Nga ang mga Tawo Moila Kanimo

Ni Elder Jonathan S. Schmitt

Sa Seventy

Ang akong bug-os nga tinguha mao nga kamo makaila ni Jesus pinaagi sa Iyang daghang mga ngalan ug kamo mahimong mahisama Kaniya.

Pipila ka tuig na ang milabay, ako adunay makausab sa kinabuhi nga kasinatian atol sa usa ka miting sa sakramento didto sa among home ward sa Arizona. Samtang ang pag-ampo sa sakramento naghisgot sa atong kaandam sa “pagdala nganha [kanato] sa ngalan [ni Jesukristo],”¹ ang Espiritu Santo mipahinumdom nako nga si Jesus adunay daghang mga ngalan. Kini nga pangutana dayon miabot sa akong kasingkasing: “Hain sa mga ngalan ni Jesus ang akong dad-on sa akong kaugalingon niini nga semana?”

Tulo sa mga ngalan ang misantop sa akong hunahuna, ug ako misulat niini. Ang matag usa niana nga mga ngalan adunay mga Kristohanong hiyas nga gusto nakong mas hingpit nga mapalambo. Sa misunod nga semana, akong gitutokan kadtong tulo ka ngalan ug misulay sa paghangop sa nag-uban niini nga mga hiyas ug mga kinaiya. Sukad niadtong panahona, nagpadayon ko sa pagpangutana niana nga pangutana isip kabahin sa akong personal nga pagsimba: “Hain sa mga ngalan ni Jesus ang akong dad-on sa akong kaugalingon niini nga semana?” Ang pagtubag niana nga pangutana ug pagpaningkamot sa pagpalambo sa may kalabotan nga Kristohanong mga hiyas nakapanalangin sa akong kinabuhi.

Sa Iyang bantogan nga Pag-ampo alang sa uban, si Jesus mipahayag niining mahinungdanon nga kamatuoran: “Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo nga imong gipadala.”² Karon gusto ko nga mopakigbahin kaninyo sa mga panalangin ug gahom nga moabot gikan sa pagkaila ni Jesuskristo pinaagi sa Iyang daghang mga ngalan.

Ang usa ka yano nga paagi sa pag-ilaila og usa ka tawo mao ang pagkahibalo sa ilang ngalan. Ginaingon nga “ang ngalan sa usa ka tawo para niya mao ang labing tam-is ug labing mahinungdanon nga tingog sa bisan unsa nga pinulongan.”³ Nakasinati na ba kamo sa pagtawag og usa ka tawo sa sayop nga ngalan o sa pagkalimot sa ilang ngalan? Ang akong asawa, si Alexis, ug ako, nakasulay, sa usa ka higayon, nga mitawag sa usa sa among mga anak og “Lola.” Subo lang, tingali nakatag-an mo, si Lola mao ang among iro! Maayo man ang resulta o dili, ang pagkalimot sa ngalan sa usa ka tawo nagpahibalo niana nga tawo nga ikaw tingali wala kaayo makaila kaniya.

Si Jesus nakaila og mitawag sa mga tawo pinaagi sa ngalan. Ngadto sa karaang Israel, ang Ginoo miingon, “Ayaw kahadlok, kay nalukat ko na ikaw, natawag ko na ikaw pinaagi sa imong ngalan; ikaw ako man.”⁴ Niadtong buntag sa Pasko sa Pagkabanhaw, ang pagsaksi ni Maria sa nabanhaw nga Kristo gipalig-on dihang si Jesus misangpit sa iyang ngalan.⁵ Sa samang paagi, ang Dios misangpit sa ngalan ni Joseph Smith agig tubag sa iyang pag-ampo sa hugot nga pagtuo.⁶

Sa ubang sitwasyon, si Jesus mihatag sa Iyang mga disipulo og bag-ong mga ngalan nga maoy nagpaila sa ilang kinaiya, kapasidad, ug potensiyal. Si Jehova mihatag ni Jacob sa bag-ong ngalan nga Israel, nga nangahulogan “Usa nga nagpatigbabaw uban sa Dios” o “Ipatigbabaw ang Dios labaw sa tanan.”⁷ Si Jesus mihatag ni Santiago ug ni Juan sa ngalan nga Boanerges, sa ato pa “mga anak sa dalugdog.”⁸ Nakakita sa iyang umaabot nga pagkalider, si Jesus mihatag ni Simon sa ngalan nga Cefas o Pedro, nga sa ato pa usa ka bato.⁹

Sama nga si Jesus nakaila sa matag usa kanato sa ngalan mismo, ang usa ka paagi nga kita mas makaila ni Jesus mao ang pagkat-on sa Iyang daghan nga mga ngalan. Sama sa ngalan ni Israel ug ni Pedro, daghan sa ngalan ni Jesus mao ang mga titulo nga makatabang kanato sa pagsabot sa Iyang misyon, katuyoan, kinaiya, ug mga hiyas. Sa atong pagkahibalo sa daghang mga ngalan ni Jesus, mas masabtan nato ang Iyang balaang misyon ug ang Iyang dili hakog nga kinaiya. Ang pagkahibalo sa Iyang daghang mga ngalan makadasig usab kanato aron mahimong mas mahisama Kaniya—aron mopalambo og Kristohanong mga hiyas nga magdala og hingpit nga kalipay ug tumong sa atong mga kinabuhi.

Pipila ka tuig ang milabay, si Presidente Russell M. Nelson nagtuon sa mga kasulatan kabahin ni Jesukristo diha sa Ang Giya ngadto sa mga Kasulatan.¹⁰ Siya dayon midapit sa mga single adult sa pagtuon niining sama nga mga kasulatan. Kabahin sa daghang mga ngalan ni Jesus, si Presidente Nelson miingon, “Tun-i ang tanan kon unsa si Jesukristo pinaagi sa mainampoon ug madasigong pagtinguha nga makasabot sa kahulogan sa matag usa sa Iyang nagkadaiyang mga tawag ug mga ngalan sa personal nga paagi alang ninyo.”¹¹

Pagkahuman sa pagdapit ni Presidente Nelson, gisugdan nako ang pag-ugmad sa akong kaugalingong lista sa daghang mga ngalan ni Jesus. Ang akong personal nga lista karon aduna nay sobra sa 300 ka ngalan, ug nakasiguro ko nga adunay daghan pa nga wala pa nako makaplagi.

Samtang adunay ubang mga ngalan ni Jesus nga gigahin lang alang Kaniya,¹² gusto ko nga mopakigbahin og lima ka ngalan ug mga titulo nga adunay kagamitan sa matag usa kanato. Ako modapit kaninyo sa paghimo og inyong kaugalingong lista samtang kamo makaila ni Jesus pinaagi sa Iyang daghang mga ngalan. Sa pagbuhat niini, kamo makakaplag nga adunay ubang mga ngalan—uban sa kaabin niini nga Kristohanong mga hiyas—nga gusto ninyong dalhon sa inyong kaugalingon isip mga disipulo ni Jesukristo diha sa pakigsaad.¹³

Una, si Jesus mao ang Maayong Magbalantay.¹⁴ Sa ingon, si Jesus nakaila sa Iyang mga karnero,¹⁵ “ang iyang kaugalingong mga karnero pagatawgon niya sa ngalan,”¹⁶ ug, isip ang Kordero sa Dios, gihatag Niya ang Iyang kinabuhi alang sa Iyang karnero.¹⁷ Sa samang paagi, si Jesus gusto nga kita mahimong maayo nga mga magbalantay, ilabi na sa atong mga pamilya ug isip tigpangalagad nga mga kaigsoonan. Usa ka paagi nga kita makapakita sa atong gugma alang ni Jesus mao ang pagpakaon sa Iyang mga karnero.¹⁸ Alang niadtong tingali nangasalaag, ang maayong mga magbalantay moadto sa kamingawan aron sa pagpangita sa nawala nga karnero ug dayon magauban kanila hangtod nga sila mabalik ngadto sa kahilwasan.¹⁹ Isip maayong mga magbalantay ug kon ang lokal nga mga kondisyon motugot, kinahanglang magtinguha kita sa paggahin og mas daghang panahon sa pagpangalagad ngadto sa mga tawo diha sa ilang mga paninamalay. Sa atong pagpangalagad, ang pag-text ug ang teknolohiya kinahanglang gamiton aron sa pagpalambo, dili ipuli, sa personal nga mga paghimamat.²⁰

Ikaduha, si Jesus mao ang Pangulong Pari alang sa Maayong mga Butang nga Ania na Dinhi.²¹ Nasayod nga ang Iyang Paglansang sa Krus mahitabo sa pipila na lamang ka oras, si Jesus miingon: “Gisulti ko kini kaninyo aron nga dinhi kanako makabaton kamog kalinaw. Dinhi sa kalibotan aduna kamoy kagul-anan; apan sumalig kamo, gidaog ko na ang kalibotan.”²² Karon, samtang ang atong kalibotan kanunay nga nagkalagyo ug nagkabulag, adunay dakong panginahanglan nga kita mosangyaw ug mopakita og pagkapositibo, pagkamadasigon, ug paglaom. Bisan pa sa bisan unsang mga hagit sa atong kagahapon, ang hugot nga pagtuo kanunay nga magtudlo ngadto sa umaabot,²³ puno sa paglaom, nga nagtugot kanato nga matuman ang pagdapit ni Jesus nga magmaya.²⁴ Ang malipayon nga pagsunod sa ebanghelyo makatabang kanato nga mahimong mga disipulo sa maayong mga butang nga ania na dinhi.

Lain pa nga titulo ni Jesus mao nga Siya mao sa Gihapon, Kagahapon, Karon, ug Hangtod sa Kahangtoran.²⁵ Ang pagkamakanunayon usa ka Kristohanong hiyas. Si Jesus kanunay nga nagbuhat sa kabubut-on sa Iyang Amahan,²⁶ ug ang Iyang bukton kanunay nga bukas aron sa pagluwas, pagtabang, ug pag-ayo kanato.²⁷ Samtang kita magmakanunayon sa pagsunod sa ebanghelyo, kita mahimong mas mahisama ni Jesus.²⁸ Bisan tuod ang kalibotan makasinati ug dagko nga kausaban kon unsa ang popular samtang ang katawhan maanod-anod sa mga balod ug mapadpad ngadto-nganhi sa nagbalibali nga hangin sa pagtulon-an,²⁹ ang makanunayon nga pagsunod sa ebanghelyo makatabang kanato nga magmakanunayon ug dili mausab atol sa mga unos sa kinabuhi.³⁰ Kita usab makapakita og pagkamakanunayon pinaagi sa pagdawat sa pagdapit ni Presidente Nelson sa “paggahin og panahon alang sa Ginoo.”³¹ Ang talagsaong espirituwal nga kalig-on magagikan sa gagmay ug yano nga mga butang³² sama sa pagpalambo og “balaanong mga kinaiya ug matarong nga mga naandan nga buhaton”³³ sa inadlaw nga pag-ampo, paghinulsol, pagtuon sa kasulatan, ug pagserbisyo sa uban.

Ikaupat, si Jesus mao ang Usa nga Balaan sa Israel.³⁴ Ang kinabuhi ni Jesus usa ka sundanan sa pagkabalaan. Samtang kita magsunod ni Jesus, kita mahimong usa ka balaan diha sa Israel.³⁵ Kita mo-uswag diha sa pagkabalaan samtang kita kanunay nga mobisita sa templo diin ang “Pagkabalaan ngadto sa Ginoo” gikulit sa ibabaw sa matag ganghaan. Sa matag higayon nga kita mosimba diha sa templo, kita mobiya nga gitugahan sa mas dako nga gahom sa paghimo sa atong mga panimalay nga mga dapit sa pagkabalaan.³⁶ Alang ni bisan kinsa nga sa kasamtangan walay rekomend aron makasulod sa balaan nga templo, ako modapit kaninyo sa pagpakigkita sa inyong bishop ug sa pag-andam sa inyong kaugalingon sa pagsulod o pagbalik ngadto nianang balaan nga dapit. Ang panahon diha sa templo modugang sa pagkabalaan sa atong mga kinabuhi.

Usa pa nga kataposang ngalan ni Jesus mao nga Siya Matinud-anon ug Matinuoron.³⁷ Sama nga si Jesus kanunay nga matinud-anon ug kanunay nga matinuoron, ang Iyang bug-os nga tinguha mao nga kita mopakita niini nga mga kalidad sa atong mga kinabuhi. Kon ang atong hugot nga pagtuo mokunhod, kita mahimong mohangyo ngadto ni Jesus, “Ginoo, luwasa ako,” sama ni Pedro sa dihang nagsugod siya sa pagkaunlod sa unoson nga dagat sa Galilea.³⁸ Niadtong adlawa, si Jesus mikab-ot aron sa pagluwas sa hapit malumos nga disipulo. Siya mihimo sa sama niini ngari kanako, ug Siya mohimo sa sama niini alang kaninyo. Ayaw pagkawala sa paglaom ni Jesus—Siya dili gayod mawad-an og paglaom kaninyo!

Kon kita matinud-anon ug matinuoron, kita nagsunod sa tawag ni Jesus nga “Pabilin kamo kanako,” nga nagpasabot usab nga “ubani ko.”³⁹ Kon kita mag-atubang og mga pangutana, kon kita bugalbugalan tungod sa atong pagtuo, kon ang mga matamayon nga mga tudlo itulisok kanato niadtong mga anaa sa dako ug lapad nga gambalay, kita magpabilin nga matinud-anon ug kita magpabilin nga matinuoron. Niini nga mga gutlo, atong hinumdoman ang hangyo ni Jesus, “Paghunahuna ngari kanako sa matag hunahuna; ayaw pagduha-duha, ayaw kahadlok.”⁴⁰ Samtang ato kining buhaton, Siya mohatag kanato sa gikinahanglan nga hugot nga pagtuo, paglaom, ug kalig-on sa pagpabilin uban Kaniya.⁴¹

Minahal nga mga kaigsoonan, si Jesus gusto nga kita makaila Kaniya tungod kay Siya mao lamang ang ngalan ubos sa langit diin kita mahimong maluwas.⁴² Si Jesus mao ang Dalan, ang Kamatuoran, ug ang Kinabuhi—walay bisan kinsa nga makaadto sa Amahan, gawas kon pinaagi Kaniya.⁴³ Si Jesus mao lamang ang bugtong nga dalan! Alang niana nga rason, si Jesus mitawag, “Duol ngari kanako,”⁴⁴ “Sunod kanako,”⁴⁵ “Lakaw uban kanako,”⁴⁶ ug “Pagtuon kamo gikan kanako.”⁴⁷

Sa tibuok nakong kasingkasing, ako mosaksi kang Jesukristo—nga Siya buhi, nga Siya naghigugma kaninyo, ug nga Siya nakaila kaninyo sa ngalan mismo. Siya ang Anak sa Dios,⁴⁸ ang Bugtong Anak sa Amahan.⁴⁹ Siya mao ang atong Bato, atong Kota, atong Panagang, atong Dalangpanan, ug ang atong Tigluwas.⁵⁰ Siya ang Kahayag nga Nagdan-ag sa Kangitngit.⁵¹ Siya ang atong Manluluwas⁵² ug ang atong Manunubos.⁵³ Siya mao ang Pagkabanhaw ug ang Kinabuhi.⁵⁴ Ang akong bug-os nga tinguha mao nga kamo makaila ni Jesus pinaagi sa Iyang daghang mga ngalan ug kamo mahimong mahisama Kaniya samtang kamo magsunod sa Iyang diosnon nga mga hiyas diha sa inyong kinabuhi. Sa ngalan ni Jesukristo, amen.