“Si Lehi ug Sariah Mibiya sa Jerusalem,” Mga Sugilanon sa Basahon ni Mormon (2023)
“Si Lehi ug Sariah Mibiya sa Jerusalem,” Mga Sugilanon sa Basahon ni Mormon
Si Lehi ug Sariah Mibiya sa Jerusalem
Ang pasidaan sa Ginoo ngadto sa usa ka pamilya
Si Lehi ug si Sariah nagpuyo sa Jerusalem kauban sa ilang mga anak. Si Lehi nakakita og usa ka panan-awon gikan sa Ginoo. Nakita niya nga ang Manluluwas moanhi sa kalibotan sa moabot nga adlaw. Gipakita usab sa Ginoo kaniya nga ang Jerusalem malaglag.
Gisugilon ni Lehi ngadto sa katawhan ang mahitungod sa iyang panan-awon. Siya misulti kanila nga si Jesukristo moanhi sa moabot nga adlaw sa pagluwas sa kalibotan.
Gisultihan usab ni Lehi ang katawhan nga ang Jerusalem malaglag. Siya midapit nila sa paghinulsol.
Ang katawhan nangasuko. Ang Ginoo namulong kang Lehi pag-usab sa usa ka damgo. Nahibaloan ni Lehi nga siya ug ang iyang pamilya dili luwas sa Jerusallem. Kinahanglan nga mamiya sila.
Si Lehi ug Sariah mituman sa Ginoo. Namiya sila sa siyudad kauban sa ilang pamilya. Si Lehi ug Sariah dunay upat ka anak nga lalaki nga ginganlan og Laman, Lemuel, Sam, ug Nephi. Kinahanglan nga mobiya sila sa ilang balay ug sa ilang maanindot nga mga butang.
Ang pamilya mipanaw sa kamingawan sunod sa Pulang Dagat. Si Lehi nagpasalamat sa Ginoo sa pagpanalangin sa iyang pamilya. Gitudloan niya ang iyang pamilya sa pagsunod sa Ginoo ug pagtuman sa Iyang mga sugo.
Si Laman ug Lemuel mireklamo. Gimingaw sila sa ilang balay ug sa tanang butang nga ilang gipangbiyaan. Wala sila makasabot nganong ang Ginoo mihangyo kanila sa pagbiya. Wala sila motuo nga ang usa ka dakong siyudad sama sa Jerusalem malaglag.
Si Laman ug Lemuel naghunahuna nga gihanduraw lang ni Lehi ang iyang mga panan-awon. Unsa kaha kon mahitabo nga mangasaag ang ilang pamilya sa kamingawan hangtod sa hangtod?
Si Nephi gustong masayod sa iyang kaugalingon kon ang gisulti ni Lehi tinuod ba. Nag-ampo siya ug nangutana sa Ginoo.
Ang Ginoo mipadala sa Espiritu Santo aron matabangan si Nephi nga motuo sa mga pulong sa iyang amahan. Si Nephi mituo sa Ginoo ug mipakigbahin sa unsay iyang nakat-onan ngadto sa iyang mga igsoon. Si Sam naminaw kang Nephi ug mituo kaniya, apan si Laman ug Lemuel wala maminaw.