“Mobalik sa Jerusalem,” Mga Sugilanon sa Basahon ni Mormon (2023)
“Mobalik sa Jerusalem,” Mga Sugilanon sa Basahon ni Mormon
Mobalik sa Jerusalem
Ang Panaw alang sa mga palid nga tumbaga
Ang pamilya ni Lehi ug Sariah mibiyahe ngadto sa kamingawan. Sa usa ka damgo, ang Ginoo misulti kang Lehi mahitungod sa mga kasulatan nga gisulat sa mga palid nga tumbaga. Usa ka tawo nga ginganlan og Laban ang naggunit niini didto sa Jerusalem. Ang Ginoo miingon nga ang pamilya ni Lehi kinahanglan nga modala sa mga palid nga tumbaga ngadto sa ilang biyahe.
Ang Ginoo miingon kang Lehi nga pabalikon ang iyang mga anak nga lalaki ngadto sa Jerusalem aron sa pagkuha sa mga palid nga tumbaga. Ang mga igsoong lalaki ni Nephi nangreklamo. Giingnan nila si Lehi nga lisod buhaton kana nga butang. Dili sila gustong moadto.
Lisod kaayong buhaton kadto nga butang, apan si Nephi gusto nga motuman. Nasayod siya nga ang Ginoo motabang niya ug sa iyang mga igsoon. Gisultihan ni Nephi si Lehi nga mobalik siya sa Jerusalem ug kuhaon ang mga palid nga tumbaga.
Si Laman, Lemuel, Sam, ug Nephi namalik sa Jerusalem. Dihang nangabot na sila didto, mihukom sila nga si Laman ang moadto sa balay ni Laban ug mohangyo sa mga palid nga tumbaga.
Dihang mihangyo si Laman alang sa mga palid nga tumbaga, si Laban mitawag kaniya nga usa ka kawatan. Miingon si Laban nga patyon niya si Laman.
Si Laman midagan palayo ug gisultihan ang iyang mga igsoong lalaki sa nahitabo.
Ang upat ka managsoon nangaguol. Si Laman, Lemuel, ug Sam gustong mamalik ngadto sa ilang mga ginikanan didto sa kamingawan, apan dunay nahunahunaan si Nephi. Miingon siya nga may ibaylo sila kang Laban aron makuha ang mga palid. Namalik sila sa ilang balay sa siyudad ug mikuha sa tanan nilang bulawan ug pilak aron ibaylo.
Dihang gipakita nila ang mga bulawan ug pilak ngadto kang Laban, gusto niyang angkonon ang tanan niini. Apan dili gihapon niya ihatag kanila ang mga palid nga tumbaga. Hinoon, giingnan niya ang iyang mga sulugoon sa pagpatay sa managsoon aron iyang makuha ang ilang mga bulawan ug pilak.
Ang upat ka managsoong lalaki nanagan alang sa ilang kinabuhi ug nabiyaan ang ilang mga bulawan ug pilak. Ang mga sulugoon ni Laban wala makadakop kanila. Ang managsoon nanago sa langob.
Human niining tanang lisod nga butang, si Laman ug Lemuel naglagot ni Nephi. Gibunalan nila si Nephi ug Sam.
Sa kalit lang, usa ka anghel ang miabot ug nangutana nganong gibunalan nila si Nephi. Ang anghel miingon nga si Nephi gipili nga mangulo kanila. Dayon ang anghel misulti kanila sa pagbalik sa Jerusalem. Ang Ginoo mag-andam og paagi aron makuha nila ang mga palid nga tumbaga.