“Hari Benjamin,” Mga Sugilanon sa Basahon ni Mormon (2023)
Hari Benjamin
Pagserbisyo sa katawhan ug sa Dios
Si Hari Benjamin propeta sa Dios nga nagmando sa yuta sa Zarahemla. Naningkamot gayod siya nga makaserbsiyo sa iyang katawhan ug matudloan sila mahitungod sa Dios. Uban sa tabang gikan sa ubang mga propeta sa Dios, si Benjamin nakahimo sa Zarahemla nga usa ka malinawon ug luwas nga dapit nga kapuy-an.
Mga Pulong ni Mormon 1:17–18; Mosiah 1:1–7
Si Benjamin tigulang na. Gihangyo niya ang iyang anak nga si Mosiah sa pagpundok sa katawhan. Si Benjamin gustong mosulti kanila nga si Mosiah ang mahimo nilang bag-o nga hari.
Daghang tawo ang nangabot gikan sa tibuok yuta. Gipahimutang nila ang ilang mga tolda duol sa templo sa pagpaminaw kang Benjamin.
Si Benjamin namulong gikan sa usa ka tore aron daghang tawo ang makadungog kaniya. Miingon si Benjamin nga ang Dios mitabang kaniya sa paggiya kanila. Isip hari, iya silang gitudloan sa pagsunod sa mga sugo sa Dios. Wala siya mokuha sa ilang kwarta o mopaserbisyo nila kaniya. Kondili, nagtrabaho siya aron makaserbisyo sa katawhan ug sa Dios.
Gisultihan ni Benjamin ang mga tawo nga kon moserbisyo sila sa usag usa, nagserbisyo usab sila sa Dios. Dayon giingnan niya sila nga ang tanan nga anaa kanila naggikan sa Dios. Agig balos, ang Dios gusto nga sila mosunod sa Iyang mga sugo. Dihang sila misunod, gihatagan sila sa Dios og dugang nga panalangin.
Si Benjamin misulti kanila nga dili na siya mahimo nilang hari o magtutudlo. Ang iyang lalaking anak nga si Mosiah mao na ang bag-o nilang hari.
Dayon si Benjamin misulti sa iyang katawhan nga usa ka anghel ang mibisita kaniya. Ang anghel miingon nga ang Anak sa Dios, si Jesukristo, moanhi sa yuta. Mohimo Siya og mga milagro ug moayo sa mga tawo. Mag-antos Siya og mga kasakit ug mamatay aron sa pagluwas sa tanang katawhan. Si Benjamin mitudlo nga si Jesus mopasaylo sa tanan nga dunay hugot nga pagtuo Kaniya ug maghinulsol.
Ang mga tawo mituo sa unsay gitudlo ni Benjamin kanila mahitungod ni Jesus. Nasayod sila nga kinahanglan silang maghinulsol. Ang tanang katawhan nag-ampo ug mihangyo sa Dios sa pagpasaylo kanila. Human sa ilang pag-ampo, ang Espiritu sa Dios anaa kanila. Mibati sila og kalipay ug nasayod nga ang Dios mipasaylo nila tungod sa ilang hugot nga pagtuo ni Jesus.
Ang katawhan mibati og lahi ug kabag-o sa sulod tungod kay aduna silay hugot nga pagtuo kang Jesus. Karon gusto silang mohimo og maayong mga butang sa tanang higayon. Mihimo sila og saad sa pagsunod sa mga sugo sa Dios sa nahibilin sa ilang kinabuhi. Kay sila mituo kang Jesus ug mihimo niini nga saad, gitawag sila nga katawhan ni Jesus.