Sunda si Jesukristo uban sa mga Lakang sa Hugot nga Pagtuo
Si Kristo makasuporta nato karon taliwala sa malisod nga mga panahon. Siya mihimo niini sa unang mga pioneer, ug Siya mohimo niini karon alang sa matag usa kanato.
Salamat, choir, sa pagkanta sa “Faith in Every Footstep.” Ang musika ug mga pulong niana nga kanta gisulat niadtong 1996 ni Brother Newell Dayley1 agig pagpangandam alang sa selebrasyon sa ika-150 nga anibersaryo sa pag-abot sa unang mga pioneer ngadto sa Walog sa Salt Lake niadtong 1847.
Bisan kini nga kanta gisulat agig pagpangandam alang niana nga selebrasyon, ang mensahe niini magamit sa tibuok kalibotan.
Ako ganahan kanunay sa chorus:
Uban sa hugot nga pagtuo sa matag lakang, kita mosunod ni Kristo, ang Ginoo;
Ug mapuno sa paglaom pinaagi sa tiunay nga gugma, kita mokanta uban sa komon nga tinguha.2
Mga kaigsoonan, ako mopamatuod nga kon kita mosunod ni Jesukristo uban sa matag lakang sa hugot nga pagtuo, adunay paglaom. Adunay paglaom diha ni Ginoong Jesukristo. Adunay paglaom alang sa tanan niini nga kinabuhi. Adunay paglaom sa pagbuntog sa atong mga sayop, sa atong mga kasubo, sa atong mga pakigbisog, ug sa atong mga pagsulay ug mga kasamok. Adunay paglaom diha sa paghinulsol ug pagdawat og pasaylo ug sa pagpasaylo sa uban. Ako mopamatuod nga adunay paglaom ug kalinaw diha ni Kristo. Siya makasuporta kanato karon taliwala sa malisod nga mga panahon. Siya mihimo niini sa unang mga pioneer, ug Siya mohimo niini karon alang sa matag usa kanato.
Kini nga tuig nagtimaan sa ika-175 nga anibersaryo sa pag-abot sa unang mga pioneer ngadto sa Walog sa Salt Lake, nga nakapamalandong nako sa akong mga katigulangan, ang pipila nila milakaw gikan sa Nauvoo hangtod sa Walog sa Salt Lake. Ako adunay apohan sa tuhod kinsa milakaw diha sa kapatagan sa ilang pagkabatan-on. Si Henry Ballard nag-edad og 20 anyos;3 si Margaret McNeil nag-edad og 13;4 ug si Joseph F. Smith, kinsa nahimong ikaunom nga Presidente sa Simbahan, nag-edad lang og 9 sa dihang miabot siya sa Walog sa Salt Lake.5
Sila nag-atubang og mga kapit-os sa matag matang diha sa dalan, sama sa mabugnaw nga tingtugnaw, sakit, ug kakulang sa igong pagkaon ug sinina. Pananglitan, sa dihang si Henry Ballard misulod sa Walog sa Salt Lake, nalipay siya nga nakakita sa “Gisaad nga Yuta” apan nahadlok nga adunay makakita kaniya tungod kay ang sinina nga iyang gisul-ob gision na kaayo nga kini wala na makatabon sa iyang lawas. Siya mitago sa kalibonan tibuok adlaw hangtod nga mongitngit. Siya dayon miadto sa usa ka balay ug nangayo og sinina aron nga siya makapadayon sa iyang panaw ug makit-an ang iyang mga ginikanan. Siya nagpasalamat sa Dios nga siya miabot sa iyang umaabot nga panimalay nga luwas.6
Ang akong mga apohan sa tuhod misunod ni Jesukristo uban sa mga lakang sa hugot nga pagtuo sa ilang tibuok nga mga pagsulay. Ako mapasalamaton kanila nga wala gayod mohunong. Ang ilang mga lakang sa hugot nga pagtuo mipanalangin nako ug sa misunod nga mga henerasyon, sama sa inyong mga lakang sa hugot nga pagtuo karon mopanalangin sa inyong kaliwatan.
Ang pulong pioneer usa ka pungan [noun] ug berbo [verb]. Isip usa ka pungan kini mahimong magpasabot sa usa ka tawo kinsa kauban sa una nga misuhid o nanimuyo sa bag-ong teritoryo. Isip usa ka berbo, kini mahimong magpasabot sa pag-abli o pag-andam sa dalan alang sa uban nga mosunod.7
Samtang ako maghunahuna mahitungod sa mga pinoneer kinsa miandam sa dalan alang sa uban, una nakong mahunahunaan si Propeta Joseph Smith. Si Joseph usa ka pioneer tungod kay ang iyang mga lakang sa hugot nga pagtuo migiya niya ngadto sa kakahoyan diin siya miluhod sa pag-ampo ug miabli sa dalan alang nato nga makabaton sa kahingpitan sa ebanghelyo ni Jesukristo. Ang hugot nga pagtuo ni Joseph nga “mangutana sa Dios”8 nianang buntag sa tingpamulak niadtong 1820 miabli sa dalan alang sa Pagpahiuli sa kahingpitan sa ebanghelyo ni Jesukristo, nga naglakip sa mga propeta ug apostoles nga gitawag aron moserbisyo sa yuta sa makausa pa.9 Nasayod ko nga si Propeta Joseph Smith usa ka propeta sa Dios. Ako nasayod sa iyang puno sa hugot nga pagtuo nga mga lakang nga migiya niya sa pagluhod diha sa presensya sa Dios nga Amahan ug sa Iyang Hinigugma nga Anak nga si Jesukristo.
Ang mga lakang sa hugot nga pagtuo ni Propeta Joseph nakapahimo niya nga mahimong instrumento sa Ginoo sa pagpatungha sa Basahon ni Mormon, nga mao ang lain nga tugon ni Jesus ug sa Iyang maulaong grasya.
Pinaagi sa hugot nga pagtuo ni Joseph Smith ug sa pagpadayon atubangan sa grabeng kalisod ug oposisyon, siya nahimong usa ka instrumento sa mga kamot sa Ginoo sa pagtukod sa Simbahan ni Jesukristo pag-usab dinhi sa kalibotan.
Atol sa kataposan nga kinatibuk-ang komperensiya, ako namulong mahitungod kon sa unsa nga paagi nga ang akong misyonaryo nga pagserbisyo mipanalangin nako. Ako napanalanginan samtang ako mitudlo mahitungod sa mahimayaong plano sa atong Langitnong Amahan sa kaluwasan, sa Unang Panan-awon ni Joseph Smith, ug sa iyang paghubad sa Basahon ni Mormon. Kining gipahiuli nga mga pagtulon-an ug doktrina migiya sa akong mga lakang diha sa hugot nga pagtuo sa pagtudlo niadtong kinsa andam nga maminaw sa mensahe sa Pagpahiuli sa Ebanghelyo.
Ang atong mga misyonaryo karon mao ang moderno nga mga pioneer tungod kay sila mopaambit niining mahimayaon nga mensahe ngadto sa mga tawo sa tibuok kalibotan, sa ingon nag-abli sa dalan alang sa mga anak sa atong Langitnong Amahan nga makaila Kaniya ug sa Iyang Anak, si Jesukristo. Ang pagdawat sa ebanghelyo ni Jesukristo moabli sa dalan alang sa tanan aron makaandam ug modawat sa mga ordinansa ug mga panalangin sa Simbahan ug sa templo.
Sa miaging kinatibuk-ang komperensiya, si Presidente Russell M. Nelson mimatuod pag-usab “nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo og misyon” ug nga “ang usa ka misyon usa ka gamhanan, apan opsiyonal, nga oportunidad ” alang sa “mga batan-on ug makahimo nga mga igsoon nga babaye.”10
Minahal nga mga batan-ong lalaki ug mga batan-ong babaye, ang inyong mga lakang sa hugot nga pagtuo motabang ninyo sa pagsunod sa pagdapit sa Ginoo nga moserbisyo og mga misyon—nga mahimong moderno nga mga pioneer—pinaagi sa pag-abli sa dalan alang sa mga anak sa Dios sa pagpangita ug pagpabilin diha sa dalan sa pakigsaad balik ngadto sa Iyang mahimayaong presensya.
Si Presidente Nelson usa ka pioneer sa Simbahan. Isip usa ka Apostol siya nakabiyahe ug miabli sa daghang yuta alang sa pagsangyaw sa ebanghelyo. Sa wala madugay human mahimong propeta ug Presidente sa Simbahan, siya nanghangyo nato sa pagpalambo sa [atong] espirituhanong kapasidad sa pagdawat og pagpadayag.11 Siya nagpadayon sa pagtudlo nato unsaon sa pagpalig-on ang atong mga pagpamatuod. Sa usa ka debosyonal alang sa mga young adult, siya miingon:
Ako mangamuyo kaninyo sa pag-angkon sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. …
“[Dayon] bantayi ang mga milagro nga mahitabo sa inyong kinabuhi.”12
Siya nagtudlo nato unsaon nga mahimong mas makabarog sa kinaugalingon nga paningkamot diha sa espirituhanong paagi. Siya miingon, “Sa umaabot nga mga adlaw, dili na posible ang espirituhanon nga pagsugakod kon wala ang paggiya, pagdirekta, paghupay, ug ang makanunayon nga impluwensya sa Espiritu Santo.”13
Ako mopamatuod nga si Presidente Russell M. Nelson mao ang propeta sa Dios sa yuta karon.
Ang atong Manluluwas, si Jesukristo, mao ang labing unang pioneer sa pag-andam sa dalan. Sa pagkatinuod, Siya mao “ang dalan”14 alang sa plano sa kaluwasan nga matuman aron nga kita makahinulsol ug, pinaagi sa hugot nga pagtuo diha Kaniya, makabalik ngadto sa atong Langitnong Amahan.
Si Jesukristo miingon, “Ako mao ang dalan, ang kamatuoran, ug ang kinabuhi: walay makaadto sa Amahan, kon dili moagi kanako.”15 Siya misaad nga dili mobiya kanato nga walay kahupayan; Siya moanhi nato diha sa atong mga pagsulay.16 Siya midapit kanato nga “ moduol ngadto [Kaniya] uban sa hingpit nga katuyoan sa kasingkasing, ug [Siya] moayo [kanato].”17
Ako mopamatuod nga si Jesukristo mao ang atong Manluluwas ug atong Manunubos, atong Manlalaban ngadto sa Amahan. Ang atong Langitnong Amahan miabli sa dalan alang nato aron makabalik ngadto Kaniya pinaagi sa pagsunod sa Iyang Hinigugma nga Anak nga si Jesukristo, uban sa hugot nga pagtuo sa matag lakang.
Ang akong mga apohan sa tuhod ug ubang unang mga pioneer nag-atubang og daghang babag samtang sila miabot pinaagi sa mga karwahe, mga karomata, ug naglakaw padulong sa Walog sa Salt Lake. Kita usab mag-atubang og mga hagit diha sa atong indibidwal nga mga panaw sa atong mga kinabuhi. Kita wala magtulod og mga karomata o magdrayb og tinabonan nga mga karwahe subay sa sakaon nga mga bukid ug agi sa lawom nga mga pundok sa snow; kita naningkamot sama sa ilang gibuhat nga espirituhanong mobuntog sa mga tintasyon ug mga hagit sa atong panahon. Kita adunay mga dalan nga pagalakton; kita adunay mga bungtod—ug usahay mga bukid—nga katkaton. Bisan og ang mga pagsulay karon lahi kay sa niadtong unang mga pioneer, kini mahagiton gihapon alang kanato.
Importante nga mosunod sa propeta ug maningkamot pag-ayo sa pagbuhat sa mga butang nga mogiya nato ngadto sa Dios, sama kaniadto sa unang mga pioneer.
Sundon nato si Jesukristo uban sa hugot nga pagtuo sa matag lakang. Kita kinahanglan nga moserbisyo sa Ginoo ug moserbisyo sa usag usa. Kita kinahanglan nga molig-on sa atong kaugalingon sa espirituhanong paagi pinaagi sa pagtuman ug pagtahod sa atong mga pakigsaad. Kita kinahanglan nga dili mawad-an sa pagbati nga dinalian alang nato ang pagtuman sa mga sugo. Si Satanas naningkamot sa pagpahuyang sa atong pasalig ug sa atong gugma alang sa Dios ug ni Ginoong Jesukristo. Palihog hinumdomi nga kon si bisan kinsa nga mahisalaag sa ilang dalan, kita dili gayod mahisalaag ngadto sa atong Manluluwas. Uban sa mga panalangin sa paghinulsol, kita makabalik ngadto Kaniya. Siya motabang nato nga makat-on, motubo, ug mausab kon kita maningkamot nga magpabilin diha sa dalan sa pakigsaad.
Hinaot nga kita mosunod sa mga lakang ni Jesukristo ug, uban sa hugot nga pagtuo sa atong matag lakang, motutok diha Kaniya, mopalig-on sa atong mga tiil diha sa dalan sa pakigsaad, mao ang akong mapainubsanon nga pag-ampo sa ngalan ni Jesukristo, amen.