Paghatag sa Pagkabalaan ngadto sa Ginoo
Ang sakripisyo dili kaayo kabahin sa “paghatag” ug mas kabahin sa “paghatag ngadto sa” Ginoo.
Sa miaging tuig, samtang nagserbisyo didto sa Kapangulohan sa Asia North Area, nakadawat ko og tawag sa telepono gikan ni Presidente Russell M. Nelson nga nagdapit nako sa pagserbisyo isip Ikaduhang Magtatambag diha sa Presiding Bishopric. Mabination siya nga midapit sa akong asawa, si Lori, sa pag-apil sa panag-istoryahanay. Pagkahuman sa tawag, kami dili pa gihapon makatuo sa dihang ang akong asawa nangutana, “Unsa man diay ang buhaton sa Presiding Bishopric?” Human sa higayon sa pagpamalandong, ako mitubag, “Wala gyod ko makahibalo!”
Usa ka tuig ang milabay—ug human sa tumang mga pagbati sa kamapainubsanon ug pagpasalamat—ako nang matubag ang pangutana sa akong asawa uban sa mas dakong pagsabot. Taliwala sa daghang mga butang, ang Presiding Bishopric modumala sa kaayohan ug makatawhanong buhat sa Simbahan. Kini nga buhat karon nahitabo sa tibuok kalibotan ug nagpanalangin og mas daghang mga anak sa Dios kay sa kaniadto.
Isip usa ka Presiding Bishopric, kami gitabangan sa maanindot nga mga empleyado sa Simbahan ug sa uban, lakip sa Kinatibuk-ang Kapangulohan sa Relief Society, kinsa nagserbisyo uban kanamo diha sa Welfare and Self-Reliance Executive Committee sa Simbahan. Sa among kapasidad isip mga sakop niana nga komite, ang Unang Kapangulohan mihangyo kanako—ingon man ni Sister Eubank, kinsa namulong kanato sa miaging gabii—sa pagpaambit diha kaninyo sa usa ka update sa bag-ohayng mga makatawhanong mga paningkamot sa Simbahan. Sila piho usab nga mihangyo nga among ipahayag ang ilang dakong pasalamat—tungod kay, mga kaigsoonan, kamo ang nakapahimo niadtong makatawhanong mga paningkamot nga posible.
Samtang kami nag-obserbar uban sa kabalaka sa nahaunang mga epekto sa ekonomiya tungod sa krisis sa COVID-19 sa tibuok kalibotan, nagdahom kami nga mokunhod ang mga giamot nga kwarta sa mga Santos. Total, ang atong kaugalingong mga miyembro nakasinati usab og mga kalisod gumikan sa pandemya. Hunahunaa ang among mga gibati sa dihang kami nakaobserbar sa sukwahi! Ang makatawhanong mga donasyon sa 2020 misangpot nga mao ang kinatas-an sukad—ug nagkataas pa niining tuiga. Isip resulta sa inyong kamanggihatagon, ang Simbahan nakaamgo sa labing halapad nga pagtubag sukad sa paglunsad sa Makatawhanong Pundo [Humanitarian Fund], nga dunay kapin sa 1,500 ka proyektong hinabang sa COVID sa kapin sa 150 ka nasod. Kini nga mga donasyon, nga inyong gihatag sa walay paghinakog ngadto sa Ginoo, gibaylo ngadto sa makapasustiner sa kinabuhi nga pagkaon, oxygen, mga kasangkapan nga medikal, ug mga bakuna alang niadtong kinsa tingali dili makabaton niini nga mga butang.
Ingon ka mahinungdanon sa kontribusyon sa mga kasangkapan mao ang hilabihan nga paghatag sa oras ug kusog nga gidonar sa mga miyembro sa Simbahan ngadto sa makatawhanong mga kawsa. Bisan ang pandemya mihasi, ang natural nga mga katalagman, sibil nga kagubot, ug ang paghuyang sa ekonomiya walay poas ug mipadayon sa pag-abog sa minilyon ka mga tawo gikan sa ilang mga panimalay. Ang United Nations karon nagreport nga adunay kapin sa 82 ka milyon ka tawo sa kalibotan ang napugos nga walay kapoy-an.1 Idugang kini sa minilyon pa sa ubang tawo nga mipili sa paglayas gikan sa kawad-on o pagdaog-daog sa pagpangita og mas maayong kinabuhi alang sa ilang kaugalingon o sa ilang mga anak, ug makasugod kamo nga makasabot og gamay sa kamahinungdanon niini nga tibuok kalibotan nga sitwasyon.
Akong ikalipay ang pagtaho nga salamat sa giboluntaryo nga oras ug mga talento sa daghan kaayong tawo, ang Simbahan nakapadagan og mga sentro nga dawatanan sa mga bakwit ug lalin diha sa daghang lugar sa Estados Unidos ug sa Uropa. Ug salamat sa inyong mga kontribusyon, kita mohatag og mga kasangkapan, donasyon, ug ang mga boluntaryo sa pagtabang sa susama nga mga programa nga gipadagan sa ubang mga organisasyon sa tibuok kalibotan.
Tugoti ko nga mopadangat sa akong kinasingkasing nga pasalamat niadtong mga Santos nga mitabang sa pagpakaon, paghatag og sinina, pakighigala, ug sa pagtabang niining mga bakwit nga mahimong lig-on ug makabarog sa kaugalingon.
Kagabii, si Sister Eubank mipaambit kaninyo og pipila sa maanindot nga mga paningkamot sa mga Santos kalabot niini. Samtang ako namalandong kabahin niining mga paningkamot, ang akong mga hunahuna kasagaran mobaling ngadto sa baroganan sa pagsakripisyo ug sa direktang koneksiyon kabahin niining baroganan ngadto sa duha ka dagkong sugo sa paghigugma sa Dios ug sa paghigugma sa atong isigkatawo.
Sa modernong paggamit, ang pulong nga sakripisyo nagsugyot sa konsepto sa “paghatag” sa mga butang alang sa Ginoo ug sa Iyang gingharian. Apan, sa karaang panahon, ang kahulogan sa pulong nga sakripisyo mas duol nga dunay kalabotan sa duha ka Latin niini nga mga gamotpulong: sacer, pasabot “sagrado” o “balaan,” ug facere, pasabot “sa paghimo.”2 Busa, sa karaan ang sakripisyo tinud-anay nga nagpasabot “sa paghimo nga balaan sa usa ka butang o sa usa ka tawo.”3 Kon hunahunaon sa ingon, ang sakripisyo mao ang usa ka proseso sa pagkahimong balaan ug pagkahibalo sa Dios, dili usa ka panghitabo o ritwal nga “paghatag” sa mga butang alang sa Ginoo.
Ang Ginoo miingon, “Ang akong gipangayo kaninyo mao ang gugmang [putli], dili ang mga halad. Ang akong gipaabot mao ang inyong pagkahibalo kanako nga inyong Dios, dili ang inyong paghalad ug mga halad nga sunogon.”4 Ang Ginoo gusto nga kita mobalaan sa atong kaugalingon,5 aron makaangkon sa gugmang putli ,6 ug aron makaila Kaniya.7 Sama sa gitudlo ni Apostol Pablo, “Bisag ipanghatag ko pa ang tanan nga ania kanako ug ipasunog ang akong lawas apan kon wala akoy gugma, wala kini kapuslanan.”8 Sa kataposan, gusto sa Ginoo ang atong kasingkasing; Siya gusto nga kita mamahimong bag-o na nga binuhat diha ni Kristo.9 Sama sa Iyang gisugo sa mga Nephite, “Kamo mohalad og usa ka sakripisyo ngari kanako nga usa ka masulub-on nga kasingkasing ug usa ka mahinulsulon nga espiritu.”10
Ang sakripisyo dili kaayo kabahin sa “pag hatag” ug mas kabahin kini sa “paghatag ngadto” sa Ginoo. Gikulit diha sa entrada sa matag usa sa atong mga templo ang mga pulong “Pagkabalaan ngadto sa Ginoo; ang Balay sa Ginoo.” Samtang mosunod kita sa atong mga pakigsaad pinaagi sa pagsakripisyo, kita gibalaan pinaagi sa kalooy ni Jesukristo, ug diha sa mga altar sa balaan nga templo, uban sa masulob-ong mga kasingkasing ug mahinulsulon nga mga espiritu, kita mohatag sa atong kabalaan ngadto sa Ginoo. Si Elder Neal A. Maxwell mitudlo: “Ang pagtugyan sa kabubut-on sa tawo [o kasingkasing11] mao lang gayod ang personal nga butang nga atong mahalad diha sa altar sa Dios. … Hinoon, kon kamo ug ako sa kataposan motugyan sa atong kaugalingon, pinaagi sa pagtugyan sa atong kabubut-on ngadto sa kabubut-on sa Dios, nan kita naghatag gayod og butang ngadto Kaniya!”12
Kon ang atong mga sakripisyo alang sa kaayohan sa uban gikonsiderar gikan sa “paghatag,” kita mahimong motan-aw niini isip palas-anon ug mahimong mawad-an og kadasig kon ang atong mga sakripisyo wala ilha o gantihi. Hinoon, kon gikonsiderar kini gikan sa “paghatag ngadto” sa Ginoo, ang atong mga sakripisyo alang sa uban mahimong mga gasa, ug ang kalipay sa madagayaong paghatag maoy mahimong kaugalingong ganti niini. Wala na nagkinahanglan alang sa gugma, pagtugot, o pagpasalamat gikan sa uban, ang atong mga sakripisyo mahimong ang labing putli ug kinaladman nga mga pagpahayag sa atong pasalamat ug gugma alang sa Manluluwas ug sa atong isigkatawo. Ang bisan unsang pagbati og mapagarbohon sa kaugalingong sakripisyo naghatag og paagi sa mga pagbati sa pagpasalamat, kamanggihatagon, pagkakontento, ug kalipay.13
Ang usa ka butang gibalaan—kini mahimong ang atong kinabuhi, atong mga kabtangan, atong panahon, o atong mga talento—dili lang sa pagtugyan niini apan pinaagi sa pagpahinungod14 niini ngadto sa Ginoo. Ang makatawhanong buhat sa Simbahan mao gayod ang usa ka gasa. Mao kini ang produkto sa katingbanan, gipahinungod nga mga halad sa mga Santos, usa ka pagpakita sa atong gugma sa Dios ug sa Iyang mga anak.15
Sila si Steve ug Anita Canfield mga representante sa mga Santos sa Ulahing mga Adlaw sa tibuok kalibotan nga nakasinati mismo sa makapausab nga mga panalangin sa paghatag ngadto sa Ginoo. Isip mga misyonaryo sa kaayohan ug pagbarog sa kinaugalingong paningkamot, ang mga Canfield gihangyo sa paghatag og abag diha sa mga kampo sa bakwit ug sa mga sentro sa lalin sa tibuok Uropa. Sa iyang propesyonal nga kinabuhi, si Sister Canfield nahimong usa ka world-class nga interior nga tigdesinyo, gikontrata sa mga adunahan nga mga kliyente aron sa pagpanindot sa ilang maluho nga mga panimalay. Sa kalit lang, nakaamgo sa iyang kaugalingon diha sa palibot nga sukwahi gayod samtang siya miserbisyo taliwala sa mga tawo nga nawad-an sa hapit tanang butang kon kabahin sa yutan-ong mga kabtangan. Sa iyang kaugalingong mga pulong, siya mibaylo sa “marmol nga mga agianan alang sa yuta nga mga salog,” ug sa pagbuhat sa ingon siya nakakaplag og dili masukod nga katumanan samtang siya ug ang iyang bana misugod sa pagpakighigala—ug sa wala madugay sa paghigugma ug paghangop—niadtong nagkinahanglan sa ilang pag-amuma.
Ang mga Canfield nakaobserbar, “Kami wala mobati nga daw kami ‘nakahatag’ og bisan unsang butang aron sa pagserbisyo sa Ginoo. Ang among tinguha yano lang sa ‘pagtugyan ngadto’ Kaniya sa among panahon ug kusog aron sa pagpanalangin sa Iyang mga anak sa bisan unsang paagi nga sumala sa Iyang gusto nga kami mapuslan. Samtang kami nakigtambayayong uban sa among mga kaigsoonan, ang bisan unsang panggawas nga pagtan-aw—ang bisan unsang mga kalahian sa mga kaagi o mga kabtangan—nahanaw alang kanamo, ug kami yanong nakakita sa mga kasingkasing sa usag usa. Walay matang sa kalamposan sa panginabuhi o materyal nga naangkon nga makatupong sa paagi nga kining mga kasinatian, sa pagserbisyo taliwala sa labing mapainubsanong mga anak sa Dios, nakapalambo kanamo.”
Ang istorya sa Canfields ug ang daghan pa sama niini nakatabang kanako nga makasabot sa mga pulong sa musika sa yano apan tulugkaron nga awit sa Primary:
Sulti’s gamay’ng sapa’ng,
Nagdali pagdagayday;
“Gamay man ko basta agian ko
Ang uma mamaayo.”
Oo, matag usa kanato gamay, apan samtang kita magkaubang mopadali sa paghatag ngadto sa Dios ug sa atong isigka tawo; bisan asa kita padulong ang mga kinabuhi gipalambo ug gipanalanginan.
Ang ikatulo nga bersikulo niini nga awit dili kaayo inila apan motapos gamit niining mahigugmaong imbitasyon:
Minahal nga mga kaigsoonan kon kita mosunod sa Dios ug sa uban pinaagi sa paghatag sa atong mga butang, sa atong panahon, ug oo, bisan sa atong mga kaugalingon, kita magpabilin sa kalibotan nga mas harohay, magpabilin sa mga anak sa Dios nga mas malipay og diyutay, ug sa proseso, mamahimo nga mas balaan og diyutay.
Hinaot ang Ginoo buhong nga mopanalangin kaninyo tungod sa mga sakripisyo nga inyong gihatag ngadto Kaniya nga madagayaon kaayo.
Ako mopamatuod nga ang Dios buhi. “Tawo sa Pagkabalaan mao ang iyang ngalan.”17 Si Jesukristo mao ang Iyang Anak ug Siya mao ang tighatag sa tanang maayong mga gasa.18 Hinaot nga kita, pinaagi sa Iyang kalooy ug sa pagtuman sa atong mga pakigsaad pinaagi sa pagsakripisyo, mahimong mabalaan ug mohatag gayod sa dugang gugma ug kabalaan ngadto sa Ginoo.19 Sa balaan nga ngalan ni Jesukristo, amen.