Malungtaron nga Pagkadisipulo
Kita makakaplag og espirituhanong pagsalig ug kalinaw kon kita moamuma sa balaan nga mga pamatasan ug matarong nga mga gimbuhaton nga makasustiner ug mopalig-ong sa kalayo sa hugot nga pagtuo.
Atol niining milabay nga summer, kapin sa 200,000 sa atong mga batan-on sa tibuok kalibotan milambo diha sa hugot nga pagtuo sa gatosan ka sesyon sa tibuok semanang komperensiya sa Alang sa Kalig-on sa mga Kabatan-onan, o AKK, nga mga komperensiya. Nakagawas gikan sa pagkahimulag tungod sa pandemya, alang sa kadaghanan bisan ang pagtambong lang usa na ka buhat sa hugot nga pagtuo diha sa Ginoo. Daghan sa batan-ong mga partisipante daw nagsunod og usa ka direksiyon sa mas lawom nga pagkakabig. Sa pagtapos sa ilang semana, ganahan ko mangutana, “Unya, Kumusta man ang komperensiya?”
Sila usahay moingon og sama niini: “Kuan, pagka-Lunes naglagot kaayo ko sa akong mama tungod kay iya gyod ko gipaanhi ug buhaton kini. Ug ako walay kaila bisan kinsa. Ug sa akong hunahuna dili kini para nako. Ug dili ko makabaton og bisan kinsang mga higala. … Apan karon nga Biyernes na, ug ganahan ko nga magpabalin lang dinhi. Gusto ko nga mobati sa Espiritu diha sa akong kinabuhi. Gusto ko nga mabuhi sama niini.”
Matag usa nila adunay kaugalingong ikasugilon bahin sa klaro nga mga higayon ug bahin sa higayon nga mibati sila nga napanalanginan og espirituhanong mga gasa nga nakatampo sa espirituhanong paglambo. Ako usab adunay kausaban niining summer nga AKK tungod kay akong nakita ang walay hunong nga pagtubag sa Espiritu sa Dios ngadto sa matarong nga mga tinguha sa indibidwal nga mga kasingkasing niining daghang batan-on nga nakakaplag og kaisog sa pagsalig Kaniya kinsa nag-amuma kanila sa usa ka semana.
Sama sa sinaw kaayo nga mga barkong puthaw diha sa dagat, kita nagpuyo sa makadaot nga palibot diin gikinahanglan kaayo ang sanag nga mga pagtuo nga mapatunhay o kini mahimong magarasan, dayon matay-an, ug dayon mabungkag.
Unsang Matang sa mga Butang ang Atong Mahimo aron Mapatunhay ang Kalig-on sa Atong mga Pagtuo?
Ang mga kasinatian sama sa mga komperensiya sa AKK, mga camp, mga miting sa sakramento, ug mga misyon makatabang sa pagpalig-on sa atong mga pagpamatuod, modala kanato latas sa espirituhanong paglambo ug sa espirituhanong pagdiskobre ngadto sa mga dapit nga dunay kalinaw. Apan unsa ang kinahanglang buhaton aron kita magpabilin didto ug “mopadayon sa unahan uban ang pagkamakanunayon kang Kristo” (2 Nephi 31:20) kay sa mohuyang ang pagpamatuod? Kita kinahanglan gayod mopadayon sa pagbuhat niadtong mga butang nga nagdala kanato didto una sa tanan, sama sa kanunayng pag-ampo, pagsubsob sa atong kaugalingon sa kasulatan, ug sinsero nga pagserbisyo.
Alang sa uban kanato, kini mahimong nagkinahanglan sa pagpakita og pagsalig diha sa Ginoo bisan sa pagtambong sa miting sa sakramento. Apan sa higayon nga anaa didto, ang makapaalim nga impluwensiya sa sakramento sa Ginoo, dugangan sa mga baroganan sa ebanghelyo, ug sa pag-amuma sa komunidad sa simbahan makatabang kanato nga mouswag sa espiritwalidad.
Diin man Maggikan ang Gahom sa Personal nga Panag-uban sa Pagpundok?
Atol sa AKK, pipila ka gatosan ug sobra pa sa atong kabatan-onan ang mas nakaila sa Manluluwas pinaagi sa paggamit og usa ka yanong pormula sa panag-uban diin duha o sobra pa nila ang nagpundok sa Iyang ngalan (tan-awa sa Mateo 18:20), gilambigit ang ebanghelo ug ang mga kasulatan, magdungan sa pagpanganta, magdungan sa pag-ampo, ug sa pagkaplag og kalinaw diha ni Kristo. Kini usa ka gamhanang paagi sa pagtabang sa mga kabatan-onan nga mobati og espirituhanong paglamdag.
Kining malukpanon nga hut-ong sa kaigsoonan nakapauli na sa ilang panimalay aron sa pagtino kon unsa ang kahulogan sa “pagsalig [gihapon] diha sa Ginoo” (Mga Panultihon 3:5; 2022 nga tema sa kabatan-onan) kon mapalibotan sa dili kapugngan nga kalibotanong impluwensiya. Usa kini ka butang ang “pagpaminaw Kaniya” (Joseph Smith—Kasaysayan 1:17) diha sa hilom nga dapit sa pagpamalandong gamit ang giablihan nga kasulatan. Apan lahi nga butang ang pagpakita sa atong pagkadisipulo kon mapalibotan sa kalibotanong pagkabalda diin kita kinahanglan gayod nga maningkamot sa “pagpaminaw Kaniya,” bisan latas sa hanap nga kahingawa ug nagkahinay nga pagsalig sa kaugalingon. Sa walay pagduha-duha: mao gayod kini ang kinaiya sa mga bayani nga makita sa kabatan-onan kon sila magbaton og lig-on nga determinasyon nga ipadayon ang ilang mga pagpamatuod bisan pa sa nag-usab-usab nga moralidad sa atong panahon.
Unsa ang Mahimo sa mga Pamilya diha sa Panimalay aron Mapalig-on ang Puwersa nga Namugna sa mga Kalihokan sa Simbahan?
Ako sa makausa miserbisyo isip bana ngadto sa presidente sa Young Women sa stake. Usa ka gabii gitahasan ko sa paghan-ay sa cookies diha sa hawanan samtang ang akong asawa nagpahigayon sa usa ka fireside didto sa chapel alang sa mga ginikanan ug sa ilang mga anak nga babaye nga nangandam sa pagtambong og Young Women camp sa sunod semana. Human sa pagpasabot kon asa ug unsa ang dad-on, miingon siya, “Karon, Martes sa buntag inig paghatod ninyo sa inyong buotan nga mga batang babaye diha sa bus, gaksa sila og hugot. Ug kamo mohalok nila aron manamilit—tungod kay sila dili na mobalik.”
Nakadungog ko nga naay nahingangha, dayon nakaamgo nga ako ra diay kadto. “Dili na mobalik?”
Apan siya mipadayon, “Kon inyo nang mahatod kadtong mga batang babaye sa Martes sa buntag, ilang biyaan ang mga pagbalda sa mas gagmayng butang ug mogahin og usa ka semanang mag-uban sa pagkat-on ug paglambo ug pagsalig sa Ginoo. Kami mag-uban sa pag-ampo ug pagpanganta ug pagluto ug pagserbisyo ug mag-uban sa pagpaambit og mga pagpamatuod ug mobuhat sa mga butang nga makatugot kanamo nga mobati sa Espiritu sa Langitnong Amahan, sa tibuok semana, hangtod ang espiritu motuhop og maayo kanila. Ug sa Sabado, ang mga batang babaye nga inyong makita nga manganaog niana nga bus lahi na sa inyong gihatod nianang Martes. Bag-o na sila nga mga linalang. Ug kon kamo motabang nila sa pagpadayon gikan nianang mas taas nga ang-ang, sila mopahingangha kaninyo. Sila mopadayon sa pag-usab ug sa paglambo. Ug mao usab ang inyong pamilya.”
Nianang Sabadoha, sama gayod sa iyang natag-anan. Samtang akong gikarga ang mga tolda, akong nadungog ang tingog sa akong asawa diha sa gamayng amphitheater sa kakahoyan diin ang mga batang babaye nagpundok sa wala pa mamauli. Nadunggan nako siya nga nag-ingon, “Oh, ania ra diay kamo. Kami nagtan-aw kaninyo sa tibuok semana. Among mga batang babaye sa Sabado.”
Ang lig-on nga kabatan-onan sa Zion naglawig sa matahom nga mga panahon. Ang pagkaplag og kalipay dinhi niining kalibotan sa gipanagna nga pagkabalda nga dili moapil niana nga kalibotan, uban sa kamapihigon niini ngadto sa pagkabalaan, mao ang ilang piho nga sugo. Mga gatosan ka tuig ang milabay, si G. K Chesterton namulong nga daw iyang nakita kini nga panaw isip nakasentro sa panimalay ug gisuportahan sa Simbahan sa dihang siya miingon, “Kinahanglan natong mabati ang uniberso dihadiha dayon isip kastilyo sa usa ka dambuhala, nga sulongon, ug sanglit isip atong kaugalingong payag, atong kapaulian sa gabii.” (Orthodoxy [1909], 130).
Salamat nalang, nga sila wala mogawas nga nag-inusara. Sila anaa alang sa usag usa. Ug kamo anaa alang kanila. Ug sila nagsunod sa usa ka buhi nga propeta, si Presidente Russell M. Nelson, nga nangulo gamit ang kahibalo sa pagkapositibo sa usa ka manalagna sa pagpahayag nianang dakong paningkamot niining mga panahona—ang pagpundok sa Israel—mahimong halangdon ug harianon (tan-awa sa “Hope of Israel” [tibuok kalibotan nga debosyonal sa kabatan-onan Hunyo 3, 2018], HopeofIsrael. ChurchofJesusChrist.org).
Niining summer, ang akong asawa, si Kalleen, ug ako mibalhin og gisakyan nga eroplano ngadto sa Amsterdam diin, sa daghang katuigan nga milabay, usa ako ka bag-ong misyonaryo. Human migahin og pila ka bulan nga pagpanglimbasog sa pagkat-on og Dutch, ang among KLM nga flight padulong na sa pagtugpa, ug ang kapitan mihimo og dili masabtan nga pahibalo diha sa PP [Panawagan sa Publiko] nga systema. Human sa usa ka takna sa kahilom, ang akong kompanyon mihunghong “murag Dutch man to.” Nagtinan-away mi, gibasa ang hunahuna sa usag usa: Ang tanan nakalimtan na.
Apan ang tanan wala mawagtang. Samtang naghunahuna ko sa mga buhat nga nagpakita og hugot nga pagtuo nga among nabuhat samtang kami naglakaw niining airport padulong sa among nasinati nga mga milagro isip mga misyonaryo, sa kalit lang nahunong ko sa paghandom sa nanglabay ug nakaamgo nga pabalik nako sa kasamtangan dungan sa usa ka buhi, nagginhawa nga misyonaryo nga nagsakay sa eroplano mopauli na. Siya mipaila sa iyang kaugalingon ug nangutana, “Presidente Lund, unsay akong buhaton karon? Unsay akong buhaton aron magpabilin nga lig-on?”
Nan, mao kini ang samang pangutana nga anaa sa hunahuna sa atong mga batan-on sa dihang sila mobiya sa komperensiya sa AKK, mga kamping sa kabatan-onan, mga pagbiyahe sa templo, ug sa bisan unsang panahon nga sila mobati sa mga gahom sa langit: “Sa unsa paagi nga ang paghigugma sa Dios mahimo nga malungtaron nga pagkadisipulo.”
Ako mibati og nagkadakong gugma alang niining misyonaryo nga nagserbisyo sa kataposang mga oras sa iyang misyon, ug nianang takna sa kahilom sa Espiritu akong nadunggan ang akong tingog nga puno sa pagbati samtang ako yanong miingon, “Dili ka kinahanglan magsul-ob og badge sa pagdala sa Iyang ngalan.”
Gusto nakong ibutang ang akong kamot sa iyang mga abaga ug moingon, “ania ang imong buhaton. Mopauli ka ug kinahanglan lang ka nga ingon niini. Maayo kaayo ka nga murag moamag ka sa ngitngit. Ang imong disiplina sa misyon ug mga sakripisyo nakahimo kanimo nga talagsaon nga anak sa Dios. Padayona sa pagbuhat diha sa panimalay ang unsay gamhanang malamposon dinhi. Nakakat-on ka sa pag-ampo ug kang kinsa ka nag-ampo ug sa pinulongan sa pag-ampo. Nakatuon ka sa Iyang mga pulong ug nakat-on sa paghigugma sa Manluluwas pinaagi sa pagpaningkamot nga mahisama Kaniya. Gimahal nimo ang Langitnong Amahan sama Siya nga nagmahal sa Amahan sa Langit, miserbisyo sa uban sama nga Siya miserbisyo sa uban, ug misunod sa mga sugo sama sa Iyang pagsunod—ug sa dihang wala ka mosunod, ikaw naghinulsol. Ang imong pagkadisipulo dili lang usa ka panultihon diha sa T-shirt—kini nahimong imong kinabuhi nga gihalad alang sa pagserbisyo sa uban. Busa pauli, ug buhata kana. Himoa kana. Dad-a kining espirituhanong puwersa ngadto sa tibuok nimong kinabuhi.”
Ako nasayod nga pinaagi sa pagsalig sa Ginoo nga si Jesukristo ug sa Iyang dalan sa pakigsaad, kita makakaplag og espirituhanong pagsalig ug kalinaw kon kita moamuma sa balaan nga mga pamatasan ug matarong nga mga gimbuhaton nga makasustiner ug mopalig-ong sa kalayo sa hugot nga pagtuo. Hinaot nga kita molihok nga mas maduol ngadto sa mga butang nga makapalig-on sa pagtuo, ug bisan unsay mahitabo, magpabilin. Sa ngalan ni Jesukristo, amen.