Unsa Ang Tinuod?
Ang Dios mao ang tinubdan sa tanang kamatuoran. Ang Simbahan ni Jesukristo sa mga Santos sa Ulahing mga Adlaw mihangop sa tanang kamatuoran nga gipasabot sa Dios ngadto sa Iyang mga anak.
Akong gimahal nga mga kaigsoonan, daghang salamat sa tanan alang niining makadasig nga sesyon! Sukad sa atong komperensiya niadtong Abril, kita nakasaksi og daghang panghitabo sa kalibotan, gikan sa makapasubo pag-ayo ngadto sa makapalipay kaayo.
Kami malipayon nga moreport sa dagkong mga komperensiya sa kabatan-onan nga gipahigayon sa tibuok kalibotan.1 Niini nga mga komperensiya, ang atong halangdong kabatan-onan nakakat-on nga bisan kon unsay mahitabo sa ilang kinabuhi, ang ilang labing dako nga kalig-on nagagikan sa Ginoo.2
Kami nalipay nga dugang nga mga templo ang gitukod sa tibuok kalibotan. Uban sa pagpahinungod sa matag bag-o nga templo, dugang diosnon nga gahom ang moabot sa kalibotan aron sa pagpalig-on kanato ug pagpakigbatok sa nagkagrabe nga mga paninguha sa kaaway.
Ang pag-abuso nagpakita sa impluwensiya sa kaaway. Kini usa ka mabug-at kaayo nga sala.3 Isip Presidente sa Simbahan, ako mopamatuod sa mga pagtulon-an ni Ginoong Jesukristo bahin niini nga isyu. Tugoti ko nga klarohon kini: ang bisan unsa nga klase sa pag-abuso sa kababayen-an, kabataan, o ni bisan kinsa usa ka salawayon ngadto sa Ginoo. Siya maguol ug ako maguol sa higayon nga si bisan kinsa napasakitan. Siya magbangutan, ug kitang tanan magbangutan alang sa matag tawo nga nahimong biktima sa pag-abuso sa bisan unsa nga matang. Kadtong magbuhat niining mangilngig nga mga buhat dili lamang adunay tulubagon sa mga balaod sa tawo apan mag-atubang usab sa kasuko sa Makagagahom nga Dios.
Sa daghang dekada na karon, ang Simbahan mibuhat og daghan kaayong mga lakang aron sa pagpanalipod––ilabi na gayod––sa kabataan gikan sa pang-abuso. Adunay daghang mga tabang diha sa website sa Simbahan. Dapiton ko kamo sa pagtuon kanila.4 Kini nga mga giya anaa aron sa pagpanalipod sa inosente. Ako moawhag sa matag usa kanato nga magmaabtik ni bisan kinsa nga mahimong anaa sa pilegro nga maabusohan ug sa paglihok dayon aron sa pagpanalipod kanila. Ang Manluluwas dili mobaliwala sa pag-abuso, ug isip Iyang mga disipulo, kita dili usab.
Ang kaaway adunay laing makabalaka nga mga paagi. Usa niini mao ang iyang mga tinguha sa pagpahanap sa linya tali sa unsa ang tinuod ug sa unsa ang dili tinuod. Ang kusog nga bul-og sa impormasyon nga anaa sa tumoy sa atong mga tudlo, sukwahi lang, nakapahimo niini nga nag-anam kalisod sa pagtino kon unsa ang tinuod.
Kini nga hagit nakapahinumdom kanako sa usa ka kasinatian ni Sister Nelson ug nako sa dihang mibisita kami og usa ka adunay hataas nga katungdanan diha sa usa ka nasod diin gamay ra ang nakadungog bahin ni Jesukristo. Kining pinalangga nga tigulang na nga higala bag-ohay lang nga nagmasakit pag-ayo. Siya misulti kanamo nga atol sa iyang daghang mga adlaw nga naghigda, siya kanunay nga magtan-aw sa kisame ug mangutana, “Unsa ang tinuod?”
Daghan sa ibabaw sa yuta karon ang “natago gikan sa kamatuoran tungod kay wala sila masayod asa kini pangitaa.”5 Ang uban mopatuo kanato nga ang kamatuoran managlahi––nga ang matag tawo kinahanglan nga motino alang sa iyang kaugalingon kon unsa ang tinuod. Ang samang pagtuo hunahuna lamang niadtong kinsa naghunahuna nga sila usab dili manubag ngadto sa Dios.
Minahal nga mga kaigsoonan, ang Dios mao ang tinubdan sa tanang kamatuoran. Ang Simbahan ni Jesukristo sa mga Santos sa Ulahing mga Adlaw mihangop sa tanang kamatuoran nga gipasabot sa Dios ngadto sa Iyang mga anak, nakat-onan man sa siyantipiko nga laboratoryo o nadawat pinaagi sa direkta nga pagpadayag gikan Kaniya.
Gikan sa pulpito karon ug ugma, kamo padayon nga makadungog og kamatuoran. Palihog timan-i ang mga ideya nga makakuha sa inyong pagtagad ug kadtong mosantop sa inyong hunahuna ug magpabilin sa inyong kasingkasing. Mainampoon nga mohangyo sa Ginoo sa pagkompirmar nga unsay inyong nadungog mao ang tinuod.
Ako nahigugma kaninyo, akong minahal nga mga kaigsoonan. Ako nag-ampo nga kining komperensiya makahatag sa espirituwal nga pagkabusog nga inyong gitinguha. Sa sagradong ngalan ni Jesukristo, amen.