Wala Na Bay Tambal diha sa Gilead?
Ang makaayo nga gahom sa Manluluwas dili lang ang Iyang abilidad sa pag-ayo sa atong mga lawas, apan tingali mas importante, ang Iyang abilidad sa pag-ayo sa atong mga pagbati.
Wala madugay human sa akong misyon, samtang usa pa ako ka estudyante didto sa Brigham Young University, nakadawat ako og tawag sa telepono gikan sa akong papa. Giingnan ko niya nga nahiling siya nga dunay kanser sa hagudila [pancreas] ug nga bisan og ang iyang mga kahigayonan nga mabuhi dili maayo, determinado siya nga mamaayo ug mobalik sa iyang normal nga mga kalihokan sa kinabuhi. Kana nga tawag sa telepono usa ka seryoso nga higayon alang kanako. Ang akong papa nahimong akong bishop kaniadto, akong higala, ug akong tigtambag. Samtang ang akong mama, akong mga igsoon, ug ako namalandong sa umaabot, kini ingon og walay paglaom. Ang akong manghod nga lalaki, si Dave, nagserbisyo og misyon didto sa New York ug halayo nga miapil niining malisod nga mga panghitabo sa pamilya.
Ang mga tighatag og medikal nga pag-atiman niadtong panahona misugyot og pag-opera aron sa pagsulay ug pagpugong sa pagkatap sa kanser. Ang among pamilya matinguhaong nagpuasa ug nag-ampo sa usa ka milagro. Nabati nako nga kami adunay igong hugot nga pagtuo nga ang akong amahan mamaayo. Sa higayon lang gayod sa wala pa ang pag-opera, ang akong magulang nga lalaki, si Norm, ug ako mihatag sa akong papa og panalangin. Uban sa tanang hugot nga pagtuo nga among magamit, nag-ampo kami nga siya mamaayo.
Ang pag-opera nakatakda nga molungtad og taas nga panahon, apan human lang sa mubo nga higayon, ang doktor miabot sa hulatanan nga lawak aron makigkita sa among pamilya. Gisultihan niya kami nga samtang gisugdan nila ang pag-opera, ilang nakita nga ang kanser mikatap na sa tibuok lawas sa akong amahan. Base sa unsay ilang naobserbahan, ang akong papa adunay pipila na lang ka bulan nga mabuhi. Nahugno kami.
Sa dihang nakamata ang akong papa gikan sa pag-opera, matinguhaon siya nga makahibalo kon nagmalamposon ba ang pag-opera. Gipaambit namo kaniya ang masulub-on nga balita.
Nagpadayon kami sa pagpuasa ug pag-ampo alang sa usa ka milagro. Samtang paspas nga mikunhod ang panglawas sa akong amahan, nagsugod kami sa pag-ampo nga siya walay mabati nga sakit. Sa kataposan, samtang migrabe ang iyang kondisyon, mihangyo kami sa Ginoo nga tugotan siyang mopanaw dayon. Pipila lang ka bulan human sa pag-opera, sama sa gitag-an sa tig-opera [surgeon], ang akong amahan mipanaw.
Dakong gugma ug pagpakabana ang gihatag ngari sa among pamilya pinaagi sa mga miyembro sa ward ug sa mga higala sa pamilya. Kami nakahimo og matahom nga lubong nga mipasidungog sa kinabuhi sa akong amahan. Apan, sa paglabay sa panahon ug nakasinati kami sa kasakit sa pagkawala sa akong amahan, nagsugod ako sa paghunahuna kon nganong wala naayo ang akong amahan. Naghunahuna ako kon dili ba igo ang kalig-on sa akong hugot nga pagtuo. Ngano man nga ang ubang mga pamilya nakadawat og milagro, apan ang among pamilya wala? Nakat-onan nako sa akong misyon nga modangop ngadto sa mga kasulatan alang sa mga tubag, busa misugod ako sa pagsiksik sa mga kasulatan.
Ang Daang Tugon nagtudlo bahin sa usa ka pahumot o haplas nga gigamit sa pagtambal og mga samad nga gihimo gikan sa usa ka sampinit nga mitubo sa Gilead. Sa panahon sa Daang Tugon, ang haplas nailhan isip ang “tambal sa Gilead.”1 Ang propeta nga si Jeremias nagbangotan sa mga katalagman nga iyang naobserbahan taliwala sa iyang katawhan ug naglaom alang sa pagkaayo. Nangutana si Jeremias, “Wala na bay tambal diha sa Gilead? Wala ba gayoy mananambal didto?”2 Pinaagi sa literatura, musika, ug art, ang Manluluwas nga si Jesukristo kasagaran gipasabot isip ang Tambal sa Gilead tungod sa Iyang talagsaon nga makaayo nga gahom. Sama ni Jeremias, naghunahuna ko, “Wala na bay tambal diha sa Gilead alang sa pamilyang Nielson?”
Sa Marcos kapitulo 2 sa Bag-ong Tugon, atong makaplagan ang Manluluwas diha sa Capernaum. Ang balita sa makaayo nga gahom sa Manluluwas mikatap sa tibuok yuta, ug daghang tawo ang mibiyahe ngadto sa Capernaum aron ayohon sa Manluluwas. Daghan kaayo ang nagpundok sa palibot sa balay diin nahimutang ang Manluluwas nga walay lugar alang Kaniya sa pagdawat kanilang tanan. Upat ka lalaki midala og paralitiko nga lalaki aron ayohon sa Manluluwas. Wala sila makaagi sa pundok sa katawhan, ug busa giukab nila ang atop sa balay ug gitunton ang lalaki aron mahimamat ang Manluluwas.
Samtang gibasa nako kini nga asoy, nasorpresa ako sa unsay giingon sa Manluluwas sa dihang nahimamat niya kini nga lalaki: “Anak, gipasaylo na ang imong mga sala.”3 Naghunahuna ako nga kon usa ako sa upat ka lalaki nga midala niini nga lalaki, tingali akong sultihan ang Manluluwas, “Sa pagkatinuod gidala namo siya dinhi aron mamaayo.” Tingali ang Manluluwas motubag og, “Giayo gayod nako siya.” Posible ba nga wala ko nakasabot sa hingpit—nga ang makaayo nga gahom sa Manluluwas dili lang ang Iyang abilidad sa pag-ayo sa atong mga lawas, apan tingali mas importante, ang Iyang abilidad sa pag-ayo sa atong mga pagbati ug sa masulub-on nga mga kasingkasing sa akong pamilya?
Ang Manluluwas mitudlo og importante nga leksiyon pinaagi niini nga kasinatian samtang sa kataposan Siya miayo sa lawas sa lalaki. Nahimong tin-aw kanako nga ang Iyang mensahe mao nga Siya makahikap sa mga mata niadtong mga buta, ug sila makakita. Siya makahikap sa mga dalunggan niadtong mga bungol, ug sila makadungog. Siya makahikap sa mga bitiis niadtong mga dili makalakaw, ug sila makalakaw. Siya makaayo sa atong mga mata ug sa atong mga dalunggan ug sa atong mga bitiis apan labing importante sa tanan, Siya makaayo sa atong mga kasingkasing samtang Siya molimpyo kanato gikan sa sala ug mobayaw kanato latas sa malisod nga mga pagsulay.
Sa dihang nagpakita ang Manluluwas ngadto sa katawhan diha sa Basahon ni Mormon human sa Iyang Pagkabanhaw, namulong Siya pag-usab sa iyang makaayo nga gahom. Ang mga Nephite nakadungog sa Iyang tingog gikan sa langit nga nag-ingon, “Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?”4 Sa wala madugay, ang Manluluwas nagtudlo, “Kay kamo wala masay[o]d kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila.”5 Ang Manluluwas wala naghisgot og usa ka pisikal nga pag-ayo apan hinuon sa usa ka espirituwal nga pag-ayo sa ilang mga kalag.
Si Moroni nagdala og dugang nga panabot samtang gipaambit niya ang mga pulong sa iyang amahan, si Mormon. Human mamulong bahin sa mga milagro, si Mormon mipasabot, “Ug si Kristo miingon: Kon kamo adunay hugot nga pagtuo kanako kamo makabaton sa gah[o]m sa pagbuhat sa bisan unsa nga butang nga maayo ngari kanako.”6 Akong nakat-onan nga kinahanglan si Jesukristo mao ang tumong sa akong hugot nga pagtuo ug nga ako kinahanglan modawat kon unsay angay diha Kaniya samtang magpakita ako og hugot nga pagtuo diha Kaniya. Nakasabot na ako karon nga ang pagpanaw sa akong amahan angay diha sa plano sa Dios. Karon, samtang ipandong nako ang akong mga kamot sa ulo sa laing tawo aron sa pagpanalangin kaniya, ang akong hugot nga pagtuo anaa kang Jesukristo, ug ako nakasabot nga ang usa ka tawo mahimong pisikal nga mamaayo kon kini angay diha kang Kristo.
Ang Pag-ula sa Manluluwas, nga naghimong posible sa Iyang matubsanon ug sa Iyang makaabag nga gahom, mao ang kinadak-ang panalangin nga gitanyag ni Jesukristo ngadto sa tanan. Kon maghinulsol kita nga adunay hingpit nga katuyoan sa kasingkasing, ang Manluluwas molimpyo kanato gikan sa sala. Kon malipayon kita nga motugyan sa atong kabubut-on ngadto sa Amahan, bisan diha sa kinalisoran nga mga kahimtang, ang Manluluwas moalsa sa atong mga alantoson ug mohimo niini nga magaan.7
Apan ania ang mas dako nga leksiyon nga akong nakat-onan. Nasayop ako sa pagtuo nga ang makaayo nga gahom sa Manluluwas wala moepekto sa akong pamilya. Samtang maghandom ako karon nga adunay mas hingkod nga mga mata ug kasinatian, akong nakita nga ang makaayo nga gahom sa Manluluwas dayag diha sa mga kinabuhi sa matag sakop sa akong pamilya. Nakatutok ra kaayo ko sa pisikal nga pagkaayo nga napakyas ako nga makakita sa mga milagro nga nahitabo. Ang Ginoo mipalig-on ug mibayaw sa akong inahan labaw pa sa iyang kapasidad latas niining malisod nga pagsulay, ug siya nagpuyo og taas ug mabungahon nga kinabuhi. Siya adunay talagsaon nga positibo nga impluwensiya sa iyang mga anak ug mga apo. Ang Ginoo mipanalangin kanako ug sa akong mga igsoon og gugma, panaghiusa, hugot nga pagtuo, ug kalig-on nga nahimong importante nga bahin sa among mga kinabuhi ug nagpadayon hangtod karon.
Apan unsa man sa akong papa? Sama sa tanan nga maghinulsol, naayo siya sa espirituhanong paagi samtang siya nagtinguha ug nakadawat sa mga panalangin nga anaa tungod sa Pag-ula sa Manluluwas. Nakadawat siya og kapasayloan sa iyang mga sala ug karon nagpaabot sa milagro sa Pagkabanhaw. Si Apostol Pablo mitudlo, “Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.”8 Kahibalo mo, miingon ako sa Manluluwas, “Gidala namo ang akong papa Kanimo aron mamaayo,” ug klaro na kanako karon nga ang Manluluwas miayo gayod kaniya. Ang tambal sa Gilead miepekto gayod alang sa pamilyang Nielson—dili sa paagi nga among gihunahuna, apan sa mas mahinungdanon gayod nga paagi nga mipanalangin ug nagpadayon sa pagpanalangin sa among mga kinabuhi.
Sa Juan kapitulo 6 sa Bag-ong Tugon, ang Manluluwas mihimo og labing makapaikag nga milagro. Uban sa pipila lang ka isda ug pipila ka piraso sa pan, ang Manluluwas mipakaon og 5,000 ka tawo. Kadaghan na nako nabasa kini nga asoy, apan adunay bahin niana nga kasinatian nga akong nataligam-an nga karon adunay mahinungdanon nga kahulogan kanako. Human ang Manluluwas mipakaon og 5,000 ka tawo, gihangyo Niya ang Iyang mga disipulo sa pagpundok sa mga salin, nga nakapuno og 12 ka bukag. Naghunahuna ko kon nganong migahin ang Manluluwas og panahon aron sa pagbuhat niana. Nahimong klaro kanako nga usa ka leksiyon nga atong makat-onan gikan niana nga higayon mao kini: Siya makapakaon og 5,000 ka tawo ug aduna pay mga salin. “Ang akong grasya igo alang sa tanan nga mga tawo.”9 Ang matubsanon ug makaayo nga gahom sa Manluluwas makalukop sa bisan unsang sala, samad, o pagsulay—bisan unsa pa ka dako o kalisod—ug aduna pay pakapin nga pagkaayo. Ang Iyang grasya paigo.
Uban niana nga kahibalo, kita makapadayon sa unahan uban sa hugot nga pagtuo, nga nahibalo nga kon moabot ang malisod nga mga panahon—ug segurado gayod nga moabot kini—o kon ang sala molibot sa atong mga kinabuhi, ang Manluluwas nagbarog nga “adunay kaayohan sa iyang mga pako,”10 nga nagdapit kanato nga moduol ngadto Kaniya.
Ako mosaksi kaninyo sa Tambal sa Gilead, ang Manluluwas nga si Jesukristo, atong Manunubos, ug sa Iyang talagsaon nga makaayo nga gahom. Ako mosaksi sa Iyang tinguha sa pag-ayo kaninyo. Sa ngalan ni Jesukristo, amen.