“Mosiah ug Zeniff,” Mga Sugilanon sa Basahon ni Mormon (2023)
Mosiah ug Zeniff
Gipanalipdan sa Ginoo
Ang mga Nephite ug mga Lamanite dunay daghang pakiggubat. Usa ka adlaw, ang Ginoo misulti ngadto sa usa ka Nephite nga ginganlan og Mosiah sa pagbiya sa yuta sa Nephi uban ang si bisan kinsa nga mosunod sa Ginoo.
Daghang Nephite ang mituman sa Ginoo ug mibiya kauban ni Mosiah. Ang Ginoo midala kanila ngadto sa yuta nga adunay mga tawo nga nagpuyo niini. Gitawag sila og mga tawo sa Zarahemla.
Ang katawhan sa Zarahemla naggikan usab sa Jerusalem dugay na. Nalipay sila nga ang Ginoo mipadala sa mga Nephite nga nagdala sa mga palid nga tumbaga. Ang katawhan ni Mosiah mitipon sa katawhan ni Zarahemla. Ang tanang katawhan mipili kang Mosiah isip ilang hari. Siya mitudlo kanila mahitungod sa Ginoo.
Ang mga Nephite nagpuyo sa Zarahemla sulod sa pipila ka panahon dihang ang dako nga pundok namalik sa yuta sa Nephi. Gipangulohan sila sa usa ka Nephite nga ginganlan og Zeniff.
Ang mga Lamanite karon nagpuyo sa yuta sa Nephi, mao nga nihangyo si Zeniff sa ilang hari kon ang iyang katawhan makapuyo ba usab didto. Ang hari miuyon.
Ang hari milipat ni Zeniff ug sa iyang katawhan. Gitugot niya nga makapuyo sila sa yuta sa Nephi aron makakuha siya sa pipila sa ilang pagkaon ug mga kahayopan sa dili madugay. Ang katawhan ni Zeniff namuyo didto nga malinawon sulod sa katuigan. Nagpatubo sila og daghang pagkaon ug dunay daghang hayop. Dayon ang mga Lamanite misulong ug misulay sa pag-ilog sa ilang pagkaon og mga hayop.
Gitudloan ni Zeniff ang iyang katawhan sa pagsalig sa Ginoo. Dihang ang mga Lamanite nangadto sa pagpakig-away kanila, si Zeniff ug ang iyang katawhan nag-ampo sa Ginoo. Gihatagan sila sa Ginoo og kusog ug mitabang sa pagpanalipod kanila. Nahimo nila ang paggukod sa mga Lamanite palayo. Ang Ginoo mipanalangin ni Zeniff ug sa iyang katawhan tungod sa ilang hugot nga pagtuo.