Ang mga Butang sa Akong Kalag
Unsa nga mga butang ang inyong gipamalandongan? Unsa nga mga butang ang mahinungdanon gayod kaninyo? Unsa ang mga butang sa inyong kalag?
Akong mga kaigsoonan, samtang nagbarog na usab ako dinhi niining atong minahal nga Conference Center, napahinumdoman ako sa mga pulong ni Apostol Pedro: “Ginoo, maayo nga ania kita dinhi.”1
Ang akong mga hunahuna karon nakasentro sa mga pulong ni propeta Nephi, kinsa mitipig sa rekord sa iyang katawhan human sa kamatayon ni Amahan Lehi. Misulat si Nephi, “Ug diha niini ako mosulat sa mga butang sa akong kalag.”2
Akong naandan nga labyan ra kining bersikulo, nga naghunahuna nga ang pulong mga butang dili kaayo elegante o espirituhanon, dili igo ang kahalangdon nga ipares sa “akong kalag.” Apan akong nakat-onan nga ang pulong mga butang gigamit diha sa mga kasulatan 2,354 ka higayon.3 Sama pananglit, sa Moises: “Ako mao ang Sinugdanan ug ang Katap[o]san, ang Makagagah[o]m nga Dios; pinaagi sa akong Bugtong Anak Ako milalang niini nga mga butang.”4 Ug sa mga pulong ni Nephi: “Tan-awa, ang akong kalag nalipay sa mga butang sa Ginoo; ug ang akong kasingkasing nagpalandong sa kanunay diha sa mga butang diin ako nakakita ug nakadungog.”5
Ang mga pulong ni Nephi makaaghat og mga pangutana nga “Unsa nga mga butang ang inyong gipamalandongan?” “Unsa nga mga butang ang mahinungdanon gayod kaninyo?” “Unsa ang mga butang sa inyong kalag?”
Ang mga butang sa atong kalag kasagaran mapatin-aw ug mapalambo pinaagi sa pagpangutana.
Atol sa pandemya akong nahimamat ang kabatan-onan gikan sa tibuok kalibotan diha sa daghang debosyonal, dagko ug gagmay, pinaagi sa mga sibya ug social media, ug gihisgotan namo ang ilang mga pangutana.
Ang katorse anyos nga Joseph Smith adunay pangutana sa kahiladman sa iyang kalag, ug gipaabot niya kini ngadto sa Ginoo. Si Presidente Russell M. Nelson mipasabot: “Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa … mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad.”6
Ang kabatan-onan kasagaran mangutana kanako kon unsa ang akong gituohan ug nganong mituo ako.
Nakahinumdom ko nga mibisita sa virtual nga paagi sa usa ka batan-ong babaye diha sa iyang panimalay. Nangutana ako kon mao ba kadto ang unang higayon nga ang usa ka Apostol anaa diha sa iyang panimalay. Dali siyang mipahiyom ug mitubag, “Oo.” Ang iyang pangutana alang kanako maayo: “Unsa ang labing importante nga mga butang nga kinahanglan nakong mahibaloan?”
Mitubag ako og ang mga butang sa akong kalag, ang mga butang nga moandam kanako nga makadungog sa mga pag-aghat, nga mobayaw sa akong mga panglantaw labaw sa mga paagi sa kalibotan, nga maghatag og katuyoan sa akong buhat diha sa ebanghelyo ug sa akong kinabuhi mismo.
Mahimo ba akong mopaambit kaninyo sa pipila sa mga butang sa akong kalag? Kini nga mga butang magamit sa tanan nga nagtinguha nga mahimong tinuod nga mga disipulo ni Jesukristo. Nindot ang napulo ka butang diha sa lista. Karon mohatag ako kaninyo og pito uban sa paglaom nga inyong kompletohon ang walo, siyam, ug napulo gikan sa inyong kaugalingon nga mga kasinatian.
Una, higugmaa ang Dios nga Amahan ug si Jesukristo, atong Manluluwas.
Gimando ni Jesus ang una nga dakong sugo: “Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.”7
Si Presidente Nelson mipahayag sa iyang debosyon ngadto sa Dios, atong Mahangtorong Amahan, ug ngadto sa Iyang Anak, si Jesukristo, sa dihang gitawag siya sa pagpangulo sa Simbahan sa Ginoo, nga nag-ingon, “Nakaila ako Kanila, naghigugma Kanila, ug mopasalig sa pag-alagad Kanila—ug kaninyo—sa matag ginhawa nga nahabilin sa akong kinabuhi.”8
Mao nga una, higugmaa ang Amahan ug ang Anak.
Ikaduha, “Higugmaa ang imong isigkatawo.”9
Kana dili lang usa ka maayo nga ideya; kana mao ang ikaduha nga dakong sugo. Ang inyong mga isigkatawo mao ang inyong kapikas ug pamilya, mga miyembro sa ward, mga kauban sa trabaho, mga kauban sa kwarto [roommates], kadtong dili sama nato og tinuohan, kadtong nanginahanglan og matinabangon nga kamot, ug, sa pagkatinuod, tanang tawo. Ang kahulogan sa “higugmaa ang imong isigkatawo” gipasabot diha sa himno nga “Maghigugmaay.”10
Si Presidente Nelson nagpahinumdom kanato, “Kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban.”11
Ikatulo, higugmaa ang inyong kaugalingon.
Daghan ang naglisod dinhing dapita. Dili ba makapainteres nga ang paghigugma sa atong kaugalingon ingon og mas lisod kay sa paghigugma sa uban? Apan ang Ginoo miingon, “Higugmaa ang imong isigkatawo sama sa imong kaugalingon.”12 Iyang gihatagan og bili ang pagkadios sa sulod kanato, ug mao nga kinahanglan kita usab. Kon kita nabug-atan sa mga kasaypanan, mga kasakit, mga pagbati sa kakulang, kasagmuyo, kasuko, o sala, ang gahom sa Pag-ula sa Manluluwas, pinaagi sa balaanon nga plano, mao ang usa sa mga butang nga makapabayaw sa kalag.
Ikaupat, tumana ang mga sugo.
Giklaro kini sa Ginoo: “Kon nahigugma kamo kanako, tumana ninyo ang akong mga sugo.”13 Paningkamot kada adlaw nga mahimo ug mobuhat og medyo mas maayo ug mopadayon sa unahan diha sa pagkamatarong.
Ikalima, kanunay nga mahimong takos nga motambong sa templo.
Gitawag nako kini nga mamahimong girekomendar ngadto sa Ginoo. Kon kamo makaadto sa templo o dili, ang pagkahimong takos sa usa ka magamit nga rekomend sa templo magpabilin kaninyo nga lig-ong nakatutok sa mga butang nga mahinungdanon, ang dalan sa pakigsaad.
Ikaunom, mamahimong malipayon ug masadyaon.
“Paglipay, ug ayaw kahadlok,”14 ang Ginoo miingon. Ngano? Unsaon, kon kanunay kitang makasinati og mga hagit? Tungod sa saad nga gihimo ni Jesukristo: “Ako ang Ginoo anaa uban kaninyo, ug mobar[o]g diha kaninyo.”15
Si Presidente Nelson naghulagway sa gipahiuli nga ebanghelyo isip “usa ka mensahe sa hingpit nga kalipay!”16 Ug siya mipasabot, “Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.”17
Ikapito, sunda ang buhi nga propeta sa Dios.
Tingali ikapito kini sa akong lista sa mga butang, apan nagtuo ako nga kini mao ang akong labing importante nga punto karon.
Kita adunay buhi nga propeta sa Dios dinhi sa yuta karon! Ayaw gayod ibaliwala kon unsay gipasabot niana alang kaninyo. Hinumdomi ang batan-ong babaye nga akong gihisgotan sa sinugdanan. Gusto siya nga mahibalo kon unsa nga mga butang ang labing mahinungdanon. “Sunda ang buhi nga propeta,” giingon nako niadtong higayona ug akong hatagan og gibug-aton pag-usab karon.
Kita giila isip usa ka Simbahan nga gigiyahan sa mga propeta, mga manalagna, ug mga tigpadayag nga gitawag sa Dios alang niini nga panahon. Ako mosaad nga kon kamo maminaw ug mosunod sa ilang tambag, dili gayod kamo mahisalaag. Dili gayod!
Nagpuyo kita sa panahon nga kita “[gi]anod-anod sa mga balod,”18 diin ang espirituwalidad, kaligdong, katarong, ug pagtahod giatake. Kinahanglan mohimo kita og mga pagpili. Anaa kanato ang tingog sa Ginoo pinaagi sa Iyang propeta aron sa pagkalma sa atong mga kahadlok ug pagbayaw sa atong mga panglantaw, kay kon mamulong si Presidente Nelson, mamulong siya alang sa Ginoo.
Napanalanginan kita sa mga kasulatan ug mga pagtulun-an nga nagpahinumdom kanato nga, “Ang akong hunahuna dili sama sa inyong hunahuna, ug ang akong mga laraw dili sama sa inyong mga laraw, nag-ingon ang Ginoo.”19
Mao usab kini kang Naaman, usa ka bantogan nga lider sa militar sa Syria, apan usa ka sanlahon, kinsa giingnan nga si propeta Eliseo makaayo kaniya. Si Eliseo nagpadala sa iyang mensahero aron sa pagsulti kang Naaman nga motuslob makapito ngadto sa Suba sa Jordan ug mamaayo siya. Wala nakauyon si Naaman. Sa pagkatinuod adunay mas nindot gayod nga suba kay sa Jordan, ug nganong nagpadala og sulugoon sa dihang nagdahom siya nga si Eliseo, ang propeta, personal nga moayo kaniya? Mibiya si Naaman apan sa kataposan naagni sa iyang mga sulugoon: “Kon ang propeta magsugo kanimo sa pagbuhat ug dakong butang, dili ba buhaton nimo kini?”20 Sa kataposan si Naaman mituslob makapito didto sa Jordan ug naayo.
Ang asoy ni Naaman nagpahinumdom kanato sa risgo sa pagpili sa mga bahin sa propetikanhon nga tambag nga mohaom sa atong panghunahuna, sa atong mga gidahom, o sa mga sumbanan karon. Ang atong propeta padayong nagtudlo kanato ngadto sa atong kaugalingong mga Suba sa Jordan aron mamaayo.
Ang labing importanting mga pulong nga atong madungog, mapamalandongan, ug masunod mao kadtong mga gipadayag pinaagi sa atong buhi nga propeta. Ako mosaksi nga ako nakaapil sa pagtinambagay uban ni Presidente Nelson aron sa paghisgot sa mahinungdanon nga mga butang sa Simbahan ug sa kalibotan, ug akong nakita ang pagpadayag nga midagayday pinaagi kaniya. Nakaila siya sa Ginoo, nasayod siya sa Iyang mga paagi, ug nagtinguha siya nga ang tanang anak sa Dios maminaw Kaniya, ang Ginoong Jesukristo.
Sulod sa daghang katuigan nakadungog kita gikan sa propeta kaduha sa usa ka tuig atol sa kinatibuk-ang komperensiya. Apan uban sa malisod nga mga isyu sa atong panahon, si Presidente Nelson mas kanunayng namulong diha sa mga forum,21 sa social media,22 sa mga debosyonal,23 ug gani sa mga pag-interbiyo sa media [press briefings].24 Nakaobserbar ako kaniya nga nag-andam ug nagpresentar og makahuloganon nga mapadayagon nga mga mensahe nga miawhag og dugang nga pagpasalamat, midasig og mas dako nga paglakip sa tanan sa atong kaigsoonan dinhi sa yuta, ug dugang nga kalinaw, paglaom, kalipay, maayong panglawas, ug pagkaayo sa atong indibidwal nga mga kinabuhi.
Si Presidente Nelson usa ka hanas nga mamumulong, apan mas importante, siya usa ka propeta sa Dios. Kana makapahingangha kon inyo kining hunahunaon, apan importante kaayo nga makaamgo nga ang iyang klaro nga direksiyon manalipod kanatong tanan gikan sa panglimbong, pagkamalipoton, ug kalibotanon nga mga paagi nga nagkakusog sa kalibotan karon.25
Ang gahom, awtoridad, ug responsibilidad sa propeta mahitungod tanan sa pagpadayag. “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalib[o]tan sa Ikaduhang Siglo nga Kasaulogan,” nga gihatag sa Abril 2020 nga kinatibuk-ang komperensiya, naghatag og gibug-aton nga ang Ginoo ang nagdirekta niini nga buhat. Niini nga pamahayag, ang Unang Kapangulohan ug Korum sa Napulog Duha ka Apostoles miingon: “Malipayon kaming modeklarar nga ang gisaad nga Pagpahiuli padayon nga mahitabo pinaagi sa nagpadayon nga pagpadayag. Ang kalib[o]tan dili na gay[o]d mahimong sama kaniadto, tungod kay ang Dios ‘[mo]hiusa diha kang Kristo sa tanang mga butang’ (Mga Taga-Efeso 1:10).”26
“Kang Kristo sa tanang mga butang”27 ug “[ang] mga butang sa akong kalag”28 mao ang tanan mahitungod niini nga Simbahan, niini nga ebanghelyo, ug niini nga katawhan.
Ako motapos uban sa usa ka imbitasyon alang sa matag usa kaninyo sa pagkonsiderar sa pito ka “mga butang sa akong kalag” nga akong gipaambit karon: higugmaa ang Dios nga Amahan ug si Jesukristo, atong Manluluwas; higugmaa ang inyong isigkatawo; higugmaa ang inyong kaugalingon; tumana ang mga sugo; kanunay nga mahimong takos sa usa ka rekomend sa templo; mamahimong malipayon ug masadyaon; ug sunda ang buhi nga propeta sa Dios. Gidapit ko kamo sa pagtino sa inyong kaugalingon nga walo, siyam, ug napulo. Ikonsiderar ang mga paagi nga mahimo ninyong ipaambit ang inyong kinasingkasing nga “mga butang” sa uban ug awhaga sila nga mag-ampo, mamalandong, ug magtinguha sa giya sa Ginoo.
Ang mga butang sa akong kalag sama ka bililhon kanako sama nga ang inyo nganha kaninyo. Kini nga mga butang magpalig-on sa atong pagserbisyo diha sa Simbahan ug sa tanang aspeto sa kinabuhi. Kini mopasalig kanato ngadto kang Jesukristo, kini magpahinumdom kanato sa atong mga pakigsaad, ug kini motabang kanato nga mobati nga luwas diha sa mga bukton sa Ginoo. Ako magpamatuod nga Siya nagtinguha nga ang atong mga kalag “dili gay[o]d gut[o]mon ni uhawon, apan pagatagbawon”29 sa Iyang gugma samtang magtinguha kita nga mamahimong Iyang tinuod nga mga disipulo, aron mamahimong usa Kaniya sama nga Siya usa sa Amahan. Sa ngalan ni Jesukristo, amen.