Magmatinud-anon ngadto sa Dios ug sa Iyang Buhat

Ni Elder Quentin L. Cook

Sa Korum sa Napulog Duha ka Apostoles

Kitang tanan nagkinahanglan nga magtinguha og atong kaugalingon nga pagpamatuod kang Jesukristo, mopugong sa atong mainit nga mga pagbati, maghinulsol sa atong mga sala, ug magmatinuoron sa Dios ug sa Iyang buhat.

Niadtong Oktubre, gitahasan ko, kauban ni Presidente M. Russel Ballard ug ni Elder Jeffrey R. Holland, nga mobisita sa United Kingdom, diin kaming tulo didto nakaserbisyo isip batan-ong mga misyonaryo. Kami adunay pribilehiyo sa pagtudlo ug pagpamatuod, ingon man sa pagbisita ug pagpamalandong sa sayong bahin sa kasaysayan sa Simbahan sa British Isles, diin ang lolo sa tuhod sa akong mama nga si Heber C. Kimball ug ang iyang mga kaubanan maoy unang mga misyonaryo.¹

Si Presidente Russell M. Nelson, nga misungog namo bahin niini nga buluhaton, nakabantay nga dili kasagaran nga ang tulo ka Apostoles mobisita sa dapit diin sila nagserbisyo isip mga misyonaryo sa ilang kabatan-on. Siya miangkon nga ang tanan nagtinguha nga matudlo aron mobisita sa ilang orihinal nga misyon. Uban sa dakong pahiyom sa iyang nawong, siya daklit nga mipasabot nga kon dunay laing hut-ong sa tulo ka Apostoles nga nakaserbisyo og parehas nga misyon 60 ka tuig nang milabay, nan sila usab tingali makadawat og susamang buluhaton.

Agig pagpangandam alang ana nga buluhaton, akong gibasa og balik ang Kinabuhi ni Heber C. Kimball, nga sinulat sa usa ka apo, nga si Orson F. Whitney, kinsa sa wala madugay natawag sa pagka-apostol. Kini nga libro gihatag ngari nako sa akong pinalanggang inahan dihang hapit na ko mag-siyete anyos. Nangandam kami nga motambong sa pagpahinungod sa This Is the Place nga Monumento niadtong Hulyo 24, 1947, ni Presidente George Albert Smith.² Siya gusto nga ako mahibalo pa og daghan bahin sa akong katigulangan nga si Heber C. Kimball.

Kini nga basahon naglangkob og makapahinuklog nga pamahayag nga gipahinungod ngadto ni Presidente Kimball nga makahuloganon sa atong panahon. Sa dili pa ipaambit ang pamahayag, tugoti ko nga mohatag og gamayng kaagi.

Samtang si Propeta Joseph Smith natanggong sa Bilanggoan sa Liberty, ang Apostoles nga si Brigham Young ug si Heber C. Kimball dunay katungdanan, ubos sa makahadlok ngil-ad nga mga kahimtang, nga maoy magdumala sa pagbakwit sa mga Santos sa Missouri. Ang pagbakwit gikinahanglan sa daghan tungod sa sugo sa pagpatay nga gipagawas ni Gobernador Lilburn W. Boggs.³

Hapit 30 ka tuig human niadto si Heber C. Kimball, nga kaniadto naa sa Unang Kapangulohan, nga namalandong niini nga kasaysayan kauban sa bag-ong henerasyon, mitudlo, “Sultihan ko kamo, nga daghan kaninyo ang makakita sa panahon nga kamo makaangkon sa tanang kalisod, pagsulay ug pagpanggukod nga inyong masugakod, ug daghang oportunidad nga ikapakita nga kamo matinuoron sa Dios ug sa iyang buhat.”⁴

Si Heber mipadayon: “Sa pagsagubang sa mga kalisdanan nga nagsingabot, gikinahanglan alang kaninyo nga makaangkon og kahibalo sa kamatuoran niini nga buhat alang sa inyong kaugalingon. Ang mga kalisdanan maingon niana og kinaiyahan nga kon ang lalaki o babaye wala niini nga personal nga kahibalo o saksi siya mapukan. Kon kamo wala pa makaangkon og pagpamatuod, pagpakabuhi nga matarong, ug tawaga ang Ginoo ug ayaw paghunong hangtod nga maangkon ninyo kini. Kon kamo dili mobuhat niini dili kamo makasugakod. … Moabot ang panahon diin wala nay lalaki o babaye ang makahimo sa paglahutay sa hinulaman nga kahayag. Ang matag usa kinahanglan nga magiyahan sa kahayag nga anaa sulod sa iyang kaugalingon. … Kon kamo wala niini dili kamo makasugakod; busa tinguhaa ang pag-angkon og pagpamatuod kang Jesus ug hupti kini, nga kon moabot man ang panahon sa pagsulay dili kamo mapandol ug mapukan.”⁵

Kitang tanan kinahanglan og personal nga pagpamatuod sa buhat sa Dios⁶ ug sa labing mahinungdanon nga tahas ni Jesukristo. Ang ika-76 nga seksiyon sa Doktrina ug mga Pakigsaad nagpasabot bahin sa tulo ka ang-ang sa himaya ug nagkompara sa celestial nga himaya ngadto sa adlaw. Dayon kini nagkompara sa terrestrial nga gingharian ngadto sa bulan.⁷

Makapaikag nga ang adlaw aduna sa iyang kaugalingon nga kahayag, apan ang bulan usa ka misanag nga kahayag o “hinulaman nga kahayag.” Sa paghisgot bahin sa terrestrial nga gingharian, ang bersikulo 79 nag-ingon, “Kini mao sila kinsa dili maisog diha sa pagpamatuod ni Jesus.” Kita dili makaangkon sa celestial nga gingharian ug makapuyo uban sa Dios nga Amahan sa hinulaman nga kahayag; kita nagkinahanglan sa atong kaugalingon nga pagpamatuod kang Jesukristo ug sa Iyang ebanghelyo.

Kita nagpuyo sa kalibotan diin ang kadaotan nagdagsang⁸ ug ang mga kasingkasing nagpalayo sa Dios tungod sa mga lagda sa katawhan.⁹ Usa sa labing kusganon nga mga ehemplo diha sa mga kasulatan bahin sa mga kabalaka ni Heber C. Kimball mahitungod sa pagtinguha og pagpamatuod sa buhat sa Dios ug ni Jesukristo gihulagway diha sa tambag ni Alma ngadto sa iyang tulo ka anak nga lalaki—Helaman, Shiblon, ug Corianton.¹⁰ Duha sa iyang anak nga lalaki nagmatinuoron sa Dios ug sa Iyang buhat. Apan ang usa ka anak nga lalaki mihimo og pipila ka dili maayo nga mga desisyon. Alang nako ang labing importante sa tambag ni Alma mao nga siya naghatag niini isip usa ka amahan alang sa kaayohan sa kaugalingon niyang mga anak.

Ang unang gikabalak-an ni Alma, sama ni Heber C. Kimball, mao ang pagbaton sa matag usa og pagpamatuod kang Jesukristo ug magmatinuoron sa Dios ug sa Iyang buhat.

Sa usa ka talagsaong pagtulon-an ni Alma ngadto sa iyang anak nga si Helaman, siya naghimo og makahinuklog nga saad nga kadtong “mobutang sa ilang pagsalig diha sa Dios pagabuligan sa ilang mga pagsulay ug sa ilang mga kasamok, ug sa ilang mga kasakit, ug pagabayawon sa kataposan nga adlaw.”¹¹

Samtang si Alma nakadawat og usa ka pagpakita diin siya nakakita og usa ka anghel, talagsa ra kini. Ang mga impresyon nga gihimo sa Espiritu Santo mao ang mas kasagaran. Kini nga mga impresyon posibling sama kaimportante sa pagpakita sa mga anghel. Si Presidente Joseph Fielding Smith mitudlo: “Ang mga impresyon sa kalag nga maggikan sa Espiritu Santo mas labaw nga makahuloganon kay sa panan-awon. Kon ang Espiritu mamulong ngadto sa espiritu, ang marka diha sa kalag mas labaw kalisod papason.”¹²

Maghatod kini kanato ngadto sa tambag ni Alma sa iyang ikaduhang anak, nga si Shiblon. Si Shiblon matarong, sama sa iyang igsoon nga si Helaman. Ang tambag nga akong gusto nga ipasabot og maayo mao ang Alma 38:12, diin ang ubang bahin mabasa nga, “Pagmatngon usab nga ikaw makapugong sa tanan nimo nga mga mainit nga pagbati, nga ikaw mapuno uban sa paghigugma.”

Ang pagpugong usa ka makapainteres nga pulong. Kon kita mosakay og kabayo, kita mogamit og rinda, sa paggiya niini. Ang usa ka maayong kaparehas nga pulong tingali mao ang pagtultol, pagkontrol, o pagpugong. Ang Daang Tugon nagsulti nato nga kita misinggit sa kalipay dihang nasayran nato nga kita makaangkon og pisikal nga mga lawas.¹³ Ang lawas dili daotan—matahom kini ug mahinungdanon—apan ang pipila ka mainit nga pagbati, kon dili gamiton sa hustong paagi ug sa tukmang pagpugong, makabulag kanato gikan sa Dios ug sa Iyang buhat ug dili maayo og epekto sa atong pagpamatuod.

Atong hisgotan ang mahitungod sa duha ka mainit nga pagbati sa piho gayod—una, kapungot, ug ikaduha, kahigal.¹⁴ Makapainteres nga kining duha kon mapasagdan nga walay rinda o walay kontrol makahatag og dakong kasakit, mopaminos sa impluwensiya sa Espiritu, ug mobulag kanato gikan sa Dios ug sa Iyang buhat. Ang kaaway mopahimulos sa matag oportunidad sa pagpuno sa atong kinabuhi og mga hulagway sa kabayolente ug imoralidad.

Sa ubang mga pamilya, komon ra sa napungot nga bana o asawa nga pasakitan ang kapikas o anak. Niadtong Hulyo, miapil ko sa United Kingdom All Party Parliamentary nga forum sa London.¹⁵ Ang kabayolente batok sa mga babaye ug mga batan-on gitutokan isip dako nga problema sa tibuok kalibotan. Dugang sa kabayolente, ang uban miapil sa pag-abuso gamit ang pulong. Ang pamahayag sa pamilya nagsulti nato nga kadtong “kinsa moabuso sa ilang kapikas o mga anak … moabot ang adlaw nga mobarog nga adunay tulubagon atubangan sa Dios.”¹⁶

Si Presidente Nelson sa kusganong paagi mihatag og empasis niini kagahapon sa buntag.¹⁷ Palihog desisyoni kana bisan kon kamo giabuso man sa inyong ginikanan o wala, ayaw ninyo abusohi ang inyong kapikas o mga anak sa pisikal o sa pulong o sa emosyonal nga paagi.

Sa atong panahon ang usa sa labing dagko nga mga hagit mao ang panagbingkil ug pag-abuso gamit ang pulong nga may kalabotan sa katilingbanong mga isyu. Sa daghang sitwasyon ang kapungot ug abusadong pinulongan mipuli sa pangatarongan, diskusyon, ug pagkamatinahuron. Daghan ang misalikway sa pahimangno sa senior nga Apostol sa Manluluwas nga si Pedro, sa pagtinguha og Kristohanong mga kalidad sama sa pagpugong sa kaugalingon, pagpailob, pagkadiosnon, inigsoon nga kamabination, ug gugmang putli.¹⁸ Sila usab misalikway sa Kristohanong kinaiya sa pagkamapaubsanon.

Dugang sa pagpugong sa kapungot ug pagpugong sa ubang mainit nga mga pagbati, kita kinahanglan nga mopasiugda og putli moral nga kinabuhi pinaagi sa pagkontrolar sa atong hunahuna, pinulongan ug mga buhat. Kita kinahanglang maglikay sa pornograpiya, motimbangtimbang sa katukma kon unsay atong tan-awon diha sa internet sa atong panimalay, ug paglikay sa tanang matang sa masalaypon nga buhat.

Maghatod kini kanato ngadto sa tambag ni Alma ngadto sa iyang anak nga si Corianton. Dili sama sa iyang mga igsoong lalaki, nga si Helaman ug Shiblon, si Corianton nalambigit sa moral nga kalapasan.

Tungod kay si Corianton nalambigit sa imoralidad, gikinahanglan nga si Alma motudlo niya mahitungod sa paghinulsol. Siya kinahahanglang motudlo niya sa kaseryuso sa sala ug dayon unsaon sa paghinulsol.¹⁹

Busa ang tambag ni Alma aron makalikay mao ang pagpugong sa mainit nga mga pagbati, apan ang iyang tambag ngadto sa mga nakasala mao ang paghinulsol. Si Presidente Nelson mihatag sa mga miyembro og makahinuklog nga tambag bahin sa paghinulsol atol sa Abril 2019 nga kinatibuk-ang komperensiya. Iyang giklaro nga ang matag adlaw nga paghinulsol importante kaayo sa atong kinabuhi. “Ang paghinulsol dili usa ka panghitabo; usa kini ka proseso. Mao kini ang yawe sa kalipay ug kalinaw sa hunahuna,” mitudlo siya. “Ang matag adlaw nga paghinulsol mao ang agianan ngadto sa kaputli, ug ang kaputli magdala og gahom.”²⁰ Kon si Corianton mihimo pa sa gitambag ni Presidente Nelson, siya unta nakahinulsol dayon dihang siya misugod og tagad sa hugaw nga mga hunahuna. Ang dagkong mga kalapasan wala unta mahitabo.

Ang panapos nga tambag nga gihatag ni Alma ngadto sa iyang mga anak nga lalaki maoy pipila sa labing importante nga doktrina diha sa tibuok nga kasulatan. May kalabotan kini sa Pag-ula nga gihimo ni Jesukristo.

Si Alma mipamatuod nga si Kristo mokuha sa sala.²¹ Kon wala ang Pag-ula sa Manluluwas, ang mahangtoron nga baroganan sa kaangayan magkinahanglan og silot.²² Tungod sa Pag-ula sa Manluluwas, ang kaluoy makapatigbabaw alang niadtong nakahinulsol, ug kini magtugot nga sila makabalik sa presensiya sa Dios. Makaayo alang kanato ang pagpamalandong niining talagsaon nga doktrina.

Walay makabalik sa Dios pinaagi sa iyang kaugalingong mga buhat lamang; tanan kita nagkinahanglan sa benipisyo sa sakripisyo sa Manluluwas. Tanan nakasala, ug pinaagi lamang sa Pag-ula ni Jesukristo nga kita makaangkon og kaluoy ug makapuyo uban sa Dios.²³

Si Alma mihatag usab og talagsaong tambag kang Corianton alang natong tanan nga miagi o moagi sa proseso sa paghinulsol, bisan kon ang mga sala gamay ra o sama kagrabe sa nahimo ni Corianton. Sa bersikulo 29 sa kapitulo 42 sa Alma mabasa nga, “Ug karon, akong anak, ako nagtinguha nga ikaw kinahanglan dili motugot niini nga mga butang nga mohasol pa kanimo, ug himoa nga ang imong mga sala ang mosamok kanimo, uban niana nga paghasol diin modala kanimo ngadto sa paghinulsol.”

Si Corianton mipatalinghog sa tambag ni Alma ug naghinulsol ug nangalagad sa madungganon nga paagi. Tungod sa Pag-ula sa Manluluwas, ang pagkaayo anaa alang sa tanan.

Sa panahon ni Alma, sa panahon ni Heber, ug sigurado sa atong panahon, kitang tanan nagkinahanglan nga magtinguha og atong kaugalingon nga pagpamatuod kang Jesukristo, mopugong sa atong mainit nga mga pagbati, maghinulsol sa atong mga sala, ug mangita og kalinaw pinaagi sa Pag-ula ni Jesukristo ug magmatinuoron sa Dios ug sa Iyang buhat.

Sa bag-o lang nga pakigpulong ug usab karong buntag si Presidente Russell M. Nelson misulti sa ingon niining paagi: “Ako mohangyo kaninyo nga atimana ang inyong pagpamatuod kang Jesukristo. Trabahoa kini. Angkona kini. Atimana kini. Amumaha kini aron motubo kini. Dayon bantayi ang mga milagro nga mahitabo sa inyong kinabuhi.”²⁴

Ako mapasalamaton nga kita karon makapaminaw gikan ni Presidente Nelson. Ako mopamatuod nga si Presidente Russell M. Nelson mao ang propeta sa Ginoo alang sa atong panahon. Ako nalipay ug mihatag og bili sa kahibulongan nga mga inspirasyon ug giya nga atong nadawat pinaagi kaniya.

Isip Apostol sa Ginoo nga si Jesukristo, ako mohatag sa akong sigurado nga pagsaksi sa kabalaan ug sa katinuod sa Iyang Pag-ula sa ngalan ni Jesukristo, amen.