“Si Ishmael ug ang Iyang Pamilya,” Mga Sugilanon sa Basahon ni Mormon (2023)
Si Ishmael ug ang Iyang Pamilya
Pagkuyog sa panaw ngadto sa gisaad nga yuta
Ang pamilya ni Lehi ug ni Sariah nagpuyo nga sila ra sa kamingawan. Usa ka adlaw, gisultihan sa Ginoo si Lehi nga paadtoon ang iyang mga anak nga lalaki, nga si Laman, Lemuel, Sam, ug Nephi, ngadto sa Jerusalem. Gipaadto sila aron hangyoon si Ishmael ug ang iyang pamilya sa pagkuyog kanila. Kon magkauban sila ang ilang mga pamilya makapasanay og mga anak didto sa gisaad nga yuta.
Si Ishmael ug ang iyang pamilya gusto nga mosunod sa Ginoo. Mituo sila nga ang Ginoo gusto nga mokuyog sila sa pamilya ni Lehi ug Sariah. Gipili nila ang pagbiya sa Jerusalem ug makighimamat ni Lehi didto sa kamingawan.
Sa ilang pagbiyahe, dunay pipila ka tawo nga dili na gustong motuman. Gusto sila nga mobalik sa ilang panimalay. Gihangyo sila ni Nephi sa pagbaton og hugot nga pagtuo sa Ginoo.
Miingon si Nephi nga ang Ginoo makahimo sa bisan unsa kon sila adunay hugot nga pagtuo. Apan si Laman ug Lemuel nangasuko. Gigapos nila si Nephi ug gusto nga biyaan siya sa kamingawan.
Si Nephi nag-ampo alang sa tabang. Ang mga pisi nabadbad, ug si Nephi mibarog. Apan si Laman ug Lemuel gusto gihapon nga mopasakit kaniya. Usa sa mga anak nga babaye ni Ishmael mipanalipod ni Nephi. Ang iyang inahan ug usa sa iyang mga igsoong lalaki mipanalipod usab kaniya. Si Laman ug Lemuel naminaw kanila ug mihunong sa sulay nga pagpasakit ni Nephi.
Si Laman ug Lemuel mibati og kaguol tungod sa ilang nahimo. Gihangyo nila si Nephi nga pasayloon sila. Si Nephi mipasaylo sa iyang mga igsoong lalaki. Dayon si Laman ug Lemuel nag-ampo ug mihangyo sa Ginoo sa pagpasaylo kanila.
Tanan sila mipadayon sa ilang panaw ug nakaabot ngadto sa tolda ni Lehi ug Sariah. Sa kataposan, nagkauban na ang duha ka pamilya. Nagpasalamat sila sa Ginoo ug misimba Kaniya.