Yano ang Katahom—Matahom ang Kayano
Hinaot nga atong ipabiling yano ang ebanghelyo samtang huptan nato ang atong balaanong gitudlo nga mga responsibilidad.
Pasiuna
Ako motanyag og mainitong pag-abiabi sa matag usa kaninyo nga miapil niini nga komperensiya.
Karon gusto kong mohulagway og duha ka elemento sa gipahiuli nga ebanghelyo ni Jesukristo, pagasundan sa upat ka makapadasig nga mga asoy gikan sa mga Santos sa Ulahing mga Adlaw sa tibuok kalibotan nga nagpakita sa paggamit niini nga mga baroganan. Ang unang elemento sa gipahiuli nga ebanghelyo—ang buhat sa Dios bahin sa kaluwasan ug kahimayaan—nagpokus sa balaang gitudlo nga mga responsibilidad. Ang ikaduhang elemento magpahinumdom kanato nga ang ebanghelyo yano ug bililhon.
Balaang Gitudlo nga mga Responsibilidad
Aron makadawat og kinabuhing dayon, kita kinahanglan nga “[mo]duol ngadto kang Kristo, ug [m]aghingpit diha kaniya.”1 Samtang moduol kita ngadto kang Kristo ug motabang sa uban sa pagbuhat sa ingon, kita miapil sa buhat sa Dios bahin sa kaluwasan ug kahimayaan, nga nagpokus sa balaang gitudlo nga mga responsibilidad.2 Kining balaang mga responsibilidad mopahiuyon sa ilang kaugalingon sa mga yawe sa pagkapari nga gipahiuli pinaagi nila ni Moises, Elias, ug Elijah, nga narekord diha sa ika-110 nga seksiyon sa Doktrina ug mga Pakigsaad,3 ug sa ikaduha nga dakong sugo nga gihatag ngari kanato ni Jesukristo sa paghigugma sa atong silingan sama sa atong kaugalingon.4 Makita kini diha sa unang duha ka pahina sa na-update nga Kinatibuk-ang Tamdanan nga Basahon, nga magamit sa tanang miyembro.
Kon ang pagkadungog sa mga pulong nga “Kinatibuk-ang Tamdanan nga Basahon” o “balaang gitudlo nga mga responsibilidad” makapakurog kaninyo sa kahadlok tungod sa kakomplikado, palihog ayaw pagbati niana. Kini nga mga responsibilidad yano, makapadasig, makapaawhag, ug mahimo ra. Ania kini:
-
Pagsunod sa ebanghelyo ni Jesukristo
-
Pag-atiman niadtong nanginahanglan
-
Pagdapit sa tanan nga modawat sa ebanghelyo
-
Paghiusa sa mga pamilya alang sa kahangtoran
Mahimo ninyo kining tan-awon sama sa akong pagtan-aw: isip usa ka mapa sa dalan aron makabalik ngadto sa atong mahigugmaong Langitnong Amahan.
Ang Plano sa Ebanghelyo Yano ug Bililhon
Ginaingon nga ang ebanghelyo ni Jesukristo “yano ang katahom ug matahom ang kayano.”5 Ang kalibotan dili. Kini komplikado, lisod, ug puno sa kasamok ug kagubot. Kita mapanalanginan kon kita mag-amping nga dili motugot sa kakomplikado, nga komon kaayo sa kalibotan, nga mosulod sa paagi sa atong pagdawat ug pagtuman sa ebanghelyo.
Si Presidente Dallin H. Oaks nakaobserbar: “Gitudloan kita sa daghang gagmay ug yanong mga butang sa ebanghelyo ni Jesukristo. Kinahanglan nga mapahinumd[o]man kita nga kon ting[o]bon sulod sa taas nga panahon, kining daw gagmayng mga butang makahimo og dagkong mga butang.”6 Si Jesukristo Mismo naghulagway nga masayon ang Iyang yugo ug magaan ang Iyang luwan.7 Kinahanglan nga kitang tanan maningkamot sa pagpabilin sa ebanghelyo nga yano—diha sa atong mga kinabuhi, diha sa atong mga pamilya, diha sa atong mga klase ug mga korum, ug diha sa atong mga ward ug mga stake.
Samtang maminaw kamo sa mosunod nga mga istorya nga akong ipaambit ninyo, hibaloi nga mainampingon kining gipili aron sa pagdasig sa usa ka bahin ug sa pagpahibalo sa laing bahin. Ang mga binuhatan sa matag usa niini nga mga Santos sa Ulahing mga Adlaw mahimong modelo alang sa matag usa kanato sa paggamit sa ebanghelyo sa yano, bililhon nga mga paagi samtang nagtuman sa usa sa balaang gitudlo nga mga responsibilidad nga bag-o lang gipahibalo.
Pagsunod sa Ebanghelyo ni Jesukristo
Una, pagsunod sa ebanghelyo ni Jesukristo. Si Jens sa Denmark nag-ampo matag adlaw nga makatuman sa ebanghelyo ug nakamatikod og mga pag-aghat sa Espiritu Santo. Nakakat-on siya sa paglihok dayon kon bation niya nga gigiyahan sa Espiritu.
Si Jens mipaambit sa mosunod:
“Nagpuyo kami sa usa ka nindot, gamayng balay, nga kahoy ang katunga nga nipa ang atop, diha sa sentro sa usa ka komportable nga gamayng baryo, duol sa lim-aw sa baryo.
“Niining gabhiona nga adunay kinanindotang panahon sa summer sa Denmark, ang mga pultahan ug mga bintana giablihan, ug ang tanan malinawon ug hilom. Tungod sa among hayag kaayo ug taas nga mga kagabhion sa summer, wala ra ko magdali-dali nga ilisan ang napundir nga bombilya sa lawak sa among mga gamit.
“Kalit lang, adunay kusog nga pagbati nga kinahanglan dayon nako kining ilisan! Sa samang higayon, nakadungog ko sa akong asawa, si Mariann, nga nanawag nako ug sa mga bata nga manghugas na sa among mga kamot kay andam na ang panihapon!
“Taud-taod na ko nga naminyo nga mahibalo nga dili kini panahon sa pagbuhat og bisan unsang butang kay sa pagpanghugas sa kamot, apan misulti ko ni Mariann nga moadto ra ko og kadali sa tindahan aron mopalit og bag-ong bombilya. Mibati ko og kusog nga pagdasig nga mobiya dayon.
“Ang tindahan naa ra sa pikas nga bahin sa lim-aw. Sagad maglakaw ra mi, apan karon nagbisikleta ko. Samtang nagsakay agi sa lim-aw, aduna koy nasiplatan nga nakamatikod ko og usa ka gamayng bata nga lalaki, mga dos anyos ang edad, nga nag-inusarang naglakaw duol sa kilid sa lim-aw, nga duol na kaayo sa tubig—sa kalit lang nahulog siya! Usa ka minuto naa pa siya—ug human nawala na siya!
“Walay nakakita nga nahitabo kini gawas nako. Gibuhian nako ang akong bisikleta, midagan, ug milukso sa taga-hawak nga lim-aw. Ang ibabaw sa tubig natabonan dayon sa mga sagbot, nga maoy nakapalisod nga makita ang ilawom sa tubig. Dayon nakabantay ko og milihok sa usa ka bahin. Gituslob nako ang akong kamot sa tubig, nakuptan ang T-shirt, ug gibira ang gamayng batang lalaki. Nagkapunga-punga siya, miubo, ug mihilak. Wala madugay human niana ang batang lalaki nakauban na sa iyang mga ginikanan.”
Samtang si Brother Jens nag-ampo matag buntag alang sa tabang aron makaila sa mga pag-aghat sa Espiritu Santo, bisan sa butang nga dili kasagaran sama sa pag-ilis dayon sa bombilya, nag-ampo usab siya nga siya mahimong gamiton nga instrumento sa pagpanalangin sa mga anak sa Dios. Si Jens nagsunod sa ebanghelyo pinaagi sa pagtinguha og balaanong giya matag adlaw, naningkamot nga mahimong takos, dayon naghimo sa iyang labing maayo sa pagsunod niana nga giya kon kini moabot.
Pag-atiman Niadtong Nanginahanglan
Ania ang usa ka ehemplo sa pag-atiman niadtong nanginahanglan. Usa ka adlaw ang presidente sa stake sa Cucuta sa Colombia mikuyog sa presidente sa Young Women sa stake aron mobisita sa duha sa iyang mga batan-ong babaye—ug sa ilang magulang nga lalaki nga ten-edyer—nga nakasinati og grabeng kalisod nga mga pagpanlimbasog. Bag-ohay lang ang ilang amahan namatay, ug ang ilang inahan namatay sa miaging tuig. Ang tulo ka managsuon mao na lang ang nahabilin karon sa ilang gamay, pinobre nga pinuy-anan. Ang mga bongbong hinimo sa gansangon nga kahoy nga gilinyahan og mga bag nga plastik, ug ang sin nga atop mitabon kutob lang sa dapit nga ilang gihigdaan.
Human sa ilang pagbisita, kini nga mga lider nasayod nga kinahanglan silang motabang. Pinaagi sa konseho sa ward, usa ka plano sa pagtabang nila ang mitumaw. Ang mga lider sa ward ug stake—Relief Society, korum sa mga elder, Young Men, Young Women—ug daghang pamilya ang tanan nangandam sa ilang mga kaugalingon ngadto sa buluhaton sa pagpanalangin niini nga pamilya.
Ang mga organisasyon sa ward mikontak sa pipila ka miyembro sa ward nga nagtrabaho sa konstruksiyon. Ang uban mitabang sa pagdesinyo, ang uban mipahinungod sa ilang panahon ug kusog, ang uban nagluto og pagkaon, ug sa gihapon ang uban mihatag og gikinahanglan nga mga materyales.
Sa dihang nahuman na ang gamayng balay, usa kadto ka malipayong adlaw alang sa mga mitabang ug alang sa tulo ka batan-ong mga miyembro sa ward. Kining nailo nga mga anak mibati og kalipay ug makahupay nga kasuod sa ilang ward nga pamilya nga masayod nga wala sila mag-inusara ug nga ang Dios anaa kanunay alang kanila. Kadtong mga mitabang mibati sa gugma sa Manluluwas alang niini nga pamilya ug milihok isip Iyang mga kamot sa pagserbisyo kanila.
Pagdapit sa Tanan nga Modawat sa Ebanghelyo
Siguro malingaw kamo niini nga ehemplo sa pagdapit sa tanan nga modawat sa ebanghelyo. Ang disesiyete anyos nga si Cleiton sa Cape Verde walay ideya kon unsay mahitabo niya isip resulta sa paglakaw paingon sa iyang klase sa seminary sa ward usa ka adlaw niana. Apan ang iyang kinabuhi ug ang mga kinabuhi sa uban mausab sa kahangtoran tungod kay gihimo niya kini.
Si Cleiton, uban sa iyang inahan ug magulang nga lalaki, nabunyagan sa Simbahan taud-taod na, apan ang pamilya wala na mosimba. Ang usa niya ka buhat sa pagtambong sa seminary mao ang sinugdanan sa kausaban sa pamilya.
Ang ubang kabatan-onan sa klase sa seminary mainiton ug maabiabihon. Sila mihimo nga si Cleiton mobati nga komportable ug miawhag kaniya sa pagtambong og lain pa nga kalihokan. Gibuhat niya kini ug wala madugay mitambong sa iyang ubang mga miting sa Simbahan. Ang maalamong bishop nakakita sa espirituhanon nga potensyal nga anaa ni Cleiton ug midapit niya nga mahimo niyang assistant. “Sukad nianang higayona,” miingon si Bishop Cruz, “si Cleiton nahimong usa ka ehemplo ug impluwensya ngadto sa ubang kabatan-onan.”
Ang unang tawo nga gidapit ni Cleiton nga mobalik sa simbahan mao ang iyang inahan, dayon ang iyang magulang nga lalaki. Dayon mas daghan pa siya og gidapit lakip na ang iyang mga higala. Usa niadto nga mga higala usa ka batan-ong lalaki nga kaedad niya, si Wilson. Sa una gayod niya nga pakighimamat sa mga misyonaryo, si Wilson mipahayag og tinguha nga magpabunyag. Ang mga misyonaryo nakadayeg ug nahingangha sa kadaghan na gayod nga napaambit ni Cleiton kang Wilson.
Ang mga paningkamot ni Cleiton dili lang kutob diha. Mitabang siya sa ubang dili kaayo aktibo nga mga miyembro nga mobalik, agi og dugang sa pagpaambit sa ebanghelyo ngadto sa mga higala sa laing mga tinuohan. Karon ang ward adunay 35 ka aktibong kabatan-onan, uban sa naglambo nga programa sa seminary, salamat nga ang dakong bahin niini tungod sa mga paningkamot ni Cleiton sa paghigugma, pagpaambit, ug pagdapit. Si Cleiton ug ang iyang magulang nga lalaki, si Cléber, parehong nangandam sa pagserbisyo og full-time nga mga misyon.
Paghiusa sa mga Pamilya alang sa Kahangtoran
Sa kataposan, tugoti kong mopaambit og usa ka nindot nga ehemplo sa paghiusa sa mga pamilya alang sa kahangtoran. Si Lydia gikan sa Kharkiv, Ukraine, unang nakakat-on mahitungod sa templo gikan sa mga misyonaryo. Diha-diha dayon, si Lydia mibati og mainitong tinguha nga motambong sa templo, ug human sa iyang bunyag, misugod siya sa pagpangandam aron makadawat og rekomend sa templo.
Si Lydia mitambong sa Freiberg Germany Temple sa pagdawat sa iyang pagtuga ug unya migahin og pipila ka adlaw sa paghimo og puli [proxy] nga buhat didto. Human sa pagpahinungod sa Kyiv Ukraine Temple, si Lydia mas kanunay nga nagtambong sa templo. Siya ug ang iyang bana, si Anatoly, mahangtorong nasilyo didto ug wala madugay gitawag aron moserbisyo isip mga misyonaryo sa templo. Silang duha nakakita og sobra sa 15,000 ka ngalan sa mga katigulangan ug nagtinabangay aron mahatag ang mga ordinansa sa templo alang nila.
Sa dihang gipangutana mahitungod sa iyang mga pagbati kalabot sa buhat sa templo, si Lydia miingon, “Unsay akong nadawat didto sa templo? Ako nakahimo og bag-ong mga pakigsaad ngadto sa Dios. Ang akong pagpamatuod nalig-on. Ako nakakat-on sa pagdawat og personal nga pagpadayag. Ako nakapahigayon og makaluwas nga mga ordinansa alang sa akong patay na nga mga katigulangan. Ug ako makahimo sa paghigugma ug pagserbisyo sa ubang mga tawo.” Siya mitapos uban niining tinuod gayod nga pamahayag: “Ang Ginoo gusto nga makakita kanato sa templo kanunay.”
Panapos
Ako nadasig pinaagi sa kamaayo niini nga mga Santos sa Ulahing mga Adlaw, matag usa uban sa nagkalainlain ug managlahi nga mga gigikanan, nga gitutokan niining upat ka istorya. Daghan ang mahimong makat-onan gikan sa milagroso nga mga resulta nga nahitabo pinaagi sa yano nga paggamit sa yano nga mga baroganan sa ebanghelyo. Ang tanan nilang gihimo mahimo ra usab nato.
Hinaot nga atong ipabiling yano ang ebanghelyo samtang huptan nato ang atong balaanong gitudlo nga mga responsibilidad: Sa pagsunod sa ebanghelyo ni Jesukristo ingon man magmahimong sensitibo ngadto sa mga pag-aghat, sama sa gihimo ni Jens sa Denmark. Sa pag-atiman niadtong nanginahanglan, sama sa gipakita sa mga miyembro sa stake sa Cucuta sa Colombia sa paghatag og kapuy-an sa nailo nga mga miyembro sa ward. Sa pagdapit sa tanan nga modawat sa ebanghelyo, sa paagi nga gihimo ni Cleiton gikan sa isla sa Africa sa nasod sa Cape Verde ngadto sa iyang mga higala ug pamilya. Sa kataposan, sa paghiusa sa mga pamilya alang sa kahangtoran, sama sa gipakita ni Sister Lydia gikan sa Ukraine pinaagi sa iyang kaugalingong mga ordinansa sa templo, mga paningkamot sa family history, ug pagserbisyo diha sa templo.
Ang paghimo niini siguradong makahatag kaninyo og hingpit nga kalipay ug kalinaw. Niini ako mosaad ug mopamatuod—ug ni Jesukristo isip atong Manluluwas ug atong Manunubos—sa ngalan ni Jesukristo, amen.