Uban sa Gahom sa Dios sa Dako nga Himaya
Ang pagtahod sa atong mga pakigsaad magsangkap kanato sa katarong ug sa gahom sa Dios sa dako nga himaya.
Ako nag-ampo nga ang Espiritu Santo molamdag ug mobayaw kanatong tanan samtang kita dungan nga maghunahuna sa kahibulongan nga buhat sa kaluwasan ug kahimayaan diha sa dispensasyon sa kahingpitan sa panahon.
Unang Pagbisita ni Anghel Moroni kang Joseph Smith
Gibana-bana nga tulo ka tuig human sa Unang Panan-awon, sa gabii sa Septyembre 21, 1823, ang batan-ong Joseph Smith nag-ampo aron makadawat og kapasayloan sa iyang mga sala ug aron mahibalo sa iyang estado ug kahimtang atubangan sa Dios.1 Usa ka personahe ang mitungha sa kiliran sa iyang higdaanan, misangpit sa ngalan Joseph, ug miingon nga “siya usa ka sinugo nga gipadala gikan sa atubangan sa Dios … ug nga ang iyang ngalan mao si Moroni.” Siya mipasabot “nga ang Dios adunay ipabuhat kang [Joseph]”2 ug dayon misulti kaniya kabahin sa pagtungha sa Basahon ni Mormon. Makahuloganon kaayo nga ang Basahon ni Mormon mao ang usa sa labing una nga hilisgotan nga gihisgotan sa mensahe ni Moroni.
Ang Basahon ni Mormon lain nga tugon ni Jesukristo ug ang labing maayo nga himan sa pagkakabig niining ulahing mga adlaw. Ang atong katuyoan sa pagpakigbahin sa ebanghelyo mao ang pagdapit sa tanan nga moduol ngadto ni Jesukristo,3 modawat sa mga panalangin sa gipahiuli nga ebanghelyo, ug molahutay hangtod sa kataposan pinaagi sa hugot nga pagtuo diha sa Manluluwas.4 Ang pagtabang sa mga tawo nga makasinati og dako nga kausaban sa kasingkasing5 ug mobugkos sa ilang kaugalingon ngadto sa Ginoo pinaagi sa sagrado nga mga pakigsaad ug mga ordinansa mao ang labing mahinungdanon nga mga katuyoan sa pagsangyaw sa ebanghelyo.
Ang pagpaila ni Moroni sa Basahon ni Mormon ngadto ni Joseph Smith mipasiugda sa buhat sa kaluwasan ug kahimayaan alang sa mga tawo niini nga habig sa tabil niini nga dispensasyon sa kahingpitan sa mga panahon.
Sa pagpadayon sa iyang mga tugon ngadto ni Joseph, si Moroni mikutlo gikan sa basahon ni Malaquias sa Daang Tugon, nga may gamayng kausaban diha sa pinulongan nga gigamit sa King James nga bersyon:
“Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moab[o]t ang mahinungdanon ug makalilisang nga adlaw sa Ginoo.
“… Ug siya motanom diha sa mga kasingkasing sa anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan. Kon dili pa ingon niini, ang tibuok kalib[o]tan pagalaglagon sa hingpit sa iyang pag-ab[o]t.”6
Ang atong katuyoan sa pagtukod og mga templo mao ang paghimo nga anaay balaan nga mga dapit diin ang sagrado nga mga pakigsaad ug mga ordinansa nga gikinahanglan alang sa kaluwasan ug kahimayaan sa tawhanong pamilya mapahigayon, alang sa buhi ug sa patay. Ang tugon ni Moroni ngadto ni Joseph Smith mahitungod sa importante kaayo nga papel ni Elijah ug sa katungod sa pagkapari nga mipalapad sa buhat sa kaluwasan ug kahimayaan dinhi niini nga habig sa tabil ug mipasiugda sa atong dispensasyon sa buhat alang sa patay didto sa pikas nga habig sa tabil.
Sa katingbanan, ang mga panudlo ni Moroni niadtong Septyembre sa 1823 mahitungod sa Basahon ni Mormon ug sa misyon ni Elijah mitukod sa pundasyon sa doktrina alang sa buhat sa kaluwasan ug kahimayaan sa duha ka habig sa tabil.
Mga Pagtulun-an ni Propeta Joseph Smith
Ang mga leksiyon nga nakat-onan ni Joseph Smith gikan ni Moroni miimplewensiya sa matag aspeto sa iyang pangalagad. Sama pananglit, sa usa ka maligdong nga panagtigom nga gihimo sa Templo sa Kirtland niadtong Abril 6, 1837, ang Propeta mipahayag, “Human sa tanan nga nasulti, ang pinakadako ug pinakaimportante nga katungdanan mao ang pagsangyaw sa Ebanghelyo.”7
Hapit eksaktong pito ka tuig ang milabay, niadtong Abril 7, 1844, si Joseph Smith mihatag og usa ka wali nga naila karon nga ang King Follett Discourse. Siya mipahayag niadto nga pakigpulong, “Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay.”8
Apan sa unsang paagi nga ang pagtudlo sa ebanghelyo ug ang pagsiksik sa atong mga patay mahimong duha sa labing dako nga katungdanan ug responsibilidad nga gisangon sa Dios kanato? Ako nagtuo nga si Propeta Joseph Smith naghatag og gibug-aton diha sa duha ka pamahayag sa sukaranang kamatuoran nga ang mga pakigsaad, nga gihimo pinaagi sa awtorisado nga mga ordinansa sa pagkapari, makabugkos kanato ngadto ni Ginoong Jesukristo ug mao ang importanting kinauyokan sa buhat sa kaluwasan ug kahimayaan sa duha ka habig sa tabil.
Ang buhat sa misyonaryo ug sa templo ug kasaysayan sa pamilya [family history] nagsuporta ug konektado nga mga aspeto sa usa ka mahinungdanong buhat nga nagtutok sa sagrado nga mga pakigsaad ug mga ordinansa nga makahimo kanato nga makadawat sa gahom sa pagkadiosnon diha sa atong kinabuhi ug, sa kataposan, mahibalik sa presensya sa Langitnong Amahan. Sa ingon, ang duha ka pamahayag sa Propeta nga sa sinugdanan daw makita nga nagkasukwahi, sa pagkatinuod, naghatag og gibug-aton sa labing importanting bahin niining dakong buhat sa ulahing mga adlaw.
Nabugkos ngadto sa Manluluwas pinaagi sa mga Pakigsaad ug mga Ordinansa
Miingon ang Manluluwas:
“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.
“Sayon ang yugo nga akong isangon kaninyo, ug gaan ang ipapas-an ko kaninyo.”9
Atong isangon ang yugo sa Manluluwas nganhi kanato samtang kita makakat-on mahitungod, takos nga modawat, ug motahod sa sagrado nga mga pakigsaad ug mga ordinansa. Kita lig-on nga nabugkos ngadto ug uban sa Manluluwas samtang matinud-anong mohinumdom ug mohimo sa labing maayo sa pagpuyo sumala sa mga obligasyon nga atong gidawat. Ug kana nga pagkabugkos uban Kaniya mao ang tinubdan sa espirituhanon nga kalig-on sa matag panahon sa atong kinabuhi.
Ang Katawhan sa Pakigsaad sa Ginoo
Ako modapit kaninyo sa pagkonsiderar sa mga panalangin nga gisaad ngadto sa nagtuman sa pakigsaad nga mga disipulo ni Jesukristo. Sama pananglit, si Nephi “nakakita sa simbahan sa Kordero sa Dios [sa ulahing mga adlaw], ug ang iyang gidaghanon diyutay ra, … ang mga santos sa Dios, diha usab sa ibabaw sa tibuok yuta; ug ang ilang mga kamandoan … gamay ra.”10
Siya usab “nakakita sa gah[o]m sa Kordero sa Dios, nga kini mikunsad diha sa mga santos sa simbahan sa Kordero, ug diha sa mga katawhan sa pakigsaad sa Ginoo, … ug sila gisangkapan sa katar[o]ng ug uban sa gah[o]m sa Dios sa dako nga himaya.”11
Ang mga pulong nga “gisangkapan sa katar[o]ng ug uban sa gah[o]m sa Dios sa dako nga himaya” dili lamang nindot nga ideya o usa ka ehemplo sa nindot nga mga pulong sa kasulatan. Hinuon, kini nga mga panalangin tataw nga anaa kanunay sa mga kinabuhi sa dili maihap nga mga disipulo sa Ginoo sa ulahing mga adlaw.
Ang akong buluhaton isip sakop sa Napulog Duha midala kanako sa tibuok kalibotan. Ug ako napanalanginan nga makahimamat ug makakat-on og mga halandumon nga mga leksiyon gikan sa daghan kaninyo. Ako mopamatuod nga ang katawhan sa pakigsaad sa Ginoo karon sa pagkatinuod gisangkapan sa katarong ug uban sa gahom sa Dios sa dako nga himaya. Ako nakasaksi sa hugot nga pagtuo, kaisog, panglantaw, kamakanunayon, ug hingpit nga kalipay nga molabaw pa kaayo sa mortal nga kapasidad––ug nga ang Dios lamang ang makahatag.
Ako nakasaksi sa katarong ug gahom sa Dios sa dako nga himaya, nga nadawat pinaagi sa kamatinuoron sa mga pakigsaad ug mga ordinansa, diha sa kinabuhi sa batan-ong miyembro sa Simbahan kinsa wala hingpit nga maparalisado tungod sa makalilisang nga aksidenti sa sakyanan. Human sa mga bulan sa malisod nga pagpaalim ug pagpahiangay niini nga tawo ngadto sa bag-o nga paagi sa pagpakabuhi nga adunay restriksiyon sa paglihok-lihok, akong nahimamat ug nakaistorya kining malig-on nga kalag. Atol sa among panag-istoryahanay nangutana ko, “Unsay natabang niini nga kasinatian nga imong nakat-onan?” Ang dali nga tubag mao ang, “Ako wala maguol. Wala ko masuko. Ug ang tanan mamaayo ra.”
Akong nasaksihan ang katarong ug gahom sa Dios sa dako nga himaya, nga nadawat pinaagi sa kamatinuoron sa mga pakigsaad ug mga ordinansa sa kinabuhi sa bag-o nga nabunyagan ug nakumpermahan nga mga miyembro sa Simbahan. Kini nga mga kinabig mahinamon nga makakat-on ug moserbisyo, andam apan kasagaran dili sigurado bahin sa unsaon paghiklin sa karaan nga mga pamatasan ug lig-on nga mga tradisyon, ug bisan pa niana malipayon nga mahimong “kauban na sa katawhan sa Dios ug mga sakop na sa iyang banay.”12
Akong nasaksihan ang katarong ug gahom sa Dios sa dako nga himaya nga nadawat pinaagi sa kamatinuoron sa mga pakigsaad ug mga ordinansa sa kinabuhi sa usa ka pamilya kinsa malumo nga miamuma sa usa ka kapikas ug ginikanan nga adunay gitagalan na nga sakit. Kini nga mga maisogon nga mga disipulo mihulagway sa mga higayon nga ang ilang pamilya mibati nga nag-inusara––ug mga higayon nga sila nahibalo nga ang kamot sa Ginoo mibayaw ug mipalig-on kanila. Kini nga pamilya mipahayag sa sinsero nga pasalamat alang sa malisod nga mortal nga mga kasinatian nga nagtugot kanato nga molambo ug mahimong mas mahisama sa atong Langitnong Amahan ug sa atong Manunubos, si Jesukristo. Ang Dios mitabang ug mipanalangin niini nga pamilya uban sa pakig-uban sa Espiritu Santo ug mihimo sa ilang panimalay nga sama ka sagrado nga kapasilongan sa templo.
Akong nasaksihan ang katarong ug gahom sa Dios sa dako nga himaya nga nadawat pinaagi sa kamatinuoron sa mga pakigsaad ug mga ordinansa sa kinabuhi sa usa ka miyembro sa Simbahan kinsa nakasinati og kagul-anan tungod sa diborsyo. Kining espirituwal ug emosyonal nga kalisod sa usa ka sister misamot tungod sa gibati nga pagkadili makiangayon kalabot sa paglapas sa iyang kapikas sa mga pakigsaad ug sa pagkabungkag sa ilang kaminyoon. Siya gusto og hustisya ug pagkamay-tulubagon.
Isip usa ka matinud-anon nga babaye nga nakigbisog sa tanang nahitabo kaniya, siya mas matinguhaon ug mainiton nga nagtuon ug namalandong sa Pag-ula sa Manluluwas sukad sa iyang kinabuhi. Sa hinay-hinay, ang usa ka mas lawon nga pagsabot sa makaluwas nga misyon ni Kristo mituhop sa iyang kalag––ang Iyang pag-antos alang sa atong mga sala, ug usab alang sa atong mga kasakit, mga kahuyang, mga kahigawad, ug kalisdanan. Ug siya nadasig sa pagpangutana sa iyang kaugalingon og usa ka makapahinuklog nga pangutana: tungod kay ang bugti alang niadtong mga sala nabayaran naman, gikinahanglan ba nga ikaw mobayad og kaduha? Siya nakaamgo nga ang samang panginahanglanon mahimong dili makiangayon o dili manggiloloy-on.
Kini nga babaye nakakat-on nga ang pagbugkos sa iyang kaugalingon ngadto sa Manluluwas pinaagi sa mga pakigsaad ug mga ordinansa makapaayo sa mga samad nga gumikan kay ang laing tawo dili matarong nga migamit sa moral nga pagpili ug nakapahimo kaniya sa pagkaplag sa kapasidad sa pagpasaylo ug pagdawat sa kalinaw, kalooy, ug gugma.
Saad ug Pagpamatuod
Ang mga saad ug mga panalangin sa pakigsaad mahimong posible lamang tungod sa atong Manluluawas, si Jesukristo. Siya nagdapit kanato sa paghunahuna Kaniya,13 moduol ngadto Kaniya,14 magkat-on diha Kaniya,15 ug hiusahon ang atong kaugalingon ngadto Kaniya16 pinaagi sa mga pakigsaad ug mga ordinansa sa Iyang gipahiuli nga ebanghelyo. Ako mopamatuod ug mosaad nga ang pagtahod sa mga pakigsaad mosangkap kanato sa katarong ug uban sa gahom sa Dios sa dako nga himaya. Ug ako mosaksi nga ang buhi nga si Ginoong Jesukristo mao ang atong Manluluwas. Niini nga mga kamatuoron ako malipayong mopamatuod diha sa sagradong ngalan ni Jesukristo, amen.