outline niini nga semana diha sa Dali, Sunod Kanako—Alang sa mga Indibidwal ug mga Pamilya). Pangutan-a ang mga bata kon unsa nga mga materyal kaha ang gikinahanglan aron sa pagbuhat sa tabernakulo. Basaha uban sa mga kabataan ang Exodo 35:20–29, ug hangyoa sila sa pagpangita kon giunsa ang gikinahanglan nga mga materyal pagsangkap. Ipamatuod nga ang matag kabataan adunay usa ka butang nga ikatabang ngadto sa buluhaton sa Ginoo.

• Hangyoa ang mga kabataan sa pagbasa sa Exodo 36:1 aron mahibaloan kon unsay gihatag sa Ginoo ngadto niadtong kinsa gitawag sa pagtabang og buhat sa tabernakulo. Dapita ang mga kabataan sa pagpakigbahin kon unsay ilang gibati nga gihatag sa Ginoo kanila aron sa pagtabang sa pagtukod sa Iyang gingharian (pagtanyag og mga sugyot kon gikinahanglan). Sa unsa nga paagi kita makagamit niining mga butanga aron sa pagpanalangin sa uban?

Exodo 40:17–33

Ako makahimo nga mas mahisama ni Jesukristo ug sa Langitnong Amahan.

Ang tabernakulo wala lamang mitugot sa mga anak sa Israel nga makabaton sa presensya sa Dios uban kanila, apan kini mitudlo usab kanila og mga butang nga sila makabuhat aron mahimong mas mahisama sa Dios.

Posible nga mga Kalihokan

• Dapita ang mga kabataan sa paggamit sa Exodo 40:17–33 aron sa pag-ila og mga butang nga kaniadto kabahin sa tabernakulo ug sa pagpangita og pipila niini diha sa usa ka hulagway sa karaang tabernakulo (tan-awa sa outline niini nga semana diha sa Dali, Sunod Kanako––alang sa mga Indibidwal ug mga Pamilya). Dapita ang mga kabataan sa pagdrowing sa ilang kaugalingon nga mga hulagway sa tabernakulo. Pag-istorya mahitungod kon sa unsa nga paagi ang matag bahin sa tabernakulo makatudlo mahitungod sa Manluluwas o sa Langitnong Amahan. Sama pananglit, ang arka sa pagpamatuod makapahinumdom kanato sa mga sugo sa Dios, ang altar makapahinumdom kanato sa sakripisyo ni Jesukristo, ang tangkawan makapahinumdom kanato nga ang Manluluwas mao ang Kahayag sa Kalibutan, ug uban pa.

• Hangyoa ang mga kabataan sa pagbasa sa Exodo 25:8 aron mahibalo kon ngano nga ang Ginoo gusto sa mga anak sa Israel nga magbuhat og usa ka “santuwaryo” (o tabernakulo). Tabangi ang mga kabataan sa paglista sa mga dapit ug mga sitwasyon diin atong bation ang presensya sa Ginoo. Sa unsang paagi nga kini nga mga dapit nagtabang kanato nga mahimong mas mahisama sa Langitnong Amahan ug ni Jesukristo?

Levitico 1:1–4

Pinaagi sa Pag-ula ni Jesukristo, ako mahimong mapasaylo.

Ang pagsakripisyo og hayop nga gihimo sa Daang Tugon gituyo aron sa pagtudlo sa mga anak sa Israel mhitungod sa pagpasaylo nga nahimong posible pinaagi sa Pag-ula ni Jesukristo.

Posible nga mga Kalihokan

• Pagpakita og mga hulagway ni Jesukristo didto sa Getsemane ug didto sa krus (tan-awa sa Libro sa Hulagway sa Ebanghelyo, nus. 56, 57). Ipasabut nga ang Ginoo misugo sa mga anak sa Israel sa paghimo og sakripisyo aron sa pagtudlo kanila nga sila mapasaylo sa ilang mga sala pinaagi sa Pag-ula ni Jesukristo. Basaha sa mga kabataan ang Levitico 1:1–4, ug dapita sila sa pagpangita alang sa mga pulong o mga hugpong sa mga pulong nga nagpahinumdom kanila sa sakripisyo ni Jesukristo.

• Pagpakita og usa ka hulagway ni Jesukristo nga nagduaw sa mga katawhan sa mga Amerika (sama sa Libro sa Hulagway sa Ebanghelyo, no. 82). Ipasabut nga human si Jesukristo gilansang sa krus ug nabanhaw Siya mitudlo sa mga katawhan sa Amerika kon ngano nga sila wala na kinahanglana nga magsakripisyo og mga hayop. Basaha og dungan ang 3 Nephi 9:19–20, ug pangutan-a ang mga kabataan kon unsa hinoon ang gisugo kanato sa pagsakripisyo. Unsa ang gipasabut sa paghalad og sakripisyo nga usa ka masulub-on nga kasingkasing ug usa ka mahinulsulon nga espiritu? Isugyot nga sila mosiksik sa “Masulub-on nga Kasingkasing” sa Ang Giya ngadto sa mga Kasulatan (scriptures.ChurchofJesusChrist.org) alang sa tabang sa pagtubag niini nga pangutana. Dapita sila sa pagpamalandong kon sa unsa nga paagi sila makatanyag og masulub-on nga kasingkasing ug mahinulsulon nga espiritu ngadto sa Ginoo.

Awhaga ang Pagkat-on diha sa Panimalay

Dapita ang mga kabataan sa pag-ampo sa Langitnong Amahan niini nga semana kon sa unsa nga paagi Siya gusto kanila nga motabang sa Iyang buluhaton diha sa ilang pamilya.

Pagpalambo sa Atong Pagtudlo

Ipunting ang mga kabataan ngadto sa Langitnong Amahan ug ni Jesukristo. Ang imong dakong katuyoan kinahanglan mao ang pagtabang sa mga kabataan nga imong gitudloan sa paglig-on sa ilang hugot nga pagtuo diha sa Langitnong Amahan ug ni Jesukristo. Unsa ang imong mabuhat sa pagtabang kanila sa pagsabut kon unsaon ang pagpuyo sa mga kamatuoran sa ebanghelyo motabang kanila nga mahimong mas mahisama sa Amahan ug sa Anak?