Jesus Mibisita sa Katawhan

Nagtabang sa matag tawo nga motuo diha Kaniya

usa ka pamilya nagtan-aw sa langit, ug ang uban nga mga tawo sa siyudad naglalis

Kadaghanan sa katawhan dili maminaw sa mga propeta sa Dios. Apan ang pipila ka mga tawo mituo sa unsay gitudlo sa mga propeta. Kini nga mga tumutuo nagpaabot alang sa mga timailhan sa kamatayon ni Jesukristo.

3 Nephi 7:16–26; 8:1–4

mga kilat, mga unos, mga baha, mga linog, ug mga sunog miguba sa usa ka siyudad

Human namatay si Jesus sa Jerusalem, nagsugod ang mga timailhan. Sa Amerika, dunay mga unos, mga linog, ug mga sunog sulod sa tulo ka oras. Mga siyudad nangaguba, ug daghang tawo ang nangamatay. Dihay hingpit nga kangitngit sulod sa tulo ka adlaw.

3 Nephi 8:5–19, 23

adunay tawo nga misulay sa pagdagkot og kalayo, apan kini dili mosiga ug ang tanan mangitngit

Ang kangitngit baga kaayo nga ang mga tawo dili makakita sa adlaw, bulan, o mga bituon. Dili gani sila makahaling og kalayo o mga kandila.

3 Nephi 8:20–23

mangitngit pa, ang mga tawo nagtinabangay sa usag usa nga makalingkawas sa naguba nga gambalay, ug usa ka tawo naghilak ug nag-ampo

Daghan sa mga tawo nga buhi pa nagguol ug nahadlok og maayo. Sila mihilak ug nagbasol nga wala sila maghinulsol dayon.

3 Nephi 8:24–25

mangitngit pa, ang mga tawo mihangad sa langit, ug ang tawo nga nag-ampo mihunong sa paghilak

Sa kalit lang, nakadungog sila og usa ka tingog. Si Jesukristo kadto ang namulong kanila. Misaad Siya nga ayohon ang tanan nga maghinulsol. Gisulti ni Jesus kanila nga Siya namatay ug nabuhi pag-usab aron sa pagtabang sa tanang katawhan. Ang mga tawo nahingangha og maayo nga sila mihunong sa paghilak. Dihay kahilom sa yuta sulod sa daghang mga takna.

3 Nephi 9; 10:1–2

ang mga pamilya nanglingkod nga nag-alirong ug nagpahiyom, ug dili na kadto mangitngit

Si Jesus namulong pag-usab. Misulti Siya sa mga tawo nga Siya motabang kanila kon sila mopili sa pagsunod Kaniya. Ang kangitngit mibiya, ug ang yuta mihunong sa pag-uyog. Ang mga katawhan malipayon ug midayeg ni Jesus.

3 Nephi 10:3–10

usa ka dakong pundok sa mga tawo nga nagpundok libot sa templo, ug sila mihangad sa langit samtang ang mangitngit nga mga panganod nagsugod sa pagpakita og kahayag

Mga usa ka tuig ang milabay, daghang tawo ang miadto sa templo sa yuta sa Bountiful. Naghisgot sila bahin ni Jesus ug sa mga timailhan sa Iyang kamatayon. Samtang nag-istoryahanay sila, nakadungog sila og hinay nga tingog nga naggikan sa langit. Sa sinugdanan, wala nila kini masabti. Unya nadungog nila kini pag-usab.

3 Nephi 8:5; 10:18; 11:1–4

Si Jesukristo mikunsad gikan sa langit, ug ang mga tawo malipayon ug mihangop Kaniya

Sa diha nga sila nakadungog sa tingog sa ikatulo nga higayon, sila mihangad ngadto sa langit. Kadto ang Langitnong Amahan nga namulong. Siya misulti sa katawhan sa pagtan-aw ug pagpaminaw sa Iyang Anak. Dayon ang mga tawo nakakita og usa ka tawo nga nagsul-ob og puti nga kupo nga mikanaog gikan sa langit.

3 Nephi 11:5–8

Si Jesukristo nagbarog sa taliwala sa mga katawhan, ug ang mga tawo miduol Kaniya ug mihikap sa mga marka sa lansang sa Iyang mga palad

Ang tawo mibarog taliwala sa mga katawhan ug miingon, “Ako si Jesukristo.” Ang katawhan mihapa sa yuta. Misulti si Jesus kanila nga Siya nag-antos ug namatay alang sa tanan. Iyang gidapit ang mga tawo sa paghikap sa mga marka sa Iyang mga kamot, mga tiil, ug kilid aron sila makahibalo nga Siya mao ang Manluluwas sa kalibotan.

3 Nephi 11:8–14

Si Jesukristo naglingkod diha sa mga ang-ang sa templo, ug ang katawhan miduol Kaniya ug mihikap sa mga marka sa lansang diha sa Iyang mga palad

Ang katawhan tagsa-tagsang miduol ngadto ni Jesus. Ilang nakita mismo sa ilang mga mata ug nabati mismo sa ilang mga kamot ang mga marka sa Iyang mga kamot, mga tiil, ug sa kilid. Silang tanan nasayod nga Siya mao ang usa nga gisulti sa mga propeta nga moabot. Nakahibalo sila nga Siya mao ang Manluluwas sa kalibotan. Ug ang katawhan mihapa sa tiilan ni Jesus ug misimba Kaniya.

3 Nephi 11:15–17