“Kapitan Moroni ug Zerahemnah,” Mga Sugilanon sa Basahon ni Mormon (2023)
Kapitan Moroni ug Zerahemnah
Usa ka gubat ug usa ka saad nga magpuyo sa kalinaw
Si Zerahemnah maoy lider sa kasundalohang Lamanita. Gusto niya nga magmando sa mga Nephita ug pasilbihon sila sa iyang katawhan. Si Zerahemnah nangulo sa iyang kasundalohan aron sa pagsulong sa mga Nephita.
Gusto sa mga Nephita nga panalipdan ang ilang mga panimalay, mga pamilya, ug relihiyon. Sila nakahibalo nga dili na sila mahimong mosimba sa Ginoo kon ang mga Lamanita mao na ang magmando kanila. Gipili sa mga Nephita nga mosukol sa ilang mga kaaway.
Usa ka tawo nga ginganlan og Moroni ang kapitan sa kasundalohang Nephita. Giseguro ni Moroni nga ang iyang kasundalohan andam nga makig-away.
Ang kasundalohan ni Moroni nagdala og mga hinagiban, ug gihatagan sila ni Moroni og lig-on nga taming ug mga panagang aron sa pagpanalipod kanila.
Gidala ni Moroni ang iyang kasundalohan aron makig-away sa mga Lamanita. Apan sa dihang nakita sa mga Lamanita nga ang mga Nephita adunay taming ug mga panagang, nahadlok sila nga makig-away. Ang mga Lamanita aduna lamang nipis nga mga sapot ug walay taming nga manalipod kanila.
Ang mga Lamanita mibiya. Misulay sila sa paglusot ngadto sa lahi nga yuta sa mga Nephita. Nagtuo sila nga dili mahibaloan ni Moroni kon asa sila miadto.
Apan sa pagbiya dayon sa mga Lamanita, mipadala og mga espiya si Moroni aron sundan sila.
Dayon si Moroni mipadala og mensahe ngadto ni propeta Alma. Gusto niya nga si Alma mangamuyo sa Ginoo kon unsa ang giplano nga buhaton sa mga Lamanita. Ang Ginoo misulti ni Alma nga ang mga Lamanita nagplano sa pagsulong sa usa ka huyang nga yuta nga gitawag og Manti. Naminaw si Moroni ni Alma. Siya nangulo sa iyang kasundalohan sa pagpakig-away batok sa mga Lamanita.
Ang kasundalohan nag-away. Ang mga Lamanita lig-on kaayo ug nasuko. Nahadlok ang mga Nephita sa mga Lamanita ug modagan na unta. Apan gipahinumdoman sila ni Moroni kabahin sa ilang mga pamilya ug pagtuo, mao nga nagpadayon sila sa pagpakig-away.
Ang mga Nephita midangop sa Ginoo alang sa tabang. Gitubag sa Ginoo ang ilang mga pag-ampo ug gihatagan sila og dakong gahom. Karon ang mga Lamanita nahadlok. Napalibotan sila ug dili na makaikyas. Sa dihang nakita ni Moroni nga nahadlok ang mga Lamanita, gisultihan niya ang iyang kasundalohan nga mohunong sa pagpakig-away. Dili gusto ni Moroni nga patyon ang mga Lamanita.
Gisultihan ni Moroni si Zerahemnah nga mahimong makabiya ang mga Lamanita kon mosaad sila nga dili na gayod makig-away pa sa mga Nephita. Nasuko si Zerahemnah ug misulay sa pagpadayon sa pagpakig-away, apan dili niya mapilde ang kasundalohan ni Moroni. Dayon si Zerahemnah ug ang iyang kasundalohan misaad nga magpuyo sa kalinaw, ug gitugotan sila ni Moroni nga mobiya.