“Gihigugma Mo ba Ako Labaw sa Paghigugma Nimo Niining mga Butanga?”
Unsa ang mga butang nga inyong mahimo sa inyong kaugalingon nga kinabuhi aron makapakita nga inyong gihigugma ang Ginoo una sa tanan?
Niadtong Nobyembre 2019, ang akong higala ug ako mibisita sa Balaan nga Yuta. Samtang didto mi, among girebyo ug gitun-an ang mga kasulatan kabahin sa kinabuhi ni Jesukristo. Usa ka buntag nagbarog mi sa amihanang kasadpan nga baybayon sa Dagat sa Galilea sa dapit diin didto tingali si Jesus nakighimamat sa Iyang mga disipulo human sa Iyang Pagkabanhaw.
Human sa Pagkabanhaw ni Jesus, sama sa atong mabasa diha sa Juan kapitulo 21, si Pedro ug ang ubang mga disipulo nangisda sa tibuok gabii nga walay kuha.1 Sa pagkabuntag, nakakita sila og tawo nga nagbarog sa baybayon kinsa misugo kanila sa paglabay sa ilang pukot sa pikas nga bahin sa sakayan. Sa ilang kahingangha, ang pukot milagroso nga napuno.2
Nahibaloan dayon nila nga ang tawo mao ang Ginoo, ug nagdali sila sa paghangop Kaniya.
Samtang ilang gibira ang ilang pukot paingon sa baybayon, nga puno sa isda, si Jesus miingon, “Dali ngari ug pangaon kamo.”3 Si Juan mitaho nga “human nilag pangaon, nangutana si Jesus kang Simon Pedro, Simon, anak ni Juan, gihigugma mo ba ako labaw sa paghigugma nimo niining mga butanga?”4
Samtang nagbarog ko nianang sama nga baybayon, nakaamgo ko nga ang pangutana sa Manluluwas mao ang usa sa labing mahinungdanong mga pangutana nga tingali Iyang ipangutana kanako sa umaabot nga panahon. Daw nadungog nako ang Iyang tingog nga nangutana, “Russell, gihigugma mo ba ako labaw sa paghigugma nimo niining mga butanga?”
Naghunahuna ba kamo kon unsa kaha ang gipasabot ni Jesus sa dihang nangutana Siya ni Pedro, “Gihigugma mo ba ako labaw sa paghigugma nimo niining mga butanga?”
Kon ilambigit kini nga pangutana sa atong mga kaugalingon karon, ang Ginoo tingali mangutana kanato kabahin sa atong pagkabisi ug kabahin sa daghang positibo ug negatibo nga mga impluwensiya nga nag-ilog sa atong atensiyon ug sa atong panahon. Tingali mangutana siya sa matag usa kanato kon ato ba Siyang gihigugma labaw pa kay sa mga butang niining kalibotana. Kini tingali usa ka pangutana kabahin sa unsa gayod ang atong gihatagan og bili sa kinabuhi, kinsa ang atong gisunod, ug unsay atong panglantaw sa atong mga relasyon ngadto sa mga sakop sa pamilya ug sa mga silingan. O tingali mangutana Siya kon unsa gayod ang makahatag kanato og kamaya ug kalipay.
Ang mga butang niini nga kalibotan makahatag ba kanato og kamaya, kalipay, ug kalinaw nga gidalit sa Manluluwas ngadto sa Iyang mga disipulo ug nga Iyang gidalit kanato? Siya lamang ang makahatag kanato og tinuod nga kamaya, kalipay, ug kalinaw pinaagi sa atong paghigugma Kaniya ug pagsunod sa Iyang mga pagtulon-an.
Unsaon nato pagtubag sa pangutana nga “Gihigugma mo ba ako labaw sa paghigugma nimo niining mga butanga?”
Kon makakaplag kita og mas hingpit nga kahulogan niini nga pangutana, mahimo kitang mas maayo nga mga sakop sa pamilya, mga silingan, mga lumulopyo, mga miyembro sa Simbahan, ug mga anak sa Dios.
Sa akong pangedaron, daghan na akong natambongan nga seremonyas sa paglubong. Nakasiguro ko nga daghan kaninyo ang nakamatikod sa unsay akong namatikdan. Kon magpasidungog sa kinabuhi sa namatay nga sakop sa pamilya o higala, talagsa ra kaayo nga ang mamumulong maghisgot kabahin sa gidak-on sa balay sa maong tawo, sa gidaghanon sa mga sakyanan, o sa mga balanse sa pundo sa bangko. Kasagaran dili sila maghisgot kabahin sa mga post sa social media. Sa kadaghanan nga seremonyas sa paglubong nga akong natambongan, nakatutok sila sa mga relasyon sa ilang minahal, serbisyo ngadto sa uban, mga leksiyon ug mga kasinatian sa kinabuhi, ug sa ilang gugma alang ni Jesukristo.
Ayaw ko saypa sa pagsabot. Wala ko magpasabot nga ang pag-angkon og nindot nga balay o nindot nga sakyanan sayop o ang paggamit sa social media dili maayo. Unsay akong gisulti mao nga sa kataposan, kanang mga butanga gamay ra kaayo og bili kon itandi ngadto sa paghigugma sa Manluluwas.
Kon kita mohigugma ug mosunod Kaniya, kita adunay hugot nga pagtuo diha Kaniya. Kita maghinulsol. Kita mosunod sa Iyang ehemplo ug magpabunyag ug modawat sa Espiritu Santo. Kita molahutay hangtod sa kataposan ug magpabilin diha sa dalan sa pakigsaad. Kita mopasaylo sa mga sakop sa pamilya ug mga silingan pinaagi sa pagsalikway sa mga pagdumot nga atong gihambin. Kita matinguhaon sa pagpaningkamot nga motuman sa mga sugo sa Dios. Kita maningkamot nga magmasulundon. Kita mohimo ug motuman sa mga pakigsaad. Kita motahod sa atong mga amahan ug mga inahan. Kita mohikling sa negatibo nga kalibotanon nga mga impluwensiya. Kita mangandam sa atong kaugalingon alang sa Iyang Ikaduhang Pag-anhi.
Sa “Ang Buhi nga Kristo: Ang Pagpamatuod sa mga Apostoles,” atong mabasa: “[Si Jesus] sa umaab[o]t nga adlaw mobalik nganhi sa yuta. … Siya magmando isip Hari sa mga Hari ug magmando isip Ginoo sa mga Ginoo, ug ang matag tuhod moluhod ug ang tanan nga mga dila mokumpisal sa pagsimba diha sa Iyang atubangan. Ang matag usa kanato mobar[o]g aron pagahukman Niya sumala sa atong mga binuhatan ug sa mga tinguha sa atong mga kasingkasing.”5
Isip usa sa mga Apostol nga mipirma sa dokumento nga “Ang Buhi nga Kristo”, ako moingon nga ang pagkahibalo nga si Jesus “mao ang kahayag, ang kinabuhi, ug ang pagla[o]m sa kalib[o]tan6 naghatag kanako og mas dako nga tinguha nga mas mohigugma pa Kaniya sa kada adlaw.
Ako mopamatuod nga ang Langitnong Amahan ug si Jesukristo buhi. Ako mopamatuod nga Sila nahigugma kanato. Ang mga kasulatan nagtudlo nga “Gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon.”7 Ang mga kasulatan nagtudlo usab nga si Jesus “nahigugma sa kalib[o]tan nga siya mihatag sa iyang kaugalingon nga kinabuhi, nga kutob sa motuo mahimo nga mga anak sa Dios [nga mga lalaki ug mga babaye].”8
Ang Langitnong Amahan nahigugma pag-ayo kanato nga Iyang giandam ang Iyang plano sa kaluwasan diin ang usa ka Manluluwas mao ang pinakasentro nga binuhat. Ug si Jesus nahigugma pag-ayo kanato nga didto sa dakong Konseho sa Langit, dihang ang Langitnong Amahan nangutana, “Kinsa ako mopadala?” Si Jesus, kinsa mao ang Unang Natawo sa tanan nga espiritu nga mga anak sa Amahan, mitubag, “Ania ako, ipadala ako.”9 Siya miingon ngadto sa Amahan, “Amahan, ang imong pagbuot mao ang matuman, ug ang himaya imo sa kahangt[o]ran.”10 Si Jesus miboluntaryo nga mahimong atong Manluluwas ug Manunubos aron nga kita mahimong sama Kanila ug makabalik ngadto sa Ilang presensya.
Kining duha ka kasulatan nagtudlo usab nga aron makabalik ngadto sa Ilang presensya kinahanglan kita nga motuo. Kinahanglan kita nga motuo ni Jesus ug sa plano sa Dios bahin sa kalipay. Ang pagtuo mao ang paghigugma ug pagsunod sa atong Manluluwas ug pagtuman sa mga sugo, bisan diha sa taliwala sa mga pagsulay ug kagubot.
Ang kalibotan karon wala pa mahiluna. Adunay mga kasagmuyo, panagsumpaki, kasubo, ug mga paglingla.
Si Presidente Dallin H. Oaks, nga namulong niadtong 2017, misulti sa mosunod: “Kini mao ang mahagiton nga mga panahon, puno sa dagkong mga kabalaka: mga gubat ug mga hungihong bahin sa mga gubat, posibling mga epidemya sa makatakod nga mga sakit, mga huwaw, mga pagbaha, ug pagtaas sa temperatura sa kalibotan.”11
Dili mahimong mawala ang atong gugma ug paglaom diha ni Jesus, bisan kon kita nag-atubang sa ingon og sobra kaayo nga mga hagit. Ang Langitnong Amahan ug si Jesus dili gayod makalimot kanato. Sila nahigugma kanato.
Sa miaging Oktubre, si Presidente Russell M. Nelson mitudlo kanato sa importansiya sa pag-una sa Langitnong Amahan ug ni Jesukristo diha sa atong mga kinabuhi. Si Presidente Nelson nagtudlo kanato nga usa ka kahulogan sa pulong nga Israel mao ang “ipatigbabaw ang Dios labaw sa tanan.”12
Siya nangutana sa matag usa kanato niini nga mga pangutana: “Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tug[o]tan ang Dios nga maoy mahimong labing importante nga impluwens[i]ya sa inyong kinabuhi? Tugutan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwens[i]ya sa inyong buhaton matag adlaw? Tug[o]tan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?”13
Kinahanglan nga kanunay kitang mahinumdom nga ang atong tinuod nga kalipay magdepende sa atong relasyon ngadto sa Dios, ngadto ni Jesukristo, ug sa usag usa.
Ang usa ka pamaagi sa pagpakita sa atong gugma mao ang pag-apil sa pamilya, mga higala, ug mga silingan diha sa pagbuhat og ubang gagmay nga mga butang aron mas makaserbisyo pag-ayo sa usag usa. Paghimo og mga butang nga makahimo niining kalibotan nga mas maayong dapit.
Unsa ang mga butang nga inyong mahimo sa inyong kaugalingon nga kinabuhi aron makapakita nga inyong gihigugma ang Ginoo una sa tanan?
Samtang atong tutokan ang paghigugma sa atong mga silingan sama sa Iyang paghigugma kanila, magsugod kita sa paghigugma sa tinuoray niadtong anaa sa atong palibot.14
Mangutana na usab ako, unsaon ninyo pagtubag sa pangutana sa Manluluwas nga “Gihigugma mo ba ako labaw sa paghigugma nimo niining mga butanga?”
Samtang inyong ikonsiderar kini nga pangutana, sama sa akong gibuhat, ako mag-ampo nga kamo unta motubag sama sa gihimo ni Pedro kaniadto sa dugay na kaayo nga panahon, “Oo, Ginoo, nasayod ka nga gihigugma ko ikaw”15 ug dayon mopakita niini pinaagi sa paghigugma ug pag-alagad sa Dios ug sa tanan niadtong anaa sa inyong palibot.
Ako mopamatuod nga bulahan kita nga nakaangkon sa ebanghelyo ni Jesukristo nga mogiya kanato diha sa paagi sa atong pagpakabuhi ug pagtratar sa usag usa. Diha Kaniya, kita makakaplag nga ang matag anak sa Dios nga lalaki ug babaye bililhon kaayo para Kaniya.
Ako mopamatuod nga si Jesukristo mao ang atong minahal nga Manluluwas. Siya mao ang Bugtong nga Anak sa Dios. Ug mapainubsanon ko nga ihatag kini nga pagpamatuod sa ngalan ni Jesukristo, amen.