Pagpalambo og Kinabuhi nga Dili Matarog sa Kaaway
Ako mag-ampo nga kita padayon nga motukod sa atong kinabuhi nga magsubay sa teknikal nga mga detalye sa balaanong desinyo nga gipasiugdahan sa atong Amahan sa Langit.
Sulod sa katuigan gikan niining matahom nga pulpito sa Conference Center, atong nadawat ang talagsaong tambag, inspirasyon, instruksiyon, ug pagpadayag. Sa ubang higayon, ang mga mamumulong migamit og mga pagkompara inubanan sa ilang kahibalo ug kasinatian aron ihulagway sa tin-aw ug puno sa gahom ang baroganan sa ebanghelyo ni Jesukristo.
Niini nga paagi, pananglit, nakakat-on kita bahin sa mga eroplano ug mga pagpalupad diin ang gamay kaayong pagliko modala kanato palayo sa atong orihinal nga destinasyon.1 Usab niini nga paagi, atong nahibaloan gikan sa pagkompara ang katuyoan sa atong pisikal nga kasingkasing ngadto sa puno sa gahom nga kausaban sa kasingkasing nga gikinahanglan aron matubag ang pagdapit sa Ginoo sa pagsunod Kaniya.2
Karon, ako sa mapaubsanong paagi gusto nga magdugang og usa ka pagkompara nga dinasig gikan sa usa ka luna sa akong propesyonal nga pagpangandam. Buot nakong ipasabot ang kalibotan sa civil engineering. Sukad sa sinugdanan sa akong mga pagtuon sa unibersidad, akong gipangandoy ang adlaw nga akong makompleto ang mga rekisito aron mahimong kwalipikado sa klase nga magtudlo nako unsaon sa pagdesinyo og mga gambalay [building] ug ubang mga estraktura nga makonsiderar nga “makasukol sa linog.”
Sa kataposan miabot ang adlaw alang sa una nakong klase niini nga subject. Ang unang mga pulong sa propesor mao kini: “Kamo mahinamon gayod nga sugdan kini nga kurso ug magkat-on unsaon pagdesinyo og estraktura nga kontra sa linog,” diin daghan namo mahinamong miyango sa among ulo. Dayon ang propesor miingon, “Pasayloa ko sa pag-ingon nga dili kini posible, kay ako dili makatudlo ninyo unsaon pagdesinyo og gambalay [building] nga dili uyon, nga ‘kontra,’ o supak, sa usa ka linog. Kini dili magpulos kay ang mga linog moabot gihapon, gusto man nato o dili.”
Dayon midugang siya, “Ang akong ikatudlo ninyo mao ang kon unsaon sa pagdesinyo og mga estraktura nga dili matarog sa linog, mga estraktura nga makabatok sa mga puwersa nga naggikan sa linog, aron ang estraktura magpabiling nagbarog nga walay mahitabong grabe nga kadaot ug padayon nga makahatag og serbisyo nga maoy tuyo sa pagmugna niini.”
Ang inhenyero mohimo og mga pagkalkulo nga magpiho sa mga sukod, sa mga kalidad, ug mga elemento sa mga pundasyon, mga haligi, mga troso, konkretong mga busaog, ug ubang mga elemento sa gidesinyo nga estraktura. Kini nga mga resulta palamboon ngadto sa mga pagplano ug teknikal nga mga pagkalkulo, nga kinahanglang sundon gayod sa tigtukod aron matuman ang han-ay sa buluhaton ug sa ingon matuman ang katuyoan sa pagdesinyo ug pagtukod niini.
Bisan og kapin na sa 40 ka tuig ang milabay sukad nianang unang klase bahin sa dili matarog sa linog nga pamaagi sa engineering, akong nahinumdoman sa hingpit ang panahon dihang nagsugod ko sa pag-angkon og lawom ug mas kompletong panabot sa labihan ka importante nganong kini nga konsepto anaa gayod sa mga estraktura nga akong idesinyo sa akong umaabot nga propesyonal nga kinabuhi. Dili lang kana, apan labaw nga importante—nga kini permanente gayod nga anaa sa pagpalig-on sa kaugalingon nakong kinabuhi ug niadtong akong mapakitaan og positibong impluwensiya.
Bulahan kaayo kita nga adunay masaligan nga kahibalo bahin sa plano sa kaluwasan nga gimugna sa atong Langitnong Amahan, nga nakaangkon sa gipahiuling ebanghelyo ni Jesukristo, ug makasalig sa dinasig nga direksiyon sa buhing mga propeta! Ang tanang gihisgotan naglangkob sa balaanong gidesinyo nga “mga plano” ug sa “teknikal nga mga detalye” nga nagtudlo nato sa klaro gayod unsaon sa pagtukod og malipayong kinabuhi—kinabuhi nga dili matarog sa sala, dili matarog sa tentasyon, dili matarog sa mga pag-atake ni Satanas, kinsa nagtinguha sa hilabihan sa pagpakyas sa atong mahangtoron nga tinguha nga ikauban ang atong Langitnong Amahan ug ang atong hinigugmang mga pamilya.
Ang Manluluwas mismo, sa pagsugod sa Iyang pangalagad, “gitugotan nga tentalon sa yawa.”3 Apan si Jesus nagmalamposon gikan niana nga dagkong pagsulay. Sa unsang paagi nga ang pagbaton og kinaiya nga dili matarog sa tentasyon nakatabang Kaniya? Ang hinungdan nganong si Jesus nagmadaugon gikan niadtong labing lisod nga mga panahon mao ang Iyang espirituwal nga pagpangandam, nga nagtugot Kaniya nga maanaa sa kahimtang nga dili matarog sa mga tentasyon sa kaaway.
Unsa ang pipila ka butang nga nakatabang sa Manluluwas nga maandam alang nianang lisod nga panahon?
Una, Siya nagpuasa sulod sa 40 ka adlaw ug 40 ka gabii, pagpuasa nga siguradong giubanan og padayon nga pag-ampo. Busa, bisan og Siya sa pisikal nga paagi huyang, ang Iyang espiritu lig-on kaayo. Bisan pa, suwerte lang, kay kita wala hangyoa og ingon ana kadugayon nga puasa—apan sulod lang sa 24 oras kausa sa usa ka bulan—ang pagpuasa maghatag nato og espiritwal nga kalig-on ug mag-andam nato nga dili matarog sa mga pagsulay niini nga kinabuhi.
Sa ikaduhang bahin, diha sa paghulagway sa mga tentasyon nga gisagobang sa Manluluwas, atong nakita nga Siya kanunay nga motubag ni Satanas gamit ang mga kasulatan diha sa Iyang hunahuna, nagkutlo niini, ug naggamit niini sa eksaktong panahon.
Dihang si Satanas mitental Kaniya nga himoong pan ang mga bato aron Siya motagbaw sa Iyang kagutom gikan sa taas Niya nga pagpuasa, ang Ginoo miingon kaniya, “Nahisulat na, ang Tawo mabuhi dili sa tinapay lamang, kondili sa matag pulong nga magagula sa ba-ba sa Dios.”4 Dayon, dihang ang Ginoo didto sa kinatas-ang bahin sa templo, ang yawa misulay sa pagtental Kaniya sa pagpakita sa Iyang gahom, diin ang Ginoo mitubag gamit ang awtoridad, “Usab nahisulat kini nga nagaingon, Ayaw pagtentala ang Ginoo nga imong Dios.”5 Ug sa ikatulong pagsulay ni Satanas, ang Ginoo mitubag, “Ang kasulatan nag-ingon ‘Simbaha ang Ginoo nga imong Dios, ug siya lamang ang alagari.”6
Ang usa ka hitabo nga linog magbilin og marka niini gani diha sa mga estraktura nga eksakto ang pagkadesinyo ug pagkatukod—ang mga resulta tingali mao ang mga pagliki, pagkahagsa sa kagamitan o mga kisame, pagkabuak sa mga bintana. Apan kining maayo nga pagkadesinyo ug maayong pagkatukod nga edipisyo motuman sa katuyoan niini sa pagpanalipod sa mga nagpuyo niini, ug uban sa pipila ka pagpang-ayo, mabalik ang orihinal nga kondisyon niini.
Sa samang paagi, ang mga pagpanglutos sa kaaway makamugna usab og mga “pagliki” o pipila ka ginagmayng kadaot sa atong kinabuhi, bisan sa atong mga paningkamot sa paglig-on sa atong kinabuhi pinasubay sa hingpit nga balaanong desinyo. Kini nga mga “pagliki” posibling mabatyagan pinaagi sa mga pagbati sa kasubo o pagmahay tungod sa paghimo og pipila ka sayop ug tungod kay wala mahimo ang tanan sa hingpit nga paagi, o sa pagbati nga kita dili ingon ana kamaayo kay sa atong gusto.
Apan ang mahinungdanon gayod mao nga tungod sa pagsunod sa balaanong gidesinyo nga mga plano ug mga detalye, nga mao, ang ebanghelyo ni Jesukristo, kita padayon nga nagbarog. Ang estraktura sa atong kinabuhi wala mabungkag tungod sa mga paningkamot sa kaaway o tungod sa lisod nga mga sitwasyon nga kinahanglan natong atubangon; kondili, kita andam nga mopadayon.
Ang kalipay nga gisaad diha sa mga kasulatan isip katuyoan sa atong kinabuhi7 dili angay sabton nga kita walay mga kalisdanan o mga kasubo, nga kita walay mga “pagliki” isip mga sangpotanan sa mga tentasyon, sa kaaway, o gikan sa aktwal nga mga pagsulay sa atong kinabuhi sa yuta.
Kini nga kalipay adunay kalabotan sa panglantaw ni Nephi sa kinabuhi dihang miingon siya, “Nakasinati sa daghan nga mga kasakit sa akong panahon, bisan pa, gipangga sa Ginoo sa tanan ko nga mga panahon.”8 Sa iyang tanan nga panahon! Bisan sa mga panahon nga si Nephi nag-antos nga wala masabti ug gisalikway sa iyang kaugalingong mga igsoon, bisan sa dihang sila migapos kaniya didto sa barko, bisan sa adlaw nga ang iyang amahan, si Lehi, namatay, bisan sa dihang si Laman ug Lemuel nahimong mortal nga mga kaaway sa iyang katawhan. Bisan pa niadtong malisod nga mga panahon, si Nephi mibati nga gipangga sa Ginoo.
Kita makabaton og malinawong pagbati sa kahibalo nga ang Ginoo dili gayod motugot nga kita tentalon lapas kay sa atong masagubang. Si Alma midapit kanato nga “magbantay ug mag-ampo sa kanunay, nga [kita] mahimo nga dili matental labaw niana nga [kita] makalahutay, ug sa ingon giyahan pinaagi sa Balaang Espiritu, magmapainubsanon, magmaaghop, masinugtanon, mapailubon, puno sa gugma ug sa tanan mainantoson.”9
Ang samang butang magamit ngadto sa mga pagsulay sa kinabuhi. Si Ammon mipahinumdom kanato sa mga pulong sa Ginoo: “Lakaw … ug antosa uban sa pailob ang inyong mga kasakit, ug ako mohatag nganha kaninyo sa kalamposan.”10
Ang Ginoo sa kanunay mohatag kanato og tabang kon kita mag-atubang og kalisdanan, tentasyon, wala masabti, kahuyang, ug gani kamatayon. Siya miingon, “Ug karon, sa pagkatinuod ako moingon nganha kaninyo, nga unsa nga ako mosulti ngadto sa usa ako mosulti ngadto sa tanan, pagmalipayon, mga bata; kay ako anaa sa inyong taliwala, ug ako wala mobiya kaninyo.”11 Siya dili gayod mobiya kanato!
Ako mag-ampo nga kita padayon nga motukod sa atong kinabuhi nga magsunod sa mga plano ug teknikal nga mga detalye sa balaanong desinyo nga gipasiugdahan sa atong Amahan ug makab-ot pinaagi sa atong Manluluwas, si Jesukristo. Mao nga, tungod sa grasya nga modangat kanato pinaagi sa Pag-ula sa atong Manluluwas, kita magmalamposon sa pagtukod sa kinabuhi nga dili matarog sa sala, dili matarog sa tentasyon, ug malig-on aron makalahutay sa subo, lisod nga mga panahon sa atong kinabuhi. Ug dugang pa, kita maanaa sa kahimtang nga makaangkon sa tanang panalangin nga gisaad pinaagi sa gugma sa atong Amahan ug sa atong Manluluwas. Sa ngalan ni Jesukristo, amen.