Usa ka Matinud-anon nga Pagpangita Nagantihan
Ako modapit kaninyong tanan sa pagpadayon sa pagpalambo sa inyong hugot nga pagtuo diha kang Kristo, kinsa padayon nga miusab sa kinabuhi sa tanan kinsa magtinguha Kaniya.
Sugod niadtong 1846, liboan ka pioneer nga mga lalaki, mga babaye, ug kabataan mipaingon sa silangan ngadto sa Zion. Ang ilang dakong hugot nga pagtuo midasig sa ilang walay kinutoban nga kaisog. Alang sa uban, kadto nga biyahe wala gayod mahuman tungod kay namatay sila pagpaingon didto. Ang uban, nag-atubang og hilabihan nga kalisod, mipadayon diha sa hugot nga pagtuo.
Tungod kanila, mga henerasyon ang milabay, ang akong pamilya nakatagamtam sa mga panalangin sa tinuod nga ebanghelyo ni Jesukristo.
Sama sa ubang batan-ong lalaki, kinsa akong hisgotan unya, 14 anyos ako sa dihang nagsugod ko nga adunay pangutana bahin sa relihiyon ug sa akong hugot nga pagtuo. Misimba ko sa lain nga denominasyon nga duol sa among balay, apan ako mibati sa tinguha sa pagbisita sa daghang lain-laing mga simbahan.
Usa ka hapon, nakabantay ko og duha ka batan-ong lalaki nga nagsul-ob og itom nga amerkana ug puti nga mga sinina nga misulod sa panimalay sa akong silingan. Kini nga mga batan-ong lalaki mura og––espesyal.
Pagka-ugma akong nahimamat ang akong silingan, si Leonor Lopez, ug nangutana kaniya bahin sa duha ka batan-ong lalaki. Si Leonor mipasabot nga sila mga misyonaryo sa Ang Simbahan ni Jesukristo sa mga Santos sa Ulahing mga Adlaw. Malipayon kaayo siyang misulti kanako nga ang iyang pamilya nabunyagan ngadto sa Simbahan usa ka tuig ang milabay. Nakita ang akong interes, si Leonor midapit kanako sa pagpakigkita sa mga misyonaryo ug magkat-on bahin sa Simbahan.
Duha ka adlaw ang milabay, mikuyog ko sa pamilya Lopez sa pagpakigkita sa mga misyonaryo. Sila mipaila sa ilang kaugalingon nga sila si Elder John Messerly gikan sa Ogden, Utah, ug Elder Christopher Osorio gikan sa Walnut Creek, California. Dili gayod nako sila makalimtan.
Tungod kay 14 pa lang ako, si Elder Messerly namugos nga moadto kami sa tupad nga balay, sa akong balay aron ang akong inahan mahibalo kon unsa ang ilang gitudlo kanako. Didto, siya mabination nga mipasabot nga sila miadto aron sa pagpakigbahin og usa ka mensahe bahin ni Jesukristo ug nananghid kaniya nga tudloan ko. Si mama misugot ug gani miapil kanamo samtang sila nagtudlo kanako.
Ang mga misyonaryo mihangyo usa ni Leonor sa paghalad og pag-ampo. Kini nakatandog kaayo kanako tungod kay ang iyang pag-ampo dili balik-balik sa gimemorya nga mga pulong apan usa ka pahayag nga gikan sa iyang kasingkasing. Ako mibati nga siya nakig-istorya gayod sa iyang Langitnong Amahan.
Ang misyonaryo dayon mitudlo kanamo bahin ni Jesukristo. Sila mipakita og hulagway Kaniya nga nakakuha sa akong pagtagad tungod kay hulagway kadto sa nabanhaw, buhi nga Kristo.
Sila mipadayon, mitudlo kanamo kon giunsa ni Jesus pagtukod sa Iyang Simbahan sa karaang mga panahon, nga Siya ang anaa sa ulohan inubanan sa napulog duha ka Apostoles. Sila mitudlo kanamo bahin sa Apostasiya––sa unsang paagi nga ang kamatuoran ug ang awtoridad ni Kristo gikuha gikan sa kalibotan human mamatay ang Iyang Apostoles.
Sila misulti kanamo bahin sa usa ka batan-ong lalaki nga 14 anyos nga ginganlan og Joseph Smith kinsa, atong sa mga 1800, mibisita sa nagkalain-laing simbahan sa pagpangita sa kamatuoran. Milabay ang panahon, si Joseph misamot og kalibog. Human makabasa sa Biblia nga kita “makapangayo sa Dios”1 alang sa kaalam, si Joseph, mibuhat diha sa hugot nga pagtuo, miadto sa kakahoyan aron sa pag-ampo ug pagpangutana hain nga simbahan ang iyang apilan.
Usa sa mga misyonaryo ang mibasa sa asoy ni Joseph sa unsay nahitabo samtang siya nag-ampo:
“Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.
“… Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”2
Atol niadto nga leksiyon, ang Espiritu mipamatuod kanako sa pipila ka kamatuoran.
Una, ang Dios maminaw sa sinsero nga mga pag-ampo sa tanan Niyang mga anak, ug nga ang langit abli ngadto sa tanan––dili lamang sa pipila.
Ikaduha, ang Dios Amahan, si Jesukristo, ug ang Espiritu Santo tulo ka managlahi nga mga binuhat, nagkahiusa sa katuyoan Nila nga “ang pagpahinabo sa pagka-imortal ug sa kinabuhi nga dayon sa tawo.”3
Ikatulo, gilalang kita diha sa panagway sa Dios. Ang atong Langitnong Amahan ug ang Iyang Anak, si Jesukristo, adunay lawas nga unod ug mga bukog sama kanato, apan Sila nahimaya ug nahingpit, ug ang Espiritu Santo usa ka personahe sa espiritu.4
Ika-upat, pinaagi ni Joseph Smith, si Jesukristo mipahiuli sa Iyang ebanghelyo ug tinuod nga Simbahan ngadto sa yuta. Ang awtoridad sa pagkapari nga gitugyan sa Apostoles ni Kristo 2,000 ka tuig ang milabay mao gihapon ang samang pagkapari nga gitugyan ngadto kang Joseph Smith ug Oliver Cowdery ni Pedro, Santiago, ug Juan.5
Sa kataposan, nakakat-on kami bahin sa lain nga tugon ni Jesukristo: ang Basahon ni Mormon. Gisulat sa karaang mga propeta, kini nagsaysay sa mga tawo kinsa nanimuyo sa Amerika sa wala pa, atol, ug human sa pagkatawo ni Jesus. Gikan niini atong makat-onan kon giunsa nila pagkaila, paghigugma, ug pagsimba si Kristo, kinsa mipakita kanila isip ang nabanhaw nga Manluluwas.
Ang Espiritu mitandog kaayo kanako samtang ako nakakat-on sa pamahayag sa Manluluwas ngadto kanila: “Tan-awa, Ako mao si Jesukristo, kinsa gipamatud-an sa mga propeta nga moanhi sa kalib[o]tan.”6
Ang mga misyonaryo mihatag kanamo og among kaugalingon nga kopya sa Basahon ni Mormon. Among gibasa ug gidawat ang pagdapit nga makita sa kataposan sa Basahon ni Mormon, nga:
“Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangt[o]ran, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gah[o]m sa Espiritu Santo.
Ug pinaagi sa gah[o]m sa Espiritu Santo kamo mahimo nga masay[o]d sa kamatuoran sa tanan nga mga butang.”7
Dul-an sa 45 ka tuig na sukad nga ang akong inahan ug ako unang nakahibalo sa hingpit nga kalipay ug gahom sa pagbaton og hugot nga pagtuo kang Jesukristo. Tungod kadto sa ilang hugot nga pagtuo kang Kristo nga ang pamilya Lopez mipakigbahin sa ilang bag-o nga tinuohan kanako. Tungod kadto sa ilang hugot nga pagtuo kang Kristo nga kining duha ka misyonaryo mibiya sa ilang panimalay sa Estados Unidos aron sa pagkaplag sa akong inahan ug kanako. Ang hugot nga pagtuo sa tanan niining minahal nga mga higala ang nagtanom sa liso sa mustasa sa hugot nga pagtuo dinhi kanamo nga sukad mitubo ngadto sa dakong kahoy sa mahangturong mga panalangin.
Atol niining mapanalanginong mga katuigan, nasinati namo, sama sa gipahayag ni Presidente Russell M. Nelson: “Ang tanan nga maayo sa kinabuhi—ang matag kalagmitan nga panalangin nga may mahangturong kahulogan—magsugod sa hugot nga pagtuo. Ang pagtugot nga ang Dios mopatigbabaw sa atong kinabuhi magsugod sa hugot nga pagtuo nga Siya andam nga mogiya kanato. Ang tinuod nga paghinulsol magsugod sa hugot nga pagtuo nga si Jesukristo adunay gahom sa paglimpyo, pag-ayo, ug paglig-on kanato.”8
Ako modapit kaninyong tanan sa pagpadayon sa pagpalambo sa inyong hugot nga pagtuo kang Kristo, kinsa miusab sa kinabuhi sa akong pinangga nga inahan ug kanako ug padayon nga miusab sa kinabuhi sa tanan kinsa nagtinguha Kaniya. Ako nasayod nga si Joseph Smith mao ang propeta sa Pagpahiuli, nga si Presidente Nelson mao ang atong propeta karon, nga si Jesus mao ang buhi nga Kristo ug atong Manunubos, ug nga ang Langitnong Amahan buhi ug motubag sa mga pag-ampo sa tanan Niyang mga anak. Ako nagpamatuod niini nga mga kamatuoran sa ngalan ni Jesukristo, amen.