Mga Milagro sa Ebanghelyo ni Jesukristo
Ako nasayod nga ang Iyang ebanghelyo makadala kanato og paglaom, kalinaw, ug hingpit nga kalipay, dili lamang karon, apan kini usab makapanalangin og dili maihap pang uban sa umaabot nga mga henerasyon.
Mabuhay! Ako nagdala kaninyo sa gugma ug mainiton nga mga pahiyom gikan sa buotan nga mga Santos sa Pilipinas. Kining tuiga nagtimaan sa ika-60 ka tuig sukad ang unang mga misyonaryo miabot sa mga isla sa Pilipinas. Karon, adunay 23 ka misyon ug kapin sa 800,000 ka miyembro sa Simbahan diha sa 123 ka stake. Aduna na karoy pito ka templo nga nagdagan, padayon nga gitukod, o gipahibalo. Tinuod gayod kini nga milagro. Kita nagsaksi sa katumanan sa panagna diha sa 2 Nephi 10:21: “Daghan ang mga saad sa Ginoo ngadto kanila kinsa anaa sa mga pulo sa dagat.”
Kini nga milagro katumanan usab sa panagna nga gihatag sa pag-ampo ni kanhi-Elder Gordon B. Hinckley sa Manila niadtong 1961. Niadto nga pag-ampo, si Elder Hinckley miingon: “Kami nangamuyo sa Imong mga panalangin sa katawhan niini nga dapit, nga sila mahimong mahigalaon ug maabiabihon ug mabination ug matinahuron niadtong kinsa moabot dinhi, ug nga daghan, oo, Ginoo, kami nag-ampo nga adunay [daghan,] daghang kaliboan kinsa makadawat niini nga mensahe ug mapanalanginan niini. Imo unta silang panalanginan og bukas nga mga hunahuna ug masinabtanon nga mga kasingkasing, ug adunay hugot nga pagtuo sa pagdawat, ug adunay kaisog sa pagpuyo sa mga baroganan sa ebanghelyo” (pagpahinungod nga pag-ampo didto sa American War Memorial Cemetery, Philippines, Abril 28, 1961).
Gawas pa sa daghan, daghang kaliboan ka matinud-anon nga mga Santos sa Ulahing mga Adlaw, ang milagro sa ebanghelyo nagdala og positibo nga mga kausaban sa nasod ug sa katawhan niini. Ako usa ka buhi nga saksi niini. Sayis anyos ako dihang ang akong mga ginikanan mipasakop sa Simbahan didto sa habagatang isla sa Mindanao. Niadtong higayona, adunay usa lamang ka misyon sa tibuok nasod ug wala pay stake. Mahangturon ako nga mapasalamaton sa kaisog ug kamapasaligon sa akong mga ginikanan sa pagsunod sa Manluluwas. Ako mopasidungog kanila ug sa tanang mga pioneer sa Simbahan sa Pilipinas. Sila ang miandam sa dalan alang sa mosunod nga mga henerasyon nga mapanalanginan.
Si Hari Benjamin sa Basahon ni Mormon miingon: “Ug dugang pa niini, ako nagtinguha nga kamo kinahanglan maghunahuna sa bulahan ug malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon” (Mosiah 2:41).
Samtang kita nagpuyo ug nagtuman sa mga baroganan ug mga ordinansa sa ebanghelyo, kita mapanalanginan, mausab, ug makabig nga mahimong mas mahisama kang Jesukristo. Mao kadto ang paagi sa ebanghelyo sa pag-usab ug pagpanalangin sa Pilipino nga mga Santos, lakip ang akong pamilya. Ang ebanghelyo tinud-anay gayod nga dalan ngadto sa malipayon, buhong nga kinabuhi.
Ang unang baroganan sa ebanghelyo mao ang hugot nga pagtuo kang Ginoong Jesukristo. Daghang Pilipino ang adunay natural nga pagtuo sa Dios. Sayon lang alang kanamo ang pagsalig ni Jesukristo ug mahibalo nga kami makadawat og mga tubag sa among mga pag-ampo.
Ang pamilya Obedoza usa ka maayo kaayo nga ehemplo niini. Si Brother Obedoza mao ang akong presidente sa branch sa dihang ako usa pa ka batan-on. Ang dakong tinguha ni Brother ug Sister Obedoza mao ang masilyo sa ilang pamilya sa Manila Temple. Nagpuyo sila sa Siyudad sa General Santos, 1,000 ka milya (1,600 ka kilometro) gikan sa Manila. Alang sa pamilya nga siyam, ang pagbiyahe padulong sa templo daw imposible. Apan sama sa negosyante kinsa milakaw ug gibaligya ang tanan niyang katigayonan aron mapalit ang usa ka perlas nga labing bililhon (tan-awa sa Mateo 13:45–46), kining magtiayon mihukom sa pagbaligya sa ilang balay aron sa paggasto sa ilang biyahe. Si Sister Obedoza nabalaka tungod kay wala na silay panimalay nga balikan pa. Apan si Brother Obedoza mipaniguro kaniya nga ang Ginoo mosangkap.
Sila nasilyo isip usa ka pamilya alang sa karon ug hangtod sa kahangturan sa templo niadtong 1985. Sa templo ilang nakaplagan ang dili hitupngan nga hingpit nga kalipay––ilang perlas nga bililhon. Ug tuod man sumala sa mga pulong ni Brother Obedoza, ang Ginoo misangkap. Sa ilang pag-uli gikan sa Manila, mabination nga mga kaila mihatag kanila og mga luna nga kapuy-an, ug sila sa kadugayan nakaangkon og ilang kaugalingon nga panimalay. Ang Ginoo moamuma niadtong kinsa mopakita sa ilang hugot nga pagtuo diha Kaniya.
Ang ikaduhang baroganan sa ebanghelyo mao ang paghinulsol. Ang paghinulsol mao ang pagpalayo gikan sa sala ug pagduol ngadto sa Dios alang sa kapasayloan. Usa kini ka kausaban sa hunahuna ug kasingkasing. Sama sa gitudlo ni Presidente Russell Nelson, kini ang “pagbuhat ug mahimong mas maayo matag adlaw” (“Kita Makabuhat og Mas Maayo pa ug Mahimong mas Maayo; Liahona, Mayo 2019, 67).
Ang paghinulsol susama kaayo sa sabon. Isip batan-ong chemical engineer, nagtrabaho ako sa usa ka buhatan sa sabon sa Pilipinas. Nakakat-on ko unsaon paghimo og sabon ug sa proseso sa paghimo niini. Kon imong sagulon ang lana ug alkali base ug dugangan og mga kemikal nga pamatay sa kagaw, kini makahimo og isog nga substansiya nga makakuha sa mga kagaw. Sama sa sabon, ang paghinulsol usa ka panglimyo nga kemikal. Naghatag kini og kahigayonan kanato sa pagkuha sa atong mga hugaw ug atong karaan nga mga sala, aron takos kita nga makauban sa Dios, tungod kay “walay hugaw nga butang nga makapanunod sa gingharian sa [Dios]” (Alma 11:37).
Pinaagi sa paghinulsol kita migamit sa makapalimyo, makabalaan nga gahom ni Jesukristo. Importante kaayo kini nga bahin sa proseso sa pagkakabig. Mao kini ang nahitabo sa mga Anti-Nephi-Lehi diha sa Basahon ni Mormon. Sila mga Lamanite kinsa hingpit nga nakabig nga sila “wala gay[o]d mobiya” (tan-awa sa Alma 23:6–8). Gilubong nila ang ilang mga hinagiban sa gubat ug wala na gayod mogamit niini pag-usab. Mas pilion pa nilang mamatay kay sa molapas niadto nga pakigsaad. Ug ila kining gipamatud-an. Kita nasayod nga ang ilang sakripisyo midala og mga milagro, liboan ang nakig-away batok kanila ang milabay sa ilang mga hinagiban ug nakabig. Katuigan ang milabay ang ilang mga anak nga lalaki, kinsa atong nailhan nga ang gamhanang batan-ong mga manggugubat, napanalipdan sa gubat batok sa talagsaong mga kalisod!
Ang akong pamilya ug daghang mga Santos nga Pilipino miagi og sama nga proseso sa pagkakabig. Sa dihang among gidawat ang ebanghelyo ni Jesukristo ug mipasakop sa simbahan, among giusab ang among mga batasan ug among kultura aron mahiangay sa ebanghelyo. Kinahanglan namong tangtangon ang sayop nga mga tradisyon. Ako kining nakita sa akong amahan sa dihang iyang nakat-onan ang ebanghelyo ug naghinulsol. Kusog kaayo siya manigarilyo, apan iyang gilabay ang mga sigarilyo ug wala na gayod mohikap niini pag-usab. Tungod sa iyang desisyon sa pag-usab, upat ka henerasyon gikan niya ang napanalanginan.
Ang paghinulsol modala kanato sa paghimo ug pagtuman sa mga pakigsaad pinaagi sa sagrado nga mga ordinansa. Ang unang ordinansa sa kaluwasan ug kahimayaan mao ang pagbunyag pinaagi sa pagpaunlod sa tubig alang sa kapasayloan sa mga sala. Ang bunyag nagtugot kanato nga makadawat sa gasa sa Espiritu Santo ug mosulod ngadto sa pakigsaad uban sa Ginoo. Makabag-o kita niini nga pakigsaad sa bunyag matag semana samtang kita moambit sa sakramento. Kini usab usa ka milagro!
Mga kaigsoonan, ako modapit kaninyo sa pagdala niini nga milagro ngaha sa inyong kinabuhi. Duol ngadto kang Jesukristo ug pilia ang paggamit sa inyong hugot nga pagtuo diha Kaniya; paghinulsol, ug paghimo ug pagtuman sa mga pakigsaad nga makita sa mga ordinansa sa kaluwasan ug kahimayaan. Kini magtugot kaninyo nga makigsangon sa yugo uban kang Kristo ug makadawat sa gahom ug mga panalangin sa pagka-diosnon (tan-awa sa Doktrina ug mga Pakigsaad 84:20).
Ako mopamatuod sa katinuod ni Jesukristo ug nga Siya buhi ug nahigugma sa matag usa kanato. Ako nasayod nga ang Iyang ebanghelyo makadala kanato og paglaom, kalinaw, ug hingpit nga kalipay, dili lamang karon, apan kini usab makapanalangin og dili maihap pang uban sa umaabot nga mga henerasyon. Mao kana ang rason alang sa maanindot ug mainiton nga mga pahiyom sa Pilipino nga mga Santos. Mao kini ang milagro sa ebanghelyo ug sa doktrina ni Kristo. Ako nagpamatuod niini sa sagradong ngalan ni Jesukristo, amen.