Ang Hugot nga Pagtuo alang sa Pagpangutana ug Dayon sa Paglihok
Ang hugot nga pagtuo diha ni Jesukristo mao ang yawe sa pagdawat og pagpadayag sa kamatuoran.
Minahal kong kaigsoonan, mapasalamaton ko sa oportunidad sa pagpamulong kaninyo niining Sabado sa gabii nga sesyon sa kinatibuk-ang komperensiya. Sa iyang pasiuna sa komperensiya kaganihang buntag, si Presidente Russell M. Nelson miingon nga ang “tiunay nga pagpadayag alang sa mga pangutana sa inyong kasingkasing makapahimo niini nga komperensiya nga magantihon ug dili mahikalimtan. Kon kamo wala pa magtinguha alang sa pagpangalagad sa Espiritu Santo aron matabangan kamo nga makapaminaw kon unsa ang buot sa Ginoo nga inyong madunggan atol niining duha ka adlaw, ako modapit kaninyo sa pagbuhat sa ingon karon.”1 Nagtinguha ko niana nga panalangin samtang ako nag-andam sa pagdawat og pagpadayag alang niini nga pagpamulong nganha kaninyo. Ang akong matinguhaon nga pag-ampo mao nga kamo makadawat og pagpadayag gikan sa Dios.
Ang paagi sa pagdawat og pagpadayag gikan sa Dios wala mausab gikan sa mga adlaw ni Adan ug Eva. Pareha ra kini alang sa tanang gitawag nga mga sulugoon sa Ginoo gikan sa sinugdanan hangtod karon. Pareha ra kini alang kaninyo ug kanako. Gihimo kini kanunay pinaagi sa paggamit sa hugot nga pagtuo.2
Ang tin-edyer nga si Joseph Smith adunay hugot nga pagtuo nga igo alang sa pagpangutana sa Dios, nagtuo nga ang Dios motubag sa iyang kinasingkasing nga panginahanglan. Ang tubag nga miabot miusab sa kalibotan. Gusto siya nga masayod unsa nga simbahan ang apilan aron malimpyohan sa sala. Ang tubag nga iyang nadawat miawhag kaniya sa pagpadayon sa pagpangutana og mas maayo pa nga mga pangutana ug sa pagtuman sa nagpadayon nga pagdagayday sa pagpadayag nga bag-o lang misugod.3
Ang inyong kasinatian posible nga susama niini nga komperensiya. Kamo adunay mga pangutana diin nagtinguha kamo og mga tubag. Labing menos kamo adunay igong hugot nga pagtuo nga maglaom nga kamo makadawat og mga tubag gikan sa Ginoo pinaagi sa Iyang mga sulugoon.4 Kamo walay oportunidad sa pagpangutana og kusog alang sa mga tubag gikan sa mga mamumulong, apan kamo makapangutana sa inyong mahigugmaong Amahan pinaagi sa pag-ampo.
Nahibaloan nako gikan sa kasinatian nga ang mga tubag moabot nga ipahaom sa inyong mga panginahanglan ug sa inyong espirituwal nga pagpangandam. Kon nagkinahanglan mo og tubag nga importante sa inyong mahangtorong kaayohan o ngadto sa uban, ang tubag mas dako og kalagmitan nga moabot. Apan bisan pa man, kamo mahimong makadawat—sama ni Joseph Smith—sa tubag nga magmapailubon.5
Kon ang inyong hugot nga pagtuo kang Jesukristo misangpot ngadto sa nalukmay nga kasingkasing pinaagi sa mga epekto sa Iyang Pag-ula, kamo mas makahimo nga mobati sa impluwensya sa Espiritu agig tubag sa inyong mga pag-ampo. Ang akong personal nga kasinatian mao nga ang hinay, hinagawhaw nga tingog—nga tinuod—klaro ug mamatikdan sa akong hunahuna kon ako mobati og kalinaw sa kahiladman ug pagtugyan ngadto sa kabubut-on sa Ginoo. Kana nga pagbati sa pagkamapainubsanon mahulagway pag-ayo isip “Apan dili ang akong pagbuot kondili ang imo maoy matuman.”6
Kini nga proseso sa pagpadayag maoy hinungdan nganong kamo maminaw sa mga mamumulong nga magtudlo niini nga komperensiya sa unsay gitawag nga ang doktrina ni Kristo.7 Ang pagpadayag moabot kanato katimbang sa gidak-on sa atong tinguha sa pagdawat sa doktrina ni Kristo sulod sa atong mga kasingkasing ug gamiton kini sa atong mga kinabuhi.
Nahinumdom kamo gikan sa Basahon ni Mormon nga si Nephi mitudlo kanato nga ang hugot nga pagtuo kang Jesukristo mao ang yawe sa pagdawat og pagpadayag sa kamatuoran ug mao ang yawe nga makabaton og pagsalig nga kita nagsunod sa direksyon sa Manluluwas. Gisulat ni Nephi ang mosunod nga mga pulong gatosan ka tuig na ang milabay sa wala pa ang pagkahimugso ni Jesukristo dinhi sa pagka-mortal:
“Ang mga anghel mamulong, pinaagi sa gah[o]m sa Espiritu Santo; busa, sila namulong sa mga pulong ni Kristo. Busa, ako moingon nganha kaninyo, pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.
“Busa, karon nga human ako makapamulong niini nga mga pulong, kon kamo dili makasab[o]t kanila kini nahimo tungod kay kamo wala mangutana, ni kamo motuktok; busa, kamo wala madala ngadto sa kahayag, apan malaglag diha sa kangitngit.
“Kay tan-awa, pag-usab ako moingon nganha kaninyo nga kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton.
“Tan-awa, kini mao ang doktrina ni Kristo, ug wala nay lain nga doktrina nga ihatag hangt[o]d human siya mopakita sa iyang kaugalingon nganha kaninyo diha sa lawas. Ug kon siya mopakita sa iyang kaugalingon nganha kaninyo diha sa lawas, ang mga butang nga iyang ipamulong nganha kaninyo kinahanglan kamo mobuhat.”8
Ang Ginoo mosulti og mga butang pinaagi sa Iyang mga sulugoon nganha kaninyo ug kanato karon ug sa umaabot nga mga adlaw. Siya mosulti kanato sa mga butang nga kinahanglan natong buhaton.9 Ang Manluluwas dili mosinggit sa sugo nganha kaninyo ug kanako. Sama sa Iyang gitudlo ni Elias:
“Ug siya miingon, Lakaw ug tindog sa tumoy sa bukid atubangan kanako. Unya miagi ang Ginoo ug may kusog nga hangin nga mihapak sa kabukiran ug nangatipak ang mga bato apan ang Ginoo wala diha sa hangin. Ug human sa hangin miabot ang linog apan ang Ginoo wala diha sa linog:
“Human sa linog misunod ang kalayo apan ang Ginoo wala diha sa kalayo. Apan human sa kalayo may hinay ug malumong tingog.”10
Ang pagkadungog niana nga tingog magdepende sa atong hugot nga pagtuo Kaniya. Uban sa igong hugot nga pagtuo, mangayo kita og direksyon sa tuyo nga moadto ug mobuhat bisan unsa ang Iyang isugo.11 Kita makapalambo sa hugot nga pagtuo aron masayod nga bisan unsa ang Iyang isugo mopanalangin sa uban ug nga kita mamahimong putli sa maong proseso tungod sa Iyang gugma alang kanato.
Samtang ang atong hugot nga pagtuo kang Jesukristo mogiya nato sa pagpangutana sa Amahan alang sa mga tubag, kana nga hugot nga pagtuo modala usab sa impluwensya sa Manluluwas igo nga kita makadungog sa Iyang direksyon ug mahimong determinado ug madasigon sa pagsunod. Dayon mokanta kita sa mga pulong sa himno nga malipayon, bisan kon ang buhat malisod: “Matah[o]m ang buhat sa Dios.”12
Kon kita aduna sa doktrina ni Kristo sa atong mga kinabuhi ug mga kasingkasing, mas mobati kita og mas dako nga gugma ug simpatiya alang niadtong kinsa wala gayoy mga panalangin sa hugot nga pagtuo kang Jesukristo o nakigbisog sa pagmintenar niini. Lisod ang pagtuman sa mga sugo sa Ginoo kon walay hugot nga pagtuo ug pagsalig Kaniya. Ingon nga ang uban nawad-an sa ilang hugot nga pagtuo diha sa Manluluwas, gani ilang sumpoon ang Iyang tambag, motawag sa maayo nga daotan ug daotan nga maayo.13 Aron malikayan kini nga sayop, importante nga ang bisan unsa nga personal nga pagpadayag nga atong madawat nahisubay sa mga pagtulon-an sa Ginoo ug sa Iyang mga propeta.
Mga kaigsoonan, magkinahanglan og hugot nga pagtuo ang pagkamasulundon ngadto sa mga sugo sa Ginoo. Magkinahanglan og hugot nga pagtuo kang Jesukristo ang pag-alagad sa uban alang Kaniya. Magkinahanglan og hugot nga pagtuo ang pagtudlo sa Iyang ebanghelyo ug pagtanyag niini ngadto sa mga tawo kinsa wala mobati sa tingog sa Espiritu o molimod gani sa pagkatinuod sa mensahe. Apan kon kita mogamit sa atong hugot nga pagtuo kang Kristo—ug mosunod sa Iyang buhi nga propeta—ang hugot nga pagtuo molambo sa tibuok kalibotan. Tungod sa teknolohiya, tingali mas daghan sa mga anak sa Dios ang makadungog ug makaila sa pulong sa Dios niining kataposan sa semana kay sa bisan unsang laing duha ka adlaw sa kasaysayan.
Uban sa naglambo nga hugot nga pagtuo nga kini mao ang Simbahan sa Ginoo ug gingharian sa yuta, mas daghang miyembro nagbayad sa ikapulo ug nagdonar aron matabangan kadtong nanginahanglan, bisan kadto nga mga miyembro nakasinati og mga pagsulay sa ilang kaugalingon. Uban sa hugot nga pagtuo nga sila gitawag ni Jesukristo, ang mga misyonaryo sa tibuok kalibotan nakakita og mga paagi sa pagbuntog sa mga hagit nga nahimo sa pandemya, naghimo sa ingon uban ang kaisog ug kamaya. Ug sa ilang dugang nga paningkamot, ang ilang hugot nga pagtuo mas milig-on pa.
Ang oposisyon ug mga pagsulay mao ang nakapalambo sa hugot nga pagtuo. Kana sa kanunay tinuod, ilabi na sukad sa sinugdanan sa Pagpahiuli ug sa pagkatukod sa Simbahan sa Ginoo.14
Unsay dugay nang gisulti ni Presidente George Q. Cannon tinuod karon ug gani hangtod nga personal nga moanhi ang Manluluwas ug mogiya sa Iyang Simbahan ug sa Iyang katawhan: “Ang pagkamasulundon ngadto sa Ebanghelyo modala sa [mga tawo] ngadto sa suod kaayo nga relasyon uban sa Ginoo. Nag-establisar kini og suod nga koneksyon tali sa mga tawo sa yuta ug sa atong Halangdon nga Tiglalang didto sa mga langit. Mapatik ngadto sa hunahuna sa tawo ang usa ka pagbati sa hingpit nga pagsalig sa Makagagahom ug sa Iyang pagkaandam nga maminaw ug motubag sa pangaliya niadtong kinsa mosalig Kaniya. Sa mga panahon sa pagsulay ug kalisod kini nga pagsalig bililhon kaayo. Ang kasamok moabot sa indibidwal o sa katawhan, ang katalagman mohulga ug ingon og mahubsan sa paglaom, apan, kon ang mga [tawo] mogamit sa mga pribilehiyo nga gidalit sa pagkamasulundon ngadto sa Ebanghelyo, sila anaa sa sigurado nga katindogan; ang ilang mga tiil anaa sa usa ka bato nga dili matarog.”15
Akong pagpamatuod nga ang bato nga atong gitindogan mao ang atong saksi nga si Jesus mao ang Kristo; nga kini Iyang Simbahan nga personal Niyang gigiyahan; ug nga si Presidente Russell M. Nelson mao ang Iyang buhi nga propeta karon.
Si Presidente Nelson nagtinguha ug nakadawat og direksyon gikan sa Ginoo. Siya alang nako usa ka ehemplo sa pagtinguha niana nga direksyon nga may determinasyon sa pagsunod niini. Kanang mao gihapon nga determinasyon nga magmasulundon sa direksyon sa Ginoo anaa sa kasingkasing sa tanan niadtong kinsa nakapamulong o mamulong, mag-ampo, o mokanta niining kinatibuk-ang komperensiya sa Iyang Simbahan.
Ako mag-ampo nga kadtong nanan-aw o naminaw sa lain-laing lugar sa yuta niini nga komperensiya makabaton sa pagbati sa gugma sa Ginoo alang kanila. Ang Langitnong Amahan mitubag sa akong pag-ampo nga ako mobati bisan gamay kaayo sa gugma sa Manluluwas alang kaninyo, ug sa Iyang gugma alang sa Iyang Langitnong Amahan, kinsa mao ang atong Langitnong Amahan.
Mopamatuod ko nga si Jesukristo buhi. Siya mao ang atong Maluluwas ug atong Manunubos. Kini Iyang Simbahan. Siya ang nangulo niini. Siya, uban sa Iyang Langitnong Amahan, personal nga nagpakita ngadto ni Joseph Smith didto sa kakahoyan sa New York. Ang ebanghelyo ni Jesukristo ug ang Iyang pagkapari gipahiuli pinaagi sa langitnong mga mensahero.16 Pinaagi sa gahom sa Espiritu Santo, ako nasayod nga kana tinuod.
Ako mag-ampo nga kamo adunay sama nga pagsaksi. Ako mag-ampo nga kamo mangutana sa Langitnong Amahan alang sa hugot nga pagtuo kang Jesukristo nga inyong gikinahanglan sa paghimo ug pagtuman sa mga pakigsaad nga makapatugot sa Espiritu Santo nga mahimo ninyong kauban kanunay. Akong ibilin kaninyo ang akong gugma ug ang akong sigurado nga pagsaksi, pinaagi sa ngalan ni Jesukristo, amen.