Makabuhat Kita og Lisod nga mga Butang pinaagi Kaniya
Kita molambo sa atong pagkadisipulo kon kita mopakita sa atong hugot nga pagtuo diha sa Ginoo atol sa lisod nga mga panahon.
Atol sa pangalagad sa Manluluwas dinhi sa yuta, Siya nakamatikod og usa ka tawo nga buta. Ang mga disipulo ni Jesus nangutana, “Magtutudlo, kinsa may nakasala nga natawo man siyang buta? Siya ba o ang iyang mga ginikanan?”
Ang sigurado, mahigugmaon, ug sinsero nga tubag sa Manluluwas nagahatag nato og kasiguroan nga Siya naghunahuna sa atong mga pakigbisog: “Ang iyang pagkabuta dili tungod sa iyang mga sala o sa mga sala sa iyang mga ginikanan. Siya natawong buta aron ang gahom sa Dios ikapadayag diha kaniya.”1
Samtang ang ubang mga hagit moabot tungod sa atong tinuyo nga pagsupak, kita nahibalo nga daghang hagit sa kinabuhi moabot tungod sa ubang mga rason. Bisan unsa pa man ang hinungdan sa atong mga hagit, kini makahatag og nindot nga oportunidad sa paglambo.
Ang among pamilya wala makalingkawas sa mga kalisdanan sa kinabuhi. Sa nagtubo pa, ganahan ko sa dakong mga pamilya. Ang ingon nga mga pamilya nindot para nako, labi na sa dihang akong nakaplagan ang Simbahan sa tin-edyer pa ako pinaagi sa akong uyoan nga magulang sa akong inahan, si Sarfo, ug ang iyang asawa didto sa Takoradi, Ghana.
Sa dihang si Hannah ug ako nagminyo, gusto namong tumanon ang among patriyarkal nga mga panalangin, nga nag-ingon nga kami panalanginan og daghang mga anak. Apan, sa wala pa matawo ang among ikatulong anak nga lalaki, ang medikal nga mga propesyonal mipahibalo nga si Hannah dili na pwedeng manganak. Salamat na lang, bisan kon si Kenneth gipanganak nga anaa sa sitwasyon nga siya ug ang iyang inahan duhaduhaan nga mabuhi, siya luwas nga natawo, ug ang iyang inahan naulian ra. Nagsugod siya og apil sa among kinabuhi sa pamilya—lakip na sa pagtambong sa Simbahan, inadlaw nga mga pag-ampo sa pamilya, pagtuon sa kasulatan, home evening, ug nindot nga makalingaw nga mga kalihokan.
Bisan kon kinahanglan namong usbon ang among gidahoman bahin sa dakong pamilya, makapalipay ang pagtuman sa mga pagtulon-an gikan sa “Ang Pamilya: Usa ka Pamahayag ngadto sa Kalibotan” ngadto sa among tulo ka pinangga nga mga anak. Ang pagsunod niana nga mga pagtulon-an nakadugang og dakong kahulogan sa akong naglambo nga hugot nga pagtuo.
Sama sa giingon diha sa pamahayag: “Ang kaminyoon tali sa lalaki ug babaye mahinungdanon ngadto sa Iyang walay kataposan nga plano. Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahod sa mga panaad sa kaminyoon uban sa hingpit nga pagkamaunongon.”2 Samtang among gituman kini nga mga pagtulon-an, kami napanalanginan.
Apan, usa ka kataposan sa semana atol sa akong pagserbisyo isip presidente sa stake, nasinati namo ang tingali labing lisod nga pagsulay nga atubangon sa ginikanan. Ang among pamilya mipauli gikan sa usa ka kalihokan sa Simbahan ug nagtapok alang sa paniudto. Dayon ang among tulo ka anak nga lalaki migawas aron magdula sulod sa among compound.
Ang akong asawa mibati og balik-balik nga impresyon nga adunay dili maayo nga mahitabo. Siya mihangyo nako nga ipasusi ang mga bata samtang nanghugas kami sa mga hugasanan. Gibati nako nga luwas ra sila kay madungog ra namo ang ilang mga tingog nga nalingaw kaayo sa ilang pagdula.
Sa dihang gisusi na namong duha ang among mga anak, sa among kadismaya, among nakit-an ang 18 ka bulan nga si Kenneth nga wala na maglihok sulod sa balde sa tubig, wala makit-i sa iyang mga igsoon. Gidali namo siya og dala sa ospital, apan ang tanang paningkamot sa pagluwas niya walay kapuslanan.
Kami nasagmuyo nga wala na kami oportunidad sa pagpadako sa among pinangga nga anak atol niining mortal nga kinabuhi. Bisan kon nahibalo kami nga si Kenneth mahimong kabahin sa among pamilya sa kahangtoran, akong nakaplagan ang akong kaugalingon nga nangutana kon ngano nga ang Dios mitugot nga kini nga trahedya mahitabo nako nga gibuhat man unta nako tanan kutob sa akong mahimo aron motuman sa akong calling. Mao pa lang ang pag-abot nako sa balay gikan sa pagtuman sa usa sa akong mga katungdanan sa pagpangalagad sa mga Santos. Nganong wala man makakita ang Dios sa akong pagserbisyo ug moluwas sa akong anak ug sa akong pamilya gikan niini nga trahedya? Kon magsige ko og hunahuna niini, mas nagmagul-anon ko.
Ang akong asawa wala gayod momahay nako nga wala moresponde sa iyang mga pag-aghat, apan nakakat-on ko og makapausab sa kinabuhi nga leksiyon ug mihimo og duha ka lagda, nga dili gayod pakyason:
Lagda 1: Maminaw ug mopatalinghog sa mga pag-aghat sa imong asawa.
Lagda 2: Kon ikaw dili sigurado sa bisan unsa nga rason, adto sa numero 1 nga lagda.
Bisan kon ang kasinatian sakit kaayo ug padayon kami nga nagbangotan, ang among labihan kabug-at nga palas-anon sa kaulahian migaan.3 Ang akong asawa ug ako nakakat-on og piho nga mga leksiyon gikan sa unsay nawala kanamo. Kami mibati nga gihiusa ug gibugkos sa among mga pakigsaad sa templo; kami nahibalo nga among maangkon si Kenneth isip amoa didto sa sunod nga kalibotan tungod kay natawo siya sa pakigsaad. Kami nakabaton usab og kasinatian nga mahinungdanon sa pagpangalagad sa uban ug pagbati sa ilang kasakit. Ako mopamatuod nga ang among kaguol nawagtang samtang kami mipakita sa among hugot nga pagtuo diha sa Ginoo. Ang among kasinatian padayon nga lisod, apan kami nakakat-on uban ni Apostol Pablo nga kami “may kalig-on sa pagsagubang sa tanan tungod sa [gahom nga gihatag kanamo] ni Kristo” kon kami motutok Kaniya.4
Si Presidente Russell M. Nelson mitudlo, “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.” Siya mipadayon sa pag-ingon, “Ang kalipay moabot gikan ug tungod Kaniya.”5
Kita mahimong magmalipayon ug mapuno sa kalinaw diha sa lisod nga mga panahon. Ang gugma nga atong gibati tungod sa Manluluwas ug sa Iyang Pag-ula mahimong usa ka gamhanang kapanguhaan nato diha sa panahon sa atong mga pagsulay. “Ang tanan nga dili makiangayon [ug lisod] kabahin sa kinabuhi mahimong mapahusto pinaagi sa Pag-ula ni Jesukristo.”6 Siya mimando, “Paantoson kamo sa kalibotan apan ayaw kahadlok kay nabuntog ko na ang kalibotan.”7 Siya makatabang nato nga makalahutay sa bisan unsa nga kasakit, balatian, ug mga pagsulay nga atong giatubang sa mortalidad.
Kita makakaplag og daghang sugilanon sa kasulatan bahin sa banggiitan ug halangdon nga mga lider, sama nila ni Jeremias, Job, Joseph Smith, ug Nephi, kinsa wala makalingkawas gikan sa mga pakigbisog ug mga hagit sa mortalidad. Sila mga mortal kinsa nakakat-on sa pagsunod sa Ginoo bisan diha sa lisod nga mga kahimtang.8
Atol sa lisod nga mga adlaw didto sa Bilanggoan sa Liberty, si Joseph Smith nangamuyo: “O Dios, hain ba ikaw? Ug hain ang imong gambalay nga nagsalipod sa imong tagoanan?”9 Ang Ginoo mitudlo ni Joseph nga “molahutay pag-ayo”10 ug misaad nga kon mahimo niya kini, kining tanan nga mga butang makahatag niya og kasinatian ug alang sa iyang kaayohan.11
Namalandong sa akong kaugalingong mga kasinatian, ako nakaamgo nga akong nakat-onan ang pipila sa labing maayo nako nga mga leksiyon atol sa labing lisod nga mga panahon sa akong kinabuhi, mga panahon diin ako nakasinati og mga butang nga wala pa nako masinati. Ang mga kalisdanan nga akong gisagubang isip usa ka batan-on, samtang nagkat-on bahin sa Simbahan pinaagi sa seminary, isip usa ka bag-ong kinabig, ug isip usa ka full-time nga misyonaryo ug sa mga hagit nga akong giatubang sa akong edukasyon, sa akong paningkamot sa pagtuman sa akong mga calling, ug sa pag-atiman og usa ka pamilya ang nag-andam nako alang sa umaabot. Kon ako mas malipayon nga motubag sa lisod nga mga kahimtang uban sa hugot nga pagtuo diha sa Ginoo, ako mas molambo sa akong pagkadisipulo.
Ang lisod nga mga butang sa atong kinabuhi dili ikatingala nga moabot sa higayon nga kita nakasulod sa higpit ug pig-ot nga dalan.12 Si Jesukristo nakakat-on sa “pagkamasinugtanon pinaagi sa Iyang mga pag-antos.”13 Kon kita mosunod Kaniya, labi na diha sa atong lisod nga mga panahon, kita molambo nga mas mahimong sama Kaniya.
Usa sa mga pakigsaad nga atong gihimo uban sa Ginoo didto sa templo mao ang pagsunod sa balaod sa sakripisyo. Ang sakripisyo kanunay nga kabahin sa ebanghelyo ni Jesukristo. Kini usa ka pagpahinumdom sa mahinungdanong sakripisyo sa pag-ula ni Jesukristo alang sa tanan kinsa nabuhi ug mabuhi pa dinhi sa yuta.
Ako nasayod nga ang Ginoo sa kanunay mobugti sa atong matarong nga mga tinguha. Nahinumdom ba mo sa daghang mga anak nga gisaad kanako diha sa akong patriyarkal nga panalangin? Kana nga panalangin natuman. Ang akong asawa ug ako nakaserbisyo uban sa pipila ka gatos nga mga misyonaryo, gikan sa sobra sa 25 ka nasod, didto sa Ghana Cape Coast Mission. Sila ingon ka pinangga namo sama gayod sa among tinuod nga mga anak.
Ako mopamatuod nga kita molambo sa atong pagkadisipulo kon kita mopakita sa atong hugot nga pagtuo diha sa Ginoo atol sa lisod nga mga panahon. Kon kita mobuhat niini, Siya maluloy-on nga molig-on nato ug motabang nato sa pagpas-an sa atong mga palas-anon. Sa ngalan ni Jesukristo, amen.