Mas Maayo og Usa ka Porsento
Ang matag paningkamot nga atong himoon sa pag-usab—bisan unsa pa kini ka gamay alang kanato—tingali maoy mohimo og kinadak-an nga kalainan sa atong kinabuhi.
Sobra sa usa ka siglo, ang nasyonal nga mga team sa paglumba sa bisikleta sa Great Britain gibugalbugalan sa ubang siklista sa tibuok kalibotan. Ingon og dili molambo, ang mga siklistang Briton nakasakmit lang og pipila ka medalyang bulawan sulod sa 100 ka tuig sa Olympic nga mga kompetisyon ug napakyas gayod nga makaangkon og pagdayeg sa labing importante nga kalihokan sa pagbisikleta, ang tulo ka semana nga Tour de France—diin walay siklistang Briton ang midaog sukad sulod sa 110 ka tuig. Makadismaya gayod ang kahimtang sa mga siklistang Briton nga pipila sa mga tighimo og mga bisikleta midumili gani sa pagbaligya og mga bisikleta ngadto sa mga Briton, sa kahadlok nga madaot ang hinagoan nga dungog sa ilang kompanya. Ug bisan sa pagtugyan og daghan kaayong kapanguhaan alang sa kinabag-ohan nga teknolohiya ug pamaagi sa pagbansay, walay nagsilbi.
Wala gayod, hangtod, sa 2003, sa dihang usa ka gamay, wala kaayo mabantayi nga kausaban ang nahitabo nga kahangtorang mousab sa padulngan sa British nga pagbisikleta. Kana nga bag-o nga pamaagi magpakita usab og mahangtoron nga baroganan—nga adunay usa ka saad—kabahin sa atong kasagaran nga makapalibog nga mortal nga tinguha sa pagpalambo sa atong kaugalingon. Busa unsay nahitabo sa British nga pagbisikleta nga tingali adunay dako nga kalabotan sa atong personal nga tinguha aron mahimong mas maayo nga mga anak nga babaye ug mga anak nga lalaki sa Dios?
Niadtong 2003, gi-hire si Sir Dave Brailsford. Dili sama sa nangaging mga coach nga misulay og makapahingangha, kalit nga mga kausaban, si Sir Brailsford hinuon mipasalig og usa ka estratehiya nga iyang gipasabot isip “ang kahugpongan sa ginagmay nga mga pag-uswag.” Kini naglangkob sa pagpatuman og ginagmay nga mga kalamboan sa tanan. Kana nagpasabot og kanunay nga pagsukod sa importante nga mga estatistika ug sa pagtumong sa piho nga mga kahuyang.
Kini murag sama sa unsay pagtuo ni propeta Samuel ang Lamanite nga “naglakaw nga nagmatngon.”1 Kining mas halapad, mas tibuok nga panglantaw naglikay sa lit-ag nga kanunayng magtutok ra gayod sa dayag nga problema o sala sa atong atubangan. Miingon si Brailsford, “Ang tibuok baroganan naggikan sa ideya nga kon inyong bahin-bahinon ang tanan nga inyong mahunahunaan mahitungod sa pagbisikleta, ug dayon palamboon kini og 1 ka porsento, makaangkon kamo og mahinungdanon nga dakong pag-usbaw kon tingbon ninyo kining tanan.”2
Ang iyang pamaagi maayo nga nahisubay sa pamaagi sa Ginoo, kinsa mitudlo kanato sa importansiya sa pagpangita sa 1 ka karnero—bisan pa og biyaan ang 99 ka karnero. Siyempre, Siya nagtudlo sa sugo sa ebanghelyo nga pangitaon ang mga indibidwal nga nanginahanglan. Apan unsa kaha kon gamiton nato kana nga samang baroganan ngadto sa matam-is kaayo ug makapahimuot nga ikaduhang baroganan sa ebanghelyo, ang paghinulsol? Imbes nga mababagan sa walay kahumanan nga proseso ug dagko nga mga kausaban tali sa sala ug paghinulsol, unsa kaha kon ang atong pamaagi mao ang pagpiho sa atong focus—aron makahimo og mahinungdanon nga mga pag-uswag? Imbes nga mosulay sa paghingpit sa tanan, unsa kaha kon maningkamot kita sa pagbuhat og usa lang ka butang?
Sama pananglit, unsa kaha kon diha sa inyong bag-o nga halapad nga pagkahibalo, inyong nadiskobrehan nga inyong nabaliwala ang pagbasa sa Basahon ni Mormon kada adlaw? Aw, imbes nga desperadong mobasa sa tanang 531 ka pahina sa usa ka gabii, unsa kaha kon mopasalig kita hinuon nga mobasa og 1 lang ka porsento niini—lima lang kana ka pahina sa usa ka adlaw, o laing makaya nga tumong alang sa inyong kahimtang? Ang paghugpong sa gagmay apan makanunayon nga ginagmay nga mga pag-uswag sa atong kinabuhi mao ba gayod ang paagi sa kadaogan batok sa atong labing makahasol nga personal nga mga kasaypanan? Ang ginagmay apan makanunayon ba nga pamaagi sa pagbuntog sa atong mga kahuyang magsilbi ba gayod?
Aw, ang labing inila nga tagsulat nga si James Clear miingon nga kini nga estratehiya dako gayod og kalagmitan sa atong kalamposan. Siya mipasabot nga “ang mga batasan mao ang ‘nagkadako nga interes sa pagpalambo sa kaugalingon.’ Kon mahimo lang kamong usa ka porsento nga mas maayo sa usa ka butang matag adlaw, sa kataposan sa usa ka tuig … kamo mahimong 37 ka pilo nga mas maayo.”3
Ang ginagmay nga mga pag-uswag ni Brailsford nagsugod sa unsay dayag, sama sa ekipo, tela sa uniporme, ug mga sundanan sa pagbansay. Apan ang iyang team wala mihunong didto. Mipadayon sila sa pagpangita og 1 ka porsento nga mga pagpalambo diha sa nataligam-an ug wala gidahom nga mga dapit sama sa nutrisyon ug gani sa ginagmay nga mga kalainan sa pagmintinar. Sa paglabay sa panahon, kining daghang ginagmay nga mga kalamboan nahugpong ngadto sa makapahingangha nga mga resulta, nga mas paspas nga miabot kay sa gilaoman sa bisan kinsang tawo. Sa pagkatinuod, sila nakasabot ug migamit sa mahangtoron nga baroganan sa “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto.”4
Ang ginagmay ba nga mga pagpahiangay mopahinabo nianang “dako nga kausaban”5 nga inyong gitinguha? Kon tukma nga ipatuman, 99 porsento akong segurado nga magsilbi kini! Apan ang usa ka pasidaan niini nga pamaagi mao nga aron mohugpong ang ginagmay nga mga pag-uswag, kinahanglan nga adunay makanunayon, inadlaw-adlaw nga paningkamot. Ug bisan lagmit dili kita mahimong hingpit, kinahanglang determinado kita nga himoong managsama ang atong pagkamalahutayon sa pagpailob. Buhata kana, ug ang matam-is nga mga ganti sa giusbawan nga pagkamatarong maghatag kaninyo sa hingpit nga kalipay ug kalinaw nga inyong gitinguha. Sama sa gitudlo ni Presidente Russell M. Nelson: “Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gah[o]m sa Pag-ula ni Jesukristo.”6
Kabahin sa panginahanglanon sa paghinulsol sa hugot nga pagtuo, ang mga kasulatan klaro. Ang gikinahanglan lang gayod sa sinugdanan mao ang usa ka “tipik sa hugot nga pagtuo.”7 Ug kon kita makabaton niining “liso sa mustasa”8 nga panghunahuna, kita usab mahimong magdahom sa wala damha ug sa talagsaon nga mga kalamboan sa atong mga kinabuhi. Apan hinumdomi, sama sa dili kita mosulay nga kalit nga mahimong Mother Teresa gikan sa pagkahimong Attila ang Hun, mao usab nga kinahanglan hinay-hinay natong usbon ang atong mga sundanan sa pagpalambo. Bisan kon dinagko ang mga kausaban nga gikinahanglan sa inyong kinabuhi, pagsugod sa ginagmay. Kana tinuod gayod kon mibati kamo nga nabug-atan o nawad-an og kadasig.
Kini nga proseso dili kanunay matuman sa usa ka sunod-sunod nga paagi. Bisan tali sa mga tawo nga labing determinado mahimong adunay mga kapakyasan. Ingon nga nakasinati sa kasagmuyo niini sa akong kaugalingon nga kinabuhi, nasayod ako nga kini usahay mabati nga daw 1 ka porsento nga miuswag ug 2 porsento nga miatras. Apan kon magpabilin kita nga dili matarog sa atong determinasyon nga makanunayong maningkamot sa pagbuhat niadtong 1 ka porsento nga mga pag-uswag, Siya kinsa “[m]ipas-an [sa] atong mga alantuson”9 seguradong motabang kanato.
Dayag lang, kon kita nalambigit sa bug-at nga mga sala, ang Ginoo klaro ug dili kasaypan; kinahanglan kitang mohunong, mangayo og tabang gikan sa atong bishop, ug mosalikway niana nga mga binuhatan dihadiha dayon. Apan sama sa giawhag ni Elder David A. Bednar: “Ang gamay, makanunayon, magtubo sa espirituhanong pag-uswag [mao ang] mga lakang nga buot sa Ginoo nga atong buhaton. Ang pagpangandam nga maglakaw nga walay kasaypanan sa atubangan sa Dios usa sa nag-unang mga katuyoan sa mortalidad ug ang paningkamot sa tibuok kinabuhi; kini dili resulta sa panagsang paninguha og mainiton nga espirituhanong kalihokan.”10
Mao nga, kining ginagmay nga pamaagi sa paghinulsol ug tinuod nga kausaban magsilbi ba gayod? Ang pruyba ba anaa sa pagtindak, sa lain pang pagkasulti? Ikonsiderar unsay nahitabo ngadto sa British nga pagbisikleta sa milabayng duha ka dekada sukad sa pagpatuman niini nga pilosopiya. Ang mga siklistang Briton nakadaog na karon sa inilang Tour de France sa makapahibulong nga unom ka higayon. Atol sa milabayng upat ka Dula sa Olympics, ang Great Britain mao ang labing malamposong nasod sa tanang matang sa pagbisikleta. Ug sa bag-ohay nga nahuman nga Tokyo Olympics, ang UK nakadaog og mas daghan nga bulawan nga medalya sa pagbisikleta kay sa bisan unsang nasod.
Mga litrato sa mga siklistang Briton pinaagi ni (gikan sa walang bahin sa ibabaw padulong sa tuo) Friedemann Vogel, John Giles, ug Greg Baker/Getty Images
Apan mas labaw pa kay sa kalibotanong pilak o bulawan, ang atong bililhon nga saad sa atong panaw ngadto sa kahangtoran nga kita sa pagkatinuod “kang [Kristo modaog].”11 Ug kon mopasalig kita nga mohimo og ginagmay apan makanunayon nga mga paglambo, kita gisaaran og “mahimayaong korona nga dili molubad.”12 Uban sa pagtagamtam nianang himaya nga dili molubad, gidapit ko kamo sa pagsusi sa inyong kinabuhi ug tan-awa kon unsay nakapugong o nakapahinay kaninyo diha sa dalan sa pakigsaad. Dayon hunahunaa ang dugang pa nga mga butang nga mapalambo. Tinguhaa ang kasarangan apan mahimo nga mga pag-ayo sa inyong kinabuhi nga mahimong mosangpot sa matam-is nga kalipay sa pagkahimong medyo mas maayo lang.
Hinumdomi, migamit lang si David og usa ka gamayng bato aron sa pagpatay sa daw dili mapildi nga higante. Apan siya adunay giandam nga laing upat ka bato. Sa samang paagi, ang daotan nga kinaiya ug mahangtoron nga padulngan ni Alma nga Batan-on nausab pinaagi lang sa usa ka yano, mahinungdanon nga hunahuna—usa ka panumdoman sa mga pagtulun-an sa iyang amahan mahitungod sa makaluwas nga grasya ni Jesukristo. Ug mao usab kini sa atong Manluluwas, kinsa, bisan og walay sala, “wala makadawat sa kahingpitan sa sinugdanan, apan nakaangkon og grasya ug dugang pa nga grasya, hangt[o]d nga siya nakadawat sa kahingpitan.”13
Siya nga nasayod kon kanus-a mahulog ang gagmayng langgam nga sayaw ang samang nakatutok sa ginagmay ug dinagko nga mga higayon sa atong kinabuhi ug kinsa andam karon sa pagtabang kaninyo sa bisan unsang 1 ka porsento nga tinguha nga inyong buhaton gumikan niini nga komperensiya. Tungod kay ang matag paningkamot nga atong himoon aron mag-usab—bisan unsa pa kini ka gamay alang kanato—tingali maoy mohimo og kinadak-an nga kalainan sa atong kinabuhi.
Alang niini nga katuyoan, si Elder Neal A. Maxwell mitudlo, “Ang matag pamahayag sa usa ka matarong nga tinguha, matag buhat sa pagserbisyo, ug ang matag buhat sa pagsimba, bisan unsa pa ka gamay ug hinay-hinay, magdugang ngadto sa atong espirituhanong kusog.”14 Sa pagkatinuod, pinaagi kini sa gagmay, yano, ug, oo, bisan sa 1 ka porsento lang nga mga butang nga dagko nga mga butang ang ipahinabo.15 Ang kataposang kadaogan 100 ka porsento nga segurado, “human sa tanan nga atong mabuhat,”16 pinaagi sa kusog, maayong buhat, ug kaluoy sa atong Ginoo ug Manluluwas, si Jesukristo. Niini ako mopamatuod sa ngalan ni Jesukristo, amen.