Ang Malungtarong Kalooy sa Manluluwas
Ang pagpahayag og kamanggiloloy-on alang sa uban mao sa tinuod ang mahinungdanon nga bahin sa ebanghelyo ni Jesukristo.
Usa sa labing talagsaong baroganan nga gitudlo sa Manluluwas sa Iyang yutan-ong pangalagad mao ang pagtagad sa uban nga anaay kalooy. Ato nga pamalandongan kini nga baroganan ug ang praktikal nga paggamit niini pinaagi sa paghunahuna sa asoy mahitungod sa pagbisita ni Jesus ngadto sa balay ni Simon ang Pariseo.
Ang Ebanghelyo ni Lucas nagsaysay nga ang usa ka piho nga babaye, gikonsiderar nga usa ka makasasala, misulod sa panimalay ni Simon samtang si Jesus anaa didto. Diha sa mapainubsanon nga pagbasol, ang babaye miduol ngadto ni Jesus, gihugasan ang Iyang tiil sa iyang mga luha, gipahiran niya sa iyang buhok, ug gihagkan ug gibuboan kini og espesyal nga pahumot.1 Ang mapahitas-on nga tagbalay, nga giisip ang iyang kaugalingon nga mas labaw sa moral kay sa babaye, naghunahuna sa iyang kaugalingon uban ang pagbugal-bugal ug pagka arogante, “Kon tinuod pa nga propeta kining tawhana, makaila unta siya kon kinsa kining babaye nga mihikap kaniya ug unsa kadaotan ang iyang kinabuhi.”2
Ang kinaiya sa Pariseo nga nagtuo nga mas maayo pa kay sa ubang tawo midala kaniya ngadto sa dili makiangayon nga paghukom kang Jesus ug sa babaye. Apan sa Iyang gahom nga masayod sa tanan, ang Manluluwas nasayod sa unsay gihunahuna ni Simon ug, diha sa talagsaong kaalam, gihagit ang pagtamay ni Simon, ingon man usab gipahimangnoan siya sa kakulang sa iyang maayong pamatasan sa pagdawat og espesyal nga bisita sama sa Manluluwas diha sa iyang panimalay. Gani, ang direkta nga pagbadlong ni Jesus sa Pariseo nagsilbing saksi nga si Jesus sa pagkatinuod naghupot sa gasa sa panagna ug nga kini nga babaye, uban sa mapainubsanon ug masulub-on nga kasingkasing, naghinulsol ug gipasaylo sa iyang mga sala.3
Sama sa daghang ubang panghitabo atol sa yutan-ong pangalagad ni Jesus, kini nga asoy nagpakita sa makausa pa nga ang Manluluwas nagpakita og kamaloloy-on ngadto sa tanan nga moduol ngadto Kaniya—walay gipili—ug ilabi na niadtong mas labaw nga nagkinahanglan sa Iyang tabang. Ang paghinulsol ug balaanong gugma nga gipakita sa babaye ngadto kang Jesus mao ang ebidensiya sa iyang tinuoray nga paghinulsol ug tinguha sa pagdawat og kapasayloan sa iyang mga sala. Apan, ang pagtuo ni Simon nga mas labaw siya kay sa uban, inubanan sa tig-a nga kasingkasing,4 mipugong kaniya sa pagpakita og pagsabot alang nianang mahinulsolon nga kalag, ug siya nagpakita og walay pagpakabana ug pagkawalay respeto ngadto sa Manluluwas sa kalibotan. Ang iyang pamatasan nagpadayag nga ang iyang pamaagi sa kinabuhi walay lain kon dili ang istrikto ug taphaw nga pagsunod sa mga lagda ug pagpakita sa iyang mga pagtuo pinaagi sa pagpanghambog ug sayop nga pagkabalaan.5
Ang pagkamangiloloy-on ug personal nga pagpangalagad ni Jesus niini nga asoy nagpakita og hingpit nga modelo kon unsaon nato sa pakigsandurot sa atong silingan. Ang mga kasulatan adunay dili maihap nga mga ehemplo nga nagpakita kon sa unsang paagi nga ang Manluluwas, mibati sa hilabihan ug malungtaron nga kalooy, nakigsandurot sa katawhan sa Iyang panahon ug mitabang niadtong nag-antos ug niadtong kinsa nga mga “nagluya [man sila ug walay kadasig], morag mga karnero nga walay magbalantay.”6 Siya mihatag sa Iyang maloloy-on nga kamot niadtong nagkinahanglan og kahupayan gikan sa ilang mga alantuson, ma-pisikal ug ma-espirituwal man.7
Ang maloloy-on nga kinaiya ni Jesus nakagamot sa gugma nga putli,8 diha sa Iyang tiunay ug hingpit nga gugma, nga mao ang mahinungdanong bahin sa Iyang maulaon nga sakripisyo. Ang kamanggiloloy-on usa ka sukaranang kinaiya niadtong nanlimbasog alang sa pagkabalaan ug kini nga balaanong kinaiya naglambigit sa uban pang Kristohanon nga mga kinaiya sama sa pagbangutan uban niadto nga nagbangutan ug pagbaton og pagsabot, kalooy, ug pagkamabination.9 Ang pagpahayag og kamanggiloloy-on alang sa uban mao, sa tinuod, ang mahinungdanon nga bahin sa ebanghelyo ni Jesukristo ug ang klaro nga ebidensiya sa atong espirituwal ug emosyonal nga kasuod ngadto sa Manluluwas. Dugang pa, gipakita niini ang lebel sa impluwensiya nga anaa Siya sa atong pamaagi sa kinabuhi ug gipakita ang potensyal sa atong mga espiritu.
Makahuluganon nga obserbahan nga ang mga buhat sa pagkamanggiloloy-on ni Jesus dili ra panagsa o gibuhat dili tungod kay gisugo, nga gibase sa lista sa mga buluhaton nga kompletohon, apan kada adlaw kini nga mga pagpahayag sa Iyang putli nga gugma alang sa Dios ug sa Iyang mga anak ug sa Iyang malungtaron nga tinguha sa pagtabang kanila.
Si Jesus nahibalo sa mga panginahanglan sa katawhan bisan kon anaa sa layo. Sa ingon, dili na ikahibulong, pananglitan, nga diha-diha dayon human sa pag-ayo sa sulugoon sa usa ka senturyon,10 si Jesus mibiyahe gikan sa Capernaum ngadto sa lungsod nga gitawag og Nain. Didto gihimo ni Jesus ang usa sa malumo nga mga milagro sa Iyang yutan-ong pangalagad dihang Iyang gisugo ang usa ka namatay nga batan-ong lalaki, bugtong anak nga lalaki sa usa ka biyuda, nga mobangon ug mabuhi. Si Jesus nakamatikod dili lamang sa grabing pag-antos sa makalolooy nga inahan apan sa lisod nga mga sirkumstansiya sa iyang kinabuhi ug Siya natandog uban sa tinud-anay nga kalooy alang kaniya.11
Sama sa makasasala nga babaye ug sa biyuda sa Nain, daghang tawo sa atong palibot nga nagpangita og kahupayan, atensiyon, pagkasakop, ug bisan unsa nga tabang nga atong matanyag kanila. Kitang tanan mahimong mga instrumento sa mga kamot sa Ginoo ug mopakita og kamaloloy-on ngadto niadtong nagkinahanglan og tabang, sama sa gibuhat ni Jesus.
Nakaila ako og usa ka batang babaye nga natawo nga adunay grabe nga pagkabungi. Kinahanglang sugdan siya sa unang sunod-sunod nga daghang operasyon sa ikaduhang adlaw sa iyang kinabuhi. Natandog sa tinud-anay nga kalooy alang niadtong nakasinati og sama niini nga hagit, kini nga batang babaye ug ang iyang mga ginikanan nagtinguha sa paghatag og suporta, pagsabot, ug emosyonal nga pag-abag ngadto sa uban nga nag-atubang niining lisod nga reyalidad. Bag-ohay lang misulat sila kanako ug mipaambit: “Pinaagi sa hagit sa among anak nga babaye, aduna kami oportunidad nga mahimamat ang maayong mga tawo kinsa nagkinahanglan og kahupayan, suporta, ug pag-awhag. Usa ka higayon, ang among anak nga babaye, kinsa 11 anyos na karon, nakigsulti sa mga ginikanan sa usa ka masuso nga adunay sama nga hagit. Atol niini nga pakig-istoryahanay, gitangtang og kadali sa among anak nga babaye ang mask nga iyang gisul-ob tungod sa pandemya aron ang mga ginikanan makakita nga adunay paglaom, bisan pa kon ang masuso aduna pay taas nga panahon sa mosunod nga mga katuigan aron ayohon ang problema. Kami mapasalamaton kaayo sa oportunidad nga makahatag sa among pagsabot alang niadtong nag-antos, sama sa gibuhat sa Manluluwas alang kanato. Gibati namo nga among gipagaan ang among kasakit matag higayon nga gihupay namo ang kasakit sa usa ka tawo.”
Akong minahal nga mga higala, samtang kita tuyo nga maningkamot sa paglakip sa manggiloloy-on nga kinaiya diha sa atong pamaagi sa kinabuhi, sama sa gipakita sa Manluluwas, kita mahimong mas labing sensitibo sa mga panginahanglan sa mga tawo. Uban nianang nagtubo nga pagkasensitibo, ang mga pagbati sa tinuod-anay nga interes ug gugma motuhop sa atong matag buhaton. Ang Ginoo moila sa atong mga paningkamot, ug kita siguradong mapanalanginan og mga higayon nga mahimong mga instrumento diha sa Iyang mga kamot sa pagpahumok sa mga kasingkasing ug pagdala og kahupayan niadtong kinsa “nahuyhoy … [ang] mga kamot .”12
Ang pahimangno ni Jesus ngadto ni Simon nga Pariseo miklaro usab nga kita dili gayod mobuhat og makasakit ug walay kalooy nga paghukom sa atong silingan tungod kay kitang tanan nagkinahanglan og pagsabot ug kalooy sa atong mga pagkadili hingpit gikan sa atong mahigugmaon nga Langitnong Amahan. Dili ba mao man gayod kini ang gitudlo sa Manluluwas sa laing okasyon dihang misulti Siya, “Nganong nakita man nimo ang puling sa imong isigkatawo apan wala ka magtagad sa troso diha sa imong mata?”13
Kinahanglan atong hunahunaon nga dili sayon ang pagsabot sa tanang sirkumstansiya nga makatampo sa kinaiya o reaksiyon sa usa ka tawo. Ang mga panagway makalingla ug sa kasagaran wala magrepresentar og sakto nga sukod sa batasan sa usa ka tawo. Dili sama nimo ug nako, si Kristo klaro nga makakita sa tanang aspeto sa piho nga sitwasyon.14 Bisan nasayod Siya sa tanan natong mga kahuyang, ang Manluluwas dili madali-dalion sa pagpanghimaraot kanato apan nagpadayon sa maloloy-ong pakigtambayayong kanato sa dugayng panahon, nagtabang kanato nga matangtang ang puling sa atong mata. Si Jesus sa kanunay nagtan-aw diha sa atong kasingkasing, dili sa panagway.15 Siya Mismo mideklara, “Ayaw na kamo paghukom pinasikad sa inyong makita.”16
Karon, hunahunaa ang maalamon nga tambag sa Manluluwas ngadto sa nagpulog duha ka disipulo nga Nephite mahitungod niini nga pangutana:
“Ug kamo nasay[o]d nga kamo mahimo nga mga maghuhukom niini nga mga katawhan, sumala sa paghukom diin Ako mihatag nganha kaninyo, nga makiangayon. Busa, unsa nga matang sa mga tawo kamo angay nga mahisama? Sa pagkatinuod Ako moingon nganha kaninyo, gani sama nga Ako mao.”17
“Busa Ako manghina[o]t nga kamo mahimo nga hingpit sama nga Ako ingon, o ang inyong Amahan kinsa anaa sa langit hingpit.”18
Niini nga konteksto, ang Ginoo nagtakda sa paghukom niadtong nagbaton sa ilang kaugalingon sa paghukom sa dili matarong nga paagi sa giingon nga mga kakulangan sa uban. Aron mahimong takos sa atong mga kaugalingon sa paghimo og matarong nga mga paghukom, kita maningkamot nga mahisama sa Manluluwas ug maloloy-ong motan-aw sa mga pagkadili hingpit sa mga indibidwal, gani sama sa Iyang pagtan-aw. Sa paghunahuna nga aduna pa kitay layo nga padulngan aron maabot ang pagkahingpit, tingali mas maayo kon kita mopaduol sa tiilan ni Jesus ug mangamuyo og kalooy alang sa atong kaugalingong pagkadili hingpit, sama sa mahinulsolon nga babaye diha sa balay sa Pariseo, ug dili mogahin og dakong oras ug kusog sa gihunahuna nga mga pagkadili hingpit sa uban.
Akong minahal nga mga higala, ako nagpamatuod nga samtang kita maningkamot sa paglakip sa manggiloloy-on nga ehemplo sa Manluluwas diha sa atong mga kinabuhi, ang atong kapasidad sa pagdayeg sa mga hiyas sa atong mga silingan molambo ug ang atong kinaiyanhon nga batasan sa paghukom sa ilang mga pagkadili hingpit mokunhod. Ang atong relasyon sa Dios molambo, ug sigurado gayod nga ang atong mga kinabuhi mahimong mas maanindot, ang atong mga pagbati mas malumo, ug atong makaplagan ang walay kataposang tinubdan sa kalipay. Kita mailhan nga mga tigbuhat og kalinaw,19 kansang mga pulong maaghop sama sa yamog sa kabuntagon sa tingpamulak.
Nag-ampo ko nga mahimo kitang mas labaw nga mainantoson ug masinabtanon sa uban ug nga ang kalooy sa Ginoo, diha sa hingpit nga pagpaubos, mohupay sa atong pagkawalay pailob sa ilang mga pagkadili hingpit. Kini mao ang pagdapit sa Manluluwas kanato. Mopamatuod ko nga Siya buhi. Siya ang hingpit nga panig-ingnan sa maloloy-on ug mapailubon nga pagkadisipulo. Mopamatuod ko niini nga mga kamatuoran diha sa balaan nga ngalan sa Manluluwas nga si Jesukristo, amen.