Malipayon ug Hangtod sa Hangtod
Ang tinuod, molahutay nga kalipay ug walay kataposang pakig-uban sa atong mga minahal mao gayod ang tuyo sa plano sa Dios sa kalipay.
Mga higala, minahal nga kaigsoonan, nahinumdom ba mo nga mituo, o gustong motuo, sa nagmalipayon hangtod sa hangtod?
Dayon ania ang kinabuhi. Kita “mitubo.” Ang mga relasyon nagkakomplikado. Ang kalibotan alingugngog, naghuot, mapugsanon, puno sa pagpakaaron-ingnon ug makalibog. Hinoon, sa atong kinadak-ang tinguha,”1 kita mituo, o gustong motuo, bisan asa, sa bisan unsa nga paagi, nga ang malipayon ug hangtod sa hangtod tinuod ug posible.
Ang “malipayon ug hangtod sa hangtod” dili lang butang nga inyong mabasa sa mga sugilanon. Ang tinuod, molahutay nga kalipay ug walay kataposang pakig-uban sa atong mga minahal mao gayod ang tuyo sa plano sa Dios sa kalipay. Ang iyang mapinanggaong giandam nga paagi makahimo sa atong mahangtoron nga panaw nga malipayon ug hangtod sa hangtod.
Kita dunay daghan nga angayng saulogon ug angayng pasalamatan. Apan walay usa nato nga hingpit, wala, bisan kinsa nga pamilya. Ang atong mga relasyon naglakip og gugma, pagpakig-uban, ug kinaiya apan kasagaran usab panagsungi, pagsinakitay, usahay sa labihang kasakit.
“Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.”2 Ang pagpakabuhi diha kang Jesukristo naglakip sa pagka-imortal—Iyang gasa sa atong pisikal nga pagkabanhaw. Kon kita magpakabuhi uban sa hugot nga pagtuo ug kamasulundon, ang pagpakabuhi diha kang Kristo maglakip usab og puno sa kamaya nga kinabuhing dayon uban sa Dios ug niadtong atong mga gihigugma.
Sa talagsaong paagi, ang propeta sa Ginoo nagdala nato paduol sa atong Manluluwas, lakip na pinaagi sa sagradong mga ordinansa ug mga pakigsaad sa templo nga nagpaduol kanato sa mas daghang dapit. Kita adunay dako kaayong oportunidad ug gasa sa pagdiskobre og bag-ong espirituwal nga panabot, gugma, paghinulsol, ug pagpasaylo sa usag usa ug sa atong mga pamilya, niini nga panahon ug sa kahangtoran.
Uban sa pagtugot, akong ipaambit ang talagsaong direkta nga espirituhanong mga kasinatian nga gisulti sa akong mga higala mahitungod ni Jesukristo nga nagpundok sa mga pamilya pinaagi sa pagkaayo bisan pa sa mga panagsungi sulod sa mga henerasyon.3 “Walay kinutoban ug walay kataposan,”4 “labaw pa [ka]lig-on kay sa mga higot sa kamatayon,”5 ang Pag-ula ni Jesukristo makatabang nato nga makadala og kalinaw sa atong kagahapon ug paglaom sa atong kaugmaon.
Dihang sila mipasakop sa Ang Simbahan ni Jesukristo sa mga Santos sa Ulahing mga Adlaw, ang akong higala ug ang iyang bana puno sa kamaya nga nakahibalo nga ang mga relasyon sa pamilya dili angay nga “magkabulag human sa kamatayon.” Sa balay sa Ginoo, ang mga pamilya mahiusa (masilyo) sa kahangtoran.
Apan ang akong higala dili gustong masilyo sa iyang amahan. “Dili siya maayong bana sa akong mama. Dili siya maayong papa sa iyang mga anak,” miingon siya. “Ang akong papa angay lang nga maghulat. Wala koy tinguha nga mohimo niini nga buhat sa templo ug masilyo kaniya sa kahangtoran.”
Sulod sa usa ka tuig, nagpuasa siya, nag-ampo, nakigsulti sa daghang higayon sa Ginoo bahin sa iyang amahan. Sa kataposan, andam na siya. Ang buhat sa templo alang sa iyang amahan nakompleto. Wala madugay, miingon siya, “Dihang natulog ko ang akong papa mipakita nako sa damgo, nagsinina og lubos puti. Siya nausab na. Siya miingon, ‘Tan-awa ko. Ako nalimpiyo na. Salamat sa paghimo sa buluhaton para nako sa templo.’” Ang iyang papa midugang, “Bangon ug balik sa templo, ang imong igsoon nga lalaki naghulat nga mabunyagan.”
Ang akong higala miingon, “Ang akong mga katigulangan ug tanan nga patay na mahinamon nga naghulat nga mahuman ang buluhaton alang nila.”
“Alang nako,” miingon siya, “ang templo mao ang dapit sa pagpaayo, pagkat-on, ug pagdawat sa Pag-ula ni Jesukristo.”
Ikaduhang kasinatian. Laing higala ang makugihong misiksik sa iyang family history. Gusto niyang mailhan ang iyang apohan sa tuhod.
Usa ka sayo sa buntag, ang akong higala miingon nga gibati niya ang espirituwal nga presensya sa usa ka tawo sa iyang kwarto. Ang maong tawo gustong mahibaloan ug mailhan sa iyang pamilya. Ang maong tawo mibati og pagmahay sa sayop nga iyang nahimo nga karon iya nang nahinulsolan. Ang tawo mitabang sa akong higala aron mahibalo nga ang akong higala walay koneksyon sa DNA sa tawo nga abi sa akong higala mao ang iyang apohan sa tuhod. “Sa laing pagkasulti,” ang akong higala miingon nga, “akong nadiskobrehan ang akong apohan sa tuhod ug nahibaloan nga dili diay siya ang tawo nga giingon sa rekord sa among pamilya nga maoy among apohan sa tuhod.”
Ang iyang relasyon sa pamilya naklaro na, miingon ang akong higala, “Gawasnon na ko, og malinawon. Lahi ra gyod kon masayran kinsa ang akong mga kapamilya.” Ang akong higala naghunahuna, “ang baliko nga sanga wala magpasabot nga ang kahoy daotan. Kon sa unsang paagi kita mianhi sa kalibotan dili kaayo importante kay sa kinsa kita kon kita mobiya na niini.”
Ang balaan nga mga kasulatan ug sagradong mga kasinatian bahin sa personal nga pagkaayo ug kalinaw, lakip niadtong tua buhi sa kalibotan sa espiritu, mihatag og gibug-aton sa lima ka doktrinal nga mga baroganan.
Una: Ang mahinungdanon sa plano sa Dios sa katubsanan ug kalipay, si Jesukristo, pinaagi sa Iyang Pag-ula, misaad nga hiusahon ang atong espiritu ug lawas, “dili na gayod [magbulag] pag-usab, [aron kita] makadawat og usa ka kahingpitan sa kalipay.”6
Ikaduha: Ang Pag-ula—pagka-usa diha kang Kristo—moabot samtang kita mogamit og hugot nga pagtuo ug magdala og bunga ngadto sa paghinulsol.7 Sama dinhi sa mortalidad, mao usab sa imortalidad. Ang mga ordinansa sa templo dili mismo ang mousab kanato o niadtong anaa sa kalibotan sa espiritu. Apan kining balaan nga mga ordinansa makahimo sa pagbalaan sa mga pakigsaad uban sa Ginoo, nga makadala og panag-uyon uban Niya ug sa usag usa.
Ang atong kalipay mahingpit samtang kita mobati sa grasya ni Jesukristo ug kapasayloan alang kanato. Ug samtang kita motanyag sa milagro sa Iyang grasya ug kapasayloan sa usag usa, ang kalooy nga atong madawat ug ang kalooy nga atong itanyag makatabang sa mga walay kaangayan sa kinabuhi nga mahimong makiangayon.8
Ikatulo: Ang Dios nakaila ug nahigugma kanato sa hingpit. “Ang Dios dili mabiaybiay,”9 ni Siya malingla. Uban sa hingpit nga kalooy ug kaangayan, Iyang gakson sa Iyang mga bukton sa kasiguroan ang mapaubsanon ug mahinulsolon.
Sa Templo sa Kirtland, nakita ni Propeta Joseph Smith sa panan-awon ang iyang igsoon nga si Alvin nga naluwas sa celestial nga gingharian. Si propeta Joseph nahibulong, tungod kay si Alvin namatay sa wala pa makadawat sa makaluwas nga ordinansa sa bunyag.10 Sa makahupay nga paagi, ang Ginoo “mipasabot ngano: Ang Ginoo “mohukom [kanato] sumala sa [atong] mga buhat, sumala sa tinguha sa [atong] mga kasingkasing.”11 Ang atong mga kalag mopamatuod sa atong mga buhat ug mga tinguha.
Sa mapasalamatong paagi, kita nasayod nga ang buhi ug “ang mga patay kinsa maghinulsol mahimo nga matubos, pinaagi sa pagkamasulundon ngadto sa mga ordinansa sa balay sa Dios”12 ug sa Pag-ula ni Kristo. Didto sa kalibotan sa espiritu, bisan kadtong adunay sala ug kalapasan may oportunidad nga makahinulsol.13
Sa sukwahi, kadtong tuyo nga mipili og daotan, kinsa mituyo sa paglangay sa paghinulsol, o kinsa sa bisan unsang giplanohan nang daan o tinuyo nga paagi misupak sa mga sugo, nga nagplano og sayon nga paghinulsol, pagahukman sa Dios ug sa usa ka “matin-aw nga panumdoman sa tanan nga [ilang] kasaypanan.”14 Dili mahimo nga kita nasayod sa atong sala pagka-Sabado, dayon maglaom og dihadiha nga kapasayloan pinaagi sa pag-ambit sa sakramento inigka-Dominggo. Ngadto sa mga misyonaryo o sa uban kinsa moingon nga ang pagsunod sa Espiritu nagpasabot sa dili pagtuman sa mga sumbanan sa misyon o sa mga sugo, palihog hinumdomi nga ang pagsunod sa mga sumbanan sa misyon ug sa mga sugo magdapit sa Espiritu. Kita dili gayod molangay sa atong paghinulsol. Ang mga panalangin sa paghinulsol magsugod samtang kita magsugod sa paghinulsol.
Ikaupat: Ang Ginoo mihatag nato og balaang oportunidad nga mas mahisama Kaniya samtang kita motanyag nga mo-proxy sa makaluwas nga mga ordinansa sa templo nga gikinahanglan sa uban apan dili makahimo nga sila mismo. Mas makompleto kita ug mahingpit15 samtang kita mahimo nga mga “manluluwas … sa bukid sa Zion.”16 Samtang kita moserbisyo sa uban, ang Balaang Espiritu sa Saad momatuod sa mga ordinansa ug mobalaan sa naghatag ug sa nagdawat. Ang naghatag ug ang nagdawat makahimo ug makapalig-on sa makapausab nga mga pakigsaad, sa kadugayan makadawat sa mga panalangin nga gisaad kang Abraham, Isaac, ug ni Jacob.
Sa kataposan, ikalima: Sama sa gitudlo sa Bulawanong Lagda17 nga kita kinahanglan nga mopasaylo sa uban sama sa atong panghinaot nga kita usab mapasaylo nagdapit sa matag usa sa pagtanyag ngadto sa uban sa unsay atong gikinahanglan mismo ug gitinguha.
Usahay ang atong kaandam nga mopasaylo og tawo maghimo nila ug nato sa pagtuo nga kita makahinulsol ug mapasaylo. Usahay ang kaandam nga maghinulsol ug ang katakos nga mopasaylo moabot sa managlahing panahon. Ang atong Manluluwas maoy atong Tigpataliwala ngadto sa Dios, apan Siya usab nagtabang nato nga makaila sa atong kaugalingon ug sa usag usa samtang kita moduol Kaniya. Ilabi na kon ang kasakit ug kahapdos lawom, ang pagpaalim sa atong mga relasyon ug pag-ayo sa atong mga kasingkasing lisod, tingali imposible kanato kon kita ra ang mohimo. Apan ang langit makahatag nato ug kalig-on ug kaalam lapas sa atong kaugalingon aron masayod hangtod kanus-a nato pugngan, ug kanus-a nato buhian.
Mas minos ang atong pag-inusara kon kita makaamgo nga kita wala mag-inusara. Ang atong Manluluwas kanunay nga makasabot.18 Pinaagi sa tabang sa atong Manluluwas, pwede natong itugyan ang atong garbo, atong mga kasakit, atong mga sala ngadto sa Dios. Bisan unsay atong bation samtang kita magsugod, kita mahimong mas malimpyo kon kita mosalig Kaniya sa paghimo sa atong mga relasyon nga limpyo.
Ang Ginoo, kinsa nakakita ug nakasabot nato sa hingpit, mopasaylo niadtong kinsa Iyang pasayloon, kita (nga dili hingpit) angay nga mopasaylo sa tanan. Kon kita moduol sa atong Manluluwas, atong giminosan ang pagpunting sa atong kaugalingon. Kita dili na kaayo muhokom ug mas makapasaylo na. Ang pagsalig sa Iyang mga maayo nga buhat, kalooy, ug grasya19 molayo kanato sa panagbingkil, kasuko, abuso, pagkabiniyaan, pagkadili patas, ug sa mga hagit sa pisikal ug mental nga usahay moabot tungod sa pisikal nga lawas sa mortal nga kalibotan. Ang malipayon ug hangtod sa hangtod wala magpasabot nga ang matag relasyon malipayon ug hangtod sa hangtod. Apan ang usa ka liboan nga katuigan sa milenya sa higayon nga si Satanas pagagapuson20 tingali maghatag nato sa gikinahanglan nga panahon ug makatingalang mga paagi sa paghigugma, pagsabot, ug paglihok sa mga butang, samtang kita mangandam alang sa kahangtoran.
Atong makaplagan ang pagpakig-uban sa langit diha sa usag usa.21 Ang buhat ug himaya sa Dios maglakip nga mapahinabo ang kamalipayon ug hangtod sa hangtod.22 Ang kinabuhing dayon ug kahimayaan mao ang pagkaila sa Dios ug ni Jesukristo, pinaagi sa diosnon nga gahom, nga kon asa man Sila tua usab kita.23
Minahal nga mga kaigsoonan, ang Dios nga atong Langitnong Amahan ug ang Iyang Hinigugma nga Anak buhi. Sila nagtanyag og kalinaw, hingpit nga kalipay, ug pagkaayo sa matag kaliwatan ug pinulongan, sa matag usa kanato. Ang propeta sa Ginoo ang naggiya sa dalan. Ang ulahing adlaw nga pagpadayag nagpadayon. Hinaot nga magpaduol kita sa atong Manluluwas sa balaan nga balay sa Ginoo, ug hinaot nga Siya modala kanato paduol sa Dios ug sa usag usa samtang atong ibugkos ang atong mga kasingkasing diha sa hinatag ni Kristo nga kamanggiloy-on, kamatuoran, ug kalooy sa atong tanan nga henerasyon—niini nga panahon ug sa kahangtoran, malipayon ug hangtod sa hangtod. Diha kang Jesukristo, kini posible, diha kang Jesukristo, kini tinuod. Ako mopamatuod gayod, pinaagi sa Iyang balaan nga ngalan, nga si Jesukristo, amen.