“Enero 8–14: ‘Ako Moadto ug Mobuhat.’ 1 Nephi 1–5,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Enero 8–14. 1 Nephi 1–5,” Dali, Sunod Kanako—Alang sa Panimalay ug sa Simbahan: 2024 (2024)
Lehi Traveling Near the Red Sea [Lehi Nagpanaw Duol sa Pulang Dagat], ni Gary Smith
Enero 8–14: “Ako Moadto ug Mobuhat.”
1 Nephi 1–5
Ang Basahon ni Mormon nagsugod sa usa ka asoy sa usa ka tinuod nga pamilya nga nagsinati og tinuod nga mga pakigbisog. Nahitabo kini niadtong 600 BC, apan adunay mga butang mahitungod niini nga asoy nga tingali ingon og pamilyar sa mga pamilya karon. Kini nga pamilya nagpuyo sa dautan nga kalibotan, apan ang Ginoo misaad kanila nga kon sila mosunod Kaniya, Siya mogiya kanila ngadto sa kaluwasan. Niini nga panaw sila adunay maayo nga mga panahon ug ngil-ad nga mga panahon, talagsaong mga panalangin ug mga milagro, apan sila usab adunay mga panaglalis ug panagbingkil. Panagsa ra sa kasulatan nga adunay detalyado nga asoy sa usa ka pamilya nga naningkamot sa pagsunod sa ebanghelyo: mga ginikanan nga nanglimbasog nga ilang madasig ang ilang pamilya sa hugot nga pagtuo ug nabalaka mahitungod sa ilang kahilwasan, mga anak nga nagdesisyon kon ila bang tuohan ang ilang mga ginikanan, ug mga igsoong lalaki nga nagsagubang og kasina ug panagbingkil—ug usahay nagpasayloay sa usag usa. Sa kinatibuk-an, adunay gahom sa mga ehemplo sa hugot nga pagtuo niining dili hingpit nga pamilya.
Mga Ideya alang sa Pagkat-on diha sa Panimalay ug sa Simbahan
Ang pulong sa Dios adunay “labi nga bililhon” ngari kanako.
Usa ka dayag nga mensahe diha sa Basahon ni Mormon mao ang pulong sa Dios nga “labi nga bililhon”. (1 Nephi 5:21). Samtang kamo mobasa sa 1 Nephi 1–5, pangitaa ang mga paagi nga ang Dios direkta o dili direkta nga mipanalangin sa pamilya ni Lehi (pananglitan, tan-awa sa 1:11–15; 3:19–20; 5:10–22). Unsa ang gitudlo niini nga mga kapitulo diha kaninyo mahitungod sa pulong sa Dios? Unsay inyong nakita nga makapadasig ninyo sa pagsiksik sa mga kasulatan?
Tan-awa usab sa “Sa Ako nga Pagsiksik sa Balaang Kasulatan,” Mga Himno, nu. 175.
Ako makabaton ug makapalig-on sa akong pagpamatuod kon ako modangop sa Ginoo.
Nailhan si Nephi sa iyang gamhanang hugot nga pagtuo diha sa Ginoo, apan kinahanglan niyang maningkamot aron makabaton sa iyang pagpamatuod—sama gayod kanatong tanan. Unsa ang inyong mabasa diha sa 1 Nephi 2 nga nagpakita kon nganong si Nephi nakahimo sa pagbaton og pagsaksi nga ang mga pulong sa iyang amahan tinuod? Nganong wala man nakabaton si Laman ug Lemuel niini nga pagsaksi? (Tan-awa usab sa 1 Nephi 15:2–11). Kanus-a ninyo nabati nga ang Ginoo mipahumok sa inyong kasingkasing?
Tan-awa usab sa “Ang Ginoo misugo sa Pamilya ni Lehi sa pagbiya sa Jerusalem” (bidyo), Gospel Library.
Ang Ginoo misugo sa Pamilya ni Lehi sa pagbiya sa Jerusalem | 1 Nephi 1–2
Ang Ginoo misugo kang Lehi sa pagbiya sa Jerusalem kuyog sa iyang asawa, si Sariah, ug sa upat ka anak nga lalaki—Laman, Lemuel, Sam, ug Nephi.
Ang Dios moandam og paagi alang kanako sa pagbuhat sa Iyang kabubut-on.
Sa dihang ang Ginoo misugo sa mga anak nga lalaki ni Lehi sa pagkuha sa mga palid nga tumbaga, wala Siya mohatag og piho nga mga panudlo kon unsaon pagbuhat niini. Kini sa kasagaran tinuod bahin sa direksiyon nga atong madawat gikan sa Dios, ug kini mahimong mabati nga ingon og Siya nagsugo og “usa ka malisod nga butang” (1 Nephi 3:5). Unsa ang nagdasig kaninyo mahitungod sa tubag ni Nephi ngadto sa sugo sa Ginoo diha sa 1 Nephi 3:7, 15–16?
Samtang kamo mobasa sa 1 Nephi 3–4, pangita og nagkadaiya nga kalisdanan nga nasugatan ni Nephi. Giunsa sa Ginoo sa “[pag-]andam og paagi” alang ni Nephi nga “makatuman sa butang diin siya misugo”? Nganong importante alang kaninyo nga makahibalo kon unsa ang gibuhat sa Ginoo alang kang Nephi?
Usa ka gamhanan nga paagi nga ang Dios miandam kanato aron matuman ang Iyang mga sugo mao ang pinaagi sa pagpadala ni Jesukristo nga mahimong atong Manluluwas. Ikonsiderar ang pagbasa sa mensahe ni Presidente Dallin H. Oaks “Unsa ang Nabuhat sa Manluluwas alang Kanato?” (Liahona, Mayo 2021, 75–77). Sa unsang paagi si Jesukristo miandam og paagi alang sa matag usa kanato? Nasayod nga Siya mibuntog sa tanang butang alang kaninyo, unsa ang inyong gibati nga gustong “adtoon ug buhaton”?
Tan-awa usab sa “Si Nephi Gigiyahan sa Espiritu aron Makuha ang mga Palid nga Tumbaga” (bidyo), Gospel Library.
Si Nephi Gigiyahan sa Espiritu aron Makuha ang mga Palid nga Tumbaga |1 Nephi 3–5
Gipabalik ni Lehi sa Jerusalem ang iyang mga anak sa pagkuha sa mga talaan. Milagruso ang ilang paglampos bisan sa mga hagit ug sa panagsungi.
Paggamit og mga istorya ug mga ehemplo sa pagtudlo sa mga baroganan sa ebanghelyo. Samtang mangandam ka sa pagtudlo, paghunahuna og personal nga mga kasinatian nga makadugang og ikaduha nga pagsaksi sa mga asoy diha sa mga kasulatan. Pananglitan, kanus-a nga ang Ginoo miandam og paagi alang kaninyo sa pagbuhat sa Iyang kabubut-on?
Their Joy Was Full [Ang Ilang Kalipay Napuno], ni Walter Rane
Ang paghinumdom sa mga buhat sa Dios makahatag kanako og hugot nga pagtuo sa pagsunod sa Iyang mga sugo.
Sa dihang sila si Laman ug Lemuel mibati nga kabagulbolon o kareklamohon, sa kasagaran anaa sa duol si Nephi ug Lehi aron sa pagdasig ug pagpahimangno kanila. Kon kamo mobati nga gustong magbagulbol, makatabang ang pagbasa sa mga pulong ni Nephi ug Lehi. Giunsa ni Nephi ug Lehi sa pagpaningkamot sa pagtabang sa uban nga makapalig-on sa hugot nga pagtuo diha sa Dios? (tan-awa sa 1 Nephi 4:1–3; 5:1–8; tan-awa usab 1 Nephi 7:6–21). Unsa ang inyong nakat-onan nga makatabang ninyo kon gitintal kamo sa pagbagulbol o pagreklamo?
“Ako giubanan sa Espiritu.”
Sa 1 Nephi 4:5–18, unsa ang nagustohan ninyo kabahin sa abilidad ni Nephi sa pag-ila ug sa pagsunod sa Espiritu? Mahimo ninyong tun-an ang mensahe ni Presidente Russell M. Nelson “Pagpadayag alang sa Simbahan, Pagpadayag alang sa Atong mga Kinabuhi” (Liahona, Mayo 2018, 93–96) aron makakat-on og dugang mahitungod sa pagdawat og pagpadayag gikan sa Ginoo.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Ako makaangkon sa akong kaugalingong pagpamatuod.
-
Giunsa pagkahibalo ni Nephi nga ang gitudlo sa iyang amahan tinuod? Tabangi ang inyong mga anak sa pagpangita og mga tubag niining pangutana diha sa 1 Nephi 2:16, 19. Sila tingali malingaw usab sa pagsulat og mga aksiyon ni Nephi diha sa mga bloke o ubang mga butang ug dayon magtukod og butang gamit sa mga butang. Kini mahimong mosangpot ngadto sa usa ka panag-istorya mahitungod kon sa unsang paagi kining mga aksiyon makatabang kanato sa pagpalig-on sa pagpamatuod.
-
Mahimo ninyong ipakita sa inyong mga anak ang mga litrato o mga butang nga nagrepresentar sa mga butang nga tingali sila mahimong magtinguha og pagpamatuod, sama sa usa ka kopya sa Basahon ni Mormon o usa ka hulagway ni Jesukristo, usa ka templo, o sa buhi nga propeta. Dapita sila sa pagpili og usa ug ipakigbahin ang ilang mga pagpamatuod niana nga butang. Mahimo usab ninyong sultihan ang inyong mga anak kon giunsa ninyo sa pag-angkon ang inyong pagpamatuod. Nganong kita magkinahanglan sa atong kaugalingon nga pagpamatuod?
Ang Dios motabang kanako sa pagtuman sa Iyang mga sugo.
-
Ikonsiderar ang paggamit og usa o dugang pa niining mga kapanguhaan sa pagtabang sa inyong mga anak nga maghisgot mahitungod kon giunsa sa pagtabang sa Dios si Nephi sa pagkuha sa mga palid nga tumbaga: 1 Nephi 3–4; ang pahina sa kalihokan niining semanaha; “Ang Kaisog ni Nephi” (Songbook sa mga Bata, 64–65); ug “Kapitulo 4: Ang Tumbaga nga mga Palid” (diha sa Mga Sugilanon sa ang Basahon ni Mormon, 8–12).
-
Ikaw ug ang inyong mga anak tingali malingaw nga idrama-drama ang 1 Nephi 3:2–7. Tingali kunohay ikaw si Lehi ug hangyoa ang inyong mga anak sa pagbalik ngadto sa Jerusalem sa pagkuha sa tumbaga nga mga palid. Dapita sila sa pagtubag sa ilang kaugalingong mga pulong nga daw sila si Laman ug si Lemuel o si Nephi. Unsa ang pipila ka mga butang nga gisugo sa Dios nga atong buhaton? (Tan-awa sa mga hulagway 103–15 diha sa Libro sa mga Hulagway sa Ebanghelyo o Mosiah 18:8–10 alang sa mga ideya). Sa unsang paagi kita mahimong sama kang Nephi?
Ang mga kasulatan dako nga bahandi.
-
Ang mga kasulatan nahimong importante kaayo ngadto sa pamilya ni Lehi. Sa paghulagway niini, mahimo ninyong dapiton ang inyong mga anak sa pagtabang ninyo sa pagsulti o buhaton ang unsay gibuhat ni Nephi ug sa iyang mga igsoong lalaki aron makuha ang mga palid nga tumbaga: mipanaw sila og layo, gihatag ang ilang mga bulawan ug pilak, ug mitago sa usa ka langob aron maluwas ang ilang kinabuhi. Dayon inyong mabasa ang 1 Nephi 5:21 ug maghisgot kon nganong ang mga kasulatan bililhon kaayo ngadto sa pamilya ni Lehi. Nganong kini bililhon ngari kanato? Unsaon nato pagtratar ang mga kasulatan nga sama sa usa ka bahandi?
Si Nephi ug ang iyang pamilya mihatag og bili sa mga kasulatan.
Ang Espiritu Santo mogiya kanako samtang magtinguha ko sa pagbuhat sa kabubut-on sa Ginoo.
-
Pagkahuman nga nag-uban sa pagrebyo sa 1 Nephi 3 kon giunsa ni Nephi ug sa iyang igsoong mga lalaki sa pagpaningkamot sa pagkuha sa mga palid nga tumbaga, basaha uban sa inyong mga anak ang 1 Nephi 4:6 aron masuta kon unsa ang gibuhat ni Nephi nga mitugot kaniya nga molampos sa kataposan. Dayon ang inyong mga anak makahimo og usa ka lista sa mga butang nga gusto sa Dios nga ilang buhaton. Sa unsang paagi makatabang ang Espiritu Santo kanato dinhi niining mga sitwasyon?
Alang sa dugang nga mga ideya, tan-awa ang isyu karong bulana sa Higala nga magasin.
I Did Obey the Voice of the Spirit [Ako Misunod sa Tingog sa Espiritu], ni Walter Rane