Magpunting sa Templo
Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.
Minahal nga mga kaigsoonan, atol niining lima ka talagsaon kaayo nga mga sesyon sa kinatibuk-ang komperensiya, kita sa makausa pa nakasinati nga abli ang kalangitan! Ako nag-ampo nga inyong nasulat ang inyong mga impresyon ug buhaton kini. Ang atong Langitnong Amahan mihatag sa Iyang Pinalanggang Anak, si Jesukristo, aron andam nga motabang kaninyo. Ako moaghat kaninyo sa pagpadako sa inyong mga paningkamot sa pagtinguha sa Ilang tabang.
Bag-ohay lang, si Sister Nelson ug ako dihay oportunidad sa pagtan-aw sa bag-o nga ika-4 nga hugna sa Basahon ni Mormon nga mga Bidyo nga mga serye.1 Kami nadasig kanila! Tugoti ko nga mopakita kaninyo og mubo nga kinutlo gikan sa eksena nga nagpakita sa pagpakita sa Manluluwas ngadto sa mga Nephite.
Importante kini nga ang Manluluwas mipili sa pagpakita sa katawhan diha sa templo. Iya kini nga balay. Kini puno sa Iyang gahom. Dili nato kalimtan kon unsa ang gibuhat sa Ginoo alang kanato karon. Iyang gibuhat ang Iyang mga templo nga mas dali nga maadtoan. Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel. Iya usab nga gihimong mas sayon alang sa matag usa kanato nga mahimong malamboon sa espirituhanon nga paagi. Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.
Kita sa kasamtangan adunay 168 ka magamit nga templo ug 53 ka bag-o nga templo ang kasamtangan nga gitukod ug laing 54 ang anaa sa pagdesinyo sa dili pa ang pagtukod nga hugna!2 Ako malipayon nga mopahibalo sa among plano sa pagtukod og bag-o nga templo sa matag usa niining mosunod nga mga dapit: Busan, Korea; Naga, Pilipinas; Santiago, Pilipinas; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; ug Tacoma, Washington.
Kami nagplano usab sa pagtukod og daghang templo sa pinili nga dagkong mga siyudad diin ang oras sa pagbiyahe sa kasamtangan nga templo usa ka dako nga hagit. Sa ingon, ako malipayon nga mopahibalo sa upat ka dugang mga lokasyon duol sa Siyudad sa Mexico diin bag-o nga mga templo ang itukod sa Cuernavaca, Pachuca, Toluca, ug Tula.
Akong minahal nga mga kaigsoonan, hinaot nga kamo magpunting sa templo sa mga paagi nga wala pa ninyo mabuhat sukad. Ako mopanalangin kaninyo nga mas mapaduol ngadto sa Dios ug kang Jesukristo matag adlaw. Gimahal ko kamo. Hinaot nga ang Dios magauban kaninyo hangtod nga magkita kita pag-usab, ako nag-ampo sa sagrado nga ngalan ni Jesukristo, amen.