“Ang mga Kahoy nga Oliba,” Mga Sugilanon sa Basahon ni Mormon (2023)
Ang mga Kahoy nga Oliba
Ang gugma sa Dios alang sa Iyang katawhan
Si Jacob usa ka propeta sa Dios. Gusto siyang motudlo sa mga Nephite mahitungod sa kon unsa kadako ang paghigugma sa Dios sa Iyang katawhan. Giistoryahan sila ni Jacob og usa ka sugilanon mahitungod sa ubasan sa mga kahoy nga oliba. Ang Ginoo sa ubasan ug ang Iyang mga sulugoon nagtinabangay sa pag-atiman sa ubasan.
Ang Ginoo dunay espesyal nga kahoyng oliba nga namunga og maayo nga bunga. Miingon si Jacob nga kining kahoya susama sa katawhan sa Dios, o sa balay ni Israel. Ang bunga susama sa mga buhat sa katawhan. Ang Ginoo miatiman pag-ayo niini nga kahoy. Gitabangan niya kini nga motubo pinaagi sa pag-atiman sa mga gamot niini ug pagpung-ol sa mga sanga. Gihatagan niya kini sa unsay gikinahanglan nga kini mabuhi.
Human sa mubong panahon, ang espesyal Niya nga kahoy nagsugod sa pagkamatay. Dunay pipila lamang ka himsog nga mga sanga. Nakapasubo kini sa Ginoo. Gusto niya nga padayon kining dunay maayong bunga.
Aron maluwas ang himsog nga mga sanga, ang Ginoo mitangtang niini ug gisumpay kini ngadto sa ubang mga kahoy. Dayon gipamulihan Niya kini og himsog nga mga sanga gikan sa ubang mga kahoy.
Taas nga panahon ang milabay. Ang Ginoo ug ang sulugoon miadto kanunay sa ubasan. Giatiman nila ang espesyal nga kahoy sa Ginoo. Giatiman usab nila ang espesyal nga mga sanga nga nagkatibulaag gikan sa mga kahoy sa tibuok nga ubasan. Kadaghanan sa nanubo nga bunga maayo. Ang maayo nga bunga nakapalipay sa Ginoo ug sa Iyang sulugoon.
Paglabay sa pipila ka panahon, ang matag kahoy namunga og daghan. Apan karon ang tanan nga bunga daotan. Ang Ginoo nasubo kaayo. Dili Siya gustong mawala ang Iyang ubasan o bunga niini! Nagtrabaho Siya og maayo sa pagtabang sa Iyang mga kahoy. Naghunahuna Siya unsa pa kahay lain Niyang mahimo. Nakigsulti Siya sa sulugoon ug mipili nga ipadayon ang pagpaningkamot.
Aron maluwas ang Iyang ubasan, ang Ginoo miingon nga pundokon ang mga sanga nga Iyang gipanangtang gikan sa espesyal nga kahoy. Miingon siya nga isumpay kini og balik ngadto sa espesyal nga kahoy.
Mao kini ang kataposang higayon nga ang Ginoo motrabaho sa Iyang ubasan. Nanawag Siya og ubang mga sulugoon sa pagtabang. Ang tanan nagtinabangay sa pagpundok ug pagsumpay sa mga sanga.
Giatiman nila ang tanan nga kahoy. Gipanangtang nila ang dili maayong mga sanga ug gitipigan ang mga maayo. Paglabay sa mubong panahon, ang espesyal nga kahoy sa Ginoo namunga na usab og maayo. Ang ubang mga kahoy namunga usab nga sama kamaayo sa bunga sa espesyal nga kahoy. Nalipay ang Ginoo. Naluwas ang Iyang mga kahoy! Tanan kini mipatubo sa bunga nga maoy gusto Niya nga maangkon niini.
Gipasalamatan sa Ginoo ang mga sulugoon. Giingnan Niya sila nga bulahan sila nga nakatrabaho og maayo ug sa pagtuman sa Iyang mga sugo. Gipakigbahin Niya ang bunga ngadto nila, ug nangalipay sila sa hilabihan. Sulod sa dugayng panahon, nakatagamtam ang Ginoo sa bunga.
Gihuman ni Jacob ang istorya bahin sa mga kahoy nga oliba. Gitudlo Niya sa katawhan nga ang Dios nagpangga kanila sama sa pagpangga sa Ginoo sa ubasan sa Iyang mga kahoy. Mihangyo si Jacob nga tanan maghinulsol ug magpaduol sa Dios. Gitudloan Niya sila sa paghigugma ug pagserbisyo sa Dios tungod kay ang Dios kanunay nga magtunol sa Iyang kamot sa pagtabang kanila.