“Jared ug ang Iyang Pamilya,” Mga Sugilanon sa Basahon ni Mormon (2023)
Jared ug ang Iyang Pamilya
Usa ka panaw nga gigiyahan sa Ginoo
Si Jared ug ang iyang pamilya nagpuyo sa Babel liboan ka tuig sa wala pa si Jesukristo natawo. Mituman sila sa Ginoo. Apan kadaghanan sa katawhan sa Babel wala motuman sa Ginoo. Kadto nga katawhan misugod sa pagtukod og tore aron mosulay sa pagkab-ot sa langit. Ang Ginoo miusab sa pinulongan sa katawhan aron sila dili magkasinabtanay sa usag usa.
Si Jared adunay usa ka igsoong lalaki. Ang Ginoo misalig sa igsoong lalaki ni Jared. Gihangyo ni Jared ang iyang igsoon sa pag-ampo ngadto sa Ginoo alang sa tabang. Sa iyang pag-ampo, ang igsoong lalaki ni Jared mihangyo sa Ginoo nga dili usbon ang pinulongan sa iyang pamilya ug mga higala. Nianang paagiha sila makasabot gihapon sa usag usa.
Ang Ginoo mahigugmaon ug mabination. Siya wala miusab sa pinulongan sa pamilya ug mga higala ni Jared. Sa kaulahian, ang Ginoo misulti sa igsoong lalaki ni Jared nga Siya nag-andam og usa ka espesyal nga yuta alang kanila. Ang Ginoo miingon nga Siya mogiya kanila didto.
Si Jared ug ang iyang igsoong lalaki mipundok sa ilang mga pamilya ug mga higala. Gipundok usab nila ang ilang kahayopan ug tanang matang sa mga binhi. Dayon mibiya sila sa ilang mga panimalay ug mibiyahe latas sa kamingawan. Ang Ginoo migiya kanila pinaagi sa pagpakig-istorya kanila gikan sa usa ka panganod.
Human mibiyahe og layo, sila miabot sa usa ka dagat. Sila mipuyo sa baybayon sulod sa upat ka tuig. Sulod sa taas nga panahon, ang igsoong lalaki ni Jared wala nag-ampo sa Ginoo.
Ang Ginoo misulti sa igsoong lalaki ni Jared sa pag-ampo og usab. Ang igsoong lalaki ni Jared naghinulsol ug nag-ampo ngadto sa Ginoo. Ang Ginoo mipasaylo kaniya.
Ang Ginoo mitudlo sa igsoong lalaki ni Jared sa pagtukod og mga barko nga gitawag og mga barge. Ang mga pamilya makasakay sa mga barge tabok sa dagat paingon ngadto sa gisaad nga yuta.
Ang igsoong lalaki ni Jared ug ang iyang pamilya mihimo og mga barge. Iyang nakita nga walay kahayag sa sulod sa mga barge. Nangutana siya sa Ginoo nga kon sila kinahanglan ba nga molawig latas sa dagat diha sa kangitngit. Ang Ginoo misulti sa igsoong lalaki ni Jared sa paghunahuna og usa ka paagi alang sa mga barko nga makabaton og kahayag.
Ang igsoong lalaki ni Jared naghimo og 16 ka gagmay, tin-aw nga mga bato. Siya mihangyo sa Ginoo sa paghikap niini ug himoon kini nga mohayag. Ang Ginoo mituy-od sa iyang kamot ug mihikap sa mga bato sa tagsa-tagsa sa Iyang tudlo. Ang igsoong lalaki ni Jared nakakita sa tudlo sa Ginoo. Nasurprisa siya nga ang Ginoo adunay lawas sama kaniya.
Ang Ginoo miingon nga ang igsoong lalaki ni Jared adunay talagsaong hugot nga pagtuo. Dayon ang Ginoo mitunga ug mipakita sa Iyang espiritu nga lawas ngadto sa igsoong lalaki ni Jared. Ang Ginoo miingon, “Ako si Jesukristo.” Siya miingon nga Siya mao ang gipili nga mahimong Manluluwas. Iyang gitudloan ang igsoong lalaki ni Jared og daghan pang mga butang.
Ang igsoong lalaki ni Jared mibalik ngadto sa iyang pamilya ug mga higala. Siya misulat kon unsa ang iyang nakat-onan samtang siya uban pa sa Ginoo. Gibutang usab niya ang mga bato diha sa mga barge. Sila karon aduna nay kahayag alang sa ilang panaw.
Ang mga pamilya misakay ngadto sa mga barge aron motabok sa dagat. Sila misalig sa Ginoo nga moatiman kanila. Dihay daghang mga unos ug mga balod. Adunay mga higayon, ang tubig hingpit nga mitabon sa mga barge. Apan sila nag-ampo, ug ang Ginoo mopabalik kanila sa ibabaw sa tubig. Sila nanganta og daghang kanta sa pagpasalamat sa Ginoo.
Pagkahuman sa hapit usa ka tuig, sila miabot sa yuta nga gisaad sa Ginoo ngadto kanila. Sila mihilak sa kalipay ug mipasalamat Kaniya.