Mas Makakita Pa ni Jesukristo diha sa Atong mga Kinabuhi
Ang Manluluwas nagdapit kanato sa pagtan-aw sa atong mga kinabuhi pinaagi Kaniya aron mas makakita pa Kaniya diha sa atong mga kinabuhi.
Mga kaigsoonan, mibati ako og pagkamapainubsanon sa akong pag-atubang kaninyo karong buntaga. Akong gihiusa ang akong kasingkasing uban kaninyo isip pasalamat nga nagkapundok, bisan asa kamo sa kalibotan, aron maminaw sa mga mensahe gikan sa mga propeta, mga apostoles, mga manalagna, ug mga tigpadayag ug mga lider sa gingharian sa Dios. Sa mahulagwayong paagi kita nahisama sa mga tawo sa panahon ni Hari Benjamin, nagtukod sa atong mga tolda ug bukas ang atong mga pultahan ug gitumong ngadto sa propeta sa Diyos dinhi sa yuta,1 si Presidente Russell M. Nelson.
Ako adunay dili maayo nga panan-aw sa mga mata sukad sa akong mahinumdoman ug kanunay nga nanginahanglan sa tabang sa antipara nga gi-reseta aron makorihian ang akong panan-aw. Sa pagbuka nako sa akong mga mata kada buntag, ang kalibotan morag makalibog kaayo. Ang tanan dili maklaro, naggrano-grano, ug naghiwi. Bisan ang akong minahal nga bana morag mas parehas sa abstract nga hulagway kon tan-awon kay sa ang gihigugma pag-ayo ug makahupay nga tawo nga mao gayod siya! Ang akong awtomatik dayon nga buhaton, sa dili pa ako mobuhat og bisan unsa sa pagsugod sa akong adlaw, mao ang pagkab-ot sa akong antipara aron matabangan ako nga masabtan ang akong mga palibot ug makatagamtam og usa ka mas madasigon nga kasinatian samtang kini nagtabang kanako sa paglihok-lihok sa tibuok nakong adlaw.
Sulod sa mga katuigan, akong naamgohan nga kini nga kinaiya naghulagway sa akong adlaw-adlaw nga pagsalig sa duha ka butang: una, usa ka himan nga makatabang kanako aron makaklaro, makapokus, ug makakita sa kalibotan sa unsa gayod kini; ug ikaduha, usa ka panginahanglan alang sa mahikap nga giya aron padayon nga magtudlo kanako sa husto nga direksiyon. Kining yano, nagbalik-balik nga buhat nagpaila kanako og usa ka mahinungdanon nga obserbasyon mahitungod sa atong relasyon sa atong Manluluwas, si Jesukristo.
Sa atong mga kinabuhi nga sa kasagaran puno sa mga pangutana, mga kabalaka, mga pagpamugos, ug mga oportunidad, ang gugma sa atong Manluluwas alang kanato sa tinagsa ug isip Iyang mga anak sa pakigsaad, uban sa Iyang mga pagtulon-an ug mga balaod nga anaa matag adlaw nga mga kapanguhaan nga atong masaligan nga mahimong “kahayag nga nagdan-ag, … naglamdag sa [atong] mga mata [ug] nakapadugang sa [atong] mga salabotan.”2 Samtang kita magtinguha sa mga panalangin sa Espiritu sa atong mga kinabuhi, kita makahimo, sama sa gitudlo ni Jacob, nga makakita sa “mga butang ingon nga sila gayod mao, ug … nga sila gayod mahimo unya.”3
Isip mga anak sa Dios sa pakigsaad, kita talagsaon nga napanalanginan og daghang suplay sa balaang gitudlo nga mga himan aron mapalambo ang atong espirituhanong panan-aw. Ang mga pulong ug mga pagtulon-an ni Jesukristo nga natala diha sa kasulatan ug mga mensahe gikan sa Iyang pinili nga mga propeta ug ang Iyang Espiritu nga nadawat pinaagi sa inadlaw nga pag-ampo, regular nga pagtambong sa templo, ug pinaagi sa sinemana nga ordinansa sa sakramento makatabang sa pagpahiuli sa kalinaw ug makahatag sa gikinahanglan nga gasa sa pag-ila nga nagdala sa kahayag ni Kristo ug sa Iyang panabot ngadto sa mga pribado nga mga hunahuna o mga aksiyon sa atong kinabuhi ug diha sa kalibotan nga tingali madag-omon. Ang Manluluwas mahimo usab nga atong kompas ug atong piloto samtang kita naglawig agi sa kalma ug sa gubot nga mga tubig sa kinabuhi. Siya makahimo sa yano nga paagi sa husto nga dalan nga modala kanato ngadto sa atong mahangtoron nga destinasyon. Busa unsa man ang Iyang gusto nga atong makita, ug asa Siya gusto nga kita moadto?
Ang atong minahal nga propeta mitudlo nga “lig-on kitang nakatutok sa Manluluwas ug sa Iyang ebanghelyo” ug kita “[ma]ningkamot sa pangisip nga motan-aw Kaniya sa matag hunahuna.”4 Si Presidente Nelson misaad usab nga “walay samang paagi sa pagdapit sa Espiritu kay sa inyong makanunayong pagtutok kang Jesukristo. … Siya ang mangulo ug moggiya kaninyo sa inyong personal nga kinabuhi kon kamo mogahin og panahon alang Kaniya diha sa inyong kinabuhi––matag adlaw.”5 Mga higala, si Jesukristo mao ang katuyoan sa atong pagtutok ug ang tumong sa atong destinasyon. Aron sa pagtabang kanato nga magpabiling lig-on ug magpadulong diha sa hustong direksiyon, ang Manluluwas nagdapit kanato sa pagtan-aw sa atong mga kinabuhi pinaagi Kaniya aron mas makakita pa Kaniya diha sa atong mga kinabuhi. Ako nakakat-on og dugang mahitungod niining piho nga pagdapit pinaagi sa akong pagtuon sa Daang Tugon.
Ang balaod ni Moises gihatag ngadto sa unang mga Israelita isip usa ka pagpangandam nga ebanghelyo, gidisenyo aron maandam ang mga tawo alang sa mas taas nga pakigsaad nga relasyon uban sa Dios pinaagi ni Jesukristo.6 Ang balaod, nga puno sa simbolismo nagpunting sa mga tumutuo sa “[pag]lantaw sa pag-anhi” ug sa Pag-ula ni Jesukristo,7 gituyo aron sa pagtabang sa mga katawhan sa Israel nga makatutok sa Manluluwas pinaagi sa paggamit sa hugot nga pagtuo diha Kaniya, sa Iyang sakripisyo, ug sa Iyang mga balaod ug mga sugo sa ilang mga kinabuhi8—nga ang tumong mao ang pagdala kanila ngadto sa mas dako nga panabot sa ilang Manunubos.
Sama kanato karon, ang karaang katawhan sa Dios gidapit sa pagtan-aw sa ilang mga kinabuhi pinaagi Kaniya aron mas makakita pa Kaniya diha sa ilang mga kinabuhi. Apan sa panahon sa pagpangalagad sa Manluluwas, ang mga Israelita nakalimot ni Kristo diha sa ilang mga pagsaulog, nagsalikway Kaniya ug midugang sa mga ritwal ug mga balaod og dili awtorisado nga mga buhat nga walay ikatudlo nga simbolo nga nagpunting ngadto sa tinuod ug bugtong tinubdan sa ilang kaluwasan ug katubsanan—si Jesukristo.9
Ang adlaw-adlaw nga kalibotan sa mga Israelita nahimong libog ug hanap. Ang mga anak sa Israel, niini nga kondisyon, mituo nga ang mga buhat ug mga ritwal sa balaod mao ang dalan ngadto sa personal nga kaluwasan ug sa laing bahin mipakunhod sa balaod ni Moises ngadto sa usa ka hugpong sa mga protokol nga gipahigayon sa pagmando sa kinabuhing sibilyan.10 Gikinahanglan niini ang Manluluwas aron mapahiuli sa pagtutok ug pagpatin-aw sa Iyang ebanghelyo.
Sa kataposan usa ka dako nga bahin sa mga Israelita misalikway sa Iyang mensahe, gani miabot pa sa punto ang pag-akusar sa Manluluwas—Siya kinsa mihatag sa balaod ug mideklarar nga Siya mao “ang balaod, ug ang kahayag”11—sa paglapas niini. Apan si Jesus sa Iyang Wali sa Bukid, namulong sa balaod ni Moises, mipahayag, “Ayaw paghunahuna nga mianhi ako sa pagbungkag sa balaod, o sa mga propeta: wala ako mianhi sa pagbungkag, kondili sa pagtuman.”12 Dayon ang Manluluwas, pinaagi sa Iyang walay kataposan nga Pag-ula, mitapos sa mga lagda, mga regulasyon, ug seremonyal nga mga buhat nga gisunod sa katawhan sa Israel nianang panahona. Ang Iyang kataposang sakripisyo miusab gikan sa halad nga sinunog ngadto sa atong paghalad sa “usa ka masulub-on nga kasingkasing ug usa ka mahinulsolon nga espiritu,”13 gikan sa ordinansa sa sakripisyo ngadto sa ordinansa sa sakramento.
Si Presidente M. Russell Ballard, nagtudlo bahin sa hilisgotan, miingon, “Sa usa ka pagsabot, ang sakripisyo nausab gikan sa halad ngadto sa nagtanyag.”14 Kon kita modala sa atong halad ngadto sa Manluluwas, kita gidapit aron mas makakita pa ni Jesukristo diha sa atong mga kinabuhi, samtang kita mapainubsanong motugyan sa atong kabubut-on ngadto Kaniya agig pag-ila ug pagsabot sa Iyang hingpit nga pagtugyan ngadto sa kabubut-on sa Amahan. Kon atong ipunting ang atong panan-aw kang Jesukristo, atong mailhan ug atong masabtan nga Siya lamang ang tinubdan ug paagi aron makadawat og kapasayloan ug katubsanan, gani ngadto sa kinabuhing dayon ug kahimayaan.
Isip sumusunod sa ebanghelyo sa una pa, nakasugat ko og daghan kinsa nakaobserbar ug nakamatikod sa mga kausaban sa akong mga kinaiya, mga binuhatan, ug mga pagpili human ko nagpasakop sa Simbahan. Sila nakuryoso sa “ngano” sa ilang nakita—nganong akong gipili nga magpabunyag ug moapil niini nga kongregasyon sa mga tumutuo, gani Ang Simbahan ni Jesukristo sa mga Santos sa Ulahing mga Adlaw, nganong naglikay ko sa pipila ka buhat atol sa Igpapahulay, nganong matinud-anon ko sa pagtuman sa Pulong sa Kaalam, nganong nagbasa ko sa Basahon ni Mormon, nganong motuo ko ug molakip sa mga pagtulon-an sa mga propeta sa modernong panahon ug apostoles diha sa akong kinabuhi, nganong motambong ko sa sinemana nga mga miting sa Simbahan, nganong dapiton nako ang uban nga “moduol ug motan-aw, moduol ug motabang, … moduol ug magpabilin,”15 ug “moduol ug [mag]pasakop.”16
Niadtong mga panahona, kadto nga mga pangutana mabati nga hilabihan ka bug-at ug, sa dayag, usahay pagpasangil. Apan samtang ako nanlimbasog sa pagsusi sa mga tawo, akong naamgohan nga ang ilang pagsusi mao, sa pagkatinuod, ang akong unang pagdapit sa pagkuha ug pagsul-ob og usa ka paresan sa espirituwal nga antipara aron sa pagklaro, pagtutok, ug pagpalig-on kon unsay nakapadasig sa akong pagsunod sa mga buluhaton ug mga sumbanan sa ebanghelyo. Unsa ang tinubdan sa akong pagpamatuod? Ako naghimo lang ba og “mga pasundayag sa gawas” nga wala tugoti kadtong mga buhat nga konektado sa mga balaod sa Dios sa “paglig-on sa [akong] hugot nga pagtuo kang Kristo,”17 o pagpakita og pagsabot nga si Jesukristo mao lamang ang tinubdan sa gahom diha sa akong mga pagsunod?
Pinaagi sa hugot nga paningkamot sa pagtan-aw ngadto ug alang kang Jesukristo diha sa akong matag hunahuna ug buhat, ang akong mga mata nalamdagan, ug ang akong panabot nadasig sa pag-ila nga si Jesukristo nagtawag kanako sa “pagduol ngadto Kaniya.”18 Gikan niining sayo nga panahon sa pagkadisipulo sa akong pagkakabatan-on, akong mahinumdoman ang usa ka pagdapit nga gihatag kanako sa mga misyonaryo sa pag-apil kanila samtang sila nagtudlo sa ebanghelyo ngadto sa usa ka grupo sa mga batan-ong babaye nga mga kaedad nako. Usa ka gabii, naglingkod diha sa panimalay sa pamilya sa usa niining batan-ong mga babaye, ang ilang malumo nga pangutana kon nganong mituo ko nakapatandog sa akong kasingkasing, ug mitugot kanako sa pagpamatuod ngadto kanila uban sa mas lawom nga pagsabot sa panan-awon sa Ginoo mahitungod sa espirituhanong mga kadasig sa akong pagkadisipulo, ug milunsay sa akong pagpamatuod sukad niadto.
Akong nakat-onan niadto, sama sa akong nahibaloan karon, nga ang atong Manluluwas, si Jesukristo, nagtultol sa atong mga tiil ngadto sa mga balay tigomanan kada semana sa pag-ambit sa Iyang sakramento, ngadto sa balay sa Ginoo sa paghimo og mga pakigsaad uban Kaniya, ngadto sa mga kasulatan ug mga pagtulon-an sa mga propeta aron makat-onan ang Iyang mga pulong. Siya naggiya sa atong mga ba-ba sa pagpamatuod Kaniya, ang atong mga kamot sa pagtabang ug pagserbisyo sama sa Iyang pagtabang ug pagserbisyo, ang atong mga mata sa pagtan-aw sa kalibotan ug sa usag usa sama sa Iyang pagtan-aw—“ingon nga sila gayod mao, ug … ingon nga sila gayod mahimo unya.”19 Ug samtang kita motugot Kaniya sa paggiya kanato sa tanang mga butang, kita makadawat og pagpamatuod nga “ang tanan nga mga butang nagpakita nga adunay [usa ka] Dios,”20 tungod kay kon kita mangita Kaniya kita makakaplag Kaniya21—matag adlaw. Niini ako mopamatuod diha sa sagradong ngalan ni Jesukristo, amen.