Usa ka Balay nga adunay Han-ay nga Pamaagi
Ang “han-ay nga pamaagi” usa ka yano, natural, ug epektibo nga paagi sa Ginoo sa pagtudlo kanato, isip Iyang mga anak, og importante nga mga baroganan.
Sa akong propesyonal nga kinabuhi ug sa akong serbisyo sa Simbahan, nabuhat na kini nako sa liboan ka higayon—wala pa lang gayod sukad sa atubangan niining 15 ka mga lalaki nga naglingkod diha mismo sa akong likod. Akong gibati ang inyo ug ang ilang mga pag-ampo.
Mga kaigsoonan, usa ako ka lumad sa Gingharian sa Tonga sa Habagatang Pasipiko apan nagdako sa Amihanang Amerika. Ang pandemya nakapugong sa gatosan, tingali liboan ka batan-on nga mga Tongan nga mga misyonaryo nga nagserbisyo sa tibuok kalibotan nga makapauli ngadto sa ilang minahal nga yutang natawhan tungod sa sirado nga mga utlanan niini. Ang ubang Tongan nga mga elder nagpabilin sa ilang mga misyon sulod sa tulo ka tuig ug ang mga sister lapas na sa duha ka tuig! Naghulat sila nga mapailobon inubanan sa hugot nga pagtuo nga maoy nailhan nga kinaiya sa among katawhan. Mentras tanto, ayaw kaayo mo kaalarma kon ang uban kanila nga nagserbisyo sa inyong mga ward ug mga stake nag-anam nag kaparehas nako—nagkatigulang ug ubanon. Mapasalamaton kita sa mga misyonaryo bisan asa sa ilang mahalaron nga serbisyo, bisan kon kini mas dugay o mas dali nga nahuman kay sa ilang gidahoman tungod sa pandemya.
Usa ka Dominggo dihang deacon pa ako, didto ko sa pasilyo nga may dalang usa ka tray nga tubig samtang nag-apod-apod sa sakramento dihang ang usa ka babaye misulod sa building. Matinuoron sa katungdanan, ako siyang giduol ug gitunol niya ang tray. Mitando siya, mipahiyom, ug mikuha sa kopa. Ulahi na kaayo siya nga miabot aron makadawat sa pan. Sa wala madugay human niini nga kasinatian, ang akong home teacher, si Ned Brimley, mitudlo kanako nga daghang aspeto ug mga panalangin sa ebanghelyo ni Jesukristo ihatag kanato sa han-ay nga pamaagi.
Sa hinapos niana nga semana, si Ned ug ang iyang kompanyon miabot sa among panimalay nga may dala nga usa ka halandomon nga leksiyon. Si Ned nagtudlo kanamo nga adunay pagkahan-ay sa paglalang sa Dios sa yuta. Ang Ginoo migahin og mainampingon nga pagpasabot ngadto ni Moises sa pagkahan-ay sa Iyang paglalang sa yuta. Una, gisugdan Niya pinaagi sa pagbulag sa kahayag gikan sa kangitngit, dayon sa tubig gikan sa uga nga yuta. Iyang gidugang ang kinabuhi sa mga tanom ug mga hayop sa wala pa ibutang ngadto sa bag-ong nahulma nga planeta ang Iyang labing mahinungdanon nga nilalang: ang tawo, nagsugod kang Adan ug Eva.
“Busa gibuhat sa Dios ang tawo, lalaki ug babaye, sama sa iyang dagway. …
“Nakita sa Dios nga maayo gayod ang tanan nga iyang gibuhat” (Genesis 1:27, 31).
Ang Ginoo nalipay. Ug Siya mipahulay sa ikapito nga adlaw.
Ang han-ay nga pamaagi diin ang yuta gilalang naghatag kanato og daklit nga panglantaw dili lamang sa unsa ang labing importante sa Dios, apan usab kon ngano ug para kang kinsa Niya gilalang ang yuta.
Gitapos ni Ned Brimley ang iyang dinasig nga leksyon pinaagi sa yano nga pamahayag: “Vai, ang balay sa Dios usa ka balay sa kahusay. Naglaom Siya nga imong puy-an ang imong kinabuhi diha sa kahusay. Sa tukma nga pamaagi sa kahan-ay. Gusto niya nga magserbisyo ka og misyon sa dili pa ikaw magminyo.” Hangtod karon, ang mga lider sa Simbahan kasamtangang nagtudlo nga “ang Ginoo nagpaabot sa matag makahimo nga batan-ong lalaki sa pag-andam sa pagserbisyo. … Ang batan-ong mga babaye … kinsa nagtinguha nga moserbisyo kinahanglan usab nga mangandam” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 24.0, ChurchofJesusChrist.org). Si brother Brimley mipadayon: “Gusto sa Dios nga magminyo ka sa dili pa ikaw makabaton og mga anak. Ug gusto Niya nga padayon ka nga magpalambo sa imong mga talento samtang mag-angkon ka og edukasyon.” Kon pilion nimo nga magpakabuhi sa dili husto nga pamaagi sa kahan-ay, makita nimo ang kinabuhi nga mas lisod ug gubot.
Si brother Brimley nagtudlo usab kanamo nga pinaagi sa Iyang maulaon nga sakripisyo, ang Manluluwas nagtabang kanato nga ipahiuli ngadto sa kahan-ay ang atong kinabuhi nga nahimong gubot o wala na mahan-ay pinaagi sa atong kaugalingon o sa ubang tawo nga dili maayo nga mga pagpili.
Sukad niadtong higayona, nakabaton ko og kahilig sa “han-ay nga pamaagi.” Naugmad nako ang kinaiya sa pagtan-aw sa nakahan-ay nga mga sundanan sa kinabuhi ug sa ebanghelyo.
Si Elder David A. Bednar nagtudlo niini nga baroganan: “Sa atong pagtuon, pagkat-on, ug pagsunod sa ebanghelyo ni Jesukristo, ang han-ay sa mga panghitabo makatabang kanunay. Ikonsiderar, pananglit, ang leksiyon nga atong nakat-[o]nan mahitungod sa espirituhanong prayoridad gikan sa pagkahan-ay sa dagko nga panghitabo nga nahitabo sa dihang ang kahingpitan sa ebanghelyo sa Manluluwas gipahiuli sa ulahing mga adlaw.”
Gitan-aw ni Elder Bednar ang Unang Pan-awon ug ang unang pagpakita ni Moroni ngadto ni Joseph Smith isip pagtudlo sa batang propeta og una, sa kinaiyahan ug pagkatawo sa Dios, gisundan sa tahas nga tumanon sa Basahon ni Mormon ug ni Elijah sa pagpundok sa Israel sa duha ka habig sa tabil niining kataposan nga dispensasyon.
Si Elder Bednar mitapos: “Kining makapadasig nga han-ay sa mga panghitabo makahatag og mapuslanon nga kasayoran kabahin sa espirituhanon nga butang nga mahinungdanon kaayo ngadto sa Dios” (“Ang mga Kasingkasing sa mga Anak Mobati,” Liahona, Nob. 2011, 24).
Usa ka obserbasyon nga akong gihimo mao nga ang “han-ay nga pamaagi” usa ka yano, natural, ug epektibo nga paagi sa Ginoo sa pagtudlo kanato, isip Iyang mga anak, og importante nga mga baroganan.
Kita mianhi sa yuta aron makakat-on ug makaangkon og kasinatian nga dili nato makuha sa laing paagi. Ang atong paglambo talagsaon alang sa matag usa kanato isip mga indibidwal ug mahinungdanon kaayo nga bahin sa plano sa Langitnong Amahan. Ang atong pisikal ug espirituwal nga pagtubo nagsugod sa ginagmay nga mga yugto ug hinayhinay nga naglambo samtang kita nakaangkon og mga kasinatian sa han-ay nga paagi.
Si Alma naghatag kanato og usa ka gamhanan nga sermon kabahin sa hugot nga pagtuo—nga gibasi sa panig-ingnan sa usa ka liso, nga, kon atimanon ug alimahan sa saktong paagi, mogitib gikan sa usa ka linghod ngadto sa usa ka saktong gidak-on, gulang nga kahoy nga makahatag og lamian nga prutas (tan-awa sa Alma 32:28–43). Ang leksiyon mao nga ang inyong hugot nga pagtuo molambo samtang inyong hatagan og luna ug alimahan ang liso—o ang pulong sa Dios—diha sa inyong mga kasingkasing. Ang inyong hugot nga pagtuo molambo samtang ang pulong sa Dios magsugod sa “pagtubo diha sulod sa inyong mga dughan” (bersikulo 28). Nga kini “mitubo, ug migitib, ug misugod sa pagtubo” (bersikulo 30) parehong makita ug makahatag og mapuslanon nga kasayoran. Nahan-ay usab kini.
Ang Ginoo motudlo kanato sa tinagsa sumala sa atong kapasidad sa pagkat-on ug kon unsaon nato sa pagkat-on. Ang atong paglambo magdepende sa atong kaandam, natural nga pagkakuryoso, gidak-on sa hugot nga pagtuo, ug pagsabot.
Si Nephi gitudloan kon unsa ang makat-onan ni Joseph Smith didto sa Kirtland, Ohio, human sa paglabay sa sobra sa 2,300 ka tuig: “Kay tan-awa, sa ingon miingon ang Ginoong Dios: Ako mopadayag ngadto sa mga katawhan og pagtul[o]n-an human sa usa ka pagtul[o]n-an, lagda human sa usa ka lagda, diy[o]tay dinhi ug diy[o]tay didto; ug bulahan kadto kinsa mopatalingh[o]g ngari sa akong mga lagda, ug maminaw ngari sa akong mga tambag, kay sila makakat-on og kaalam” (2 Nephi 28:30).
Nga kita makakat-on nga ang “pagtul[o]n-an human sa usa ka pagtul[o]n-an, lagda human sa usa ka lagda, diy[o]tay dinhi ug diy[o]tay didto” sa gihapon nakahan-ay.
Hunahunaa ang mosunod nga mga pamahayag nga kadaghan natong nadungog sa atong kinabuhi: “Unahon ang kinahanglang unahon” o “Gatas una sa dili pa mokaon og gahing pagkaon.” Kini kaha “Kinahanglan molakaw una kita sa dili pa modagan”? Ang matag usa niini nga mga panultihon naghulagway og butang nga nakahan-ay.
Ang mga milagro mahitabo sumala sa han-ay nga pamaagi. Ang mga milagro mahitabo kon kita magpakita una og hugot nga pagtuo. Ang hugot nga pagtuo mag-una sa milagro.
Ang batan-ong mga lalaki i-orden usab ngadto sa mga katungdanan sa Aaronic nga Pagkapari sa han-ay nga paagi, sumala sa edad sa tawo nga gi-ordenahan: deacon, teacher, ug dayon priest.
Ang mga ordinansa sa kaluwasan ug kahimayaan anaa sa han-ay nga kinaiyahan. Bunyagan kita sa dili pa makadawat sa gasa sa Espiritu Santo. Ang mga ordinansa sa templo sa samang paagi nakahan-ay. Siyempre, sama sa gitudlo kanako sa akong higala nga si Ned Brimley sa maalamong paagi, ang sakramento nakahan-ay—kini magsugod sa pan, sundan sa tubig.
“Samtang nangaon sila, mikuha si Jesus sa pan, nagpasalamat sa Dios ug gipikaspikas niya kini ug gihatag sa iyang mga tinun-an. Ug miingon siya, Dawata ninyo kini ug kan-a. Kini mao ang akong lawas.
“Unya gikuha niya ang kupa, nagpasalamat sa Dios ug gihatag kanila. Inom kamong tanan niini;
“Kini mao ang akong dugo nga naglig-on sa kasabotan, ang akong dugo nga gipaagas alang sa daghan aron sa pagpasaylo sa mga sala” (Mateo 26:26–28).
Didto sa Jerusalem ug didto sa mga kayutaan sa Amerika, ang Manluluwas mipahigayon sa sakramento sa sama ka eksakto nga pagkahan-ay.
“Tan-awa, ang akong balay mao ang balay sa kahusay, miingon ang Ginoong Dios, ug dili usa ka balay sa kagubot” (Doktrina ug mga Pakigsaad 132:8).
Ang paghinulsol nakahan-ay. Magsugod kini diha sa hugot nga pagtuo ni Jesukristo, bisan kon gamay lang kaayo. Ang hugot nga pagtuo nagkinahanglan og pagkamapainubsanon, nga maoy usa ka mahinungdanon nga elemento sa pagbaton og “masulub-on nga kasingkasing ug mahinulsulon nga espiritu” (2 Nephi 2:7).
Sa pagkatinuod, ang unang upat ka baroganan sa ebanghelyo nakahan-ay. “Kami nagtuo nga ang unang mga bar[o]ganan ug mga ordinansa sa Ebanghelyo mao ang: una, Hugot nga pagtuo diha [ni] Ginoong Jesukristo; ikaduha, Paghinulsol; ikatulo, Bunyag pinaagi sa pagpaunlod alang sa kapasayloan sa mga sala, ikaupat, Pagpandong sa mga kamot alang sa gasa sa Espiritu Santo” (Mga Artikulo sa Hugot nga Pagtuo 1:4).
Si Hari Benjamin mitudlo sa iyang katawhan niining importante nga kamatuoran: “Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog. Ug usab, kini angay nga siya kinahanglan magkugi, nga sa ingon niana siya unta makada[o]g sa ganti; busa, ang tanan nga mga butang kinahanglan gay[o]d nga mabuhat diha sa kahusay” (Mosiah 4:27).
Hinaot nga kita magpakabuhi nga adunay kahusay ug magtinguha nga mosunod sa han-ay nga gilatid sa Ginoo alang kanato. Kita mapanalanginan samtang mangita ug mosunod sa mga sundanan ug sa han-ay diin ang Ginoo nagtudlo kanato kon unsa ang labing mahinungdanon ngadto Kaniya. Sa sagrado nga ngalan ni Jesukristo, amen.